Si Jehova Nag-atiman Pag-ayo Kanako

AKO nagsugod sa pag-alagad kang Jehova sa talagsaong paagi, sa ubos nga pagpahayag niana. Nagdako ako sa maanindot nga banika sa layong amihanan sa New Zealand, nga gipuy-an kadaghanan sa katawhang Maori sama kanako. Samtang nagsakayg kabayo usa niana ka adlaw, giduol ako sa dalan sa ig-agaw nakong si Ben. Kadto niadtong 1942, sa tinghunlak (Habagatang Hemispera, tingpamulak sa Amihanang Hemispera). Ako niadto 27 anyos ug aktibong membro sa Iglesya sa Inglaterra.

Sa daghang katuigan si Ben nagbasa sa mga libro ni Huwes Rutherford, presidente niadto sa Watch Tower Bible and Tract Society, ug karon siya may sulat nga gikuptan gikan sa pangunang-buhatan sa Watch Tower Society sa New Zealand nga naghangyo niya sa pagdapit sa lokal nga katawhan ngadto sa usa ka dapit diin sila makasaulog sa tingob sa Panihapon sa Ginoo. Dugang pa, si Ben maoy maghikay nga may usang magdumala sa tigom. Nga mihangad kanako, si Ben miingon: “Ikaw maoy magdumala.” Kay magarbohong giisip nga takos​—ug kay tigkomunyon sa simbahan​—ako misugot.

Sa gabii sa Panihapon sa Ginoo, mga 40 ka tawo nagtigom sa balay ni Ben alang sa pagsaulog sa kamatayon sa atong Ginoo, ug walay usa kanila ang Saksi ni Jehova. Sa pag-abot nako ang akong ig-agaw mitunol kanako sa laraw sa pakigpulong. Gilaktawan ko ang gisugyot nga awit ug gitawag ang bayaw-nga-lalaki ni Ben sa pag-abli pinaagi sa pag-ampo. Dayon ako mipadayon sa pagpahayag sa nalaraw nga pakigpulong, nga gilangkoban sa sunodsunod nga pangutana uban sa mga tubag nga gipasukad sa Kasulatan. Usa ka lokal nga klerigo nga presente misalga nga may mga pagtutol, apan kini sila gitubag pinaagi sa pagbasa sa mga reperensiya sa Kasulatan diha sa laraw.

Ako mahinumdom nga usa sa mga pangutana diha sa laraw maoy kabahin sa panahon sa tuig kon kanus-a saulogon ang okasyon. Pagkamakapatagbaw kadto sa dihang ang tanang presente mitan-aw sa gawas sa bentana ug nakakita nga ang bulan daktol. Tin-aw, ang petsa maoy Nisan 14.

Talagsaon gayod kadtong gabhiona! Ang among saulog milungtad ug upat ka oras! Daghang pangutana ang gipatungha ug gitubag gikan sa Kasulatan diha sa laraw sa Sosyedad. Sa paghinumdom, ako nasayod nga ako dili unta makalabang sa kasinatian kon wala ang mahigugmaong pagtagad ni Jehova​—bisan pag niadto ako dili pa usa sa iyang nagpahinungod nga mga Saksi. Bisan pa niana, niadtong gabii sa Memoryal sa 1942, akong nadiskobrehan ang akong katuyoan sa kinabuhi.

Sayong Kinabuhi

Ako natawo sa 1914. Ang akong amahan namatay mga upat ka bulan una sa akong pagkatawo, ug ako mahinumdom ingon nga bata nga masina sa ubang mga bata nga may mga amahan nga nagmahal kanila. Gihidlaw gayod ako niana. Alang sa akong inahan ang kinabuhi nga walay bana usa ka lisod nga pakigbisog, nga mas gipalisod pa sa layog-abot nga mga epekto sa Gubat sa Kalibotan I.

Ingong batan-on, ako naminyo sa usa ka batan-ong dalaga nga ginganlag Agnes Cope, ug siya maoy akong kaparis sa kinabuhi sulod sa kapig 58 ka tuig. Sa sinugdan kami nanlimbasog nga duha aron magmalamposon sa kinabuhi. Ako pakyas ingong mag-uuma tungod sa grabeng hulaw. Ako nakakaplag ug diyutayng kahupayan diha sa paugnat sa kusog, apan hangtod niadtong kasinatiana sa 1942 nga Memoryal, ako walay tinuod nga katuyoan sa kinabuhi.

