Makaila Ka Kaha sa Mesiyas?
SI Jesu-Kristo migugol ug tulo ug tunga ka tuig sa pagsangyaw sa Pulong sa Diyos taliwala sa mga Israelinhon. Apan sa hapit nang matapos ang iyang yutan-ong ministeryo, ang kadaghanan sa iyang mga katalirongan nagsalikway kaniya ingong Mesiyas, o gisaad sa Diyos nga “Dinihogang Usa.” Ngano?
Ang Bibliya motabang kanato sa pag-ila sa daghang katarongan kon nganong wala dawata sa unang-siglong mga Hudiyo si Jesus ingong Mesiyas. Tulo niini nga katarongan nagpugong sa daghan sa pagdawat sa presenteng-adlaw nga posisyon ni Jesus ingong nagamandong Mesiyanikong Hari.
“Buot Kami Makakitag Ilhanan”
Usa ka katarongan kon nganong ang unang-siglong mga Hudiyo wala modawat sa Mesiyas mao ang ilang dili pagdawat sa mga ilhanan sa Kasulatan nga nagpunting sa iyang pagka-Mesiyas. Usahay, ang mga tawong namati kang Jesus nangayo nga siya magpakitag ilhanan sa pagpamatuod nga siya gikan sa Diyos. Pananglitan, ang Mateo 12:38 nagtaho nga ang pipila ka mga eskriba ug mga Pariseo miingon: “Magtutudlo, buot kami makakitag ilhanan gikan kanimo.” Wala pa ba si Jesus magpakita kanilag mga ilhanan? Siyempre siya nagpakita na.
Nianang higayona nakabuhat na si Jesus ug daghang milagro. Iyang gihimo ang tubig nga bino, nag-ayo sa himalatyong batang lalaki, nag-ayo sa nasakit nga ugangang babaye ni Pedro, naghinlo sa tawong sanlahon, nagpalakaw sa paralisadong tawo, nag-ayo sa panglawas sa usa ka tawo nga nasakit sulod sa 38 ka tuig, nagpabalik sa normal sa nakuyos nga kamot sa usa ka tawo, nag-ayo sa daghang tawo sa ilang makapaguol nga mga sakit, nag-ayo sa ulipon sa usa ka opisyal sa kasundalohan, nagbanhaw sa anak nga lalaki sa usa ka babayeng balo gikan sa mga patay, ug nag-ayo sa usa ka tawong buta ug amang. Kining mga milagroha nahitabo sa Cana, Capernaum, Jerusalem, ug Nain. Dugang pa, ang mga balita bahin sa maong mga milagro mikaylap sa tibuok Judea ug sa palibot nga mga dapit.—Juan 2:1-12; 4:46-54; Mateo 8:14-17; 8:1-4; 9:1-8; Juan 5:1-9; Mateo 12:9-14; Marcos 3:7-12; Lucas 7:1-10; 7:11-17; Mateo 12:22.
Tin-aw, daghan ang mga ilhanan nga nagpamatuod nga si Jesus mao ang Mesiyas. Bisag gibuhat niya ang daghan kaayong mga ilhanan atubangan sa katawhan, sila walay pagtuo kaniya. Kadtong nakakita sa pamatuod nga si Jesus gipadala sa Diyos apan wala magdawat kaniya ingong ang Mesiyas maoy mga buta sa espirituwal. Ang ilang mga kasingkasing matig-a ug dili-madutlan sa kamatuoran.—Juan 12:37-41.
Komosta sa atong adlaw? Ang pipila ka mga tawo nag-ingon, “Motuo lang ako kon unsay makita sa akong mga mata mismo.” Apan maalamon ba gayod kanang dalana nga subayon? Ang mga tagna sa Bibliya nagpakita nga si Jesus naentrono na ingong Hari sa langit diha sa Mesiyanikong Gingharian. Sanglit siya dili-makita, nagkinahanglan kitag ilhanan aron motabang kanato sa pagsabot sa iyang pagmando, nga nagtimaan sa pagsugod sa kataposang mga adlaw niining daotang sistema sa mga butang. Naila ba nimo ang ilhanan?—Mateo 24:3.
