Ipahimaya sa Tanan si Jehova!

“Sa rehiyon sa kahayag kinahanglang himayaon nila si Jehova.”—ISAIAS 24:15.

1. Giunsa pag-isip ang ngalan ni Jehova sa iyang mga propeta, nga maoy lahi sa unsang tinamdan sa Kakristiyanohan karong adlawa?

JEHOVA—ang madungganong ngalan sa Diyos! Dako kaayo ang kalipay sa matinumanong mga propeta sa kanhiay inighisgot sa maong ngalan! Uban sa kalipay sila naghimaya sa ilang Soberanong Ginoo, si Jehova, kansang ngalan nagpaila nga siya maoy Dakong Tigtuyo. (Isaias 40:l5; Jeremias 10:6, 10; Ezequiel 36:23) Bisan ang gitawag nga gagmayng mga propeta mapadayganon kaayo sa paghimaya kang Jehova. Usa kanila mao si Haggeo. Sa basahong Haggeo, nga gilangkoban ug 38 lamang ka bersikulo, gigamit ug 35 ka beses ang ngalan sa Diyos. Ang maong tagna walay lami nga pamation kon ilisan ang bililhong ngalang Jehova sa titulong “Ginoo,” sumala sa paghubad niana sa labing hawod nga mga apostoles sa Kakristiyanohan diha sa ilang mga hubad sa Bibliya.—Itandi ang 2 Corinto 11:5.

2, 3. (a) Sa unsang paagi natuman ang usa ka talagsaong tagna mahitungod sa pagpasig-uli sa Israel? (b) Unsang pagmaya ang giambitan sa Hudiyong nahibilin ug sa ilang mga kauban?

² Sa Isaias 12:2, gigamit ang duha ka porma sa ngalan.a Ang propeta nagpahayag: “Tan-awa! Ang Diyos mao ang akong kaluwasan. Ako magasalig ug dili mahadlok; kay si Ja Jehova mao ang akong kusog ug ang akong gahom, ug siya nahimong akong kaluwasan.” (Tan-awa usab ang Isaias 26:4.) Sa ingon, mga 200 ka tuig una pa pagawsa ang Israel gikan sa pagkaulipon sa Babilonya, pinaagi sa iyang propetang si Isaias si Ja Jehova mihatag sa pasalig nga siya mao ang ilang gamhanang Manluluwas. Ang maong pagkaulipon milungtad gikan sa 607 hangtod 537 W.K.P. Si Isaias misulat usab: “Ako, si Jehova, nagbuhat sa tanang butang, . . . ang Usa nga nag-ingon bahin kang Ciro, ‘Siya mao ang akong magbalantay, ug ang tanan nga akong gikahimut-an iyang tumanon sa bug-os’; bisan sa akong gipamulong bahin sa Jerusalem, ‘Siya pagatukoron pag-usab,’ ug bahin sa templo, ‘Ang patukoranan imong ipapahimutang.’” Kinsa ba ang maong Ciro? Katingalahan, siya mao si Haring Ciro sa Persia, kinsa nagpukan sa Babilonya sa 539 W.K.P.—Isaias 44:24, 28.

³ Ingong katumanan sa mga pulong ni Jehova nga gitala ni Isaias, si Ciro miluwat ug sugo ngadto sa binihag nga Israel: “Bisan kinsa sa inyong taliwala sa tibuok niyang katawhan, hinaot ang iyang Diyos magauban kaniya. Busa patungasa siya ngadto sa Jerusalem, nga atua sa Juda, ug ipatukod pag-usab ang balay ni Jehova nga Diyos sa Israel​—siya mao ang matuod nga Diyos​—nga atua didto sa Jerusalem.” Ang nagmaya pag-ayong Hudiyong nahibilin nga gikuyogan sa di-Israelinhong Netinim ug sa mga anak sa mga sulugoon ni Solomon mibalik sa Jerusalem. Sila nakaabot nga igo sa panahon aron saulogon ang Pista sa mga Balongbalong sa 537 W.K.P. ug mohimog mga sakripisyo kang Jehova diha sa iyang halaran. Sa misunod nga tuig, sa ikaduhang bulan, ilang gipahimutang ang patukoranan sa ikaduhang templo, taliwala sa kusog nga mga singgit sa kalipay ug pagdayeg kang Jehova.—Esdras 1:1-4; 2:1, 2, 43, 55; 3:1-6, 8, 10-13.

