GOMER

1. Apong lalaki ni Noe ug unang ginganlan nga anak nga lalaki ni Japet, nga natawo human sa Lunop. (Gen 10:​1, 2; 1Cr 1:​4, 5) Siya ug ang iyang mga anak nga lalaki nga si Askenaz, Ripat, ug Togarma, gitala lakip sa “mga banay sa mga anak nga lalaki ni Noe sumala sa ilang mga kagikan sa banay” nga gikan kanila ang kanasoran mikaylap human sa Lunop.​—Gen 10:​3, 32.

Ang nasod nga naggikan kang Gomer gilangkit sa kasaysayan sa karaang mga Cimerianhon, usa ka Aryan nga rasa nga lagmit nanimuyo sa rehiyon sa A sa Itom nga Dagat. Sa ikawalong siglo W.K.P., sa panahon sa paghari sa Asiryanhon nga si Haring Sargon, lagmit nga giabog sila sa mga Sityanhon tabok sa Caucasus (ang bukirong rehiyon taliwala sa Itom nga Dagat ug sa Dagat Caspian). Ang mga Cimerianhon nangharos sa Asia Minor, nga miatake sa gingharian sa Urartu (Ararat) ug misulod sa sidlakang Asia Minor, diin ang Armenianhong ngalan alang sa Capadocia, ang Gamirkʽ, sa walay duhaduha nagpabanaag sa ilang pagsulong. Kay giatubang sa kusganong Imperyo sa Asirya sa S, ang mga Cimerianhon mipaingon sa kasadpan ug nakiggubat sa mga Frigiahanon ug sa mga Lydianhon. Sa kataposan sila gipapahawa gikan sa Lydia sa Lydianhon nga si Haring Alyattes (ang gisundan ni Croesus).

Ang tagna ni Ezequiel (ang pagsulat niini lagmit nakompleto sa mga 591 W.K.P.) mahitungod sa pag-atake ni “Gog sa yuta sa Magog” batok sa natigom pag-usab nga katawhan ni Jehova nagtala sa ‘Gomer ug sa tanang pundok niini’ ingong lakip sa kasundalohan ni Gog uban sa Togarma ‘sa kinalay-ang mga bahin sa amihanan, ug sa tanang pundok niini.’​—Eze 38:2-8; tan-awa ang GOG Num. 2; MAGOG Num. 2; TOGARMA.

2. Ang anak nga babaye ni Diblaim kinsa nahimong asawa ni Oseas sumala sa mga instruksiyon ni Jehova sa maong manalagna. (Os 1:​2, 3) Human niadto si Gomer nanganak ug tulo ka anak, kansang makahuloganong mga ngalan gigamit sa Diyos sa pagtagna sa makatalagmanong mga sangpotanan sa espirituwal nga pagpanapaw sa Israel pinaagig idolatriya. Sa pag-asoy sa pagkahimugso sa unang anak, usa ka anak nga lalaki nga ginganlag Jezreel, ang asoy nag-ingon nga si Gomer “nanganak kaniya [Oseas] ug usa ka lalaki.” Apan, maylabot sa pagkahimugso sa misunod nga duha ka anak, wala hisgoti ang manalagna ingong mao ang amahan, ug kini ang gibasehan sa pag-isip nga sila lagmit mga anak sa gawas. (Os 1:3-9) Ang Oseas 3:1-3 mopatim-aw nga naghubit kang Gomer nga nahibalik ngadto sa manalagna gikan sa iyang pagkamananapaw, nga gipalit sama sa usa ka ulipon, sa ingon nag-ilustrar sa Israel nga gidawat pagbalik sa Diyos pinasukad sa ilang paghinulsol.