Imong Umaabot—Labaw nga Paagi sa Pagkasayod Niini

NIADTONG 1962 gitagna sa Indian nga mga astrologo ang tibuok-kalibotang katalagman “tungod sa tagsaong pagkatupad sa walo ka planeta sa senyal sa Capricorn.” Ugaling, walay misangpot niana. Labaw pang bag-o, sa pagkatapos sa 1980, ang kadaghanang Pranses nga astrologo nagtuo nga ang niadto presidente sa Pransiya, si Giscard d’Estaing, mapili pag-usab alang sa ikaduhang tagal. Apan ang iyang kaatbang, si François Mitterrand, maoy nakadaog sa piliay. Ang mga kapakyasang sama niini mopahinumdom kanato nga ang astrolohiya dili motagana sa usa ka seguradong paagi sa pagkahibalo sa umaabot.

Nan, may lain bang paagi? Pananglitan, ang paningkamot sa mga siyentipiko sa pagtagna sa umaabot makatabang ba kanimo? Aw, ania ang tagna nga gihimo sa McGraw Hill Institute sa Tinipong Bansa sa 1970 kon unsay mahitabo sa pagka 1980: “Mga droga sa pagpukgo sa kanser, mga panaw sa mga tawo sakay sa mga salakwanang ngadto sa Mars ug Venus, permanenteng base sa bulan, mga kotseng paandaron sa koryente, malangkobong paggamit sa mga kompiyutir sa balay, posibilidad sa pagpili sa sekso sa imong anak, ug tres-dimensiyong telebisyon ug sinehan.”

Niadtong 1970 ang mga siyentipiko sa maong institusyon mipahayag: “Ang maong paagi [sa pagtagna] may tumong sa pagkab-ot sa usa ka kasaligang panagna pinaagi sa nagkahiusang opinyon sa usa ka grupo sa mga eksperto.” Apan ang mga panagna sa maong mga eksperto nakitang sayop niining mga natara ug sa daghan pang laing natad, sama sa politika ug ekonomiya.

Usa ka Seguradong Tinubdan sa Impormasyon

Kon dili makapanan-aw daan ang mga astrologo ug mga siyentipiko uban ang pagkapiho kon unsay mahitabo, nagkahulogan ba kana nga imposible ang pagbatog kasaligang impormasyon mahitungod sa umaabot? Sa dili ka pa mosurender, angay atong susihon kon unsay ginasulti sa Bibliya mahitungod sa ulohan. Hinumdomi, si Jehova, ang Awtor sa Bibliya, gibatbat ingong “ang Usang nagasugid sa kataposan gikan sa sinugdan, ug gikan sa kanhi pang panahon sa mga butang wala pa mahimo.”​—Isaias 46:10.

Ang Pulong sa Diyos daghan ug mga tagna. Sa unsang paagi kana lahi sa mga panagna sa mga astrologo? Ania ang tubag sa usa ka basahong nag-ulohang The Great Ideas: “Apan kon bahin sa unang kahibalo sa mga tawong himalatyon, ang Hebreohanong mga propeta daw talagsaon. Lahi sa paganong mga mananagna, . . . sila wala mogamit ug mga arte o mga kasangkapan sa pagsusi sa balaang mga sekreto. . . . Sa kinadak-ang bahin ang ilang matagnaong mga pahayag, sama niadtong sa mga orakulo, maorag dili hanap. Sa labing menos ang tuyo daw mao ang pagbutyag, dili pagtago, sa plano sa Diyos nianang mga butanga kay Siya Mismo gustong mahibaloan daan sa mga tawo ang pagabuhaton sa Diyos.”

Ingong panig-ingnan niini, daghang impormasyon bahin kang Jesus ang gitala diha sa Bibliya daghang siglo una sa iyang pagkatawo. Gitagna nga siya matawo sa lungsod sa Bethlehem ug sa banay ni Isai, ang amahan ni Haring David. (Miqueas 5:2; Isaias 11:1, 10) Ang Kasulatan mitagna usab nga siya pagapatyon sa usa ka estaka apan walay bukog niya ang mabali, sumala sa nabatasan sa maong mga pagpatay. Natuman ang maong mga detalye, ug kini pila ra ka panig-ingnan sa gibanabana sa usa ka eskolar sa Bibliya nga kapin ug 120 ka tagna nga natuman kang Jesus.​—Salmo 22:16, 17; 34:20.

Usa ka Tagnang Natuman Karong Adlawa

Dugang pa, ang Bibliya dunay mga tagna nga nagatumong sa atong adlaw. Atong hisgotan ang usa sa labing bililhon niini nila. Kini nagabatbat sa sunodsunod nga hitabo nga magtimaan sa yugto sa dayon na sa dramatikanhong pagbalda sa Gingharian sa Diyos diha sa kahikayan sa yuta. Kining mga hitaboa mag-apil sa mga gubat sa kalibotan, mga linog, mga epidemya, mga gutom, ug pag-uswag sa pagkamalapason. Dili ba ang pagkagrabe niining mga butanga napaila diha sa balita sa kalibotan sulod sa atong ika-20ng siglo?​—Mateo 24:3, 7-14; Lucas 21:7, 10, 11; 2 Timoteo 3:1-5.

Gipatin-aw ni Jesus nga ang pagkatuman niining mga tagnaa magpahibalo sa pag-abot sa iyang Gingharian sama ka tino nga ang pagtungha sa mga udlot sa kakahoyan magpahibalo sa pag-abot sa tingpamulak. Iya pang gitino nga kana matuman sa usa lamang ka kaliwatan. Ang tanang bahin sa ilhanan, apil ang mga detalyeng gihisgotan sa ibabaw, nangatuman sa atubangan sa atong mga mata sukad sa 1914.a Busa kita makabaton ug bug-os nga pagsalig nga duol na kaayong molihok ang Gingharian.​—Lucas 21:29-33.

