Gugma Alang sa Diyos—Ang Puwersa Alang sa Maayong Moral
ANG mga tawong makataronganon moadmiter dayon nga kinahanglang sugpoon ang imoralidad. Sumala sa pagkapahayag niana sa ministro sa United Church sa Canada: “Ang resulta, dihang isalikway sa mga indibiduwal ug katilingban ang moral nga kasugoan, makalilisang: mga gubat, implasyon, Watergate, ug anarkiya.” Sumala sa gipakita sa nag-unang artikulo, ang dagkong mga relihiyon ning kalibotana napamatud-ang dili malig-ong puwersa alang sa maayong moral. Busa kon kita sa tinagsatagsa buot magkinabuhi ug mahinlong mga kinabuhi, angay nga motan-aw kita sa laing awtoridad nga nakahatag sa ingon nga puwersa ug dayon andam sa pagsunod nianang awtoridara.
Ang impluwensiya niining kinalabwang awtoridad nakita diha sa usa ka hitabo sa kinabuhi ni Jose, usa ka Hebreohanong administrador alang sa opisyal sa korte sa Ehipto. Dihang gidani sa asawa sa opisyal sa pakigrelasyon kaniya, mibalibad si Jose, ug miingon: “Unsaon ko paghimo kining dakong pagkadaotan ug makasala batok sa Diyos?” (Genesis 39:7-9) Ang pag-ila sa awtoridad sa Diyos ug sa tinguhang mopahimuot kaniya mao ang nakahatag kang Jose ug moral nga kalig-on sa pagbalibad sa mga pagpangarinyo sa asawa sa opisyal.
Sa milabay ang duha ka gatos ka tuig, ang nasod sa Israel, nga mga kaliwat sa amahan ni Jose, si Jacob, nakadawat ug Napulo ka Sugo ingong bahin sa Kasugoan nga gihatag pinaagi kang Moises. Samtang ang paglapas miresultag kasuko ni Jehova nga Diyos, ang pagsunod sa Kasugoan miresultag mga panalangin sa Diyos. Busa kining mga sugoa nagsilbi ingong moral nga giya alang sa nasod.
Ang Napulo ka Sugo—Usa ka Puwersa Alang sa Kaayohan
Unsa ka dakong puwersa ang Napulo ka Sugo? Ang ilang impluwensiya mabati gihapon bisan ning ika-20ng siglo. Sa 1962 ang gobernador-heneral niadto sa New Zealand miingon: “Nagtuo ako nga naghunahuna ang ubang tawo nga wala na sa uso ang Napulo ka Sugo. Apan hinungdanong bantayan natong tanan kini sa pagkamatinumanon karon, ang ordinaryong balaod sa yuta wala na kinahanglana.”
Apan, diha sa kolokabildo sa usa ka batan-ong magmamandong Hudiyohanon, gipakita ni Jesu-Kristo nga labaw pa ang gikinahanglan kay sa pagsunod lang sa Napulo ka Sugo. Ang batan-ong lalaki nangutana: “Unsa bay maayong buhaton ko aron mabatonan ko ang kinabuhing dayon?” Dihang miingon si Jesus nga kinahanglang “tumanon niya kanunay ang mga sugo,” sunodsunod nga gihisgotan ang pipila sa Napulo, ang magmamando mitubag: “Kining tanan ako nang nahimo; unsa pay nakulang kanako?” Si Jesus mitubag: “Lumakaw ka ug ibaligya ang tanan nimong kabtangan ug panghatag sa kabus ug makabaton kag bahandi didto sa langit, ug unya umanhi ka ug sumunod kanako.” Ang asoy nagpadayon: “Ug sa pagkadungog niini sa batan-on, siya mipahawa nga masulob-on, kay daghan man siyag katigayonan.”—Mateo 19:16-22.