Pagsangyaw Ngadto sa mga Paryente

Human niadtong Memoryala, gitun-an ko nga maikagon ang Bibliya, nga gihisgotan uban sa pipila nako ka ig-agaw ang mga basahon sa Bibliya nga gipatik sa Watch Tower Society. Sa Septiyembre 1943 ang pila ka Saksi ni Jehova gikan sa laing dapit miduaw sa among nahilit nga komunidad. Kami may malukpanon, upat-ka-oras nga panaghisgot. Dayon, sa pagkahibalo nga sila mobiya sa pagkabuntag, ako nangutana: “Unsay makapugong kanako aron mabawtismohan karon?” Duha sa akong mga ig-agaw ug ako nabawtismohan sa ala unaimedia sa buntag.

Human niadto, ako sigeg biyahe aron sa pagsangyaw ngadto sa akong mga paryente. Ang pipila madawaton, ug alang kanila akong gipasukad ang akong mga panaghisgot sa Mateo kapitulo 24. Ang uban dili madawaton, ug sa maong mga kaso gigamit ko ang mga pulong ni Jesus ngadto sa mga Pariseo nga nahitala diha sa Mateo kapitulo 23. Hinuon, sa wala madugay ako nakatuon nga mahimong mas mataktikanhon, sa pag-awat sa atong maluluton ug mahigugmaong langitnong Amahan.​—Mateo 5:43-45.

Sa sinugdan ang akong asawa supak sa akong tinguha sa pag-alagad kang Jehova. Bisan pa niana, sa wala madugay siya miduyog kanako, ug niadtong Disyembre 1943 siya nahimong usa ka dedikado, bawtismadong katabang. Miduyog kaniya sa bawtismo niadtong halandumong adlaw mao ang lima pa gikan sa among balangay sa Waima, nga naghimong siyam sa katibuk-ang gidaghanon sa mga magmamantala sa Gingharian niadtong dapita.

Mga Panalangin Bisan pa sa Pagsupak

Sulod sa 1944 kami gibisita na usab sa mga igsoon nga taga laing dapit, ug sa maong panahon gihatag nila ang gikinahanglang pagbansay diha sa pormal balay-balay nga pagsangyaw. Samtang mas nadayag ang among presensiya diha sa komunidad, miusbaw ang pagsupak gikan sa mga hawas sa Kakristiyanohan. (Juan 15:20) Dihay subsob nga mga panagharong batok sa lokal nga mga klerigo, nga misangpot sa tagdugay nga mga panaghisgot bahin sa mga doktrina. Apan si Jehova mihatag ug kadaogan, ug ubang mga sakop sa komunidad, apil ang akong igsoong babaye, nailalom sa mahigugmaong pag-atiman ni Jehova.

Naporma ang usa ka kongregasyon sa Waima sa Hunyo 1944. Midako ang relihiyosong paglutos ug pagdumot. Ang mga Saksi ni Jehova wala tugoti sa paglubong sa lokal nga sementeryo. May panahong nahimong pintas ang pagsupak. May pisikal nga mga panagharong. Ang akong kotse ug ang garahe gisunog. Bisan pa niana, tungod sa panalangin ni Jehova, sa walay tulo ka bulan, nakapalit kami ug usa ka trak. Ug gigamit ko ang ginuyod-sa-kabayo nga karomata sa pagdala sa akong nagdakong pamilya ngadto sa mga tigom.

Ang nagkadaghang mga nakig-uban nagpasabot nga kami may dinaliang panginahanglan sa dakodakong tigomanan, mao nga mihukom kami sa pagtukod ug usa ka Kingdom Hall sa Waima. Kadto ang unang Kingdom Hall nga natukod sa New Zealand. Upat ka bulan tapos maputol ang unang mga kahoy niadtong Disyembre 1, 1949, ang giipong asembliya ug dedikasyon gihimo diha sa bag-o 260-lingkoran nga tigomanan. Niadtong mga adlawa kadto usa ka dakong kahimoan, nga nalampos sa tabang ni Jehova.

