HAGDAN

Ang hagdan gihisgotan lamang sa Bibliya diha sa Genesis 28:​12, diin ang Hebreohanong termino nga sul·lamʹ gigamit sa pagtumong sa usa ka hagdan nga nakita ni Jacob diha sa usa ka damgo. Ang patriarka nakakita ug usa ka hagdan (o tingali samag mga ang-ang nga mga bato) nga nahimutang sa yuta nga ang tumoy niini miabot sa mga langit. Ang mga manulonda sa Diyos nagasaka ug nagakanaog diha sa hagdan, ug ang usa ka representasyon ni Jehova nga Diyos anaa sa ibabaw niini. (Gen 28:13) Kini nga hagdan, diin diha niini nagasaka ug nagakanaog ang mga manulonda, nagpakita nga adunay komunikasyon tali sa yuta ug sa langit ug nga ang mga manulonda nag-alagad sa mahinungdanong paagi tali sa Diyos ug niadtong iyang giuyonan.

Sa dihang si Jesus miingon sa iyang mga tinun-an, “Sa pagkatinuod gayod ako magaingon kaninyo, Inyong makita nga mabuksan ang langit ug ang mga manulonda sa Diyos magakayab ug magakunsad nganha sa Anak sa tawo,” lagmit nga diha sa iyang hunahuna ang panan-awon ni Jacob.​—Ju 1:51.

Ang pang-asdang nga mga hagdan maoy usa sa mga himan nga panglikos nga gigamit panahon sa gubat ug kasagarang gihulagway diha sa Ehiptohanon ug Asiryanhon nga mga monyumento. Usa ka linilok gikan sa Nineve nagpakita nga ang mga Asiryanhon migamit ug mga hagdan sa dihang ilang gisulong ug gilikosan ang Lakis.

Sa karaang kapanahonan ang mga hagdan gigamit usab sa ubang mga katuyoan, sama sa pagpanukod. Pananglitan, kini gipakita diha sa bantayog sa Ur-Nammu nga naghulagway sa pagtukod sa usa ka ziggurat (usa ka torre nga pormag piramide). Dugang pa, diha sa usa ka Asiryanhon nga linilok nga gikan sa Tell Halaf, nga gituohang naglungtad sukad pa sa ikasiyam nga siglo W.K.P., ang usa ka tawo gipakita nga mikatkat sa usa ka palma nga datiles ginamit ang usa ka hagdan.