Dili-Takos nga Kalulot sa Diyos—Ayawg Kawanga ang Katuyoan Niini!

“ANG paghisgot sa relihiyon . . . mao gayod ang trabaho sa pastor,” mipahayag ang usa ka sakop sa simbahan. (Italiko amoa.) Ang uban miadmitir, “Diyutay ra ang mga Kristohanon nga naningkamot sa pagpakig-ambit sa ilang pagtuo sa uban.” (Italiko amoa.) Kanang mga pamahayag tin-awng nagapasiugda nga alang sa kinabag-an sa mga hinimba karong adlawa, ang Kristiyanidad katumbas sa labaw ug diyutay sa pasibo nga pagtuo sa Diyos ug kang Kristo ingong Mesiyas.

Unsa ang imong hunahuna? Ang mga tinun-an ni Jesus nakig-ambit sa ilang pagtuo sa uban. (Lucas 8:1) Ang mga Kristohanon ba karong adlawa nagabuhat niana? O kon ang Diyos wala na magbaod sa nag-angkong mga Kristohanon nga mahimong mga ebanghelista, unsay iyang gidahom kanila? Ang Diyos ba may katuyoan alang sa mga Kristohanon karong adlawa? Oo! Ug tungod niini, ang pasidaan ni apostol Pablo ngadto sa mga Kristohanon sa Corinto nga dili “dawaton ang dili-takos nga kalulot sa Diyos ug kawangon ang katuyoan niini” dunay kahulogan alang kanato. (2 Corinto 6:1) Atong tan-awon kon ngano.

Katuyoan sa Diyos Nailhan

Sama kang Pablo, gidawat sa mga Kristohanon sa Corinto ang halad lukat ni Jesu-Kristo. Tungod sa ilang pagtuo sa maong tagana, gipahayag silang matarong ni Jehova. Ang pagdawat nila sa mga kamatuoran bahin sa Mesiyas nga nadawat pinaagi sa ministeryo ni Pablo nagluwas kanila gikan sa pagkaulipon ngadto sa bakak, pagano, ug imoral nga mga buhat nga ilado niana ang karaang Corinto. Alang kanila, ang dili-takos nga kalulot ni Jehova nagkahulogan sa ilang kaluwasan. Ugaling, ang mao bang dili-takos nga kalulot walay katuyoan?

Dili. Hinunoa, ang katuyoan ni Jehova sa pagluwas kanila maoy sama sa iyang katuyoan sa pagluwas kang Pablo gikan sa dili-kasulatanhong mga tradisyon sa katigulangan ni Pablo. Si Pablo mismo nagtin-aw sa maong katuyoan: “Ako nahimong usa ka ministro niini sumala sa walay-bayad nga gasa sa dili-takos nga kalulot sa Diyos nga gihatag kanako . . . nga akong igapahayag ngadto sa kanasoran ang maayong balita mahitungod sa dili-matugkad nga bahandi ni Kristo.” (Efeso 3:7, 8; itandi ang Galacia 1:15, 16.) Ang katuyoan sa dili-takos nga kalulot sa Diyos mao nga sagopon sa iyang mga alagad ang matuod nga pagsimba—nga bayawon ang iyang ngalan, si Jehova, ug ipahibalo kini diha sa Kristohanong ministeryo, sama sa gihimo ni Pablo.—Roma 10:10.

Ugaling lamang, sa gisulat ni Pablo ang una niyang sulat ngadto sa mga taga-Corinto, dayag nga daghan kanila ang nagkawang sa katuyoan sa dili-takos nga kalulot sa Diyos. Sa unsang paagi? Inay ipadayon ang usa ka matang sa pagsimba nga mahinlo ug dinawat sa panan-aw sa Diyos, gitugotan nila nga mahabol ang ilang mga sentido tungod sa imoral nga impluwensiya sa mga molupyo sa Corinto. Ang mga kabingkilan ug pakighilawas gitaho sa ilang taliwala. (1 Corinto 1:11; 5:1, 2) Ang kinabag-an niadtong nakig-uban sa kongregasyon napasig-uli tungod sa tambag ni Pablo. Bisan pa niana, dili buot ni Pablo nga makabaton silag mga kabaldahan sa Kristohanong ministeryo. Busa, sa ulahi sila iyang gipahinumdoman nga dili “dawaton ang dili-takos nga kalulot sa Diyos ug kawangon ang katuyoan niini.”—2 Corinto 6:1.