4. Sa unsang paagi ang Isaias mga kapitulo 35 ug 55 natuman?

⁴ Ang tagna ni Jehova nga ipasig-uli ang kahimayaan matuman sa Israel: “Ang kamingawan ug ang mamala nga rehiyon maglipay, ug ang desyertong patag magmangayaon ug mamulak sama sa sapron. . . . Anaa unya kadtong makakita sa himaya ni Jehova, ang katahom sa atong Diyos.” “Uban sa pagkalipay kamo manglakaw, ug uban ang pakigdait kamo pasudlon. Ang kabukiran ug kabungtoran mismo magmasadyaon sa imong atubangan uban ang mangayaong singgit . . . Ug alang kang Jehova kini mahimong butang nga bantogan, usa ka ilhanan sa panahong walay tino nga dili pagaputlon.”—Isaias 35:1, 2; 55:12, 13.

5. Nganong ang pagmaya sa Israel wala magdugay?

⁵ Ugaling, kadtong maong pagmaya wala magdugay. Ang mga katawhan sa duol nagtinguha nga makig-alyado sa relihiyosong paagi aron matukod ang templo. Ang mga Hudiyo sa sinugdan mibarog, nga mipahayag: “Kamo walay labot kanamo sa pagtukod sa usa ka balay alang sa among Diyos, kay kami mismo maghiusa sa pagtukod alang kang Jehova ang Diyos sa Israel, sumala sa gisugo kanamo ni Haring Ciro nga hari sa Persia.” Dayon kadtong maong mga silingan nahimong mayugtanong mga magsusupak. Sila “nagpadayon pagpuypoy sa mga kamot sa katawhan sa Juda ug nagpaluya kanila gikan sa pagtukod.” Ilang gimisrepresentar usab ang kahimtang ngadto sa sumusunod ni Ciro, si Artajerjes, kinsa miluwat sa usa ka pagdili sa pagtukod sa templo. (Esdras 4:1-24) Sulod sa 17 ka tuig ang trabaho nahunong. Ikasubo, ang mga Hudiyo nahitumpawak ngadto sa materyalistikong pagkinabuhi niadtong panahona.

“Si Jehova sa mga Panon” Nagpahayag

6. (a) Unsay sanong ni Jehova sa kahimtang sa Israel? (b) Nganong haom ang lagmit nga kahulogan sa ngalan ni Haggeo?

⁶ Bisan pa niana, gipasundayag ni Jehova ang ‘iyang kusog ug iyang gahom’ alang sa Israel pinaagi sa pagpadalag mga propeta, ilabina kang Haggeo ug Zacarias, aron pukawon ang mga Hudiyo kon bahin sa ilang mga responsabilidad. Ang ngalan ni Haggeo adunay kalangkitan sa pista, kay mopatim-aw nga nagkahulogan kining “Natawo sa Pista.” Nahiangay, siya misugod pagpanagna sa unang adlaw sa bulan sa Pista sa mga Balongbalong, sa panahon nga ang mga Hudiyo gibaoran nga “magmangayaon gayod.” (Deuteronomio 16:15) Pinaagi kang Haggeo, si Jehova nagpahayag ug upat ka mensahe latas sa yugtong 112 ka adlaw.​—Haggeo 1:1; 2:1, 10, 20.

7. Sa unsang paagi ang unang mga pulong ni Haggeo magdasig kanato?

⁷ Sa pagsugod sa iyang tagna, si Haggeo miingon: “Kini ang giingon ni Jehova sa mga panon.” (Haggeo 1:2a) Kinsa ba kaha ang maong “mga panon”? Sila mao ang mga panon sa manulonda ni Jehova, nga usahay gitawag diha sa Bibliya nga militaryong mga puwersa. (Job 1:6; 2:1; Salmo 103:20, 21; Mateo 26:53) Dili ba kana magdasig kanato karong adlawa nga ang Soberanong Ginoo nga Jehova mismo nagagamit niining di-mapukang langitnong mga puwersa aron tultolan ang atong buluhaton sa pagpasig-uli sa matuod nga pagsimba sa yuta?​—Itandi ang 2 Hari 6:15-17.