Sumala sa Bibliya, ang pagsugod sa pagmando ni Kristo ingong Mesiyanikong Hari pagatiman-an sa panaggubat, mga linog, mga kanihit sa pagkaon, ug mga kamatay diha sa di-hitupngang sukod. Sa “kataposang mga adlaw,” ang tawhanong mga relasyon pagatiman-an sa kahakog, kadalo, ug kawalay-pagpugong. (2 Timoteo 3:1-5; Mateo 24:6, 7; Lucas 21:10, 11) Gawas sa kronolohikal nga pamatuod, kapin sa 20 ka nagkalainlaing mga bahin sa kataposang mga adlaw ang nagpunting sa pagsugod sa pagmando sa Mesiyas niadtong 1914.—Tan-awa Ang Bantayanang Torre sa Marso 1, 1993, panid 5.
“Mga Mahigugmaon ug Salapi”
Ang materyalismo maoy laing katarongan kon nganong ang mga Hudiyo misalikway kang Jesus ingong Mesiyas. Ang paghatag ug dakong importansiya sa bahandi ang nagpugong sa daghan sa pagsunod kang Jesus. Pananglitan, ang mga Pariseo nailhan nga “mga mahigugmaon ug salapi.” (Lucas 16:14) Tagda ang kahimtang sa usa ka bahandianong batan-ong magmamando nga miduol kang Jesus ug nangutana kon sa unsang paagi mabatonan ang kinabuhing walay kataposan. “Sunda nga mapinadayonon ang mga sugo,” mitubag si Jesus. “Akong gisunod kining tanan; unsa pa may akong kulang?” nangutana ang batan-ong lalaki, dayag nga nasabtan niya nga labaw pa ang gikinahanglan sa pagtuman sa pipila ka kasugoan. “Ibaligya ang imong mga gipanag-iya ug ipanghatag sa mga kabos ug makabaton ka ug bahandi sa langit, ug umari magmahimong akong sumusunod,” gisultihan siya ni Jesus. Pagkadakong higayon—nga mahimong usa ka tinun-an sa Mesiyas! Bisan pa ang magmamando milakaw, naguol. Ngano? Tungod kay ang bahandi sa yuta mas hinungdanon kaniya kay sa bahandi sa langit.—Mateo 19:16-22.
Ang kahimtang wala mausab. Ang pagkahimong tinuod nga sumusunod sa Mesiyanikong Hari nagkahulogan sa pagbutang pag-una sa espirituwal nga mga intereses kay sa tanang uban, lakip sa yutan-ong mga kabtangan. Alang kang bisan kinsa nga may materyalistikanhong panglantaw, kini maoy usa ka hagit. Pananglitan, usa ka misyonaryong magtiayon sa usa ka Sidlakang nasod nakigsulti sa usa ka babaye bahin sa Bibliya. Nagtuo nga siya buot nga mokat-on ug dugang bahin kang Jehova nga Diyos ug sa iyang Anak, si Jesu-Kristo, ang magtiayon nagtanyag kaniya sa Ang Bantayanang Torre ug Pagmata! Unsay iyang reaksiyon? “Kini bang mga magasina motabang kanako nga makakuwarta ug dugang?” siya nangutana. Ang babaye mas interesado sa materyal nga mga butang kay sa espirituwal nga mga butang.
Ang mao gihapong magtiayon nagtuon sa Bibliya uban sa usa ka batan-ong lalaki nga nagsugod sa pagtambong sa mga tigom sa Kingdom Hall. “Nag-usik-usik ka lang sa imong panahon,” gisultihan siya sa iyang mga ginikanan. “Angay kang mangitag ikaduhang trabaho sa gabii ug mokitag dugang salapi.” Pagkamakapasubo sa dihang dasigon sa mga ginikanan ang ilang mga anak sa pag-una sa materyal nga mga butang kay sa pagkakat-on bahin sa Mesiyanikong Hari! “Sa tanan niyang bahandi ang magmamando dili makapalit ug napulo ka libo ka tuig nga kinabuhi,” nag-ingon ang sanglitanan sa Insek.
