Tungod Kay Siya Nag-ampo

DIHA sa 1 Tesalonica 5:17, 18, si apostol Pablo miingon: “Pag-ampo kamo kanunay. Magmapasalamaton kamo sa tanang butang. Kay kini mao ang kabubut-on sa Diyos diha kang Kristo Jesus alang kaninyo.” Apan, ikaw ba usahay magpanuko sa pagpasalamat sa dihang mokaon sa usa ka publikong dapit, sama sa usa ka restawran? Tungod sa pasidaan ni Jesus batok sa pagpakaaron-ingnong pag-ampo, hisabtan nga tingali gustong maglikay ang tawo nga makadani siya ug wala kinahanglanang pagtagad. (Mateo 6:5, 6) Bisan pa niana, ang pag-ampong gitanyag nga maalamon sa pagkamatuod mahimong makadani ug paborableng pagtagad.

Kini mao ang kasinatian sa usa ka batan-ong ministro nga nag-alagad sa Brooklyn Bethel, ang tibuok yutang hedkuwarter sa mga Saksi ni Jehova. Siya namahaw diha sa usa ka restawran, nagplano sa pag-adto sa iyang lokal nga kongregasyon ug makigtagbo sa usa ka grupo nga makig-ambit sa kalihokang pagsangyaw sa Gingharian. Sa dihang miabot na ang iyang pamahaw, siya nag-ampo sa iyang naandang paagi. Sa pagbuka niya sa iyang mga mata, nakita niya ang silbidora nga nagtindog ug mitutok kaniya.

“Nag-ampo ka, dili ba?” siya nangutana. Sa dihang siya mitubag nga oo, siya miingon: “Tingali usa ikaw sa mga Saksi ni Jehova. Ang akong mga ginikanan mga Saksi usab. Wala lang kaayo ako magpalangkit sa ilang relihiyon, apan ako nahibalo nga angay gayod. Tingali maayo nga mosuskriber ako sa The Watchtower ug Awake! Ako ba makabaton niana gikan kanimo?”

“Hapit akong matuk-an sa pagkaon,” nahinumdom ang batan-ong igsoon. Bisan pa niana, siya nakapahimutang ug duha ka suskrisyon ug sa kinabag-ohang duha ka magasin kaniya ug naghikay alang sa usa ka pagbalik duaw—ang tanan tungod kay siya nag-ampo.