Dugang mga Pamatuod sa Pag-atiman ni Jehova

Sanglit ang gidaghanon sa mga magmamantala sa Gingharian sa halayong amihanan sa New Zealand nagpadayon sa pag-uswag, ang nagduaw nga nagapanawng mga magtatan-aw mihatag ug pagdasig sa pag-alagad sa dapit diin mas dako ang panginahanglan. Sa pagsanong, niadtong 1956, gibalhin ko ang akong pamilya ngadto sa Pukekohe, habagatan lamang sa Auckland. Nag-alagad kami didto sulod sa 13 ka tuig.​—Itandi ang Buhat 16:9.

Duha ka pananglitan sa pag-atiman ni Jehova niadtong panahona sa linain akong mahinumdoman. Samtang ako gipatrabaho sa konsilyo sa distrito ingong usa ka drayber sa trak ug operetor sa makina, ako gidapit alang sa upat-ka-semanang kurso sa Tunghaan sa Ministeryo sa Gingharian sa sangang-buhatan sa Watch Tower Society sa Auckland. Mihangyo akog upat ka semana nga bakasyon alang niadtong tuyoa, ug ang pangulong inhinyero miingon: “Sige lang. Maayo untag mas daghan pang tawo ang sama kanimo. Inigbalik nimo, adtoa ug pakigkitai ako sa akong opisina.” Sa dihang ako miduaw human niadto sa iyang opisina, nakadawat ako ug suweldo alang sa upat ka semana nga wala ako diha. Sa ingon, ang materyal nga panginahanglan sa akong pamilya natagan-an.​—Mateo 6:33.

Kadto ang unang pananglitan. Ang ikaduha nahitabo sa pagsulod sa akong asawa ug nako sa regular payunir nga pag-alagad niadtong 1968. Sa makausa pa, kami misalig kang Jehova alang sa pagpaluyo, ug kami iyang gigantihan. Usa ka buntag human sa pamahaw, gibuksan sa akong asawa ang pultahan sa repriherador ug ang iya lang nakit-an sa sulod mao ang tunga sa librang mantekilya. “Sarn,” matud niya, “wala na kitay makaon. Mogula pa ba kita sa pagsangyaw karong adlawa?” Akong tubag? “Oo!”

Sa una namong pagduaw, ang tagbalay midawat ug basahon nga among gitanyag ug malulutong naghatag kanamog pila ka dosenang itlog ingong donasyon. Ang ikaduhang tawo naghatag kanamog gasang utanon​—kumaras (kamote), cauliflower, ug carrots. Ubang mga pagkaon nga among gidala sa balay niadtong adlawa mao ang karne ug mantekilya. Pagkatinuod ang mga pulong ni Jesus sa among kahimtang: “Tan-awa pag-ayo ninyo ang mga langgam sa kalangitan, tungod kay sila wala magpugas o mag-ani o maghipos ngadto sa mga dapa; apan ginapakaon sila sa inyong langitnong Amahan. Dili ba labaw pa man kamog bili kay kanila?”​—Mateo 6:26.

Usa ka Asaynment sa Gawas sa Nasod

Rarotonga sa Cook nga Kaislahan! Kadto ang among asaynment ingong espesyal nga mga payunir niadtong 1970. Kadto mao ang among pinuy-anan sulod sa sunod upat ka tuig. Ang unang hagit didto mao ang pagkat-on ug bag-ong pinulongan. Ugaling, tungod sa mga kaamgiran tali sa New Zealand Maori ug Cook Island Maori, ako nakahatag sa akong unang pakigpulong sa publiko lima ka semana human sa pag-abot.

Sa Cook nga Kaislahan, may diyutay rang magmamantala sa Gingharian, ug kami walay dapit katigoman. Sa makausa pa, ingong tubag sa pag-ampo, si Jehova mitagana sa among mga panginahanglan. Ang wala tuyoa nga pakig-estorya uban sa usa ka tindero misangpot sa among pag-abang ug nahiangay nga yuta, ug sa usa ka tuig may gamay na kaming balay ug Kingdom Hall nga makapalingkod ug 140. Sukad niadto nadawat namo ang sunodsunod nga panalangin, sa kadayegan ni Jehova.