Daghan karon ang nakaamgo nga ang pagkakat-on ug pagsunod sa Mesiyanikong Hari wala maghatag ug luna sa paghigugma sa salapi. Usa ka Saksi ni Jehova nga may kaugalingong negosyo nga dakog kita, miingon: “Ang pagbatog daghang salapi makapalipay kaayo apan dili kinahanglanon. Ang salapi dili maoy makapalipay sa usa ka tawo.” Siya karon usa na ka membro sa pamilyang Bethel sa usa ka sanga sa Uropa sa Watch Tower Society.
“Kahadlok sa mga Hudiyo”
Ang kahadlok sa tawo maoy laing hinungdan kon nganong ang mga Hudiyo wala modawat kang Jesus ingong Mesiyas. Ang pagdawat sa iyang pagka-Mesiyas sa publiko magpameligro sa ilang reputasyon. Alang sa uban dako kaayo kana nga kapildihan. Tagda si Nicodemo, usa ka membro sa Hudiyohanong hataas nga korte nga gitawag ug Sanhedrin. Nakadayeg sa mga ilhanan ug mga pagtulon-an ni Jesus, siya miadmitir: “Rabbi, kami nahibalo nga ikaw ingon nga usa ka magtutudlo mianhi gikan sa Diyos; kay walay makahimo niining mga ilhanan nga imong ginahimo gawas kon ang Diyos uban kaniya.” Bisan pa si Nicodemo miduaw kang Jesus sa kagabhion, lagmit aron dili mailhan sa ubang mga Hudiyo.—Juan 3:1, 2.
Alang sa daghan nga nakadungog sa pagpahayag ni Jesus, ang pag-uyon sa mga tawo mas hinungdanon kay nianang sa Diyos. (Juan 5:44) Sa dihang si Jesus didto sa Jerusalem alang sa Pista sa mga Balongbalong niadtong 32 K.P., “dihay daghang huluhungihong bahin kaniya taliwala sa mga panon sa katawhan.” Walay usa ang naghisgot bahin kang Jesus diha sa publiko “tungod sa kahadlok sa mga Judio.” (Juan 7:10-13) Bisan ang mga ginikanan sa usa ka tawo nga giayo ni Jesus sa pagkabuta dili andam sa pagdawat sa milagro nga gikan sa hawas sa Diyos. Sila usab “nahadlok sa mga Hudiyo.”—Juan 9:13-23.
Karong adlawa, ang pipila nakaamgo nga si Jesus nagamando na karon ingong Mesiyanikong Hari sa langit, apan sila nahadlok sa pagdawat niini nga dayag. Alang kanila dako ang kapildihan nga mawad-an sa ilang maayong dungog sa uban. Sa Alemanya, pananglitan, usa ka Saksi ni Jehova nakapakighisgot sa Bibliya uban sa usa ka tawo nga miadmitir: “Ang ginasangyaw ninyong mga Saksi bahin sa Bibliya maoy tinuod. Apan kon ako mahimong usa ka Saksi karon, ugma ang tanan mahibalo bahin niana. Unsay ilang hunahunaon diha sa trabahoan, sa kasilinganan, ug sa klab nga gianiban nako ug sa akong pamilya? Dili ako makaantos niana.”
