NEBUZARADAN

[gikan sa Babilonyanhon, nga nagkahulogang “Si Nebo Naghatag ug Anak”].

Pangulo sa mga bantay ug dakodako sa kasundalohan ni Nabucodonosor nga nangulo sa aktuwal nga paglaglag sa Jerusalem niadtong 607 W.K.P. Lagmit wala si Nebuzaradan sa panahon sa unang paglikos ug paggawang sa Jerusalem, kay mga usa ka bulan pa sa ulahi nga siya “miadto sa Jerusalem,” human si Haring Zedekias gidala ngadto kang Nabucodonosor ug gibutaan.​—2Ha 25:2-8; Jer 39:​2, 3; 52:6-11.

Gikan sa gawas sa siyudad, gipangulohan ni Nebuzaradan ang mga Babilonyanhon sa paglaglag sa siyudad sa Jerusalem, nga nagsugod “sa ikapitong adlaw sa bulan” (ang ikalimang bulan sa Ab), ug naglakip sa pagkawat sa mga bahandi sa templo, pagguba sa paril, pag-atiman sa mga binihag, ug pagtugot sa pipila ka timawa nga magpabilin. (2Ha 25:8-20; Jer 39:8-10; 43:​5, 6; 52:12-26) Tulo ka adlaw sa ulahi, sa ikanapulo nga adlaw sa bulan, mopatim-awng si Nebuzaradan “misulod sa Jerusalem” (RS, JB) ug, human sa pagsusi, gisugniban ang balay ni Jehova ug giugdaw ang siyudad. (Jer 52:​12, 13) Si Josephus nag-ingon nga nianang adlawa usab, sa ikanapulo nga adlaw sa ikalima nga bulan, sa dihang gisunog ang templo ni Solomon, ang templo nga gitukod pag-usab ni Herodes gisunog usab, niadtong 70 K.P.​—The Jewish War, VI, 250 (iv, 5); VI, 268 (iv, 8); tan-awa ang AB.

Ubos sa mga sugo ni Nabucodonosor, gibuhian ni Nebuzaradan si Jeremias ug gipakitaan siyag kalulot, ug gipapili siya kon unsay buot niyang buhaton, nga mipasalig sa pag-atiman kaniya ug sa paghatag kaniya sa iyang mga kinahanglanon. Si Nebuzaradan mao usab ang tigpamaba sa hari sa Babilonya sa pagtudlo kang Gedalias ingong gobernador sa mga nahibilin. (2Ha 25:22; Jer 39:11-14; 40:1-7; 41:10) Mga lima ka tuig sa ulahi, sa 602 W.K.P., gidestiyero ni Nebuzaradan ang ubang mga Hudiyo, lagmit kadtong nangalagiw ngadto sa mga teritoryo sa palibot.​—Jer 52:30.