Usa ka Karaang Panig-ingnan

Ang usa ka kahimtang nga susama niini naugmad kasiglohan nga miagi. Sa tingpamulak sa 537 W.K.P., gipagawas ni Jehova nga Diyos ang pinili niyang nasod sa Israel gikan sa pagkabihag sa Babilonya pinaagi sa Persianong hari si Ciro. Ang katuyoan sa pagpagawas kanila gipaila ni Ciro mismo sa mosunod nga balaod: “Si bisan kinsa sa tibuok niyang katawhan, hinaot ang iyang Diyos magauban kaniya. Busa paadtoa siya sa Jerusalem, nga anaa sa Juda, ug patukora sa balay ni Jehova ang Diyos sa Israel.”—Esdras 1:1-3.

Oo, kadto maoy tinudlong panahon ni Jehova nga mapasig-uli ang matuod nga pagsimba ngadto sa yuta sa Juda. Tungod sa dili-takos nga kalulot ni Jehova, kadtong nahibalik nga mga Hudiyo nakapribilehiyo sa pagtukod pag-usab sa iyang templo sa Jerusalem. Lau gidawat ang hagit, ang namalik nga mga distiyero nanimuyo sa ilang yutang-natawhan ug nagsugod sa buluhatong pagpasig-uli sa templo.—Esdras 1:5-11.

Hinuon, sa mubong panahon, gitugotan sa maong namalik Hudiyong nasod nga mohunong ang ilang buluhaton tungod sa pagsupak gikan sa gawas. Inay nga itisok sa tin-aw sa hunahuna ang katuyoan sa pagpahigawas kanila, sila nagsugod sa pag-ingon: “Miabot na ang panahon, ang panahon sa balay ni Jehova, aron kini pagatukoron.” (Haggeo 1:2) Ingong sangpotanan, ang buluhaton sa pagtukod pag-usab napasagdan sa bug-os sulod sa mga 16 ka tuig.

Kasamtangan, sila napuliki sa mahakogong mga pangagpas, nga labi pang nagpasiugda sa materyal nga mga butang, unodnong kaharuhay, inay sa pagtukod pag-usab sa sagradong balay ni Jehova. (Haggeo 1:3-9) Sa Haggeo 1:4 atong mabasa: “Panahon na ba nga kamo magapuyo sa inyong kinasamihan nga mga balay, samtang kining balaya nagapabiling guba?” Ang balay sa pagsimba ni Jehova nagpabiling “guba,” uban sa patukoranan lamang, samtang ang mga Hudiyo nagpuyo sa ilang mga balay nga maayog atop uban sa mga bungbong niana nga hinapinan sa nindot nga kahoy.

Pinaagi sa iyang mga propeta si Haggeo ug si Zacarias, si Jehova nagpahinumdom sa mga Hudiyo sa katuyoan sa pagpagawas kanila, ug ang buluhaton sa pagtukod pag-usab sa kadugayan nahuman. Hinuon, kadtong nagpadayon sa pagtamod sa materyal nga mga butang nga labaw kay sa pribilehiyo nga makakitang mapasig-uli ang matuod nga pagsimba sa Jerusalem tin-awng nagkawang sa katuyoan sa dili-takos nga kalulot sa Diyos.

Katuyoan sa Atong Kaluwasan

Unsay atong matun-an karong adlawa gikan sa panig-ingnan sa mga Hudiyo nga gipasig-uli niadtong 537 W.K.P. ug gikan sa mga Kristohanon sa Corinto sa adlaw ni Pablo? Ingong dedikadong mga alagad ni Jehova nga Diyos, kita nakasinati usab ug kaluwasan. Pinaagi sa iyang dili-takos nga kalulot, kita wala na maulipon sa bakak nga mga doktrina ug mga tradisyon sa Dakong Babilonya o sa pagkadaotan niining daang sistema sa mga butang. (Juan 8:32; 2 Corinto 4:4-6) Ang maong kaluwasan, ingon man ang kagawasan nga dala niini, nagahatag kanatog higayon sa pagpakita sa Diyos sa atong pagpabili sa iyang gugma alang kanato. (1 Juan 4:9) Sa unsang paagi?

Pinaagi sa dili nato pagkawang sa katuyoan sa dili-takos nga kalulot sa Diyos. Kini sama alang niadtong unaunang mga alagad ni Jehova, nga angay natong buhaton ang matuod nga pagsimba. Karong adlawa, sama sa adlaw ni Pablo, kini nagkahulogan nga kita angay “magapahayag ngadto sa kanasoran sa maayong balita mahitungod kang . . . Kristo.” (Efeso 3:8) Busa, ang tanan nga nagadawat sa dili-takos nga kalulot sa Diyos kinahanglang makig-ambit sa Kristohanong ministeryo. Kini nagkahulogan nga ingong dedikadong mga alagad ni Jehova nga Diyos, kita may responsabilidad sa pagpaila sa kamatuoran sa uban, sa pagpadako ug pagdayeg sa ngalan sa Diyos, ug sa pag-alagad kaniya diha sa pagsimba nga mahinlo ug balaan.—Mateo 28:19, 20; Hebreohanon 13:15; Santiago 1:27.

