Sa dihang moabot kanang maong kritikal nga panahon, unsa unyay imong baroganan? Biyaan ba unya ikaw sa kalaglagan, o kuhaon ka alang sa kaluwasan? Aron matultolan ka sa hustong direksiyon, palandonga pag-usab ang usa ka ilustrasyon nga gihatag ni Jesus: “Diin gani ang patay, atua usab didto managtapok ang mga agila.”​—Lucas 17:34-37; Mateo 24:28.

Busa gipasiugda ni Jesus ang panginahanglan sa paglantaw sa layo, nahiusang aksiyon. Kadtong kuhaon alang sa kaluwasan mao sila kadtong regular nga nakigtigom ug nakapahimulos gikan sa espirituwal nga pagkaon nga gitagana sa Diyos. Minilyon ang nakasinati nga ang among espirituwal nga pagpakaon makuha pinaagi sa suod nga pagpakig-uban sa usa sa kapin sa 55,000 ka kongregasyon sa mga Saksi ni Jehova ug pinaagi sa pagtuod sa gipasukad sa Bibliya nga mga publikasyon sama niining imong gibasa.

Mga Agila ba o mga Buwitre?

Ang Ilhanan

“DIIN gani ang mga patay, atua usab didto managtapok ang mga agila.” (Mateo 24:28) Inay magtuon gikan niining maong sambingay, gipangitaan kinig sayop sa pipila. Sila moingon nga limpiyong mangangayam ang mga agila nga mokaon sa buhi nga biktima, dili mga patay. Busa, gigamit sa ubang Bibliya ang pulong “mga buwitre.” Apan ang Gregong pulong nga gikuwestiyon, a·e·tosʹ, tukmang gihubad “agila.”

Ang usa ka espisye nga makita sa Israel mao ang kapehog kolor nga agila. “Sama sa daghang mga langgam nga mangdadagit,” miingon si John Sinclair ug John Mendelsohn, “ang kapehog kolor nga agila gusto usab ug dunot nga unod ug kanunay mag-una sa pag-abot diha sa bag-ong mga patayng mananap.” Lain pa ang mitaho nga nakakitag pundok sa 60 ka bateleurs ug kapehog kolor nga mga agila sa Kalahari sa Aprika. Siya midugang: “Ang Kapehog-kolor nga Agila mangibabaw kon sila mag-abot diha sa dunot nga unod. Sa daghang mga kahimtang duha ka langgam, tingali usa ka parisan, nakitang nagsalohay sa usa ka patayng lawas.”

Ang mga agila sa dagat komun usab diha sa mga yuta sa Mediteraneo. Sa nangaging mga siglo, ang mga agila sa dagat ug ang mga agila sa mamala tigkaon sa mga patayng lawas sa mga kabayo nga nangamatay sa gubat. “Ilado nga . . . sila mosunod sa mga sundalo alang sa maong mga katuyoan,” miingon ang McClintock and Strong’s Cyclopedia.

Sanglit kusog nga molupad ug layog-panan-aw, ang mga agila usahay mao ang unang Ianggam nga moabot sa bag-ong patayng lawas. Sinati si Jesus sa hubit nga gipangutana ni Jehova nga Diyos kang Job niining pangutanang makapahimong mapaubsanon. “Maglupad ba ang agila sa itaas tungod sa imong pagmando ug nagatukod ug salag diha sa itaas, . . . diha sa gingi sa usa ka bato ug sa pangpang? Gikan didto siya magalantaw sa dalagiton; ang iyang mga mata nagtan-aw niana gikan sa halayo. . . . Hain gani ang mga patay, atua siya didto.”—Job 39:27-30.

Busa, tukma ang pagkailustrar ni Jesus nga kadto lamang dunay mahulgawayong mata sa agila ang makapahimulos gikan sa ilhanan.