Ang kaamgid nga asoy nga ikatandi niini mao kanang anaa sa Lucas 10:25-28 nga makatabang kanato sa pagsabot sa pangunang problema sa batan-ong magmamando. Atong mabasa: “Dihay usa ka tawo nga batid sa Balaod nga mitindog, aron sa pagsulay kaniya [Jesus], ug miingon: ‘Magtutudlo, unsa may akong buhaton aron makapanunod ako sa kinabuhing dayon?’” Gitabangan siya ni Jesus sa pagtimbangtimbang sa maong butang, ug ingong resulta, ang tawo nakatubag sa iyang kaugalingong pangutana, ang diwa nagaingon: ‘Higugmaa si Jehova nga Diyos uban sa tibuok mong kasingkasing, sa tibuok mong kalag, sa tibuok mong kusog, ug sa tibuok mong hunahuna, ug higugmaa ang imong silingan sama sa imong kaugalingon.’ Dayon si Jesus mitapos: “Buhata kini ug mabuhi ka.”
Nakita na ba nimo karon ang suliran sa batan-ong magmamando nga gihisgotan sa sinugdan? Ang iyang gugma alang sa Diyos ug sa silingan natabonan sa iyang gugma sa materyal nga mga kabtangan. Pagkamakasubo! Bisan pa sa iyang paningkamot sa pagbantay sa Napulo ka Sugo, siya nameligro nga mawad-an sa kinabuhing dayon.
Unsay Kahulogan sa Gugma Alang sa Diyos?
Kita nagkinabuhi sa panahon diin ang gugma alang sa Diyos ug sa silingan napulihan sa gugma sa kaugalingon, sa materyal nga mga kabtangan, ug sa sekso. Ngani, bisan ang pagtuo sa Diyos ingong Maglalalang gipulihan diha sa daghang mga hunahuna ug pagtuo sa walay-kalig-onang teoriya sa ebolusyon. Unsay nakapatungha niining tanan?
Sulod sa daghang kasiglohan, ang klero sa Kakristiyanohan migamit ug dili-Biblikanhong doktrina sa makalilisang nga impiyernong kalayo sa pagsulay sa pagkontrolar sa mga moral sa katawhan. Ang Encyclopedia International miingon: “Ang labing kusgang puwersa alang sa kaayohan sa ordinaryong mga tawo sa Edad Media sa tino mao ang kahadlok sa impiyerno, nga nagpahimo bisan sa mga Hari ug mga Imperador nga masundanon sa Iglesya, ug tingali mao lamang ang nakapugong sa ilang mapatuyangong mga kailibgon.” Ang doktrina sa impiyernong kalayo nakamugnag impresyon nga dili-mahigugmaon ang Diyos, dili-maluloy-on, ug mapanimaslon. Bisan pa nga nahimo ang doktrina nga usa ka pugong sa pila ka tawo, nakapahilayo kini sa daghang mga tawo gikan sa Diyos, nga nagbilin kanilang masayon nga mga biktima sa dili-kasulatanhong mga doktrina ug mga teoriya, sama nianang sa ebolusyon.
Apan, ang Bibliya, wala magtudlo nga nagasakit ang Diyos sa mga kalag diha sa impiyernong kalayo. Hinunoa, gisultihan kita ni apostol Juan: “Ang Diyos gugma.” “Siya kasaligan ug makataronganon nga tungod niana mopasaylo siya sa atong mga sala.” Si Moises misulat: “Si Jehova, usa ka Diyos nga maluloy-on ug mapuanguron, mahinay sa kasuko ug dako sa mahigugmaong-kalulot ug kamatuoran.” (1 Juan 4:8; 1:9; Exodo 34:6) Pipila lamang kini sa katingalahang mga hiyas sa Diyos. Kini makadani kanato ngadto kaniya. Kadtong mga hiyasa, ilabina ang iyang gugma, maoy nagtukmod kanato sa paghigugma kaniya. “Alang kanato, kita nahigugma, tungod kay siya man ang unang nahigugma kanato.” (1 Juan 4:19) Kining gugmaha alang sa Diyos mao ang labing dakong puwersa alang sa maayong moral; kini motultol sa kinabuhing dayon!
