Ang Hunahuna sa Bibliya

Kinsay Moadto sa Langit?

ANG usa ka bomba sa terorista nagbungkag sa usa ka ayroplanong naglupad, nga nagpatay sa tanang pasahero niini. Ang mga paryente ug mga higala sa mga biktima giingnan nga ang ilang mga minahal sa kinabuhi atua na sa langit, nga daw ganti sa ilang wala-sa-panahon ug mapintas nga kamatayon.

Usa ka popular nga musikero ang namatay ug giingon nga ‘nagatrumpeta uban sa mga manulonda sa langit.’

Ang sakit, gutom, o mga aksidente maghikaw sa mga masuso sa usa ka bug-os nga kinabuhi, ug ang klero nag-ingon nga sila karon nagpahimulos sa langitnong kalipay, hayan pa gani ingong mga manulonda!

Ang Diyos ba nagatul-id sa inhustisya diha sa mga batan-on ug mga tigulang pinaagi sa pagkuha nianang tanan alang kaniya didto sa langitnong kalinaw? Ang pagpasulod ba sa langit mao lamay paagi sa Diyos sa pagtipig sa tanang maayo ug dalayegon sa katawhan? Unsa ang panglantaw sa Bibliya?

Kadtong Wala sa Langit

Tin-aw ang pahayag sa Bibliya: “Unsa! Wala ba kamo mahibalo nga ang mga tawong dili-matarong dili makapanunod sa gingharian sa Diyos?” (1 Corinto 6:9) Bisan pa niana, ang Bibliya naghisgot usab bahin sa daghang matarong nga mga tawo ug mga biktima sa inhustisya nga dili makapanunod sa mga langit.

Si Jesus mismo namulong bahin sa hapit-nang-pagapatyon nga si Juan ang Tigbawtismo: “Sa pagkamatuod ako magaingon kaninyo, Taliwala kanilang natawo sa mga babaye wala pay gibangon nga labaw kay kang Juan nga Bawtista; apan ang usa nga ubos sa gingharian sa mga langit labaw pa kay kaniya.” (Mateo 11:11) Ang tanang batang lalaki nga duha ka tuig ang edad ug ubos pa sa Betlehem ug sa mga distrito niini walay-kukaluoy nga gipamatay sa daotang Haring Herodes sa iyang paningkamot sa paglaglag sa batang si Jesus. (Mateo 2:16) Bisan pa niana, si Jesus miingon: “Dugang pa, walay tawo [o babaye o bata] nga nakasaka sa langit gawas niya nga nanaog gikan sa langit, ang Anak sa tawo [si Jesus].” (Juan 3:13) Nganong si Jesus wala maghisgot niining maong mga biktima sa inhustisya ingong didto sa langit?

Si Jesus Nagbukas sa Dalan

Si Jesus nagtawag sa iyang kaugalingon nga “ang dalan ug ang kamatuoran ug ang kinabuhi” ug gihisgotan ni apostol Pablo ingong “ang unang-bunga kanilang kinsa nahikatulog sa kamatayon.” (Juan 14:6; 1 Corinto 15:20) Sa ingon, walay nauna kaniya ngadto sa langit. Apan sa dihang si Jesus misaka na sa langit mga 40 ka adlaw sa ulahi tapos sa iyang pagkabanhaw, siya ba gisundan sa takos nga mga tawo sa pagtuo nga nangamatay na? Mga napulo ka adlaw sa ulahi, si apostol Pedro namulong bahin kang Haring David nga “siya namatay ug gilubong ug ang iyang lubnganan ania taliwala kanato hangtod niining adlawa. . . . Sa tinuod si David wala mosaka ngadto sa mga langit.”​—Buhat 2:​29, 34.

Busa, ang pagsulod sa langit naglangkit ug labaw pa kay sa pagbalos sa mga inhustisya nga giantos o bisan pagganti sa personal nga pagkamatinumanon. Hinunoa, kini nagtugot sa pagkaporma sa nahimutang-sa-langit nga lawas sa mga magmamando nga nalangkoban sa usa ka hawasnong gidaghanon sa mga tawo ilalom sa pagmando ni Kristo, nga dinihogan sa balaang espiritu.​—Roma 8:​15-17; Pinadayag 14:​1-3.

