Gutom Gitagna
NIINING ulahing katuigan ang hugpa sa gutom nahimong kasagaran nga makaguol diha sa mga balita sa kalibotan. Gikan sa Etiopia ug sa ubang dapit nangabot ang dili-makalimtan nga mga hulagway sa pag-antos. Niadtong 1992 ang pagtagad sa kalibotan gipunting ngadto sa alaot nga mga biktima sa gutom sa Somalia, nga gipahinabo sa hulaw ug gubat. Ang International Herald Tribune nagtaho niadtong Septiyembre 1992: “Walay nasayod kon pila ka taga Somalia ang namatay, apan ang Red Cross nagtino sa gidaghanon nga kapin sa 100,000. Gatosgatos, kon dili ba kaha libolibo, ang mamatay kada adlaw.”
Ang mga numero dili gayod makapaila sa kaalaot ug kasakit sa mga indibiduwal nga nalangkit. Si Yvette Pierpaoli, Uropanhong hawas sa Refugees International, nagsulat sa magasin sa HK nga Refugees: “Sa New York o sa Geneva, ang suliran sa kagiw daw tin-aw; ang mga numero gipahayag ug ang mga sero nga uban niana lisod nang masabtan. Apan libolibo ka kilometros sa unahan, diha sa mga utlanan sa mga nasod diin halos may anarkiya, daw matuk-an ka sa tumang pagbati ug mora kag motiyabaw tungod sa gidak-on sa pag-antos.”
Bisan pag ang Red Cross nag-ingon nga ang gitabang niana sa Somalia mao ang kinadak-ang makitawhanong hinabang nga nahimo niini masukad, daghang tigpaniid ang mireklamo nga sa katibuk-an ang tinuod mao nga kana diyutay ra kaayo, ug ulahi na. Si Pierpaoli miagulo: “Ang mga nasod nga tigdonar nagpanuko sa pagdonar ug dugang, kay gipul-an sa pagtabang sa usa ka Aprika nga nagakabungkag. . . . Ilang gibasol ang mga Aprikano tungod sa ilang dili-maayong pagdumala, sa kahakog sa ilang mga pangulo, sa daw walay-kataposang mga gubat.”
Ang Bibliya nagtagna sa usa ka panahon sa dihang monihit ang pagkaon “sa usa ka dapit ngadto sa lain.” Kining maong mga kanihit sa pagkaon, inubanan sa ubang mga panghitabo, sama sa mga gubat, mga linog, ug mga kamatay, nagpaila nga ang Gingharian sa Diyos haduol na. (Lucas 21:11, 31) Gipakita pag dugang sa Bibliya nga ubos sa maayong Gingharian sa Diyos, aduna unyay kadagaya sa pagkaon alang sa tanang katawhan. “Aduna unyay daghang trigo sa yuta,” misulat ang salmista. “Sa tumoy sa kabukiran aduna unyay pagsugwak.”—Salmo 72:16.