“Ang mga Butang nga Gipadayag Atoa”

“Ang mga butang nga tinago iya ni Jehova nga atong Diyos, apan ang mga butang nga gipadayag atoa.”—DEUTERONOMIO 29:29.

1, 2. (a) Nganong dakog panginahanglan ang katawhan sa mga pinadayag ni Jehova? (b) Unsa ang angay natong tinamdan bahin sa impormasyon nga gihatag ni Jehova kanato?

KON makita sa tawo nga anaa siya sa tunga sa minahan apan adunay mapa nga nagapakita sa agianan taliwala sa minahan, imo bang mahanduraw ang iyang mainampingong pagtuon sa mapa ug sundon ang tanang direksiyon niini? O hunahunaa ang usa nga nag-antos sa dili maayong sakit. Imo bang mahanduraw ang iyang dakong kaikag sa pagsubay sa tanang labing ulahing mga diskoberiya sa medisina sa paglaom nga matukian ra ang tambal sa ulahi? Buweno, ang makasubong kamatuoran mao nga kita nahimutang niining duha ka kahimtang. Kita nagkinabuhi sa usa ka kalibotan nga puno sa mga laang ug mga lit-ag nga makalaglag kanato. Ug kita himalatyon sa tawhanon dili maayong sakit nga napanunod tungod sa pagkadili-hingpit. (1 Juan 2:15-17; Roma 7:20, 24) Ang Diyos lamang ang makatabang kanato sa pag-ila sa mga laang ug likayan sila, ug siya lamang ang may tambal sa atong pagkadili-hingpit. Maoy hinungdan nga nagkinahanglan kita sa mga pinadayag ni Jehova.

² Mao usab kanay hinungdan nga ang dinasig nga magsusulat sa basahon sa Proverbio mitambag: “Ikiling ang imong igdulongog ug pamatia ang mga pulong sa mga maalamon, aron imong ipadapat sa kinasingkasing ang akong kahibalo.” (Proverbio 22:17) Maingon man, atong mabasa ang Proverbio 18:15: “Ang kasingkasing sa mga masinabtanon magbaton sa kahibalo, ug ang igdulongog sa mga maalamon magapangita sa kahibalo.” Dili kita makaarang sa pagbulag sa bisan unsang kahibalo nga gitagana ni Jehova.

Ang Gipadayag nga mga Tinago ni Jehova

3. Unsang mga pinadayag sa iyang katuyoan ang gihatag ni Jehova kang Adan ug Eva?

³ Makalilipay, mahinatagon kaayo si Jehova sa pagpadayag sa kahibalo. Sukad sa panahon sa paglalang, ang Diyos sa anam-anam naghatag sa iyang mga magsisimba sa tanang impormasyon nga ilang gikinahanglan ilalom sa nagkalainlaing mga kahimtang. (Proverbio 11:9; Ecclesiastes 7:12) Sa sinugdan, siya mibatbat nga ang yuta ug ang nagapuyo niini nga kahayopan ug ang ilang mga anak magpasakop kang Adan ug Eva. (Genesis 1:28, 29) Apan, gidani ni Satanas si Adan ug Eva sa pagpakasala, ug malisod handurawon kon sa unsang paagi ang balaang katuyoan makab-ot alang sa kahimayaan sa Diyos. Apan, sa madali, misugod si Jehova sa pagsaysay sa mga butang. Siya mibutyag nga, sa ulahi, adunay motunghang usa ka matarong nga kaliwat, o “binhi,” nga mosanta sa mga buhat ni Satanas ug sa iyang mga sumusunod.​—Genesis 3:15.

4, 5. Unsang dugang butang ang gipadayag ni Jehova, ug kinsa ang mga alagianan nga iyang gigamit?