Usa ka Langitnong Gingharian

Si Jesus naghisgot niining maong pagmando, o gobyerno, ingong “ang gingharian sa mga langit” o “ang gingharian sa Diyos.” (Mateo 5:​3, 20; Lucas 7:28) Dili maoy katuyoan nga ang dagkong mga panon sa mga tawo mahiapil niining administratibong lawas. Busa, gitumong kini ni Jesus nga usa ka “gamayng panon.” (Lucas 12:32) Sa orihinal nga pinulongan nga gigamit niining bahina sa Bibliya, ang pulong “gamay” (mi·krosʹ) mao ang kaatbang sa dako (meʹgas), ug ang paggamit niini diha sa Lucas 12:32 nagtumong sa gidaghanon o gidiyutayon. Busa, ang pagkahimong membro sa “gingharian sa mga langit” dili magtugot sa walay-limiteng gidaghanon. Sa pag-ilustrar: Kon gihangyo ka nga moipis ug diyutayng tubig ngadto sa usa ka baso, tinoon nimo nga dili kini moawas. Mao man, usab, ang “gamayng panon” dili mahimong langkoban sa nagsugwak nga gidaghanon sa katawhan. Ang Gingharian sa Diyos adunay usa ka tino (“diyutay”) nga gidaghanon sa kaubang mga magmamando ni Kristo.

Ang eksaktong gidaghanon niining maong mga magmamando, 144,000, gipadayag ngadto kang apostol Juan. (Pinadayag 14:​1, 4) Sayo pa sa Pinadayag kining samang mga tawo gikaingon nga ‘gikan sa matag tribo ug dila ug katawhan ug nasod aron mahimong usa ka gingharian ug mga saserdote ngadto sa atong Diyos,’ ug sila magamando ingong mga hari ibabaw sa yuta. (Pinadayag 5:​9, 10) Kining administratibong lawas nga kauban ni Jesu-Kristo mao ang Gingharian nga gitudlo niya sa iyang mga sumusunod nga iampo. Pinaagi usab niini nga ahensiya nga ang sayop nga pagmando sa yuta matapos, sa ingon mapasig-uli ang hustisya ug kalinaw ngadto sa pinuy-anan sa tawo, ang yuta, maingon man sa walay-kataposang kabaskog sa mga molupyo niini.​—Salmo 37:29; Mateo 6:​9, 10.

Usa ka Pinili nga Lawas sa mga Magmamando

Sanglit ang tawhanong mga pagmando nga giilisan sa Gingharian natugob sa kadunotan, dili ba nato masabtan kon nganong kadtong nahiapil nianang langitnong kagamhanan kinahanglang mainampingong pilion ug sulayan sa Diyos? Ang presenteng kahimtang sa katawhan mahimong ipakasama nianang sa ginatos ka pasahero nga nagsakay sa nadaot nga jet sa daotang panahon. Sa maong lisod nga kahimtang, buot ba nimo ang tripulante nga nag-apil sa batan-on, dili-eksperyensiyadong mga tawo? Dili gayod! Ang kahimtang magkinahanglan ug tripulante nga mainampingong gipili sumala sa estriktong mga kuwalipikasyon.

Maylabot niadtong mag-alagad sa langit uban kang Kristo Jesus, kita mahupayan sa pagkahibalo nga “ang Diyos nagpahiluna sa mga sangkap sa lawas, matag usa kanila, sumala sa iyang gikahimut-an.” (1 Corinto 12:18) Ang personal nga tinguha o ambisyon alang sa posisyon didto sa Gingharian dili mao ang nagatinong punto. (Mateo 20:​20-23) Ang tinong mga sukdanan sa pagtuo ug pamatasan gitukod sa Diyos aron dili pasudlon ang mga tawong dili takos. (Juan 6:44; Efeso 5:5) Ang pang-abling mga pulong sa Wali ni Jesus sa Bukid nagpakita nga ang kaubang mga magmamando ni Kristo kinahanglang magpamatuod nga mahunahunaon sa espirituwal nga mga butang, malumo, mahigugmaon sa pagkamatarong, maluluy-on, putli ug kasingkasing, ug makigdaiton.​—Mateo 5:​3-9; tan-awa usab ang Pinadayag 2:10.

Ikalipay, ang kadaghanan sa katawhan, bisan wala pilia sa Diyos nga mahilakip niining hawas sa langitnong lawas sa mga magmamando, adunay paglaom. Sila magapuyo niining matahom nga yuta ug magapahimulos sa mga kaayohan sa iyang balaang pagmando. Ang dugay nang nangamatay nga mga biktima sa kanhing mga inhustisya pagabuhion pag-usab aron magkinabuhi duyog niadtong makalabang sa pagtan-aw sa “pag-abot” sa Gingharian sa Diyos diha sa bug-os nga diwa. Ang saad mamatuman: “Ang mga matul-id maoy mopuyo sa yuta, ug ang mga walay-ikasaway maoy magapabilin diha niana.”​—Mateo 6:​9, 10; Proverbio 2:21; Buhat 24:15.