EVIL-MERODAK

[gikan sa Babilonyanhon, nga nagkahulogang “Magsisimba ni Marduk”].

Ang Babilonyanhong hari nga mipuli kang Nabucodonosor sa trono niadtong 581 W.K.P. Sa tuig sa iyang pagkahari, gipakitaan ug kalulot ni Evil-merodak si Jehoiakin nga hari sa Juda pinaagi sa pagpagawas kaniya gikan sa bilanggoan. Kadto maoy sa ika-37 nga tuig sa pagkadestiyero ni Jehoiakin sa Babilonya. Gihatagan siyag pabor ni Evil-merodak nga labaw sa tanang ubang mga hari nga nabihag sa Babilonya. (2Ha 25:27-30; Jer 52:31-34) Si Josephus miingon nga gilantaw ni Evil-merodak si Jehoiakin ingong usa sa iyang labing suod nga mga higala.

Adunay arkeolohikanhong pamatuod usab labot kang Evil-merodak (Awil-Marduk, Amil-Marduk). Pananglitan, ang usa ka inskripsiyon nga diha sa usa ka plorera nga nakaplagan duol sa Susa mabasa: “Ang palasyo ni Amil-Marduk, Hari sa Babilonya, anak nga lalaki ni Nabucodonosor, Hari sa Babilonya.” (Mémoires de la mission archéologique de Susiane, ni V. Scheil, Paris, 1913, Tomo XIV) Si Berossus, nga gikutlo ni Josephus, miingon nga siya naghari ug duha ka tuig. Si Josephus mismo miingon nga siya naghari ug 18 ka tuig. Gituohan nga namatay ingong resulta sa usa ka laraw, si Evil-merodak gipulihan ni Neriglissar (Nergal-sarezer). Walay kasaligang kompirmasyon niini nga mga detalye.