BET-AVEN

[Balay sa Pagkamadaoton (Makadaot)].

1. Usa ka lungsod sa teritoryo sa tribo ni Benjamin, duol sa karaang siyudad sa Ai. (Jos 7:2; 18:​11, 12) Nahimutang kini sa kamingawan dapit sa S sa Bethel ug sa K sa Mikmas, ug kini gihisgotan labot sa talagsaong pakiggubat ni Saul ug Jonatan sa dihang ilang giparot ang mga Filistehanon didto sa siyudad sa Mikmas.​—1Sa 13:5; 14:23.

2. Sa pagbakho tungod sa pagkahitumpawak sa Israel sa idolatrosong mga buhat sa iyang panahon, ang manalagna nga si Oseas naghisgot sa Bet-aven uban sa Gibea ug Rama, laing iladong mga siyudad sa Benjamin. (Os 4:15; 5:8; 10:​5, 8) Mopatim-aw nga kining ngalana gigamit sa manalagna diha sa mabiaybiayong diwa ngadto sa siyudad sa Bethel, nga sa usa ka panahon nahimong usa ka ‘balay sa Diyos’ apan nianang tungora nahimo nang usa ka ‘balay sa kon unsay makadaot’ tungod sa gihimo didto nga pagsimba sa nating baka.​—1Ha 12:28-30.