⁴ Ang mga mahadlokon sa Diyos nga mga lalaki ug babaye tingali adunay daghang mga pangutana bahin nianang maong Binhi. Kinsa siya? Kanus-a siya moabot? Sa unsang paagi makahatag siyag kaayohan sa katawhan? Sa milabay ang mga siglo, mihatag si Jehova ug dugang padayag bahin sa iyang mga katuyoan, ug sa ulahi iyang gitubag kining mga pangutanaha. Sa wala pa ang Lunop, iyang gidasig si Enoc sa pagtagna bahin sa umaabot nga kalaglagan sa binhi ni Satanas. (Judas 14, 15) Hapit 2,400 ka tuig sa wala pa ang atong Komung Panahon, iyang gipadayag kang Noe nga ang tawhanong kinabuhi ug dugo balaan​—usa ka kamatuoran nga mahimong labing bililhon inig-abot sa gisaad nga Binhi.​—Genesis 9:1-7.

⁵ Tapos sa mga adlaw ni Noe, si Jehova mipadayag ug bililhong impormasyon pinaagi sa ubang matinumanong mga patriarka. Sa ika-20ng siglo W.K.P., nahibaloan ni Abraham nga ang gisaad nga Binhi maoy usa sa iyang mga kaliwat. (Genesis 22:15-18) Kining saara nahimong bililhong kabtangan sa anak ni Abraham si Isaac ug sa apong si Jacob (sa ulahi ginganlag Israel). (Genesis 26:3-5; 28:13-15) Dayon, pinaagi kang Jacob, gipadayag ni Jehova nga kining maong Binhi, “Shilo,” mahimong gamhanong magmamando nga matawo sa banay sa iyang anak si Juda.​—Genesis 49:8-10.

6. Sa ika-16 nga siglo W.K.P., kinsa ang nahimong alagianan alang sa “mga butang nga gipadayag,” ug unsa ang pila ka bag-ong mga butang ang ilang nakat-onan?

⁶ Sa ika-16 nga siglo W.K.P., gihimo ni Jehova ang mga anak ni Isarel ingong usa ka nasod. Ngadto kang kinsa ang padayong pagpadayag sa kamatuoran gipanag-iya? Gitubag ni Moises kining pangutanaha niining mga pulonga ngadto nianang bag-ong nasod: “Ang mga butang nga tinago iya ni Jehova nga atong Diyos, apan ang mga butang nga gipadayag atoa ug sa atong mga anak sa walay kataposan.” (Deuteronomio 29:29) Oo, human nga natawo kini sa 1513 W.K.P., ang nasod sa Israel nahimong alagianan nga “gisaligan sa balaang mga pahayag sa Diyos.” (Roma 3:2) Ug pagkadaghan nga mga pahayag kadto! Giagak sa Diyos ang mga Israelitas ngadto sa pakigtugon sa Kasugoan, nga nagtanyag sa posibilidad sa ilang pagkahimong usa ka nasod sa mga saserdote ug mga hari. (Exodo 19:5, 6) Nasudlan ang Kasugoan ug lagda sa batasan nga nakatabang kanila sa pag-ila ug sa paglikay sa mga lit-ag sa sala ug usab sa sistema sa mga halad nga migamit sa balaang dugo sa mga mananap sa pagtabon sa ilang mga sala sa salingkapawng paagi.

7, 8. (a) Unsang dugang impormasyon ang gipadayag ni Jehova bahin sa umaabot nga Binhi? (b) Sa unsang paagi ang “mga butang nga gipadayag” natipigan, ug kinsa ang nagpadayag sa tukmang pagsabot niining mga butanga?

⁷ Sa milabay ang panahon, mihatag ug dugang mga pahayag si Jehova bahin sa Binhi. Pinaagi sa salmista, gipadayag ni Jehova nga dili dawaton sa nasod ang iyang Binhi ug nga ang Binhi modaog pinaagi sa tabang ni Jehova. (Salmo 2:1-12) Pinaagi kang Isaias, siya mibutyag nga ang Binhi mahimong “Prinsipe sa Pakigdait” ug nga antoson usab niya ang kasal-anan sa uban. (Isaias 9:6; 53:3-12) Sa ikawalong siglo W.K.P., gipadayag gani ni Jehova ang lugar nga matawhan sa Binhi ug, sa ikawalong siglo W.K.P., ang panahon sa iyang ministeryo.​—Miqueas 5:2; Daniel 9:24-27.

