Mga Pagtulon-an Gikan sa Kasulatan: Abdias 1-21

Mga Pasidaan sa Diyos nga Nagaapektar Kanimo

“SIYA nga nagahilabot kaninyo nagahilabot sa kalimutaw sa akong mata.” (Zacarias 2:8) Kadtong tilimad-ong mga pulong nagbarog ingong mensahe sa pagpasidaan sa tanan: Si Jehova nagapaniid sa paagi sa pagtratar sa mga nasod sa iyang katawhan. Apan, unsay mahitabo sa usa ka nasod nga dili manumbaling sa pasidaan sa Diyos ug madaotong magatandog sa katawhan sa Diyos? Ang labing mubong basahon sa Hebreohanong Kasulatan, ang Abdias, nagatubag.

Katalagman sa Edom

Walay makaikyas sa paghukom ni Jehova. Ang tagna ni Abdias, nga gipahayag sa mga 607 W.K.P., nagtagna sa pagpalagpot sa mga Edomhanon gikan sa ilang nasod bisan pa sa ilang daw malig-ong posisyon sa itaas sa “taliwala sa mga bitoon.” Ug bisan pa wala ipadayag ang personal nga kinabuhi niining magsusulat sa Bibliya, siya nagkinabuhi sumala sa kahulogan sa iyang ngalan, “Alagad ni Jehova.” Sa unsang paagi? Pinaagi sa pagmantala sa malaglagong paghukom. Inigkahulog sa Edom, siya bug-os nga lungkabon sa iyang mga higala nga nagpakigtugon kaniya. Bisan ang iyang maalamon ug mga gamhanan dili maluwas.​—1-9.

Ang Diyos nagpadalag katalagman sa mga tawong sad-an sa kapintasan batok sa iyang katawhan. Unsay hinungdan sa kalaglagan sa mga Edomhanon? Ang masubsob nga mga buhat sa kapintasan batok sa mga anak ni Jacob, nga ilang mga igsoon. Ingong mga kaliwat ni Esau, ang mga Edomhanon kadugo sa mga Israelinhon. Bisan pa, sila gisumbong nga nanglungkab sa ilang kabanay, madaotong nalipay sa pagkahulog sa Jerusalem, ug gitapos kini pinaagi sa pagtugyan sa mga nangaluwas ngadto sa kaaway. Busa, gitimrihan sa Edom ang iyang kalaglagan.​—10-16.

Ang Balay ni Jacob Gitukod Pag-usab

Ang mga saad ni Jehova kanunay nga kasaligan. Sa mga adlaw ni Abdias, si Jehova naghatag pasalig nga ang Iyang katawhan makapanag-iyag balik sa ilang yuta ug wala nay makapanag-iya niini pag-usab. Dili na mabahin pa ang Israel. Ang balay ni Jacob, ang duha-ka-banay nga gingharian sa Juda, magkahiusa uban sa balay ni Jose, ang napulo-ka-banay sa amihanang gingharian, sa paglamoy sa Edom sama sa pag-ugdaw sa kalayo sa dagami ug sa pag-okupar sa teritoryo sa Edom. Gitapos uban ang makadasig nga diwa, si Abdias miingon nga ang nahibalik nga mga Israelinhon magkahiusa sa pagsimba sa ilang Diyos ug mahimong iyang mga ginsakpan. Sa pagkatinuod, ang pagkahari mahimong iya ni Jehova.​—17-21.

Leksiyon karong adlawa: Ang pagsalikway sa mga pasidaan mosangpot ug makadaot nga bunga. Busa, ang tumang pasidaan ni Abdias sa Edom angay managingting sa mga dalunggan sa modernong-adlawng mga magsusupak sa Diyos: Kadtong kinsa nakig-away batok kang Jehova ug sa iyang katawhan bug-os nga laglagon sa walay-kataposan.

Mga Pagtulon-an Gikan sa Kasulatan: Jonas 1:1–4:11

LIKAYI ang kalaglagan! Dawata ang kaluoy! Sa unsang paagi? Pinaagi sa pagpamati sa leksiyon sa usa ka tinuod nga sugilanon nga kapin na sa 2,800 ka tuig​—ang basahon ni Jonas. Gisulat sa mga 844 W.K.P. pinaagi ni manalagnang Jonas sa Galilea, kini puno sa espirituwal nga kaalam.

Si Jonas Milayas

Kinahanglan mosalig kita kang Jehova nga motabang kanato diha sa iyang pag-alagad. Apan, si Jonas mikalagiw sa hinatag-sa-Diyos nga buluhaton inay sa pagsalig kang Jehova nga motabang kaniya. Tinuod, dili masayon ang iyang tinudlong-buluhaton. Kinahanglang iyang pasidan-an ang makauulawng daotang Ninive bahin sa balaang kalaglagan. Apan milakaw si Jonas sa laing direksiyon, misakay ug barko paingon sa Tarsis, Espanya na karong adlawa. Sa pagpaingon didto, mikusog ang bagyo diin imposibleng maluwas ang barko ug ang mga tripulante. Si Jonas mitug-an, siya gihulog sa mga sakayanon sa dagat, ug milinaw ang dagat. Gitukob si Jonas sa usa ka dakong isda.—1:1-17.

