LEHIYON

Ang gipailang ngalan sa usa sa duha ka tawong gigamhan sa demonyo, nga nahibalag ni Kristo Jesus sa rehiyon sa S sa Dagat sa Galilea. Hinunoa, dayag nga dili Lehiyon ang iyang tinuod nga ngalan, sanglit nagtumong man kini sa iyang pagkagigamhan sa daghang demonyo. Lagmit ang pangulo niini nga mga demonyo maoy nagdiktar niining tawhana sa pag-ingon nga ang iyang ngalan maoy Lehiyon. Sanglit ang Romanhong lehiyon sa unang siglo K.P. kasagarang gilangkoban sa 6,000 ka tawo, kini nagpakita nga daghang demonyo ang nalangkit. Ang tawo nga gigamhan sa demonyo ug ang iyang kauban mabangis kaayo mao nga walay nangahas sa pag-agi sa dapit nga ilang gipuy-an nga nahimutang taliwala sa mga lubnganan. Ubos sa paggahom sa demonyo, ang tawo nga nag-ingon nga ang iyang ngalan maoy Lehiyon maglakawlakaw nga hubo, ug sa adlaw ug gabii siya mosinggit sa makusog ug magsamadsamad sa iyang kaugalingon pinaagig mga bato. Ang tanang paningkamot sa paggapos kaniya, bisan pinaagi ug mga talikala sa tiil ug mga kadena, wala magmalamposon. Apan, si Kristo Jesus nagpahigawas niining tawhana ug sa iyang kauban gikan sa gahom sa mga demonyo. Human niana ang gihinginlan nga mga demonyo misulod sa usa ka panon sa mga baboy, nga tungod niini ang panon sa mga baboy mihaguros pagdulhog sa pangpang ug nangamatay diha sa Dagat sa Galilea.​—Mat 8:28-34; Mar 5:1-20; Luc 8:26-39; tan-awa ang GADARANHON; BABOY.

Alang sa mga detalye bahin sa Romanhong mga lehiyon, tan-awa ang KASUNDALOHAN, PANON (Romanhon).