⁸ Sa ulahi, ang “mga butang nga gipadayag” nalakip sa 39 ka basahon sa Hebreohanong Kasulatan. Apan sa daghang mga hitabo, unang lakang lamang kadto. Ang mga butang nga gisulat kasagarang lisod sabton, bisan sa mga tawong gigamit sa pagsulat kanila! (Daniel 12:4, 8; 1 Pedro 1:10-12) Apan, sa miabot ang kadan-agan sa kataposan, wala kini magasalig sa tawhanong maghuhubad. Sama sa nahitabo sa matagnaong mga damgo, “ang mga paghubad iya sa Diyos.”​—Genesis 40:8.

Usa ka Bag-ong Alagianan

9. Nganong ang unodnong Israel nawad-an ug pribilehiyo sa pagkahimong alagianan sa “mga butang nga gipadayag,” ug kanus-a kini nahitabo?

⁹ Sa dinhi pa si Jesu-Kristo sa yuta, ang Israel mao gihapon ang alagianan sa Diyos. Ang tanan nga nagtinguha sa pag-alagad kang Jehova makahimo pinaagi sa iyang piniling nasod. (Juan 4:22) Apan gipakita ni Moises nga adunay kaakohan usab ang pribilehiyo sa pagkahimong mga piniyalan niining “mga butang nga gipadayag.” Siya miingon: “Ang mga butang nga gipadayag atoa ug sa atong mga anak sa walay tino nga panahon, aron pagatumanon ta ang tanang mga pulong niini nga kasugoan.” (Deuteronomio 29:29) Kaanang “walay tino nga panahon” miabot sa kataposan sa 33 K.P. Ngano? Tungod kay ingong nasod, napakyas ang mga Hudiyo sa ‘pagtuman sa tanang mga pulong sa kasugoan.’ Ilabina, sa ilang kapakyasan sa pagdawat sa Binhi, si Jesu-Kristo, bisan ug ang Kasugoan, sa pagkatinuod, maoy “magtutoltol ngadto kang Kristo.” (Galacia 3:24) Tungod niini nga kapakyasan, mipili si Jehova ug laing alagianan alang sa “mga butang nga gipadayag.”

10. Unsa ang bag-ong alagianan alang sa mga pinadayag ni Jehova?

¹⁰ Unsa kining bag-ong alagianan? Gipaila ni Pablo kini ngadto sa mga taga Efeso sa misulat siya nga “ikapahibalo pinaagi sa iglesya ang nagkadaiyang kinaadman sa Diyos, sumala sa walay kataposang katuyoan nga iyang giporma may kalabotan kang Kristo, Jesus nga atong Ginoo.” (Efeso 3:10, 11) Oo, kadto mao ang Kristohanong kongregasyon, nga natawo sa Pentekostes 33 K.P., nga gisaligan sa bag-ong “mga butang nga gipadayag.” Ingong usa ka grupo, ang dinihogang mga Kristohanon nag-alagad ingong “matinumanon ug maalamong ulipon” nga gitudlo sa pagtaganag espirituwal nga pagkaon sa tukmang panahon. (Mateo 24:45) Ang mga Kristohanon karon maoy “mga piniyalan sa balaang mga tinago sa Diyos.”​—1 Corinto 4:1.

11, 12. Unsa ang pila ka katingalahang mga pinadayag ang gihimo pinaagi niining bag-ong alagianan?

¹¹ Ang dugokang kamatuoran niining bag-ong “balaang mga tinago” mao nga si Jesu-Kristo, ang gisaad nga Binhi, mitungha. (Galacia 3:16) Si Jesus mao ang “Shilo,” ang usa nga may katungod sa pagmando sa katawhan, ug gitudlo ni Jehova siya nga mao Hari sa Gingharian nga sa kataposan maoy mopasig-uli sa Paraiso niining yutaa. (Isaias 11:1-9; Lucas 1:31-33) Si Jesus maoy tinudlong Hataas nga Saserdote ni Jehova, kinsa mihatag sa iyang maputli, hingpit nga kinabuhi ingong lukat alang sa katawhan​—ang labing katingalahang aplikasyon sa prinsipyo sa pagkabalaan sa dugo. (Hebreohanon 7:26; 9:26) Busa, ang may pagtuong katawhan adunay paglaom sa pagkabaton pag-usab nianang hingpit tawhanong kinabuhi nga giwala ni Adan.​—1 Juan 2:1, 2.