8. Unsang panglantaw ang nag-apektar sa Israel, ug unsay resulta?

⁸ Unsa ba ang unod sa unang mensahe ni Haggeo? Ang katawhan nag-ingon: “Ang panahon wala pa moabot, ang panahon sa balay ni Jehova, aron kini pagatukoron.” Ang pagtukod sa templo, nga naghawas sa kapasig-ulian sa balaang pagsimba, dili na mao ang ilang unang gihunahuna. Sila miliso ngadto sa pagpanukod ug daw-palasyong mga balay alang sa ilang kaugalingon. Tungod sa materyalistikong panglantaw ang ilang kadasig sa pagsimba ni Jehova nakunhoran. Ingong sangpotanan, ang iyang panalangin gikuha. Dili na mabungahon ang ilang mga uma, ug kulang silag besti alang sa tingtugnaw. Ang ilang abot nahimong gamay kaayo, ug nahisama kadtog nagbutang silag kuwarta sa usa ka puyo nga napunog mga buslot.​—Haggeo 1:2b-6.

9. Unsang kusganon, makapalig-ong tambag ang gitagana ni Jehova?

⁹ Kaduha, si Jehova mihatag ug kusganong tambag: “Ibutang ang inyong kasingkasing sa inyong mga dalan.” Lagmit, si Zerubabel, ang gobernador sa Jerusalem, ug ang hataas nga saserdoteng si Josueb misanong ug maisogong nagdasig sa tanang tawo “sa pagpamati sa tingog ni Jehova nga ilang Diyos, ug sa mga pulong ni Haggeo nga propeta, kay si Jehova nga ilang Diyos nagpadala kaniya; ug ang katawhan nahadlok tungod kang Jehova.” Dugang pa, “si Haggeo ang mensahero ni Jehova namulong sa katawhan sumala sa sugo sa mensahero gikan ni Jehova, nga nag-ingon: ‘“Ako magauban kaninyo,” mao ang giingon ni Jehova.’”​—Haggeo 1:5, 7-14.

10. Giunsa paggamit ni Jehova ang iyang gahom alang sa Israel?

¹⁰ Ang pipila ka tigulang sa Jerusalem tingali naghunahunang ang himaya sa tinukod-pag-usab nga templo “wala ra” kon itandi sa unang templo. Bisan pa niana, mga 51 ka adlaw sa ulahi, gipalihok ni Jehova si Haggeo sa pagmantala sa ikaduhang mensahe. Siya mipatugbaw: “‘Magmalig-on ka, Oh Zerubabel,’ mao ang giingon ni Jehova, ‘ug magmalig-on, Oh Josue nga anak ni Jozadak nga hataas nga saserdote. Ug magmalig-on, kamong tanang tawo sa yuta,’ mao ang giingon ni Jehova, ‘ug magbuhat. Kay ako magauban kaninyo,’ mao ang giingon ni Jehova sa mga panon. . . . ‘Ayaw kahadlok.’” Si Jehova, kinsa sa nahaigong panahon magagamit sa iyang labaw nga gahom aron ‘uyogon ang langit ug yuta,’ nagtino nga ang tanang pagsupak, bisan ang pagdili sa emperador sa pagtukod, nabuntog. Sulod sa lima ka tuig ang pagtukod sa templo midangat sa dakong kalamposan.​—Haggeo 2:3-6.

11. Giunsa pagpuno sa Diyos ang ikaduhang templo sa ‘labaw nga himaya’?

¹¹ Ang usa ka talagsaong saad natuman niadto: “‘Ang tilinguhaong mga butang sa tanang nasod magasulod gayod; ug akong pun-on kining balaya sa himaya,’ nag-ingon si Jehova sa mga panon.” (Haggeo 2:7) Ang maong “tilinguhaong mga butang” mao ang mga di-Israelinhon nga miampo sa maong templo, kay kadto nagpabanaag sa himaya sa iyang harianong presensiya. Unsay kahimtang sa maong tinukod-pag-usab nga templo kon itandi niadtong natukod sa adlaw ni Solomon? Ang propeta sa Diyos nagpahayag: “‘Ang himaya niining ulahing balay mahimong labaw pa kay sa nahauna,’ nag-ingon si Jehova sa mga panon.” (Haggeo 2:9) Sa unang katumanan sa tagna, ang tinukod-pag-usab nga templo nagpabilin sa mas taas nga panahon kay sa unang balay. Nagbarog pa kadto sa dihang ang Mesiyas mitungha sa 29 K.P. Dugang pa, sa wala pa siya ipapatay sa iyang apostatang mga kaaway sa 33 K.P., ang Mesiyas mismo naghatag nianag himaya sa dihang giwali niya ang kamatuoran didto.

