ADMA

[Yuta].

Usa sa lima ka siyudad sa rehiyon sa “Ubos nga Patag sa Sidim” nga gipuy-an sa mga Canaanhon. (Gen 10:19; 14:1-3) Kining ubos nga patag, o walog, lagmit haduol sa habagatang tumoy sa Dagat sa Asin.

Uban sa silingang mga siyudad sa Sodoma, Gomora, Zeboiim, ug Bela (Zoar), ang Adma ug ang hari niini nga si Sinab nakaagom ug kapildihan sa dihang misulong ang upat ka hari sa sidlakan. (Gen 14:8-11) Ang Deuteronomio 29:23 nagpakita nga sa ulahi ang Adma gilaglag lakip sa Sodoma, Gomora, ug Zeboiim sa dihang si Jehova nagpaulan ug kalayo ug asupre diha sa tibuok dal-as. (Gen 19:25) Sa Oseas 11:8 kini gihisgotan uban sa Zeboiim ingong usa ka pasidaang panig-ingnan.

Daghang eskolar ang nagtuo nga ang orihinal nga mga dapit sa Adma ug ang ubang “mga siyudad sa Distrito” nahimutang karon ilalom sa katubigan sa Dagat sa Asin, bisan tuod nga ang uban nag-ingon sa dili pa dugay nga ang mga kagun-oban sa mga siyudad lagmit mao ang mga lugar ubay sa mga lugot dapit sa S ug sa HS sa Patayng Dagat.​—Gen 13:12.