Ang laing bahin nga gitagna alang niining panahona mao “ang kagul-anan sa kanasoran, tungod kay wala mahibalo sa lutsanan.” (Lucas 21:25) Karon, nganong adunay dakong kaikag karong adlawa sa astrolohiya ug sa ubang matang sa okulto? Ang Pranses nga mantalaang Le Monde Dimanche nagatubag: “Kay nagaatubang sa krisis, ang mga tawo mobuhat sa bisan unsa aron makaplagan ang pasalig. Ang parasikolohiya nagahatag sa dakong paglipay alang sa diyutayng kahago, ug niining panahon sa makalilisang siyentipikanhong mga kahimoan sama sa talagsaong mga nukleyar nga buhat ug gene splicing, ang mga tawo matental sa pag-ikyas ngadto sa wala-hisayri ug sa dili-makataronganon, sa paningkamot sa pagkaplag na usab ug kahulogan sa kinabuhi.” Busa, kita dili angay matingala sa kaylap nga kaikag sa okultong mga praktis, sama sa astrolohiya. Kini usa sa mga simtoma sa “kagul-anan” nga gibati sa mga tawo karong adlawa ingong katumanan sa tagna ni Jesus.

‘Ihangad ang Inyong mga Ulo’

Unsay pagabuhaton sa mga Kristohanon inigkakita nila niining tanang butang? Magpadaog sa kahadlok, sama sa mga tawo alirong kanila? Gihatag ni Jesus ang mosunod nga tambag: “Apan inigsugod sa pagkahitabo niining mga butanga, bumarog kamo nga malig-on ug ihangad ang inyong mga ulo, tungod kay ang inyong kaluwasan haduol na.”​—Lucas 21:28.

Buot ba nimong hisayran nga mas detalyado ang imong umaabot? Nan paggahin ug panahon sa pagsusi nga ugdang sa Bibliya ug “sulayi ang gidasig nga mga pahayag sa pagsusi kon kana nagagikan ba sa Diyos.” (1 Juan 4:1) Mahimo nimo kini sa tabang sa magasing Ang Bantayanang Torre, nga regular nagahisgot sa mga tagna sa Bibliya ug nagasaysay sa ilang aplikasyon sa atong adlaw. Busa, samtang makombinsir ka nga duol na ang kataposan sa samok nga kalibotan, ikaw, usab, makaarang sa ‘paghangad sa inyong mga ulo.’ Mahibaloan usab nimo kon unsay pagabuhaton aron sa pagpahimulos sa mga panalangin sa Mesiyanikong Gingharian, nga duol nang mobalda sa kahikayan sa kalibotan sa kaayohan sa tanang tawo nga matarong ug kasingkasing.

[Mga footnote]

[Kahon sa panid 5]

“Ug ang Ilhanan . . .Matuman Gayod”

‘Unsay daotan sa pag-adto sa usa ka mananagna sa kapalaran o pagbasa sa imong horoskopyo sa usa ka mantalaan? Dili ba kana dili-daotan nga kalingawan lamang?’

Ang Bibliya wala mag-isip nianang butanga nga dili gayod ugdang. Sa pagkamatuod, kini nagapabantay kanato batok sa mga espiritista ug mga mananagna. Sa basahong Deuteronomio, si Jehova nagahatag sa mosunod nga pasidaan: “Kong ang usa ka manalagna o magdadamgo sa usa ka damgo . . . maghatag kanimo sa usa ka ilhanan o usa ka tilimad-on, ug ang ilhanan o ang tilimad-on mamatuman nga bahin niana siya misulti kanimo, nga magaingon, ‘Atong pagasundon ang laing mga diyos,’ . . . ayaw pagpatalinghog sa mga pulong nianang manalagnaa o magdadamgoha sa maong damgo.”​—Deuteronomio 13:1-3.

Matikding ang Kasulatan wala maglalis sa kamatuoran nga ang pila sa mga panagna sa mga espiritista ug mga astrologo tingali matuman. Hinunoa, ang Bibliya nagapasidaan kanato nga, kon ang maong mga panagna gibase sa mga ilhanan sa mga langit o sa ubang paagi sa pagpanagna, sila nagagikan sa mga demonyo, nagalimbong, ug basin magpahilayo sa mga tawo gikan sa matuod nga Diyos.​—Tan-awa ang Buhat 16:16-18.

Ang pagpatalinghog sa mga astrologo o sa uban pa nga nagaangkon sa pagtagna sa umaabot mao ang pagpameligro nga makaagom sa seryosong espirituwal nga mga suliran ug mosangpot nga usa ka ulipon sa “daotang espiritung mga gahom sa langitnong mga dapit.” (Efeso 6:12) Busa, ang pagkonsulta nianang mga tawhana giisip sa Diyos nga usa ka seryosong sala; kadtong nagabuhat nianang mga butanga maoy ‘dulumtanan’ sa iyang mga mata ug sila dili magapanunod sa iyang Gingharian.​—Pinadayag 22:15.

Maoy sa atong kaugalingong kaayohan nga kita gipabantay sa Bibliya batok sa astrolohiya ug sa ubang matang sa pagpanagna.

[Kahon sa panid 6]

ANG BIBLIYA MITAGNANG DAAN NGA:

◆ Si Jesus matawo sa Bethlehem.—Miqueas 5:2.

◆ Siya matawo sa banay ni Isai, ang amahan ni Haring David.—Isaias 11:1, 10

◆ Siya pagapatyon sa usa ka estaka.—Salmo 22:16, 17

◆ Walay mabali sa iyang mga bukog.—Salmo 34:20