“Paggawi Kamo sa Paagi nga Takos sa Maayong Balita”
“Mao lamang nga paggawi kamo sa paagi nga takos sa maayong balita mahitungod kang Kristo.”—FILIPOS 1:27.
1. Ang dili pa dugayng hitabo sa New York City nakapukaw ug unsang maayong mga komento gikan sa mayor? (Roma 13:3)
“KAPIN sa 1,000 ka Saksi,” miadto sa City Hall sa ubos nga Manhattan sa Septiyembre 29, 1988, mitaho ang The New York Times. Sila miadto sa pagpaluyo sa plano sa pagtukod nga hulosayon atubangan sa Board of Estimate sa siyudad. Bisag ang mga plano sa pagtugot sa mga Saksi ni Jehova sa pagtukod ug bag-ong pinuy-anan diha sa punoang buhatan sa kalibotan gibalibaran, ang mayor “midayeg sa mga Saksi ingong ‘mahinlo kaayo’ ug miingon nga sila ‘takos sa pagdayeg.’”
2. Sa unsang paagi lahi ang pamatasan sa mga Saksi, ug ngano?
2 Sa kinaiyanhon, sa dihang kapin sa usa ka libo ka tawo mag-abot sa pagpakitag pagpaluyo sa usa ka dili-popular nga kawsa, unsay mapaabot? Ang pagtinuloray, pagsinggitay, bisan pagpakitag mismong kusog ug kabangisan kasagaran. Nganong lahi ang mga Saksi? Tungod kay sila nahibalo nga sa tanang panahon ang ilang pamatasan mopabanaag sa ilang tinuohan. Gihinumdoman nila pag-ayo ang Kasulatanhong tambag: “Hupti ang inyong pamatasan nga maayo taliwala sa mga nasod, aron nga, bisan pa sila magaingon nga kamo mga mamumuhat ug daotan, tungod sa ilang pagkakita sa inyong maayong binuhatan sila magahimaya sa Diyos unya sa adlaw sa iyang pagsusi.”—1 Pedro 2:12.
Ang Maayong Pamatasan Mohatag Kahimayaan ni Jehova
3. Unsang papel ang gidula sa atong pamatasan diha sa pagpasidungog kang Jehova?
3 Aron mahimaya si Jehova nga Diyos uban sa maayong pamatasan sa dayag maoy bahin sa atong Kristohanong responsabilidad. (Mateo 5:16) Ang maayong pamatasan, sa pagkamatuod, naglakip sa daghang butang—pananglitan, pagkamatinuoron, pagkakugihan, ug maayong moral. Apan, kining mga hiyasa kasagaran ginaapresyar lamang sa mga tawong nakaila kaayo kanato o sa mga tawo kinsa kita dunay regular nga mga pakiglabot, sama sa atong mga higala, paryenti, amo, kauban sa trabaho, ug mga magtutudlo. Komosta ang kinabag-an sa mga tawo nga kasuwal lang natong makontak? Dinhing bahina nga importante kaayo ang atong pamatasan. Kay sama sa usa ka maanindot nga putos nga mopatahom sa usa ka bililhong gasa, ang maayong pamatasan mopahimo sa atong ginatanyag nga labi pang madanihon. Bisan unsa pang maayong Kristohanong mga hiyas ang atong nabatonan o bisag unsa pa ka dalayegon sa atong mga intensiyon, walay maayong kaayohan ang mahatag niini kon dili-maayo ang atong batasan. Busa sa unsang paagi ang atong pamatasan mohatag kahimayaan ni Jehova?
4. Diha sa unsang mga dapit sa kinabuhi nga angay natong hatagan ug pagtagad ang atong pamatasan?
4 “Mao lamang nga paggawi kamo diha sa paagi nga takos sa maayong balita,” miingon si Pablo. (Filipos 1:27) Kini, sa pagkamatuod, naglangkit sa atong ministeryo sa publiko. Apan ang atong pamatasan ug paggawi sa atong dapit sa pagsimba, sa atong kasilinganan, sa trabahoan, ug sa tunghaan, oo, sa tanang bahin sa atong mga kinabuhi, dunay direktang kalabotan sa pagkaepektibo sa atong ministeryo. “Sa bisan unsang paagi kami wala gayod magbutang ug bisan unsang hinungdan sa pagkapandol, aron nga ang among ministeryo dili masaway,” misulat si Pablo. (2 Corinto 6:3) Sa unsang paagi kita makatino nga atong gipadapat kanang tambaga? Unsay atong mahimo aron sa pagtabang sa usa ug usa, ilabina sa mga batan-on sa atong taliwala, sa pagpakitag Kristohanong pamatasan sa tanang panahon?
