PANTASMA

Ang Gregong pulong nga phanʹta·sma makita lamang diha sa duha ka asoy bahin sa paglakaw ni Jesus ibabaw sa katubigan sa Dagat sa Galilea paingon sa iyang mga tinun-an nga nagsakay sa usa ka sakayan. (Mat 14:26; Mar 6:49) Ang nalisang nga mga tinun-an gikutlo nga nag-ingon: “Usa ka pantasma!” Ang pulong nga phanʹta·sma gihubad sa lainlaing paagi ingong “espiritu” (KJ), “multo” (AS, AT, RS, Mo), “dili-tinuod nga panan-awon” (La), ug “pantasma” (Da, ED, Dy, Fn, Kx, MR, NW).

Ang usa ka pantasma maoy usa ka ilusyon; usa ka butang nga sa kasamtangan gituohan nga anaa tungod sa napukaw nga paghanduraw o sa uban pang hinungdan apan sa pagkatinuod wala. Aron pasaligan ang mga tinun-an nga dili siya pantasma ug nga siya maoy tinuod gayod, si Jesus miingon: “Ako kini; ayaw kamo kahadlok.”​—Mat 14:27; Mar 6:50.

Busa, lahi kini nga kahimtang sa dihang ang gibanhaw nga si Jesus kalit nga mitungha diha sa taliwala sa iyang mga tinun-an, nga tungod niana ilang gihunahuna nga sila nakakita ug “espiritu [Gr., pneuʹma].” (Luc 24:​36, 37) Ang mga pulong ni Jesus niini nga kahimtang dayag nga wala isulti aron lamang patuohon sila nga siya tinuod gayod kondili aron pasaligan sila nga siya nagpakita kanila ingong tawhanong unod ug dili ingong espiritu; busa, siya miingon kanila nga “hikapa ako ug tan-awa, tungod kay ang usa ka espiritu walay unod ug mga bukog ingon sa inyong nakita nga ania kanako.” (Luc 24:38-43; itandi ang Gen 18:1-8; 19:1-3.) Busa, sila dili angayng mahadlok, sama sa gibati ni Daniel tungod sa katingalahang pagpakita sa manulonda diha sa usa ka bug-os lahi nga kinaiyahan. (Itandi ang Dan 10:4-9.) Ang maong kahimtang lahi usab kaayo niadtong kang Saulo sa Tarso, nga sa ulahi nabuta tungod sa pagpakita ni Jesus kaniya diha sa dalan paingon sa Damasco.​—Buh 9:1-9; 26:12-14; tan-awa ang PAGKAUSAB SA DAGWAY; PANAN-AWON.