‘Ayawg Kawanga ang Katuyoan Niini’

Posible ba nga may bisan kinsa kanato, sama niadtong unang mga Kristohanon, nga nameligro nga ‘nagkawang sa katuyoan’ sa dili-takos nga kalulot sa Diyos? Oo. Sama kanila, daghan kanato, diha sa trabaho o sa tunghaan, kinahanglang makig-uban sa mga tawong nagabuhat sa seksuwal nga imoralidad, pagpangawat, pagpamakak, ug paglimbong, ingon man sa ubang butang nga dulumtanan kang Jehova nga Diyos. (1 Corinto 6:9, 10; Galacia 5:19-21) Busa hinungdanon nga likayan nato ang pagpakighugoy sa maong mga tawo, kay basin maugmad nato ang pagkagusto sa butang daotan. (1 Corinto 15:33) Ang maong mga pakighugoy makapaluya lamang sa atong pagtuo. Nga haom, si Pablo misulat kang Tito: “Kay ang dili-takos nga kalulot sa Diyos nga nagadalag kaluwasan sa tanang matang sa mga tawo gikapadayag, nga nagatudlo kanato sa pagsalikway sa pagkadili-diyosnon ug sa kalibotanong mga pangibog ug sa pagkinabuhi uban ang maayong hunahuna ug pagkamatarong ug diyosnong pagkamahinalaron taliwala niining kahikayan karon sa mga butang.”—Tito 2:11, 12.

Ang pipila tingali mohinapos nga sila nagatuman sa ilang ministeryo kon sila nagatambong sa mga tigom sa Kingdom Hall, makig-ambit nga regular sa pagmantala sa maayong balita sa Gingharian sa Diyos, ug dili magbuhat sa bisan unsang matang sa imoral nga kagawian. Ugaling, adunay laing butang pagapalandongon: Si Jesus miingon: “Walay makapaulipon sa duha ka agalon.” (Mateo 6:24) Unsay iyang gipasabot? Nga bisan pag igahin nato ang usa ka bahin sa atong panahon sa pagpauswag sa maayong balita, posible nga ang atong pangunang interes sa kinabuhi mao ang pagpangagpas sa dugang ug dugang sa materyal nga mga butang. Matuod, tingali atong isipon nga makadani gayod ang kalaoman sa bag-ong sistema sa mga butang ilalom kang Kristo Jesus, apan sa samang panahon basin buot natong pahimuslan sa labing maayo kining sistemaha samtang kini nagalungtad pa. Ang maong tinamdan makapatipas lamang kanato gikan sa tinuod nga katuyoan sa pagluwas kanato. Dili ba ang susamang tinamdan bahin sa materyal nga mga pangagpas ang nakapatipas sa napasiug-uling mga Hudiyo gikan sa pagtuman sa katuyoan sa ilang pagkahigawas?

Ang ato bang binuhatan nagapakitang gikawang nato ang katuyoan sa pagluwas kanato gikan niining daotang daang sistema ug sa bakak nga relihiyon niini? Giingnan ni Pablo ang mga taga-Corinto nga “karon mao ilabina ang dalawatong panahon” sa pagtabang sa uban sa pagbatog kaluwasan. (2 Corinto 6:2) Karong adlawa, tungod kay haduol na ang kalaglagan niining daotang sistema, labi pang dinalian ang mga pulong ni Pablo. Samtang dayag nga ang kinabag-an sa mga hinimba karong adlawa mopalabi nga dili makig-ambit sa ilang pagtuo sa uban, ang mga Kristohanon nga nagapadayag ug kinasingkasing nga gugma kang Jehova nga Diyos mag-isip nga usa ka pribilehiyo ang pagpakig-ambit sa bug-os sa Kristohanong ministeryo nga iyang gipabuhat kanila. Ang tanan nga matinumanong nagapahayag sa maayong balita niining dalawatong panahon ug nagaalagad kang Jehova diha sa pagsimba nga mahinlo ug balaan makahimo niana uban ang pasalig nga sila ‘nagdawat sa dili-takos nga kalulot sa Diyos ug wala magkawang sa katuyoan niini.’—2 Corinto 6:1.