13. Nganong ang mga Kristohanon nakaarang pagtuman sa pasidaan ni Jesus sa pagkalagiw?

¹³ Apan kon ang mga Romano misibog gikan sa paglikos sa Jerusalem, nganong kinahanglan pang mokalagiw? Ang mga pulong ni Jesus nagpakita nga ang hitabo nagpamatuod ‘nga ang kalaglagan sa Jerusalem haduol na.’ (Lucas 21:20) Oo, kalaglagan. Siya nagtagna ug ‘usa ka dakong kasakitan nga ang ingon niana wala pa mahitabo sukad sa sinugdan ug dili na mahitabo pag-usab.’ Mga tulo ug tunga ka tuig sa ulahi, niadtong 70 K.P., ang Jerusalem aktuwal nga nakasinatig “dakong kasakitan” gikan sa Romanong kasundalohan ubos ni Heneral Tito. (Mateo 24:21; Marcos 13:19) Apan, nganong si Jesus mibatbat niini ingong usa ka kasakitan nga mas dako pa kay sa bisan unsang nahitabo una o sukad niini?

14. Nganong ikaingon nato nga ang nahitabo sa Jerusalem sa 70 K.P. mao ang “dakong kasakitan” nga ang ingon wala pa mahitabo kaniadto ni nahitabo sukad?

¹⁴ Ang Jerusalem gilaglag sa mga Babilonyanhon sa 607 W.K.P., ug ang siyudad nakaagig makalilisang nga panag-away sa atong presenteng siglo. Sa gihapon, ang nahitabo niadtong 70 K.P. maoy talagsaong dakong kasakitan. Sulod sa mga lima ka bulan nga pag-atake, gipildi sa mga manggugubat ni Tito ang mga Hudiyo. Sila nakapatay ug mga 1,100,000 ug nakadalag mga 100,000 sa pagkabihag. Dugang pa, gigun-ob sa mga Romano ang Jerusalem. Kini nagpamatuod nga ang Hudiyohanong sistema nga kanhi inuyonang pagsimba nga nasentro sa templo gitapos na sa dayon. (Hebreohanon 1:2) Oo, ang mga hitabo sa tuig 70 K.P. tukmang maisip nga ‘kasakitan nga ang ingon niana wala pa mahitabo [nianang siyudara, nasod, ug sistema] sukad sa sinugdan sa kalibotan, dili, ni mahitabo pa kini pag-usab.’​—Mateo 24:21.d

Ang kasakitan sa 70 K.P. maoy kinadak-an nga naagoman sa Jerusalem ug sa Hudiyohanong sistema