“Mahimong Akong Sumusunod”—Unsay Gipasabot ni Jesus?

1, 2. Unsa ang labing maayong imbitasyon nga madawat sa usa ka tawo, ug unsay ikapangutana nato sa atong kaugalingon?

UNSAY labing maayong imbitasyon nga imong nadawat sukad? Ikaw makahunahuna tingali sa dihang gidapit ka sa usa ka espesyal nga okasyon, tingali sa kasal sa duha ka tawo nga mahal kaayo nimo. O ikaw makahinumdom tingali sa adlaw nga ikaw gitanyagan ug usa ka hinungdanong trabaho. Kon ikaw nakadawat nianang mga imbitasyona, walay duhaduhang nalipay ka ug mibati nga gipabilhan. Apan, ang tinuod mao nga ikaw nakadawat ug mas maayong imbitasyon. Nakadawat niana ang matag usa kanato. Ug ang atong pagsanong sa maong imbitasyon dakog epekto kanato. Kini ang labing hinungdanong desisyon nga atong himoon sa kinabuhi.

² Unsa ba ang maong imbitasyon? Kini naggikan kang Jesu-Kristo, ang bugtong nga Anak sa Labing Gamhanang Diyos, si Jehova, ug kini nahisulat sa Bibliya. Sa Marcos 10:21, atong mabasa ang mga pulong ni Jesus: “Kuyog nako ug mahimong akong sumusunod.” Sa pagkamatuod kana maoy pagdapit ni Jesus sa matag usa kanato. Makapangutana kita sa atong kaugalingon, ‘Unsay akong sanong?’ Daw dayag ang tubag. Kinsay mobalibad nianang maayo kaayong imbitasyon? Katingad-anan nga ang kadaghanang tawo mibalibad. Ngano?

3, 4. (a) Unsay mahimong isipon nga tilinguhaon kaayo bahin sa lalaki nga miduol kang Jesus nga nangutana bahin sa kinabuhing walay kataposan? (b) Unsay maayong mga hiyas nga mahimong nakita ni Jesus sa dato nga batan-ong magmamando?

³ Ingong pananglitan, palandonga ang usa ka tawo nga personal nga nakadawat sa maong imbitasyon mga 2,000 ka tuig kanhi. Siya maoy tinahod kaayong tawo. Nakabaton siyag labing menos tulo ka butang nga lagmit isipong tilinguhaon sa mga tawo, nga kasinahan pa gani—pagkabatan-on, bahandi, ug gahom. Ang talaan sa Bibliya nagbatbat nga siya maoy “batan-ong lalaki,” ‘dato kaayo,’ ug “usa ka magmamando.” (Mateo 19:20; Lucas 18:18, 23) Hinuon, ang maong batan-on may mas hinungdanong hiyas. Siya nakadungog bahin sa Dakong Magtutudlo, si Jesus, ug iyang naangayan ang iyang nadungog.

⁴ Ang kadaghanang magmamando niadtong mga adlawa napakyas sa paghatag kang Jesus ug pasidungog nga takos kaniya. (Juan 7:48; 12:42) Apan lahi ang gibuhat sa maong magmamando. Ang Bibliya nagtug-an kanato: “Samtang diha [si Jesus] sa dalan, may tawo nga midagan ug miluhod kaniya ug nangutana: ‘Maayong Magtutudlo, unsay kinahanglan nakong himoon aron makapanunod ug kinabuhing walay kataposan?’” (Marcos 10:17) Matikding maikagon kaayo ang maong tawo nga makigsulti kang Jesus, nga midagan pa sa pagsugat kaniya nga nakita sa kadaghanan, sama gayod sa mahimong buhaton sa mga tawong kabos ug timawa. Dugang pa, siya matinahorong miluhod sa atubangan sa Kristo. Busa siya may pagkamapainubsanon ug kaamgohan sa iyang espirituwal nga panginahanglan. Gipabilhan ni Jesus ang maong maayong mga hiyas. (Mateo 5:3; 18:4) Nan, dili katingad-ang “si Jesus mitan-aw kaniya ug mibatig gugma kaniya.” (Marcos 10:21) Giunsa pagtubag ni Jesus ang pangutana sa batan-ong lalaki?