Ang pagkamaabiabihon sa isla nga gipakita kanamo sa linain giapresyar. Sa masubsob, samtang magsangyaw, dulotan kamig bugnaw nga ilimnon​—labing kahinangpan diha sa igang, umogon nga klima. Kasagaran nga kami mahiuli sa balay nga makakita ug mga saging, kapayas, mangga, ug mga kahil nga ibilin sa wala magpaila nga mga tawo diha sa among ang-ang.

Niadtong 1971 ang akong asawa ug ako, nga gikuyogan sa tulo pa ka magmamantala nga taga-Rarotonga, miadto sa isla sa Aitutaki, nga ilado tungod sa iyang matahom nga lanaw. Nakakaplag kamig mga mahigugmaon sa Pulong sa Diyos taliwala sa maabiabihon nga mga molupyo ug nakasugod ug upat ka pagtuon sa Bibliya sa balay, nga among gipadayon pinaagi sa pagsulatanay sa among paghibalik sa Rarotonga. Wala madugay kadtong mga estudyante sa Aitutaki nangabawtismohan, ug naporma ang usa ka kongregasyon. Niadtong 1978 ang ikaduhang Kingdom Hall sa Cook nga Kaislahan natukod didto. Si Jehova nagpadayon sa pagpatubo sa mga butang ingong sanong sa among pagtanom ug pagbisibis.​—1 Corinto 3:6, 7.

Nakapribilehiyo ako sa pagduaw ug napulo ka isla sa pundok sa Cook nga Kaislahan, nga sagad ubos sa masulayong mga kahimtang. Usa ka biyahe sa barko paingon sa Atiu, 180 kilometros ang kalayo, gidangtag kapin sa unom ka adlaw tungod sa kusog nga hangin ug balorong kadagatan. (Itandi ang 2 Corinto 11:26.) Bisan pag limitado ang abiyo sa pagkaon ug daghan alirong nako ang gidagat, ako mapasalamaton sa pag-atiman ni Jehova, nga misangpot sa luwas nga pag-abot sa akong destinasyon.

Niadtong 1974 wala kami hatagig permiso sa pagpabilin sa Cook nga Kaislahan ug busa kinahanglang mobalik sa New Zealand. Niadtong panahona tulo na ang kongregasyon sa kaislahan.

Dugang mga Pribilehiyo sa Pag-alagad​—Ug Usa ka Pagsulay

Balik sa New Zealand, naablihan ang bag-ong mga pultahan sa kahigayonan. (1 Corinto 16:9) Ang Sosyedad nagkinahanglan ug tawo nga makahubad sa Ang Bantayanang Torre ug ubang basahon sa Bibliya ngadto sa Cook Island Maori. Natagaan ako sa pribilehiyo, ug kini nagpabiling akoa hangtod karon. Dayon ako nakapribilehiyo sa paghimog regular nga mga subli-duaw sa akong mga igsoon sa Cook nga Kaislahan, una ingong magtatan-aw sa sirkito, dayon ingong kapuling magtatan-aw sa distrito.

Sa usa nianang mga pagduawa, si Brader Alex Napa, usa ka espesyal payunir nga taga-Rarotonga, mikuyog nako sa 23-adlaw nga biyahe sa dagat nga nagdala kanamo ngadto sa Manahiki, Rakahanga, ug Penrhyn​—kaislahan sa amihanang Cooks. Sa matag isla, si Jehova nagtandog sa mga kasingkasing sa maabiabihong lokal nga katawhan sa pagtagana kanamog puy-anan ug pagdawat ug daghang basahon sa Bibliya. (Itandi ang Buhat 16:15.) Nianang mga islaha, daghan ang mga takubo sa perlas, ug sa daghang okasyon ang mga tawo mihatag ug perlas ingong amot sa galastohan sa tibuok-kalibotang buluhaton sa pagsangyaw. Busa, samtang nanghatag kamig espirituwal nga perlas, nakadawat kamig pila ka literal nga perlas.​—Itandi ang Mateo 13:45, 46.

Pagkamatahom sa maong hilit nga bahin sa kalibotan! Tiaw na nga ang labihan ka dagkong mga iho makigdungan sa paglangoy nga malinawon kauban sa mga bata diha sa usa ka lanaw! Pagkanindot tan-awon ang kalangitan sa magabii! Pagkatinuod ang mga pulong sa salmista: “Ang adlaw ngadto sa laing adlaw nagapamulong, ug ang gabii ngadto sa laing gabii nagapadayag ug kahibalo.”​—Salmo 19:2.