Ang alagad sa Diyos makasalig nga iyang tubagon ang ilang mga pag-ampo. Diha sa sulod sa isda, nangayo si Jonas kang Jehova ug tabang, mainampoong nagpasalamat kang Jehova sa kaluwasan gikan sa tubigong lubnganan, ug nanumpa nga motuman sa iyang gisaad. Sa ulahi, siya gibuga diha sa mamala nga yuta.—2:1-10.

Si Jonas Miadto sa Ninive

Ayaw gayod likayi ang tinudlong-buluhaton nga gikan kang Jehova. Tingali nakakat-on sa iyang leksiyon, ang nagpanuko niadto nga manalagna misangyaw sa “dakong siyudad.” Gipalanog ni Jonas ang yano apan maugdang nga pasidaan: “Kap-atan na lamang ka adlaw, ug ang Ninive pagalaglagon.” Diha sa labing tagsaong bali sa mga hitabo, ang Ninive naghinulsol ug nakalikay sa kalaglagan.—3:1-10.

Ang tawo dili makapugong sa kaluoy sa Diyos. Si Jonas nasuko tungod kay wala laglaga ang Ninive. Apan pinaagi sa usa ka tanom, gitudloan ni Jehova si Jonas ug leksiyon nga Siya mopakitag kaluoy sumala sa Iyang kaugalingong kalipay.​—4:1-11.

Pagtulon-an alang karon: Ang katalagman mapugngan pinaagi sa pagpamati sa tagna sa Diyos! Sunda ang mga taga Ninive. Patalinghog nga mapaubsanon kang Jesu-Kristo, nga mas dakong manalagna kay kang Jonas.—Lucas 11:32.

[Kahon sa panid 30]

MGA TEKSTO SA BIBLIYA GISUSI

o—Sa panahon sa Bibliya, ang pakigsalo sa “pagkaon” uban sa usa ka tawo maoy usa ka pakigtugon sa panaghigala. Pagkabaliskad! Ang mga Babilonyanhon, “mga tawo nga nakigtugon” uban sa mga Edomhanon maoy ilang mga maglalaglag. Matuod, ang mga Babilonyanhon sa mga adlaw ni Nabucodonosor nagtugot sa Edom sa pakig-ambit sa mga inagaw sa gubat diha sa Juda human nga nahimong kagun-oban ang Jerusalem. Apan giputol sa ulahi nga hari sa Babilonya nga si Nabonidos ang komersiyal ug negosyong mga ambisyon sa Edom.

o 10—Ang Edom gihukman nga “pagaputlon sa walay-kataposan” tungod sa pagdumot ug pagkakulag kinaiyanhong pagmahal sa iyang igsoong nasod, “ang mga anak sa Juda.” (Bersikulo 12) Kini nga pagpuo sa nasod nagkahulogan nga ang Edomhanong estado nga may kagamhanan ug populasyon diha sa espisipikong geograpikal nga lugar mahanaw sa nawong sa yuta. Karong adlawa, walay mailhang katawhan sa Edomhanong nasyonalidad; sila “mahimo nga daw sila wala gayod maglungtad.”​—Bersikulo 16.

[Kahon sa panid 31]

MGA TEKSTO SA BIBLIYA GISUSI

o 1:17—Tungod sa pagkadakog ulo ug tutunlan, ang sperm whale (usa ka klase sa balyena) makahimo sa pagtukob ug tawo. Bisan pag talagsa ra ang mga balyena sa Mediteraneo, ang mga magbabalyena tigdunggo sa Jopa niadto. Ang usa ka isda nga nahibaloang tigsunod ug mga barko sa Mediteraneo ug mokaon ug bisan unsa nga ilabay sa dagat mao ang dakong white shark. Kini makatukob usab ug tibuok nga tawo. Sa kaso ni Jonas, hinunoa, gigamit sa Diyos ang “usa ka dakong isda,” tingali usa ka linalang nga wala-hiilhi sa modernong siyensiya.

o 2:1,2—Siyempre dili maayo ang mga kahimtang ni Jonas sa paghimog balak samtang diha sa “tiyan sa isda.” Apan iyang girekord sa ulahi ang iyang kasinatian. Gikan sa kailadman sa iyang kasingkasing mitungha ang mga pulong nga nagpalanog niadtong anaa sa Salmo nga nagpahayag sa iyang mga pagbati.​—Itandi ang 2:2 diha sa Salmo 120:1 ug 130:1; 2:5 diha sa Salmo 69:1.

o 3:3—Ang gidak-on sa Ninive dili paghingapin. Bisan pa nga ang mga kuta nga naglibot niini maoy 13 ka kilometros sa nagliyong utlanan, ang ngalan sa siyudad tatawng nag-apil sa mga banika niini, nga dunay distansiya nga 42 ka kilometro.

o 3:10—Ang Hebreohanong pulong nga gihubad “nagbasol” nagkahulogan ug “kausaban sa hunahuna bahin sa nangagi (o giplanong) buhat.” Busa, si Jehova “mibatig pagbasol” o nagbag-o sa iyang hunahuna bahin sa pagpakanaog ug silot sa makasasalang mga tawo sa dihang sila tinuod nga maghinulsol.