Kinabuhi ug Ministeryo ni Jesus
Nagatuman sa Tagna ni Isaias
HUMAN nga nahibaloan ni Jesus nga ang mga Pariseo ug ang partido sa mga sumusunod ni Herodes nagplano sa pagpatay kaniya, siya ug ang iyang mga disipulo mipahawa paingon sa Dagat sa Galilea. Dinhi ang dakong panon sa katawhan sa tibuok Palestina, ug bisan sa gawas sa mga utlanan niini, miduol kaniya. Daghan ang iyang giayo, nga tungod niini ang tanang grabe ug sakit miduol sa paghikap kaniya.
Sanglit dako man kaayo ang panon, gisugo ni Jesus ang iyang mga disipulo sa pag-andam ug sakayan nga iyang magamit sa tanang panahon. Pinaagi sa pagpalayo gikan sa baybayon, iyang mapugngan ang panon sa katawhan sa pagduol kaniya. Siya makatudlo kanila gikan sa sakayan o sa pagbiyahe sa laing dapit ubay sa kabaybayonan sa pagtabang sa mga tawo didto.
Namatikdan sa disipulong si Mateo ang kalihokan ni Jesus nga nakatuman “sa gipamulong pinaagi ni propetang Isaias.” Dayon mikutlo si Mateo sa tagna nga natuman ni Jesus, nga mao:
“Tan-awa! Ang sulogoon ko nga akong pinili, akong pinalangga, nga nakapalipay sa akong kalag! Ipakunsad ko ang akong espiritu diha kaniya, ug ang hustisya iyang ipatin-aw sa kanasoran. Dili siya makiglalis, ni mosinggit, ug walay makadungog sa iyang tingog diha sa kadalanan. Dili gani siya mobali bisan sa nadugmok nang tangbo, ni mopalong siya sa pabilo nga nagpid-okpid-ok na, hangtod nga padaogon niya ang hustisya. Sa pagkatinuod, sa iyang ngalan managlaom ang kanasoran.”
Matuod, si Jesus, mao ang pinalangang sulogoon nga gikalipayan sa Diyos. Ug gipatin-aw ni Jesus kon unsa ang tinuod nga hustisya, nga gipahanap sa bakak nga mga tradisyon sa relihiyon. Tungod sa ilang dili hustong pagpadapat sa kasugoan sa Diyos, ang mga Pariseo dili gani motabang sa masakiton sa Adlawng Igpapahulay! Busa, nagpatin-aw sa hustisya sa Diyos, gihumpay ni Jesus ang katawhan sa palas-anon sa dili matarong nga mga tradisyon, nga miresulta sa pagpaningkamot sa relihiyosong mga lider sa pagpatay kaniya.
Unsay kahulogan nga ‘siya dili makiglalis, ni mosinggit aron madunggan sa kadalanan’? Buweno, sa nagpang-ayo sa mga tawo, si Jesus ‘mipina kanila sa dili pagpaila kaniya.’ Dili siya buot ug masabang paanunsiyo sa iyang kaugalingon diha sa kadalanan o makapatunghag maukyabong mga taho nga igapasa sa naglainlaing baba ug matuis.
Dugang pa, gidala ni Jesus ang iyang makalipay nga balita ngadto sa mga tawo nga sa mahulagwayon sama sa nadugmok nga tangbo, nga bawog ug ginatumban. Sama sila sa nagpid-okpid-ok nga pabilo, kansang kataposang pangidlap sa kinabuhi hapit nang mapalong. Si Jesus dili magabali sa nadugmok na nga tangbo o mopalong sa nagkaawop, nag-asong mitsa. Apan pinaagi sa kalumo ug gugma siya sa kahanas nagatuboy sa mga maaghop. Tinuod, si Jesus mao ang usa nga pagalaoman sa kanasoran! Mateo 12:15-21; Marcos 3:7-12; Isaias 42:1-4.
◆ Sa unsang paagi gipatin-aw ni Jesus ang hustisya, ug dili makiglalis o mosinggit sa kadalanan?
◆ Kinsa ang sama sa nadugmok nga tangbo ug sa pabilo, ug sa unsang paagi gitagad sila ni Jesus?