Diha sa Kingdom Hall
5. Unsa ang kinahanglan natong ilhon kon kita anaa sa Kingdom Hall?
5 Ang Kingdom Hall mao ang atong dapit sa pagsimba. Kita atua didto sa imbitasyon ni Jehova ug sa iyang Anak, si Jesu-Kristo. Sa mao nga diwa, kita mga dinapit sa balay ni Jehova. (Salmo 15:1; Mateo 18:20) Maayo ka bang dinapit sa dihang moadto ka sa Kingdom Hall? Aron mahimong ingon, kinahanglang atong ipakita ang angay nga konsiderasyon ug pagtahod dili lamang sa tig-abiabi kondili sa ubang mga dinapit usab. Unsa may nalangkit niana?
6. (a) Ang ulahi kanunay nga pag-abot sa mga tigom nagpakitag kakulang ug unsa? (b) Unsay mahimo aron mabuntog ang problema?
6 Sa pagsugod, anaa kanang bahin sa pag-abot nga eksakto sa oras. Sa pagkamatuod dili masayon kanunay ang pagbuhat niini. Ang uban layo kaayog pinuy-anan; ang pipila dunay pamilya ug mga anak nga atimanon. Ang paningkamot nga ilang gihimo sa pag-adto sa Kristohanong mga tigom sa regular tinuod nga dalayegon. Namatikdan, hinunoa, nga ang pipila nahulog sa batasan nga ulahi nang moabot sa mga tigom. Unsay ilang mahimo sa pagtul-id niini? Kinahanglang ilhon sa usa nga ang nabatasang pagkaulahing moabot sa Kristohanong mga tigom dili sa tanang panahon pagpakitag kakulag apresasyon sa bili sa mga tigom. Ang uban nga kanunayng ulahing moabot daw nalipay sa mga tigom sama sa uban—sa dihang moabot sila didto. Hinunoa, ang problema tingali maoy resulta sa dili maayong pagplano ug sa kakulang ug konsiderasyon sa kaubang mga Kristohanon. Ang usa sa mga katarongan nga kita gitambagan ‘sa dili pagbiya sa atong panagtigom’ mao nga kita “magdinasigay sa usa ug usa ngadto sa paghigugma ug sa maayong mga binuhatan.” (Hebreohanon 10:24, 25) Dili kita makahimo niini kon, sa kanunay, kita moabot nga ulahi ug busa mohatag kasamok o makadisturbo. Aron dili maulahi, ang mga eksperto nagsugyot, nga himoon natong tumong ang pag-abot ug sayo inay sa pag-abot didto nga eksakto sa oras. Kinahanglan bang bansayon pa nimo kini?
7. Ipatin-aw kon unsay kalabotan sa pagpatalinghog sa mga tigom diha sa maayong pamatasan.
7 Ang maayong pamatasan nagkinahanglan nga ihatag nato ang atong pagtagad sa mga tawo sa dihang sila makigsulti kanato. (Proverbio 4:1, 20) Kini aplikado usab sa Kristohanong mga tigom, sa dihang ang mga ministro sa Diyos mopahayag aron sa paghatag espirituwal nga gasa sa paglig-on kanato. Pagpakita sa pagkamatuod ug dili maayong pamatasan sa atong bahin kon kita magduka, maghinunghongay kanunay sa tawong naglingkod sa atong tapad, mag-usap ug gum o karmelitos, magbasag laing materyal, o lain ang buhaton sa panahon sa tigom. Ang batan-ong Elihu wala lamang maglingkod nga mapailobon hangtod sa taas nga pahayag ni Job ug sa tulo ka kauban kondili “namati sa tanang panahon” usab sa ilang gipamulong ug “nagpunting sa [iyang] pagtagad ngadto” kanila. (Job 32:11, 12) Ang maayong Kristohanong pamatasan mopalihok kanato sa pagpakitag angay nga pagtahod sa mamumulong ug sa iyang binase-sa-Bibliya nga mensahe pinaagi sa paghatag kaniya sa atong bug-os nga pagtagad ug pagsuportar.
