CALNE

1. Usa ka siyudad nga gitukod ni Nimrod sa yuta sa Sinar. (Gen 10:10) Dayag nga kini nahimutang sa habagatang Mesopotamia, apan ang lokasyon dili matino. Ang Nippur, usa ka karaang siyudad sa Babilonya nga mga 85 km (50 mi) sa HS sa Babilonya, dugay nang gituohan nga mao ang nahimutangan niini, sumala sa tradisyong Talmud ug sa uban pang mga hinungdan. Apan, ang pipila ka eskolar mas nagtuo nga kini mao ang Kulunu, ang unang ngalan sa usa ka siyudad nga prominente duol sa Babilonya. Ang ikatulong posibilidad mao ang kaluha nga siyudad sa Kis nga gitawag ug Hursagkalama, ang ulahing bahin sa ngalan (-kalama) gituohan nga nagtumong sa Calne. Ang ubang mga hubad (RS, JB, NE) naghubad sa Calne, dili ingong usa ka ngalan sa dapit, kondili ingong prase nga “kining tanan” mao nga ang teksto mabasa, “ang Babel, Erek, ug Acad, kining tanan sa yuta sa Sinar.” Apan, kini nagkinahanglan ug kausaban sa marka para sa bokales diha sa Masoretikong teksto.

2. Usa ka dapit nga gihisgotan sa manalagnang si Amos, lakip sa mga siyudad sa Hamat ug Gat, sa dihang siya nagpasidaan sa katawhan sa Israel ug sa Juda bahin sa umaabot nga katalagman. (Am 6:2) Bisag ang ubang komentarista nag-isip niini nga mao ra ang Num. 1, ang kadaghanang eskolar naglantaw nga ang paglakip niini uban sa Hamat ug Gat nagpaila nga kini usa ka dapit diha sa rehiyon nga kasikbit sa sidlakang bahin sa Dagat Mediteranyo, inay nga sa Mesopotamia. Sila nagtuo nga kini mao ang Kullani sumala sa Asiryanhong mga inskripsiyon sa amihanang Sirya (dayag nga mao karon ang modernong Kullan Köy, mga 16 km [10 mi] sa HS sa Arpad), nga gihisgotan ni Tiglat-pileser III ingong lakip sa mga dapit nga gisakop sa panahon sa Asiryanhong pagsulong sa kasadpan. Kon husto kini nga pag-ila, nan ang Calne dinhi lagmit mao ra ang Calno sa Isaias 10:9.