Unsay nagpahinabo sa kahadlok sa tawo? Ang garbo, gugma sa popularidad taliwala sa pamilya ug mga higala, kahadlok nga yubiton ug pakaulawan, kabalaka bahin sa pagkahimong lahi kay sa kadaghanan. Ang maong mga pagbati napamatud-ang usa ka pagsulay alang niadtong nagsugod sa pagtuon sa Bibliya uban sa mga Saksi ni Jehova. Pananglitan, usa ka batan-ong babaye nalipay nga nakakat-on bahin sa Paraiso nga pagatukoron sa yuta sa Mesiyanikong Gingharian ubos sa pagmando ni Jesu-Kristo. Apan siya hilig kaayo sa disko, ug ang kahadlok sa tawo nagpugong kaniya sa pagpakigsulti sa uban bahin niini nga paglaom. Sa kataposan, siya nakabatog kaisog sa mainandamong pagpakigsulti bahin sa Bibliya. Ang iyang mga higala sa disko nagsalikway kaniya, apan ang iyang bana ug iyang mga ginikanan nagpakita ug interes. Ang babaye ug iyang inahan sa ulahi nabawtismohan, ug ang iyang bana ug iyang amahan misugod usab sa pagtuon sa Bibliya. Pagkadakong ganti sa pagbuntog sa kahadlok sa tawo!
Nakaila Ka ba Gayod sa Mesiyas?
Sa dihang si Jesus himalatyon diha sa sakitanang estaka, presente ang pipila sa iyang mga tinun-an. Sila nakaila kaniya ingong ang gitagnang Mesiyas. Presente usab ang Hudiyohanong mga magmamando, kinsa, sa mahulagwayong pagkasulti, nagpangayo gihapon ug ilhanan. “Ipaluwas niya ang iyang kaugalingon, kon siya mao man ang Kristo [o Mesiyas] sa Diyos, ang Piniling Usa.” (Lucas 23:35) Dili ba gayod sila mohunong sa pagpangayog ilhanan? Si Jesus nakahimog daghang milagro. Dugang pa, ang iyang pagkatawo, ministeryo, pagsulay, pagpatay, ug pagkabanhaw nagtuman sa daghang tagna sa Hebreohanong Kasulatan.—Tan-awa “Ang Tibuok Kasulatan Dinasig sa Diyos ug Mapuslanon,” gipatik sa Watchtower Bible and Tract Society of New York, Inc., mga panid 343-4.
Gisaway sa mga lumalabay si Jesus, kay nagsalikway sa ebidensiya sa iyang pagka-Mesiyas. (Mateo 27:39, 40) Ang mga sundalo sa pagkamateryalistiko nagbahinbahin sa taliwala kanila sa besti ni Jesus, nga giripa ang iyang pang-ilalom nga besti. (Juan 19:23, 24) Ang kahadlok sa tawo adunay bahin sa pipila ka mga kaso. Pananglitan, tagda si Jose nga gikan sa Arimatea, usa ka membro sa Sanhedrin. Siya “usa ka tinun-an ni Jesus apan sa tago gumikan sa iyang kahadlok sa mga Judio.” Human sa kamatayon sa Mesiyas, giatiman ni Jose ug Nicodemo ang lawas ni Jesus. Busa nabuntog ni Jose ang iyang kahadlok sa tawo.—Juan 19:38-40.
Kon ikaw nabuhi sa unang siglo, mailhan kaha nimo si Jesus ingong Mesiyas? Ang pag-ila nagkinahanglan nga imong dawaton ang ebidensiya sa Kasulatan, isalikway ang materyalistikanhong mga hunahuna, ug dili magpadaog sa kahadlok sa tawo. Niining kataposang mga adlaw, ang matag usa kanato angayng mangutana sa iyang kaugalingon, ‘Naila ko ba si Jesus karon ingong ang Mesiyanikong Hari sa langit?’ Sa dili madugay gamhan niya ang mga kalihokan sa yuta. Sa dihang kana mahitabo, apil ka kaha niadtong kinsa tinuod gayod nga nakaila kang Jesu-Kristo ingong ang gisaad nga Mesiyas?
[Hulagway sa panid 28]
Ayawg isalikway ang ebidensiya nga si Jesus mao ang Mesiyanikong Hari
[Hulagway sa panid 31]
Ang pagkakat-on bahin sa Mesiyas sagad nagkahulogan sa pagbuntog sa kahadlok kon unsay isulti sa uban