12. Unsang katuyoan ang natuman sa unang duha ka templo?

¹² Ang una ug ikaduhang mga templo sa Jerusalem nagsilbig usa ka hinungdanong katuyoan sa paglandong sa hinungdanong mga bahin sa saserdotehanong pag-alagad sa Mesiyas ug pagpadayong buhi sa maputling pagsimba ni Jehova sa yuta hangtod sa aktuwal nga pagtungha sa Mesiyas.​—Hebreohanon 10:1.

Ang Mahimayaong Espirituwal nga Templo

13. (a) Unsang mga hitabo maylabot sa espirituwal nga templo ang nahitabo gikan sa 29 ngadto 33 K.P.? (b) Unsang hinungdanong papel ang gituman sa halad lukat ni Jesus sa maong mga panghitabo?

¹³ Ang tagna ba ni Haggeo bahin sa pagpasig-uli dunay linaing kahulogan alang sa umaabot nga kapanahonan? Seguradong aduna! Ang gitukod-pag-usab nga templo sa Jerusalem nahimong sentro sa tibuok matuod nga pagsimba sa yuta. Apan kana naglandong sa labi pang mahimayaong espirituwal nga templo. Kini misugod paglihok sa 29 K.P. sa dihang, sa bawtismo ni Jesus sa Subang Jordan, gidihogan ni Jehova si Jesus ingong Hataas nga Saserdote, ug ang balaang espiritu mikunsad kaniya nga sama sa salampati. (Mateo 3:16) Sa pagkatapos ni Jesus sa iyang yutan-ong ministeryo diha sa haladnong kamatayon, siya nabanhaw ngadto sa langit, nga gihulagwayan sa Labing Balaan sa templo, ug didto iyang gipresentar kang Jehova ang bili sa iyang halad. Ang maong bili nagsilbing usa ka lukat, nga nagtabon sa mga sala sa iyang mga tinun-an, ug nag-abli sa dalan sa pagdihog kanila, sa adlaw sa Pentekostes 33 K.P., ingong mga ubos nga saserdote sa espirituwal nga templo ni Jehova. Ang ilang matinumanong ministeryo hangtod sa kamatayon diha sa sawang sa templo sa yuta motultol sa umaabot nga langitnong pagkabanhaw, alang sa padayong saserdotehanong pag-alagad.

14. (a) Unsang pagmaya ang miduyog sa madasigong kalihokan sa sayong Kristohanong kongregasyon? (b) Nganong ang maong pagmaya wala magdugay?

¹⁴ Libolibong mahinulsolong mga Hudiyo​—ug sa ulahi mga Hentil​—ang mihugop ngadto nianang Kristohanong kongregasyon ug nakig-ambit sa pagpahayag sa maayong balita bahin sa umaabot nga pagmando sa Gingharian sa Diyos ibabaw sa yuta. Human sa mga 30 ka tuig, si apostol Pablo nakaingon nga ang maayong balita gikawali na “sa tibuok nga kalalangan nga anaa sa ilalom sa langit.” (Colosas 1:23) Apan human sa pagkamatay sa mga apostoles, ang dakong apostasya misugod, ug ang kahayag sa kamatuoran misugod pag-awop-awop. Ang tinuod nga Kristiyanidad nalandongan sa mga sektasekta sa Kakristiyanohan, nga gibase sa paganong mga pagtulon-an ug mga pilosopiya.​—Buhat 20:29, 30.

15, 16. (a) Sa unsang paagi ang tagna natuman sa 1914? (b) Unsang pagtigom ang nagtimaan sa hinapos sa ika-19 ug sinugdan sa ika-20ng mga siglo?