Ang tinuod nga gugma alang sa Diyos dili kay sa hunahuna lamang. Mopalihok kini sa tawo sa laing interes. Gilista ni apostol Pablo ang daghang mga paagi nga ikapakita kining gugmaha. Sa paghisgot sa pila: “Ang gugma hataas ug pailob ug maluluton. Ang gugma dili abughoan, dili manghambog, dili magpaburot, dili mogawing dili maligdong, dili mangita sa kaugalingong kaayohan, dili masuko.” (1 Corinto 13:4, 5) Ang atong pagpasundayag niining gugmaha maoy usa ka pagsulay sa pagsundog sa atong langitnong Amahan. Si Jesus miingon: “Niining duha ka sugo [higugmaa ang Diyos ug ang silingan] nagasukad ang tibuok nga Kasugoan ug ang mga Propeta.” (Mateo 22:40, An American Translation) Sa laing pagkasulti, kon ipakita nato kining gugmaha, dili kita mangawat sa atong silingan o magapatay kaniya o manapaw sa iyang asawa. Miuyon si apostol Juan, nga nag-ingon: “Kay ang paghigugma sa Diyos mao kini, nga pagabantayan ta ang iyang mga sugo.”—1 Juan 5:3.
Gugma Alang sa Diyos Usa ka Puwersa Alang sa Kaayohan
Matikdi ang epekto sa gugma sa Diyos diha sa unang mga Kristohanon, sumala sa gipakita ni Tertullian, sa ikaduhang siglo. Iyang gihagit ang iyang mga kaaway sa pagtudlo ug usa ka Kristohanon taliwala sa ilang mga kriminal. Sanglit walay ikatudlo, siya midugang: “Nan, kami, lamang ang mga walay kalapasan.” Gilabanan kining puntoha sa librong The Old Roman World, nga nag-ingon: “Kami may pamatuod sa ilang walay buling nga mga kinabuhi, sa ilang dili-masaway nga mga moral.” Dugang pa, ang Christianity Today mikutlo sa manalaysay sa iglesya nga si Roland Bainton: “Sukad sa yugto sa kataposan sa Bag-ong Testamento hangtod sa dekadang 170-180 wala gayoy ebidensiya nga misulod ang mga Kristohanon sa pagkasundalo.” Ang gugma alang sa Diyos ang nagpalihok kanila sa pagsunod kaniya pinaagi sa pagpuyo diha sa mahinlog moral nga mga kinabuhi. Apan, basin ug mahibulong ka, ‘Aduna bay ebidensiya ning mapuslanon nga moral nga puwersa karon?’
Sa pagkatinuod, aduna! Ang kolumnista sa mantalaan si Mike McManus misulat diha sa Herald & Review nga siya wala pa gayod makadungog sukad ug sermon batok sa sekso sa dili pa magminyo. Sa milabay ang usa ka bulan siya mitaho nga taliwala sa mga sulat nga nadawat ingong pagsanong mao ang usa nga gikan sa 14-anyos, nga usa sa mga Saksi ni Jehova, kinsa misulat: “Ang paghunahuna lamang niining mananakod nga sakit igo na sa pagsanta sa kadaghanang mga tawo [batok sa sekso sa dili pa magminyo]. Apan ang katarongan nga nagpalayo ang mga Saksi mao nga gisugo kita ni Jehova sa paglikay gikan sa pakighilawas.” (Italiko amoa.) Mikomento sa sulat, si McManus nangutana: “Pila ka 14-anyos sa inyong kongregasyon ang makakutlo sa matin-aw kang San Pablo (1 Cor. 6:18)?”
Ang samang prinsipyo sa pagbantay sa mga sugo ni Jehova, nga gikutlo niadtong batan-ong babaye, aplikado sa mga Saksi sa ubang mga dapit. Ang diwa sa pila ka sugo sa Diyos nga narekord sa Kasulatan mao: ‘Magmatinuoron sa tanang butang,’ ‘Likayi ang mga diyosdiyos,’ ‘Likayi ang dugo ug pakighilawas,’ ‘Magmatinud-anon,’ ‘Bansaya ang inyong mga anak sa mga dalan sa Diyos.’ (Hebreohanon 13:18; 1 Juan 5:21; Buhat 15:29; Efeso 4:25; 6:4) Nakamatikod ka bag mga Saksi ni Jehova sa inyong mga kasilinganan o sa dapit sa trabahoan nga nagapaningkamot sa pagbantay niining mga sugoa? Natingala ka ba kon nganong gihimo nila kini, nganong dili sila magpaabuno ug dugo, nganong dili sila moapil sa gubat, nganong nagaduaw sila sa inyong balay, sa mubo, nganong lahi sila? Ang ilang gugma alang sa Diyos mao ang tubag.
