Makahinumdom Ka Ba?

Imo bang napalandong pag-ayo ang dili pa dugayng mga gula sa Ang Bantayanang Torre? Kon mao, tingali mahinumdoman mo ang mosunod:

◻ Unsa nga sukod nga nagpakita si Jesus sa iyang gugma sa katawhan?

Siya sa kinabubut-on mibiya sa langitnong puloy-anan sa kalinaw ug kasegurohan aron sa pag-anhi sa pagpakig-uban sa pangaon, pagkatulog, ug pakig-uban sa masakiton ug himalatyong katawhan. Human niini, kinabubut-ong gihatag ni Jesus ang iyang hingpit tawhanong kinabuhi aron sa pagtaganag lukat alang sa ikaayo sa katawhan. (Mateo 20:28)​—w 12/15/85, panid 3, 4.

◻ Unsang personal nga kaayohan ang moresulta sa Kristohanon nga nagapalambo sa pagpugong sa kaugalingon?

Ang Kristohanon makabaton ug mas dakong pagtahod sa kaugalingon pinaagi sa pagpugong sa kaugalingon. Dugang pa, iyang matagamtam ang dakong kalinaw ug kalipay sa pamilya, sa kongregasyon, ug sa adlaw-adlawng relasyon. Labaw sa tanan, ang pagpugong sa kaugalingon makatabang kaniya sa pagtukod ug maayong relasyon uban sa iyang Maglalalang ug sa pagpaila sa iyang kaugalingon ingong tinuod nga Kristohanon.​—w 12/15/85, panid 24.

◻ Unsa ang nagapaluyong motibo sa pagpakitag pagkamaabiabihon?

Bisag makatagbaw ang pagdawat ug mga pahayag sa pasalamat gikan sa uban ug sa pagkasayod nga ang atong kahago gipabilhan, kita angayng magpakitag pagkamaabiabihon tungod kay kini mao ang husto ug mahigugmaong butang nga buhaton. Dugang pa, malipay si Jehova nga Diyos kon atong buhaton kini.​—1/15, panid 22.

◻ Sa unsang paagi ang magkakabayo sa puting kabayo, nga gibatbat sa Pinadayag 6:2, nagaapektar sa imong kinabuhi?

Si Jesus mao ang magkakabayo sa puting kabayo, ug siya misugod sa iyang langitnong pagkabayo sa 1914. Nagtagna kon sa unsang paagi ang mga tawo maapektohan sa iyang pagmando, siya miingon: “Inig-abot sa Anak sa tawo uban sa iyang himaya . . . iyang pagalainon ang katawhan gikan sa usag usa, sama sa magbalantay nga magalain sa karnero gikan sa mga kanding.” Karon, ang tanang katawhan ginalain, ug ang imong pagsanong sa balita sa Gingharian magkahulogan ug kinabuhi ug kamatayon alang kanimo. (Mateo 25:31-33; 24:14)​—1/15, panid 6.

◻ Unsa ang pila ka paagi diin pagalipayon ug palig-onon ni Jehova ang iyang mga alagad?

Si Jehova magalipay ug magapalig-on sa iyang mga alagad pinaagi sa iyang balaang espiritu. (1 Pedro 4:12-14) Iyang lipayon usab sila pinaagi sa pagtubag sa ilang mga pag-ampo. (Filipos 4:6, 7) Dugang pa, ang Pulong sa Diyos maoy dakong tuboran sa paglipay, nga nagpasalig sa iyang mga alagad nga walay mahitabo kanila nga dili makita o makontrolar ni Jehova.​—2/1, panid 19.

◻ Unsa ang apokalipsis nga gitagna sa Bibliya?

Kini mao ang piniling pagpangilabot ni Jehova sa tawhanong kalihokan.​—2/15, panid 7.

◻ Unsay kahulogan sa ekspresyon ni Jesus nga “kinabuhi diha sa inyong kaugalingon,” diha sa Juan 6:53?

Diha sa Juan kapitulo 6, gipakasama ni Jesus ang “kinabuhing walay kataposan” sa pagkabaton ug “kinabuhi diha sa inyong kaugalingon,” nga mao, ang pagsulod sa kataposan ngadto sa kinabug-osan sa kinabuhi. Ang “gamayng panon” sa mga manununod sa Gingharian makaeksperyensiya niana sa ilang pagkabanhaw ngadto sa langit, ug ang “ubang karnero” makaeksperyensiya niana human sa kataposan sa Usa ka Libo ka Tuig nga Pagmando ni Kristo Jesus. (Pinadayag 20:4, 5)​—2/15, panid 19.

◻ Unsang prinsipyo ang gipasiugda sa tibuok nga basahon ni Nehemias nga maoy pagtulon-an alang kanato karon?

Ang prinsipyo mao nga “gawas nga si Jehova ang magatukod sa balay, kawang lamang ang kahago niadtong nagatukod niini.” (Salmo 127:1) Karon, sa tanan natong mga kalihokan, kita molampos lamang kon atong madawat ang panalangin ni Jehova.​—2/15, panid 26.

◻ Unsay nagpalig-on kang Job sa panahon sa iyang mga pagsulay, ug sa unsang paagi makatabang kini kanato karon?

Masaligon si Job nga dili lamang ingon niini ang kinabuhi. (Job 14:13-15) Nakabaton sa samang pagsalig karon, nga si Jehova magabanhaw sa iyang matinumanong mga alagad, ang makatabang kanato sa pag-atubang sa bisan unsang pagsulay nga ipahamtang ni Satanas kanato. (Hebreohanon 6:10; 11:6)​—3/1, panid 20.

◻ Unsang pagtulon-an ang mapupo sa mga ginikanan gikan sa resulta sa sala ni David ug Bathsheba?

Mipakita si Jehova ug kaluoy kang David tungod sa pakigtugon sa Gingharian, busa nagtugot kaniya ug kang Bathsheba sa pagpadayon sa pagkinabuhi. Apan, ang tigpamaba ni Jehova miingon kanila: “Tungod kay niining buhata ikaw nagahatag ug dakong hinungdan sa pagpasipala kang Jehova, ang anak, ang bata, nga matawo kanimo, sa pagkatinuod mamatay.” (2 Samuel 12:14) Angay nga mapasilsil kini sa mga ginikanan nga ang ilang batasan makaapektog dako sa ilang mga anak.​—3/15, panid 31.

◻ Unsay gikinahanglan aron ang usa mahimong inuyonang kauban sa mga Saksi ni Jehova?

Kinahanglang dawaton niining tawhana ang bug-os nga pagtulon-an sa Bibliya, lakip niadtong Kasulatanhong mga pagtuo nga tagsaon sa mga Saksi ni Jehova.​—4/1, panid 31.

◻ Kon mosulod ang daotang hunahuna sa atong kaisipan sa matag karon ug unya, unsay atong buhaton?

Kinahanglang dumilian nato ang atong mga hunahuna sa pagpalandong niining daotang mga butang. Aron matabangan kita niini, kinahanglang sangpiton nato si Jehova diha sa pag-ampo, ‘itugyan ang atong palas-anon diha kang Jehova.’ (Salmo 55:22)​—4/1, panid 25.