¹⁵ Milabay ang kasiglohan. Unya sa katuigang 1870, usa ka grupo sa sinserong mga Kristohanon misugod sa dulot nga pagtuon sa Bibliya. Gikan sa Kasulatan, sila nakapunting sa tuig 1914 ingong nagtimaan sa katiklopan sa “tinudlong mga panahon sa mga nasod.” Niadtong panahona ang pito ka simbolikong “mga panahon” (2,520 ka tuig sa mananapong tawhanong pagmando) natapos duyog sa langitnong pagkaentrono ni Kristo Jesus​—ang Usang dunay “legal nga katungod” ingong Mesiyasnong Hari sa yuta. (Lucas 21:24; Daniel 4:25; Ezequiel 21:26, 27) Sukad ilabina sa 1919 paunahan, ang maong mga Estudyante sa Bibliya, nga nailhan karong adlawa ingong mga Saksi ni Jehova, naghimo sa kusog nga pagpakaylap sa tibuok yuta sa maayong balita sa umaabot nga Gingharian. Maoy niadtong 1919 nga ang pipila ka libo niini misanong sa awhag nga molihok nga giluwatan sa kombensiyon sa Cedar Point, Ohio, T.B.A. Miusbaw ang ilang gidaghanon hangtod sa tuig 1935 sa dihang 56,153 ang mitahog pag-alagad sa kanataran. Niadtong tuiga, 52,465 ang miambit sa mga emblema nga tinapay ug bino sa tinuig nga Memoryal sa kamatayon ni Jesus, sa ingon nagsimbolo sa ilang paglaom nga mahimong mga saserdote uban ni Kristo Jesus sa langitnong bahin sa dakong espirituwal nga templo ni Jehova. Sila magaalagad usab kauban niya ingong kaubang mga hari sa iyang Mesiyasnong Gingharian.​—Lucas 22:29, 30; Roma 8:15-17.

¹⁶ Bisan pa niana, ang Pinadayag 7:4-8 ug 14:1-4 nagpakitang ang katibuk-ang gidaghanon niining dinihogang mga Kristohanon mao lamay 144,000, nga daghan kanila natigom na sulod sa unang siglo sa wala pa mosugod ang dakong apostasya. Sukad sa ika-19ng siglo ug ngadto sa ika-20ng siglo, si Jehova nagkompleto sa pagtigom niining grupoha nga gihinloan sa tubig sa iyang Pulong, gipahayag nga matarong pinaagi sa pagtuo sa nagatabon-sa-sala nga halad ni Jesus, ug sa kataposan gitimrihan ingong dinihogang mga Kristohanon aron maglangkob sa bug-os nga gidaghanon nga 144,000.

17. (a) Unsang pagtigom ang nagpadayon sukad sa katuigang 1930? (b) Nganong ang Juan 3:30 makapaikag dinhi? (Tan-awa usab ang Lucas 7:28.)

¹⁷ Unsay sunod nga mahitabo sa dihang napili na ang katibuk-ang gidaghanon sa mga dinihogan? Niadtong 1935, sa usa ka halandomong kombensiyon sa Washington, D.C., T.B.A., gipahibalo nga ang “dakong panon” sa Pinadayag 7:9-17 maoy usa ka grupo nga mailhan “human” sa 144,000 ug kansang dulnganan mao ang kinabuhing walay kataposan sa usa ka paraisong yuta. Human sa tin-awng pag-ila sa dinihogang Jesus, si Juan nga Tigbawtismo, kansang pagkabanhaw maoy sa yuta ingong usa sa “ubang mga karnero,” miingon mahitungod sa Mesiyas: “Kana siya kinahanglang padayong magalambo, apan ako kinahanglang padayong magakunhod.” (Juan 1:29; 3:30; 10:16; Mateo 11:11) Ang buluhaton ni Juan nga Tigbawtismo sa pag-andam ug mga tinun-an alang sa Mesiyas nagkatapos na kay si Jesus niadto mibanos aron pilion ang mausbawong gidaghanon nga mahilakip sa 144,000. Sa katuigang 1930 nahitabo ang balit-ad niana. Nagkadiyutay ang “gitawag ug gipili” nga mahilakip sa 144,000 samtang ang dako kaayong usbaw nagsugod sa gidaghanon sa “dakong panon” sa “ubang mga karnero.” Kining maong dakong panon nagpadayon pag-usbaw samtang ang tuman-kadaotang sistema sa kalibotan nagsingabot sa kataposan niini sa Armagedon.​—Pinadayag 17:14b.

18. (a) Nganong kita masaligong makadahom nga “minilyong buhi karon dili na gayod mamatay”? (b) Nganong angay natong madasigong sundon ang Haggeo 2:4?

