Mga Pangutana Gikan sa mga Magbabasa
◼ Sanglit sa sinugdan si Daniel miingong dili siya modawat ug mga gasa gikan kang Haring Belsasar tungod sa paghubad sa sinulat sa kamot sa bungbong, nganong siya nakitang nagsul-ob sa sapot ug kulentas human niadto?
Sa dayon nang pukanon sa mga taga-Media ug mga Persianhon ang Babilonya, si Haring Belsasar ug iyang korte diha sa tunga sa usa ka kombira. Panahon sa kombira, gikuha niya ang mga panudlanan nga kinuha sa templo ni Jehova ug gigamit sila sa pag-inom ug bino, nga gidayeg ang mga diyos sa Babilonya. Apan ang kombira kalit nabalda sa dihang ang labaw-tawhanon nga kamot nagsulat ug katingad-anang mga butang sa bungbong.—Daniel 5:1-5.
Ang mga tawong makinaadmanon ug mga astrologo sa Babilonya wala makahubad sa sinulat, bisan pag misaad si Belsasar nga mohatag ug kulentas nga bulawan ug pagkailado sa kagamhanan kang bisan kinsa nga makabasa ug makasaysay sa katingad-anang sinulat sa kamot.—Daniel 5:7-9.
Sa dihang ang Hebreohanon nga ginganlag si Daniel sa kataposan gipaanha, gisubli sa hari ang iyang tanyag—nga pasul-obon si Daniel sa sapot nga purpura, sab-ongan siya kulentas nga bulawas, ug himoon siyang ikatulong magmamando sa gingharian. Ang propeta halangdong mitubag: “Pasagdi nga ang imong mga gasa sa imong kaugalingon lamang, ug ang imong mga hatag ihatag sa uban. Bisan pa niana, akong pagabasahon ang sinulat mismo alang sa hari, ug ang hubad akong ipahibalo kaniya.”—Daniel 5:17.
Busa si Daniel dili kinahanglang hiphipan o bayran aron ihatag ang hubad. Ang hari makatago sa iyang mga gasa o makahatag niana ngadto sa lain. Ihatag ni Daniel ang katin-awan, dili tungod sa usa ka ganti, kondili kay siya gihatagag gahom sa paghimo niana ni Jehova, ang matuod nga Diyos, kansang paghukom sa Babilonya haduol na.
Samtang atong basahon ang Daniel 5:29, tapos mabasa ug mahubad ni Daniel ang mga pulong sumala sa iyang gisulti nga iyang himoon, ang hari nagmando nga igahatag gihapon kang Daniel ang mga ganti. Si Daniel dili mao mismo ang nagsul-ob sa sapot ug kulentas. Kadto gisul-ob kaniya sa mando sa absolutong magmamando, si Haring Belsasar. Apan kadto wala masupak sa Daniel 5:17, diin gitin-aw sa propeta nga ang iyang motibo dili hinakog.
Si Jesus sa ulahi miingon nga “siya nga nagadawat sa usa ka propeta tungod kay siya usa ka propeta makabaton sa ganti sa usa ka propeta.” (Mateo 10:41) Kana dili mapadapat kang Belsasar, sanglit siya wala magmaluluton o magmatinahoron kang Daniel tungod kay iyang gitahod ang maong matinuohong tawo ingong propeta sa matuod sa Diyos. Andam si Haring Belsasar sa paghatag sa samang mga gasa kang bisan kinsa nga makasulbad sa misteryo sa sinulat sa kamot, bisan pa sa paganong astrologo. Ang hari nakabaton sa tukmang balos, ang balos nga nahiuyon sa matagnaong sinulat sa bungbong: “Niadtong gabhiona mismo Belsasar ang Kaldeanhong hari gipatay ug si Dario nga taga-Media ang midawat sa gingharian.”—Daniel 5:30, 31.