Dayon, siyam ka tuig kanhi, miabot ang dakong pagsulay sa integridad. Ang akong asawa naospital tungod sa hemoreds sa utok. Gikinahanglan ang operasyon, apan ang doktor dili mosugot sa pag-opera kon dili magpaabuno ug dugo. Ang akong asawa ug ako dili makauyon sa usa ka operasyon nga maglapas sa balaod sa Diyos. Apan ang konsensiya sa siruhano nagdiktar nga ang tanang paaging posible, apil na ang dugo, gamiton aron sa pagluwas ug kinabuhi.

Migrabe ang panglawas sa akong asawa, ug siya gibutang sa intensive care nga lawak, nga gitugot ang limitado lang nga mga pagduaw. Nabungol siya tungod sa presyon sa sulod sa dalunggan. Kadto nahimong kritikal nga kahimtang. Human sa usa ka pagduaw usa ka doktor misunod kanako ngadto sa akong sakyanan, nga mipugos nga ang bugtong purohan sa akong asawa mao ang pag-opera nga may abuno sa dugo ug nangaliyupo kanako nga mouyon niana. Bisan pa niana, ang akong asawa ug ako misalig kang Jehova​—bisan pag ang pagsugot sa iyang balaod mosangpot sa pagkawala sa pila ka tuig niining presenteng kinabuhi.

Sa kalit, may dakong kauswagan sa kahimtang sa akong asawa. Ako miabot usa ka adlaw nga nakit-an siyang naglingkod sa katre nga nagbasa. Sa sunod nga mga adlaw siya misugod sa pagsangyaw ngadto sa mga pasyente ug sa mga narses. Dayon gipatawag ako sa pag-adto sa opisina sa siruhano. “Gn. Wharerau,” matud niya, “ikaw bulahan gayod nga tawo! Nagtuo kami nga naayo na ang sakit sa imong asawa.” Nga wala dahoma, ang presyon sa iyang dugo napermanente. Nga magkauban, ang akong asawa ug ako nagpasalamat kang Jehova ug nagbag-o sa among determinasyon sa pagbuhat sa among maarangan diha sa iyang pag-alagad.

Karon ako naasayn na usab sa Cook nga Kaislahan ug nagaalagad na usab sa Rarotonga. Pagkabulahan nga pribilehiyo! Sa paghinumdom ang akong asawa ug ako mapasalamaton tungod sa pag-atiman ni Jehova latas sa halos kalim-an ka tuig diha sa iyang pag-alagad. Sa materyal, kami wala mahitabo nga walay mga kinahanglanon sa kinabuhi. Sa espirituwal nga diwa, ang mga panalangin daghan kaayo aron iasoy. Usa niana nga talagsaon mao ang gidaghanon sa akong mga paryente sa unod nga midawat sa kamatuoran. Makaihap ako ug kapig 200 nga karon bawtismadong mga Saksi ni Jehova, lakip ang 65 ka direktang mga kaliwat. Usa ka apo maoy sakop sa pamilyang Bethel sa New Zealand, samtang ang usa ka anak babaye kauban sa iyang bana ug duha ka mga anak lalaki nagbuhat sa mga pagpanukod sa mga sanga.​—3 Juan 4.

Sa pagtan-aw sa unahan, gimahal ko ang kalaoman nga magpuyo sa usa ka paraiso diin, sa tibuok yuta, ang katahom molabaw pa sa iya sa nindot lunhaw nga walog nga akong natawhan. Pagkadako unya nga pribilehiyo ang pagdawat sa akong inahan ug amahan sa pagkabanhaw ug sa pagpahibalo kanila mahitungod sa lukat, sa Gingharian, ug sa tanang ubang pamatuod sa pag-atiman ni Jehova.

Ang akong determinasyon, nga gilig-on sa kahibalo nga ang Diyos nagaatiman kanako, maoy sumala sa gipahayag sa salmista sa Salmo 104:33: “Magaawit ako kang Jehova sa tibuok kong kinabuhi; magaawit ako sa akong Diyos samtang ako buhi.”​—Sumala sa giasoy ni Sarn Wharerau.

[Hulagway sa panid 28]

Ang unang Kingdom Hall nga gitukod sa New Zealand, 1950