Kinabuhi ug Ministeryo ni Jesus
Pagbiya sa Balay ni Jairo ug Pagduaw Pag-usab sa Nazaret
ANG adlaw okupado alang kang Jesus—biyahe sa dagat gikan sa Decapolis, pag-ayo sa babayeng naghinugo, ug pagbanhaw sa anak babaye ni Jairo. Apan wala pa matapos ang adlaw. Lagmit samtang mibiya si Jesus sa balay ni Jairo, misunod ang duha ka tawong buta, nga nagsinggit: “Kaluy-i intawon kami, Anak ni David.”
Pinaagi sa pagtawag kang Jesus nga “Anak ni David,” ang maong mga tawo sa ingon nagpahayag ug pagtuo nga si Jesus mao ang manununod sa trono ni David, busa siya ang gisaad nga Mesiyas. Ugaling, daw wala manumbaling si Jesus sa ilang mga pagtuwaw alang sa tabang, tingali nagtigi sa ilang pagkamainantoson. Apan wala mohunong ang mga tawo. Ilang gisundan si Jesus ngadto sa dapit nga iyang gipuy-an, ug sa misulod siya sa balay, ila siyang gisundan sa sulod.
Didto si Jesus nangutana: “Kamo ba may pagtuo nga ako makahimo niini?”
“Oo, Ginoo,” mitubag silang masaligon.
Busa, nga gihikap ang ilang mga mata, si Jesus miingon: “Sumala sa inyong pagtuo pasagdi nga kini mahitabo kaninyo.” Sa kalit sila makakita na! Dayon mapig-oton silang gipasidan-an ni Jesus: “Tinoa nga walay mahibalo niini.” Apan kay nahupong sa kalipay, wala sila manumbaling sa sugo ni Jesus ug nagsulti mahitungod niana sa tibuok kabanikanhan.
Samtang mipahawa ang maong mga tawo, gidala sa mga tawo ang usa ka tawong gidemonyohan nga nakapaamang kaniya. Gipagula ni Jesus ang demonyo, ug dihadiha ang tawo nakasulti. Nahibulong ang panon sa maong mga milagro, nga miingon: “Wala pa sukad makita ang ingon niini sa Israel.”
Ang mga Pariseo, usab, presente. Sila dili makalimod sa mga milagro, apan tungod sa ilang daotan nga kawalay-pagtuo ilang gisubli ang ilang pagbutangbutang bahin sa tinubdan sa gamhanang mga buhat ni Jesus, nga miingon: “Maoy pinaagi sa punoan sa mga demonyo nga siya nagapagula sa mga demonyo.”
Wala madugay tapos niadtong mga hitaboa, si Jesus mipauli ngadto sa iyang lungsod sa Nazaret, nga niadtong panahona gikuyogan sa iyang mga tinun-an. Duolag usa ka tuig nga sayosayo, siya miduaw sa sinagoga ug mitudlo didto. Bisan tuod ang mga tawo sa sinugdan nahibulong sa iyang maayong mga pulong, sa ulahi sila nasilag sa iyang gitudlo ug nagtinguha sa pagpatay kaniya. Karon, kay naluoy, gisulayan na usab ni Jesus ang pagtabang sa iyang kanhing mga silingan.
Samtang sa ubang dapit si Jesus gidugokan sa mga tawo, lagmit nga sila wala modugok kaniya dinhi. Busa, sa Igpapahulay, siya miadto sa sinagoga aron sa pagtudlo. Ang kadaghanan niadtong nakabati kaniya nahingangha. “Diin man kining tawhana makakuha niini nga kaalam ug niining gamhanang mga buhat?” sila nangutana. “Dili ba kini ang anak sa panday? Dili ba ang iyang inahan ginganlan si Maria, ug ang iyang mga igsoong lalaki si Santiago ug si Jose ug si Simon ug si Judas? Ug ang iyang mga igsoong babaye, dili ba silang tanan uban man kanato? Nan, diin ba kuhaa niining tawhana kining tanang butang?”
‘Si Jesus tagadinhi lamang sama kanato,’ sila nangatarongan. ‘Nakita nato siyang nagdako, ug nailhan nato ang iyang pamilya. Sa unsang paagi siya mao ang Mesiyas?’ Busa bisan pa sa tanang ebidensiya—ang iyang dakong kaalam ug mga milagro—ilang gisalikway siya. Bisan ang kaugalingon niyang mga paryente, tungod sa ilang pagkasinati kaayo, napandol tungod kaniya, nga nagpahinabo kang Jesus sa paghinapos: “Ang usa ka propeta dili ingon nga dili pinasidunggan gawas lamang diha sa iyang kaugalingong pinuy-anan ug taliwala sa iyang mga paryente ug sa iyang kaugalingong balay.”
Sa pagkamatuod, si Jesus nahibulong sa ilang kawalay pagtuo. Busa wala siya mobuhat ug mga milagro didto gawas sa pagpandong sa iyang mga kamot ibabaw sa pila ka tawong masakiton ug nag-ayo kanila. Mateo 9:27-34; 13:54-58; Marcos 6:1-6; Isaias 9:7.
◆ Pinaagi sa pagtawag kang Jesus nga “Anak ni David,” ang mga tawong buta nagpakita nga sila nagtuo sa unsa?
◆ Unsay gihinapos sa mga Pariseo sa pagpatin-aw sa mga milagro ni Jesus?
◆ Nganong pagkamaluluy-on ang pagpauli ni Jesus aron tabangan kadtong atua sa Nazaret?
◆ Giunsa pagdawat si Jesus didto sa Nazaret, ug ngano?