¹² Kining gisaad nga Binhi maoy usa usab ka tigpataliwala, sa iyang mga sumusunod ug sa iyang langitnong Amahan ug sa bag-ong pakigtugon nga maoy mipuli sa daang Kasugoan sa pakigtugon. (Hebreohanon 8:10-13; 9:15) Pinasukad niining bag-ong pakigtugon, ang bag-ong Kristohanong kongregasyon maoy mipuli sa nasod sa unodnong Israel, nga nahimong espirituwal nga Israel, usa ka espirituwal nga “binhi ni Abraham” lakip kang Jesus, ug sa mga piniyalan sa “mga butang nga gipadayag.” (Galacia 3:29; 6:16; 1 Pedro 2:9) Dugang pa​—usa ka butang nga dili gayod madawat sa mga Hudiyo​—gidapit ang mga Hentil nga mahimong bahin nianang bag-ong espirituwal nga Israel! (Roma 2:28, 29) Sa tingob, ang Hudiyohanon ug dili Hudiyohanong espirituwal nga mga Israelitas gisugo sa paghimog mga tinun-an ni Jesus sa tibuok yuta. (Mateo 28:19, 20) Busa, ang “mga butang nga gipadayag” nahimong internasyonal nga bahin.

13. Sa unsang paagi kining bag-ong “mga butang nga gipadayag” natipigan alang sa umaabot nga mga kaliwatan?

¹³ Sa ulahi, kining “mga butang nga gipadayag” girekord pinaagi sa Kristohanong kongregasyon diha sa 27 ka basahon sa Kristohanon Gregong Kasulatan nga nagpabug-os sa canon sa dinasig nga Bibliya. Dugang pa, nasulod niining mga basahona mao ang daghang mga tagna bahin sa katuyoan ni Jehova nga nasabtan sa bug-os diha na lamang sa milabay ang daghang kasiglohan. Sa makausa pa, ang mga magsusulat sa Kasulatan sa pagkatinuod nag-alagad sa mga kaliwatan nga wala pa matawo.

“Mga Butang nga Gipadayag” Karon

14. Pagkatapos sa dakong apostasiya, nganong si Jehova sa makausa pa mohatag kadan-agan sa “mga butang nga gipadayag”?

¹⁴ Tapos nangamatay ang mga apostoles, ang dakong apostasiya mitungha taliwala sa nagaangkong mga Kristohanon, sumala sa gitagna. (Mateo 13:36-42; Buhat 20:29, 30) Misunod ang hataas nga kasiglohan diin niining panahona ang pagsabot sa “mga butang nga gipadayag” mingitngit, apan wala biyai ni Jesus kadtong naninguha sa pagpabiling matinumanon. (Mateo 28:20) Apan, misaad si Jesus nga dili molungtad sa walay kataposan kining kahimtanga. Sa kataposan sa sistema sa mga butang, ang daotan ug ang matarong sa makausa pa makita nga lainon, ug ‘ang mga matarong mosidlak ingon sa adlaw sa gingharian sa ilang Amahan.’ (Mateo 13:43) Sumala sa gitagna ni Daniel, nga sa ‘panahon sa kataposan, ang tinuod nga kahibalo modagaya.’ (Daniel 12:4) Padan-agon pag-usab ang kahayag sa “mga butang nga gipadayag.”

15. Nganong ang mga relihiyon sa Kakristiyanohan napamatud-ang dili takos nga mahimong alagad sa alagianan alang sa labing bag-ong pagsabot sa “mga butang nga gipadayag”?

¹⁵ Sukad sa 1914, nagkinabuhi na kita sa panahon sa konklusyon niining sistemaha sa mga butang. Busa hinungdanon ang pagkahibalo kon unsay gigamit ni Jehova karon ingong alagianan niining bag-ong espirituwal nga kahayag. Sa pagkatinuod, wala niya gamita ang dagkong mga relihiyon sa Kakristiyanohan. Sila napamatud-an nga walay tinguha sa pagsalikway sa bakak nga mga pagtulon-an nga natigom sa panahon sa dakong apostasiya. Karon, ang kadaghanan sa ilang mga lider bug-os nga nakagamot sa ilang mga tradisyon ug mga doktrina nga tungod niana dili sila bukas sa bag-ong kahibalo, o nga midulot kanila ang pagkadili-matinuohon nga tungod niana gikuwestiyon nila bisan ang pagkadinasig sa Bibliya ug ang bili sa moral nga mga sukdanan niini.