Talagsaon Kaayong Pagdapit

5. Giunsa pagtubag ni Jesus ang dato nga batan-ong lalaki, ug nganong nahibalo kita nga ang pagkinabuhing kabos dili mao ang gipasabot ni Jesus nga kinahanglan pa niyang himoon? (Tan-awa usab ang footnote.)

⁵ Gipakita ni Jesus nga ang iyang Amahan nakahatag nag impormasyon bahin sa hinungdanong pangutana mahitungod sa pagbaton ug kinabuhing walay kataposan. Iyang gipunting ang Kasulatan, ug ang batan-ong lalaki nagpamatuod nga siya matinumanong nagsunod sa Moisesnong Balaod. Ugaling lang, tungod sa talagsaong pagsabot ni Jesus, iyang nasabtan ang mas lalom pang butang. (Juan 2:25) Iyang nasabtan ang espirituwal nga suliran sa maong magmamando—nga usa ka seryosong suliran. Busa, si Jesus miingon: “Duna pa kay kinahanglang himoon.” Unsa kana? Si Jesus miingon: “Lakaw, ibaligya ang tanan nimong kabtangan ug ihatag sa mga kabos ang kuwarta.” (Marcos 10:21) Gipasabot ba ni Jesus nga kinahanglan ang usa ka tawo maoy kabos aron mag-alagad sa Diyos? Dili.a Gibutyag sa Kristo ang butang nga hinungdanon kaayo.

6. Unsang pagdapit ang gitanyag ni Jesus, ug unsay gibutyag sa sanong sa dato nga batan-ong magmamando kon bahin sa iyang kasingkasing?

⁶ Aron ibutyag kaniya kon unsay kulang, gitanyagan ni Jesus ug talagsaong kahigayonan ang maong batan-on: “Kuyog nako ug mahimong akong sumusunod.” Tiaw mo na—ang Anak sa Labing Hataas nga Diyos personal nga nagdapit sa maong batan-on sa pagsunod kaniya! Gisaaran usab siya ni Jesus ug usa ka ganti nga dili mahanduraw. Siya miingon: “Makabaton kag bahandi sa langit.” Gidawat ba dayon sa dato nga batan-ong magmamando ang maong kahigayonan, ang maong talagsaong pagdapit? Ang asoy mabasa: “Naguol siya sa gisulti ni Jesus ug milakaw nga naguol, kay daghan man siyag kabtangan.” (Marcos 10:21, 22) Busa ang wala damhang mga pulong ni Jesus nagbutyag sa usa ka suliran diha sa kasingkasing sa maong batan-on. Dako kaayo ang iyang pagmahal sa iyang mga kabtangan ug, walay duhaduha, sa gahom ug kadungganan nga duyog niana. Ikasubo, ang iyang gugma sa maong mga butang labaw kaayo kay sa iyang gugma alang sa Kristo. Nan, ang iyang ‘kinahanglan pang himoon’ mao ang pagpakitag kinasingkasing ug masakripisyohong gugma alang kang Jesus ug kang Jehova. Tungod kay nakulangan ang batan-ong lalaki sa maong gugma, iyang gibalibaran ang talagsaon kaayong pagdapit! Apan, sa unsang paagi ang maong pagdapit sa batan-ong lalaki mapadapat kanimo?

7. Nganong makapaneguro kita nga ang pagdapit ni Jesus naglakip kanato karong adlawa?

⁷ Ang pagdapit ni Jesus dili lamang alang niadtong lalakiha; ni alang lamang sa pipila ka tawo. Si Jesus miingon: “Kon dunay buot mosunod kanako, [siya] padayong mosunod kanako.” (Lucas 9:23) Matikding si bisan kinsa mahimong sumusunod sa Kristo kon “buot” gayod niya. Kabigon sa Diyos ang mga tawo nga matinud-anon ug kasingkasing ngadto sa iyang Anak. (Juan 6:44) Dili lamang ang mga dato, dili lamang ang mga kabos, dili lamang ang mga sakop sa usa ka rasa o nasod, ug dili lamang ang mga nabuhi niadtong panahona kondili ang tanan gihatagag kahigayonan sa pagdawat sa pagdapit ni Jesus. Busa ang mga pulong ni Jesus nga “kuyog nako ug mahimong akong sumusunod” mapadapat gayod kanimo. Nganong angay nimong sundon ang Kristo? Ug unsa may nalangkit niana?