Nganong Gipadayag ni Jehova ang Iyang Ngalan?

Ang usa ka komentaryo sa “Daang Testamento” nga gipatik sa Polandiya niadtong 1964 nagtubag niining pangutanaha sa mopukaw-sa-hunahunang paagi. Ubos sa imprimatur sa Iglesya Romana Katolika, si Dr. Stanislaw Lach, propesor sa Lublin University, miingon:

“Ang katawhang linukat maoy responsable sa ngalan sa Diyos sa atubangan sa katawhan.” Maoy responsabilidad sa mga Israelinhon nga maningkamot aron “ang mga Hentil magadayeg sa ngalan ni Jahwe [Jehova] ug nga dili nila pasipalahan” kini. “Ang Jahwe dunay kahulogan . . . Ang kalibotan pagahukman depende sa reaksiyon niadtong moila sa maong ngalan.” Nagpahayag ang propesor nga “ang ngalang Jahwe mahimong dako taliwala sa mga nasod . . . Kini mokaylap sa tibuok nga kalibotan. Kana ang dulnganan sa . . . maong ngalan ngadto kang Moises.”

Oo, sumala sa ginatagna sa Malakias 1:11: “‘Ang akong ngalan mahimong dako taliwala sa mga nasod,’ nagaingon si Jehova sa mga panon.” Ug kinsa karong adlawa ang nagapahayag sa maong ngalan sa tibuok nga kalibotan aron nga “ang tanan nga nagatawag sa ngalan ni Jehova mamaluwas”? Ang mga Saksi ni Jehova! Ang reaksiyon sa publiko sa maong “katawhan alang sa iyang ngalan,” oo, “kadtong nagaila sa maong ngalan,” maoy butang nga magpasabot sa kinabuhi ug kamatayon alang kanila. Unsay imong reaksiyon ngadto kang Jehova ug sa iyang mga Saksi?—Buhat 2:21; 15:14; itandi ang Malakias 3:16-18.