16. Kinsa ang napamatud-ang modernong adlawng alagianan ni Jehova?

¹⁶ Si Jesus miingon nga ang Gingharian sa Diyos kuhaon gikan sa mga Hudiyo ug “ihatag kini ngadto sa usa ka nasod nga nagapamunga.” (Mateo 21:43) Sa unang siglo, nakita kini nga mao ang linghod nga Kristohanong kongregasyon sa espirituwal nga Israel. Karon, adunay usa lamang ka grupo ang nagapamunga sama niadtong sa unang kongregasyon. Kining espirituwal nga mga Israelitas maoy mga sakop sa “matinumanon ug maalamong ulipon” nga matang sa Mateo 24:45-47. Sama sa unang Kristohanon, kining modernong mga Kristohanon maisogong ‘nagapasidlak sa ilang kahayag.’ (Mateo 5:14-16) Sukad sa 1919, maisogon nilang gisugdan ang buluhaton sa pagsangyaw sa maayong balita sa Gingharian sa tibuok yuta alang sa pagpamatuod. (Mateo 24:14) Sanglit sila nakapamunga sa mga bunga sa Gingharian sa Diyos, dagayang gipanalanginan sila ni Jehova pinaagi sa “nagkadaiyang kaalam sa Diyos.”​—Efeso 3:10.

17, 18. Unsa ang mauswagong pagsabot ang gihimong posible ni Jehova pinaagi sa iyang modernong adlawng alagianan?

¹⁷ Busa, sa 1923 ang dakong tagna ni Jesus bahin sa karnero ug sa kanding nasabtan, ug naila nga hinukman na ang tibuok kalibotan. (Mateo 25:31-46) Sa 1925 nahimong mga maghuhupot ang yutan-ong mga alagad sa Diyos sa tukmang pagsabot sa Pinadayag kapitulo 12 ug natin-awan sa nahitabo sa tiniman-ang tuig sa 1914. Sa 1932 ang ilang pagsabot napasangkad pa ug dugang. Gibutyag ni Jehova nga ang mga tagna may labot sa pagpasig-uli sa mga Hudiyo ngadto sa Jerusalem wala magpunting sa unodnong Israel, nga dugay nang napamatud-ang dili matinumanon ug gisalikway, kondili ngadto sa espirituwal nga Israel, ang Kristohanong kongregasyon. (Roma 2:28, 29) Dayon sa 1935 ang natul-id nga pagsabot sa panan-awon ni Juan sa “dakong panon” sa Pinadayag kapitulo 7 nakabukas sa mga mata sa mga dinihogan ngadto sa dakong buluhaton sa pagpanigom nga anaa pa sa ilang unahan.​—Pinadayag 7:9-17.

¹⁸ Kini ang nakapukaw sa pag-uswag sa tibuok yutang buluhaton sa pagsangyaw, samtang ang pagtigom sa “mga butang sa yuta” sa kataposan nagapadayon sa madasigon. (Efeso 1:10) Sa 1939, samtang naggubatay ang Uropa, ang isyu sa neyutralidad gihatagan ug dugang katin-awan. Sa 1950 ang “mga prinsipe” sa Isaias 32:1, 2 tukmang gipaila. Sa 1962 ang tukmang pag-ila sa “labawng pamunoan” ug ang tukmang relasyon sa Kristohanon kanila mas nasabtan pa gikan sa “mga butang nga gipadayag.” (Roma 13:1, 2) Ug sa 1965 miabot ang mas tin-awng pagsabot sa yutan-ong pagkabanhaw ug sa magapahimulos unya niana.​—Juan 5:28, 29.