¹⁸ Sa sinugdan sa katuigang 1920, ang linaing pakigpulong publiko nga gipahayag sa mga Saksi ni Jehova nag-ulohang “Minilyong Buhi Karon Dili na Gayod Mamatay.” Ang maong pamulong mahimong nagpabanaag sa hinobrang kamalaomon niadtong panahona. Apan karong adlawa kanang pamulonga ikapahayag uban ang bug-os nga pagsalig. Ang mausbawong kahayag diha sa tagna sa Bibliya ug ang anarkiya niining himalatyong kalibotan kusganong nagpaila nga duol na gayod kaayo ang kataposan sa sistema ni Satanas! Ang taho sa Memoryal sa 1996 nagpadayag nga 12,921,933 ang mitambong, nga kanila 8,757 (.068 porsiyento) lamang ang nagpaila sa ilang langitnong paglaom pinaagi sa pagpakig-ambit sa mga emblema. Ang kapasig-ulian sa matuod nga pagsimba duol nang makompleto. Apan dili gayod kita maghinayhinay sa maong buluhaton. Oo, ang Haggeo 2:4 nag-ingon: “‘Magmalig-on, kamong katawhan sa yuta,’ mao ang giingon ni Jehova, ‘ug magbuhat. Kay ako magauban kaninyo,’ mao ang giingon ni Jehova sa mga panon.” Hinaot kita mahimong determinado nga walay mga pugong sa materyalismo o pagkakalibotanon ang magbugnaw sa atong kadasig alang sa buluhaton ni Jehova!—1 Juan 2:15-17.

19. Sa unsang paagi kita mahimong makaambit sa pagkatuman sa Haggeo 2:6, 7?

¹⁹ Makapalipay ang atong pribilehiyo sa pagpakig-ambit sa modernong-adlawng katumanan sa Haggeo 2:6, 7: “Kini ang giingon ni Jehova sa mga panon, ‘Apan sa makausa pa—kini makadiyot—ug akong pagauyogon ang mga langit ug ang yuta ug ang dagat ug ang mamalang yuta. Ug akong pagauyogon ang tanang nasod, ug ang tilinguhaong mga butang sa tanang nasod magasulod; ug akong pun-on kining balaya sa himaya,’ nag-ingon si Jehova sa mga panon.” Ang kadalo, kahiwian, ug pagdumot kaylap sa katibuk-an niining ika-20ng-siglong kalibotan. Kini mao na gayod ang iyang kataposang mga adlaw, ug si Jehova nagsugod na sa “pag-uyog” niini pinaagi sa iyang mga Saksi nga ‘nagmantala sa iyang adlaw sa panimalos.’ (Isaias 61:2) Ang maong unang pag-uyog mosangko sa tayuktok nga kalaglagan sa kalibotan sa Armagedon, apan sa wala pa kanang panahona, si Jehova nagtigom alang sa iyang pag-alagad sa “tilinguhaong mga butang sa tanang nasod”—ang maaghop, samag-karnerong mga tawo sa yuta. (Juan 6:44) Ang maong “dakong panon” karon ‘naghimog balaang pag-alagad’ diha sa yutan-ong sawang sa iyang balay sa pagsimba.​—Pinadayag 7:9, 15.

20. Diin hikaplagi ang labing bililhong bahandi?

²⁰ Ang pag-alagad diha sa espirituwal nga templo ni Jehova mopatunghag ganansiya nga labi pang bililhon kay sa bisan unsang materyal nga bahandi. (Proverbio 2:1-6; 3:13, 14; Mateo 6:19-21) Dugang pa, ang Haggeo 2:9 nag-ingon: “‘Ang himaya niining ulahing balay mahimong labaw kay sa nahauna,’ si Jehova sa mga panon nag-ingon. ‘Ug niining dapita akong ihatag ang pakigdait,’ mao ang giingon ni Jehova sa mga panon.” Unsay kahulogan niining mga pulonga alang kanato karong adlawa? Ang sunod natong artikulo maoy mopahayag.

[Mga footnote]

Mga Pangutana Agig Pagsubli

◻ Unsang panig-ingnan sa mga propeta ang atong pagasundon bahin sa ngalan ni Jehova?

◻ Unsang pagdasig ang atong madawat gikan sa kusganong mensahe ni Jehova ngadto sa napasig-uling Israel?

◻ Unsang mahimayaong espirituwal nga templo ang nagalihok karong adlawa?

◻ Unsang mga pagtigom ang nagpadayon sulod sa ika-19 ug ika-20ng mga siglo, nga adunay unsang dakong palaaboton sa unahan?

[Hulagway sa panid 7]

Ang langitnong mga panon ni Jehova maoy nagtultol ug nagpaluyo sa iyang mga Saksi sa yuta