8. Sa unsang paagi atong ikapakita nga kita kaubang mga disipulo ni Jesu-Kristo?
8 Sa dili pa ug sa tapos sa mga tigom, ang Kristohanong pamatasan nag-apil sa atong pagpakitag aktibong kaikag sa uban kinsa anaa sa Kingdom Hall. Si Pablo miingon nga ang dinihogang mga sakop sa Kristohanong kongregasyon “dili na mga langyaw ug mga dumuloong, kondili . . . mga sakop sa panimalay sa Diyos.” (Efeso 2:19) Ginatagad ba nimo ang imong kaubang mga Saksi ingong mga estranghero ug mga dumuloong o ingong mga sakop sa samang panimalay? Ang mahigalaong pagtimbaya, ang mainit nga paglamano, ang maluluton nga pahiyom—gagmayng mga butang lang, tingali, apan sila maoy bahin sa ebidensiya nga kita maoy kaubang mga disipulo ni Jesu-Kristo. Kon atong himoon kini sa dihang makahibalag kitag mga estranghero, dili ba angay buhaton nato kini “ilabina kanila nga mga sakop sa panimalay sa pagtuo”?—Galacia 6:10.
9. Sa unsang paagi matudloan ang mga bata sa pagpakitag kaikag sa mga tawo gawas sa ilang katalirongan?
9 Ang mga bata ba matudloan sa pagpakita niining matanga sa kaikag diha sa mga tawo gawas sa ilang mga katalirongan? Bation sa ubang mga edaran nga ang mga bata kinahanglan moadto ug makigdula uban sa ilang gagmayng mga higala human sa paglingkod ug usa ka oras o duha sa pagpamati diha sa mga tigom. Apan ang Kingdom Hall dili dapit nga dulaanan. (Ecclesiastes 3:1, 17) Sa dihang gipangutana ang usa ka batang lalaki nga kuwatro ug tunga ang edad sa iyang magtutudlo kon pila ka buok ang iyang igsoong lalaki ug babaye, siya mitubag: “Daghan kaayo dili ako makaihap kanilang tanan.” Sa ulahi, sa dihang gisukna siya sa iyang mga ginikanan bahin niini, ang bata mitubag: “Wala ako mahibalo kon pila ka buok ang akong mga igsoong lalaki ug babaye. Sa dihang moadto ako sa Kingdom Hall, daghan man kaayo.” Alang kaniya, ang tanan nga nanambong maoy iyang mga igsoong lalaki ug babaye.
Diha sa Atong Publikong Ministeryo
10. Unsang instruksiyon gikan kang Jesus ang makatabang kanato sa “paggawi diha sa paagi nga takos sa maayong balita” samtang anaa sa atong ministeryo?
10 Sa “paggawi diha sa paagi nga takos sa maayong balita” siyempre nalangkit ang atong publikong ministeryo. Kinahanglang isilsil nato sa atong hunahuna nga kita dunay makigdaitong mensahe, ug ang atong pamatasan angay mopabanaag niana. (Efeso 6:15) Ang instruksiyon nga gikan ni Jesus mao: “Inigsaka ninyo sa balay, humatag kamog katahoran; ug kon ang balay takos man niini, ipaabot diha ang inyong kalinaw.” Pinaagi sa pagkahimong mainiton, mahigalaon, ug matinahuron, atong gipahibalo sa tagbalay nga kita kinasingkasing nga may kaikag kaniya. Hinunoa, may mga panahon, nga ang tawo nga atong mahibalag diha sa pultahan tingali dili-mahigalaon, o kaha palaaway. Angay bang mabalaka kita o mosugod sa paggawi nga sama? Matikdi kon unsay dugang gipamulong ni Jesus: “Apan kon [ang tagbalay] dili takos, ipabalik diha kanimo ang kalinaw.” (Mateo 10:12, 13) Ang atong pamatasan diha sa pultahan sa tanang panahon takos “sa ministeryo sa pagpasig-uli.”—2 Corinto 5:18.