19. Sa unsang paagi ang “ulipon” nga matang ni Jehova karon napamatud-ang takos nga tigtipig sa Pulong sa Diyos?

¹⁹ Dugang pa, ang dinihogang Kristohanong kongregasyon niining ika-20ng siglo napamatud-an nga mao ang tukmang tigtipig sa Pulong sa Diyos, ang sinulat nga kompilasyon sa “mga butang nga gipadayag.” Ang mga hawas sa mga membro niining kongregasyona mihimog paghubad sa Bibliya sa modernong Ingles, ug, sa karon, ang New World Translation of the Holy Scriptures migula sa 11 ka pinulongan, ug nakaprintang 40,000,000 ka kopya. Ang “ulipon” nga matang sa dinihogang mga Kristohanon nanguna usab sa internasyonal nga mga programa sa pagpanudlo ug nagaprintag tun-anang mga libro ug mga magasin nga binase sa Bibliya. Kini nag-organisar ug senemanang mga tigom, regular nga mga asembliya, ug nagkalainlaing mga tunghaan​—ang tanan gidesinyo sa pagtabang sa mga tigpangitag kamatuoran nga makabaton ug tukmang kahibalo sa “mga butang nga gipadayag.” Sa pagkatinuod, “ang mga matarong” karon “mosidlak ingon sa adlaw” sa espirituwal nga diwa, nga nagapamatuod nga takos sa ilang pagkapiniyalan.​—Mateo 13:43.

Ang Atong Responsabilidad

20, 21. (a) Sa unsang paagi napukaw ang salmista sa paglihok sa gipadayag nga Pulong ni Jehova? (b) Unsang mga butanga ang hisgotan sa sunod nga artikulo?

²⁰ Busa wala kita pasagdi ni Jehova nga mabara diha sa minahan niining kalibotana. Hinunoa, iya kitang gihatagan sa iyang Pulong sa pagdan-ag sa atong dalan ug tabangan kita nga makalikay sa espirituwal nga kadaot. (Salmo 119:105) Ug wala usab kita pasagdi ni Jehova nga mamatay sa sala ug sa pagkadili-hingpit. Hinunoa, iyang gibuksan ang higayon sa walay kataposang kinabuhi sa usa ka paraisong yuta ug gihimo ang kahibalo bahin niining higayona nga daling mabatonan. (Juan 17:3) Dili ikatingala ang salmista, nga naghisgot sa “mga butang nga gipadayag” sa iyang adlaw, miingon: “Oh hilabihan ang paghigugma ko sa imong kasugoan! Kini ang akong gipalandong sa tibuok nga adlaw.”​—Salmo 119:97.

²¹ Ingon ba niini ang imong pagbati bahin sa “mga butang nga gipadayag” ni Jehova ug nasabtan sa atong adlaw? Dulot ba nimong ginaapresyar ang mga kamatuoran sa pagtabang kanimo sa pahimog mga desisyon, sa paglikay sa mga tintasyon, ug sa pag-alagad kang Jehova? Pilay imong ginagugol nga panahon sa aktuwal nga pagbasa ug pagtuon niining “mga butang nga gipadayag”? Aduna bay paagi nga imong mapauswag ang imong batasan sa pagtuon? Kining mga butanga hisgotan sa sunod nga artikulo.

Makahinumdom Ka Ba?

◻ Sa wala pa ang panahon ni Jesus, unsa ang ubang mga alagianan alang sa “mga butang nga gipadayag”?

◻ Kinsay nakapanag-iya sa “mga butang nga gipadayag” tapos sa 33 K.P.?

◻ Unsa ang pila ka hinungdanong mga pinadayag ang gihimo pinaagi niining bag-ong alagianan?

◻ Nganong ang espirituwal nga mga Israelitas mao ang may katungod sa pagpanag-iya sa mga “mga butang nga gipadayag” karon?

◻ Sa unsang paagi ang dinihogang Kristohanong kongregasyon napamatud-ang takos nga tigtipig sa Pulong ni Jehova?

[Blurb sa panid 12]

Ang dinihogang Kristohanong kongregasyon nahimong bag-ong mga tigtipig sa mga pinadayag ni Jehova

[Blurb sa panid 13]

Ang “ulipon” nga matang sa dinihogang mga saksi ni Jehova nakaalagad ug maayo ingong tigtipig sa Pulong sa Diyos

[Hulagway sa panid 10]

Gipadayag ni Jehova ang hinungdanong kahibalo pinaagi sa matinumanong mga tawo sa karaan