Ang Gugma Dili Gayod Mapakyas
Nagatinguha sa pagpahimuot sa Diyos, gisilsil sa kasingkasing sa mga Saksi ni Jehova ang tambag: “Usba ninyo ang inyong kaugalingon pinaagi sa pagbag-o sa inyong salabotan, aron inyong masuta kon unsa ang maayo ug hinangponon ug hingpit nga kabubut-on sa Diyos.” (Roma 12:2) Dihang mahibaloan nila ang “kabubut-on sa Diyos” alang kanila, buhaton nila kana. Ang ilang gugma alang sa Diyos mao ang puwersa sa likod ning maong tinguha. Gibati ba nimo nga katingad-anan kini, dili-praktikal sa atong panahon? Palandonga sa makadiyut ang mosunod nga aktuwal nga mga hitabo.
Balik sa 1963, si José, sa São Paulo, Brazil, nakig-ipon kang Eugênia, nga minyo na. Dihang milabay ang duha ka tuig, misugod sila sa pagtuon sa Bibliya uban sa mga Saksi ni Jehova. Gikan ning maong pagtuon ilang nakat-onan nga nagkinahanglan ang Diyos nga ang “kaminyoon angay nga dungganon alang sa tanan.” (Hebreohanon 13:4) Ilang naamgohan nga kinahanglang magpakasal sila, apan walay balaod ang Brazil sa diborsiyo nga mahimong magpakasal si Eugênia kang Jose. Apan, sa 1977, dihang gipakanaog ang balaod sa diborsiyo, sa 1980 nakahimo sila sa pagpakasal, gituman ang mga kinahanglanon sa Diyos. Ang ilang gugma alang sa Diyos adunay balos.
Nakatilaw na si Inire sa tanang matang sa droga diha sa New York. Nag-ipon siya sa pagpuyo sa iyang trato, si Ann. Nagkinahanglan ug kuwarta, gisugo ni Inire si Ann sa pagpadalag iyang mga letrato ngadto sa iladong magasin alang sa mga lalaki. Gitanyagan siya ug dakong kantidad nga salapi sa pagpaletrato nga maghubo. Kasamtangan, misugod si Inire sa pagtuon sa Bibliya uban sa mga Saksi ni Jehova, ug sa ulahi miapil si Ann. Mihunong si Inire sa paggamit ug mga droga. Tapos sa tulo ka semana sila, sa kinabubut-on, midesider sa pagpakasal. Dayon, nahibalo gikan sa Bibliya nga kinahanglang maligdong mamiste ang mga Kristohanon, midesider si Ann nga dili siya makapakuhag letrato, bisan pila pay ibayad. (1 Timoteo 2:9) Unsa sa imong hunahuna ang nakatukmod sa maong mga kausaban? Si Ann miingon nga dihang iyang nahibaloan nga ang pagkahimong usa sa mga Saksi ni Jehova dili kay pakig-anib lamang ug relihiyon kondili nalangkit ang pagkinabuhig usa ka kinabuhi nga debotado sa Diyos, siya nahibalo nga kinahanglang mohimo dayon siyag mga kausaban sa madali. Sa pagkatinuod, ang gugma alang sa Diyos maoy usa ka kusganong puwersa alang sa kaayohan.
Tingali may maghunahuna, ‘Buweno, panagsa ra kining mga hitaboa.’ Apan dili. Samang mga kausaban ang nahitabo sa daghang panahon diha sa mga dapit nga aktibo ang mga Saksi ni Jehova. Nganong dili kini susihon sa dugang pa? Pamatud-i sa imong kaugalingong nga ang gugma alang sa Diyos sumala sa ginapakita sa tinuod nga relihiyon sa gihapon mao ang puwersa alang sa maayong moral.
[Blurb sa panid 6]
Mahitungod sa unang mga Kristohanon, ang librong “The Old Roman World” nag-ingon: “Kami may pamatuod sa ilang walay buling nga mga kinabuhi, sa ilang dili-masaway nga mga moral.” Unsa ang puwersa sa likod sa ilang “dili-masaway nga mga moral”?
[Hulagway sa panid 7]
Ang gugma sa Diyos makatabang kanimo sa pagsukol dihang tentalon sa paghimog daotan