11. Sa unsang paagi ang atong pamiste ug personal nga panagway makaapektar sa atong papel ingong mga ministro sa Diyos?
11 Ang atong pamatasan mosulti bahin kanato sa laing paagi usab. Pananglitan, ang ato bang personal nga panagway takos sa atong papel ingong usa ka ministro sa Pulong sa Diyos? Komosta ang gamit nga atong gigamit—bag sa libro, Bibliya, ug literatura sa Bibliya? Ang kolumnista sa mantalaan naghatag sa mga negosyante niining tambaga: “Pamiste alang sa negosyo, dili alang sa parti, wala-planohang salo-salo o sa pagtan-aw ug mga dula.” Ngano? Tungod kay ang imong sapot ug ang personal nga panagway “maoy sosyal nga shorthand nga mohatag sa nagalibot nga populasyon ug impormasyon bahin kon kinsa ug unsa ikaw ug asa ikaw mohaom sa han-ay sa mga butang.” Busa sa dihang buhaton nato ang atong ministeryal nga “trabaho,” ang atong besti ug panagway kinahanglan dili mahugaw o nagkagidlay, dili usab mapagawalon o hinobra, apan sa tanang panahon “takos sa maayong balita.”—Itandi ang 1 Timoteo 2:9, 10.
12. Sa unsang paagi ang maayong pamatasan ikapakita maylabot sa mga katungod ug kabtangan sa tagbalay?
12 Bisan pa nga kinahanglang andam kita “kanunay sa paglaban” sa maayong balita, ang maayong Kristohanong pamatasan nagkinahanglan nga atong buhaton kini “uban ang kaaghop ug lalom nga pagtahod.” (1 Pedro 3:15) Kana nag-apil sa pagtahod sa katungod ug sa kabtangan sa tagbalay. Ginaplano ba nato ang atong kalihokan aron kita moduaw sa makataronganong oras? Alisto ba kita sa pagkamatikod kon kita nakabalda na sa pila ka hinundanong trabaho o buluhaton? Madagayaon ba kita sa paggamit sa mga ekspresyong sama sa “Makahimo ba ako?” “Palihog,” ug “Salamat kanimo”? Nagapaningkamot ba kita sa pagpaapil sa tagbalay sa kokabildo, o kita ba ang magpasulabig-sulti sa kahadlok nga dili kita makatiwas sa atong giandam nga isulti?
13. Iilustrar kon sa unsang paagi ang maayong pamatasan diha sa ministeryo sagad mohatag maayong mga resulta.
13 Ang maayong pamatasan, inubanan sa tim-os personal nga kabalaka, sagad maoy mobukas sa dalan alang sa maayong pagpamatuod. Kini mao ang hinungdan kon nganong ang maayog-batasang mga bata sa kanunay nakakuha sa pagtagad ug kaikag sa mga tagbalay nga diin pakyas niining bahina ang mga edaran. Ang usa ka 13-anyos nga Saksi sa Mexico nakahibalag ug batan-ong babaye nga gustong magtuon. Apan, ang batan-ong babaye miingon nga buhaton niya kini nga dili magpahibalo sa iyang amahan. Apan gibati sa batan-ong magmamantala nga, niining kasoha, agig pagtahod sa amahan, siya mismo kinahanglang mananghid kaniya. Busa mitanyag siya nga maoy makigsulti sa amahan ug gisultihan siya nga hinungdanon kaayong butang ang ilang pagatun-an. Nakakita sa pagkaseryoso sa batan-on igsoong babaye ug miapresyar nga miduol siya direkta kaniya, siya miingon: “Kon hinungdanon kaayo ang inyong tun-an, nan angay magtuon ang tanan sa akong pamilya.” Ang resulta mao nga gisugdan niining 13-anyos ang pagtuon sa Bibliya uban ang tibuok pamilya, apil ang minyong anak nga lalaki ug ang iyang asawa ug ubang dagkong mga anak.
Ang Maayong Pamatasan Magsugod Diha sa Panimalay
14. Asa magsugod ang maayong pamatasan, ug unsang butang ang nagdulag hinungdanong papel?
14 Ang maayong pamatasan sa batan-ong mga Saksi kasagaran maoy maayong pamatuod sa pagbansay nga tataw ilang nadawat sa panimalay. Sa pagkamatuod, ang atong pamatasan maoy banaag sa atong paagi sa kinabuhi. Tungod niini nga katarongan, lahi sa hunahuna sa pipila, ang maayong pamatasan angay dunay hinungdanong dapit sa panimalay. Niini, sama sa ubang bahin sa panimalaynong kinabuhi, ang pananglitan sa mga ginikanan mao ang labing hinungdanon. (2 Timoteo 1:5) Ang pagsulti sa mga anak, “Sunda ang akong isulti, dili ang akong buhat” sa dayag dili maoy paagi sa pagtudlo kanila sa pamatasan. Ang dili-maisip nga mga detalye bahin sa maayong pamatasan makat-onan, dili lamang sa binaba nga mga sugo, kondili pinaagi sa pagpaniid ug pagsundog. “Ang mga ginikanan dili lamang mao ang kinataposang mga magtutudlo; sila mga sulondan usab, kay ang atong mga anak makakat-on pinaagi sa pagsundog sa atong mga paagi,” miingon si Beverley Feldman, awtor sa Kids Who Succeed. Unsang matanga sa pamatasan ang makita sa imong mga anak diha kanimo?
15. Sa unsang paagi makatabang ang mga ginikanan sa ilang mga anak sa pag-ugmad ug tibuok-kinabuhing batasan sa maayong pamatasan?
15 “Mga amahan, ayaw ninyo pagsuk-a ang inyong mga anak” mao ang tambag sa Bibliya. (Efeso 6:4) Makapasuko ug makaluya sa buot alang sa anak nga sultihan nga sila kinahanglang magmaluluton ug magmahunahunaon, apan sila makakita sa ilang mga ginikanan nga mag-away, manglibak, molihok nga walay-batasan, o daling masuko. Mabasol ba sila kon sila molihok ug sama? Sa laing bahin, ang kasulatan nagpadayon sa pag-ingon: “Kondili matutoon hinuon ninyo sila uban sa pagbansay ug pagpahamatngon gikan ni Jehova.” Ug kana nag-apil sa mga pasukaranan sa maayong pamatasan, sama sa pag-ingon, “Hello,” “Palihog,” “Salamat,” ug “Pasayloa ako,” magpakitag pagtahod sa mga edaran, ug pagpaambit sa mga butang diha sa uban. (Levitico 19:32; Roma 16:3-7) Kining mga hiyasa nga nakat-onan diha sa balay sa panahon sa pagkabata dunay tibuok-kinabuhi nga bili.—Proverbio 22:6.
16. Unsang mga paningkamot ang gikinahanglan, ug uban sa unsang mga sangpotanan?
16 Busa ang mga ginikanan ug mga anak kinahanglang magbansay sa maayong pamatasan ingong bahin sa ilang adlaw-adlawng buluhaton inay maghulat hangtod moabot ang pila ka linaing okasyon. Sa pagbuhat niini, ang mga ginikanan kinahanglang magmapailobon ug mainantuson sa mga sayop nga mahimo sa mga anak. Ipahibalo kanila kon unsa ka hinungdanon alang kanimo ang ilang maayong pamatasan, ug magmaabtik sa pagdayeg sa kauswagan nga ilang mahimo. Sa pagkamatuod, nagkinahanglan kinig dakong paningkamot sa imong bahin. Apan dili ba ang Kasulatan nag-ingon nga ang pagpasilsil sa diyosnong mga prinsipyo diha sa mga anak kinahanglang buhaton “sa magalingkod ikaw sa imong balay ug sa magalakaw ikaw sa dalan ug sa imong paghigda ug sa imong pagbangon”? (Deuteronomio 6:7) Ang paghimo niini makamugnag malipayon ug maayong atmospera sa panimalay, nga dakog mahimo sa pagbansay sa imong mga anak nga managko sila nga matinabangon, matinagdanon, ug maayog-pamatasang mga hamtong. Nan sila mahimong tuboran sa pagdayeg ug kadungganan alang kanimo ug sa ilang Maglalalang, si Jehova nga Diyos.
Mga Tawong Maayog-Pamatasan
17. Unsay namatikdan diha sa mga Kingdom Hall sa mga Saksi ni Jehova?
17 Ang “kapin sa 1,000 ka Saksi” nga nagtigom sa gawas sa City Hall sa Siyudad sa New York niadtong hapon sa Septiyembre yanong nagpasundayag sa gamayng sukod sa paagi sa paggawi sa mga Saksi ni Jehova sa regular. Sa laing dapit, usa ka tawo miadto sa Kingdom Hall sa unang higayon ug miingon human niadto: “Nakahibalag akog mas daghan tinuod nga mahigugmaong mga tawo, bug-os nga mga estranghero, sa usa ka adlaw kay sa akong nahibalag diha sa iglesya nga ako gimatuto.” Ang resulta? “Dayag nga nakita ko ang kamatuoran,” siya miingon. Gibag-o niining tawhana ang iyang dalan sa kinabuhi, ug sa milabay ang pito ka bulan iyang gipahinungod ang iyang kinabuhi kang Jehova ug gibawtismohan.—Itandi ang 1 Corinto 14:25.
18. Sa unsang paagi ang sukdanan sa maayong pamatasan sa mga Saksi ni Jehova nakaapektar sa tagagawas?
18 Ang sukdanan sa pamatasan ug kaugdang sa mga Saksi diha sa ilang nasyonal ug internasyonal nga mga kombensiyon nahimong ulohan sa daghang maayong mga komento. Usa sa maong okasyon dili pa dugay sa Japan, usa ka tiggiya diha sa bus nga nagalibot miingon: “Sa dihang mangawas kamo sa bus, ang matag usa kaninyo, apil ang mga bata, sa walay pagkapakyas miingon kanako, ‘Salamat kaayo.’ Kadto nakahatag nakog dakong kalipay!” Diha sa laing kombensiyon, ang atendant sa duol nga estasyon sa tren miingon sa Saksi: “Dako kaayong kagubot ang nahitabo sa miaging tigom sa 12,000 ka tawo nga gihimo sa Osaka Castle Hall.” Apan siya mipadayon sa pag-ingon: “Kamo tinuod gayod nga mahapsay, ug kami nahupayan. Palihog ipadangat ang among mga pangomosta sa nagdumala.”
19. Ang matag usa kanato kinahanglang determinado sa pagbuhat ug unsa mahitungod sa pamatasan?
19 Unsay gipakita sa maong mga komento? Nga ang mga Saksi ni Jehova sa katibuk-an ‘nagagawi diha sa paagi nga takos sa maayong balita mahitungod kang Kristo.’ Komosta kita sa tinagsa-tagsa? Ingong mga anak nga nagatan-aw sa mahigugmaong amahan, hinaot kitang tanan, batan-on ug tigulang, magatan-aw sa atong langitnong Amahan, si Jehova, aron kita matudloan nga mahimong maayog-pamatasang mga tawo, bisan diha sa kalibotang walay-batasan.—Deuteronomio 8:5; Proverbio 3:11, 12.
Nakahinumdom Ka Ba?
◻ Nganong gikinahanglan ang maayong pamatasan ingong bahin sa maayong paggawi?
◻ Unsang maayong pamatasan ang angay diha sa atong dapit sa pagsimba?
◻ Sa unsang paagi ang maayong pamatasan ikapasundayag diha sa pag-alagad sa kanataran?
◻ Sa unsang paagi makatabang ang mga ginikanan sa ilang mga anak sa pag-ugmad ug maayong pamatasan?
◻ Unsang hataas nga sukdanan sa pamatasan ang paningkamotan natong ituboy?