Makita ba Nato Sila Pag-usab?
“Gibiyaan mo kami sa dayon. Kalit kaayo kadto. Apan bisan pa sa lalom nga mga samad nga gibilin sa imong kamatayon, diha sa among mga kasingkasing ikaw nagauban kanunay kanamo. Dili gayod namo kalimtan ang matahom nga mga tuig nga among gitagamtam uban kanimo ni nawad-an kami sa paglaom nga makakita ra kanimo pag-usab.”
DIDTO sa Grand Duchy sa Luxembourg, ang namatyang mga pamilya ug mga higala kanunayng nagapahayag ug mga sentimento sama niini diha sa mantalaan sa notisya sa mga patay nga patikon human nga mamatay ang usa ka minahal. Ang susamang mga hunahuna anaa sa mga kaisipan sa uban sa tibuok-kalibotan, mainit nga mga hunahuna nga nagapanumdom, apil ang makasubong kaguol sa ilang kamatayon—paglaom nga sagol ug walay-kasegurohan. Tingali nakaagi ka na niini o nakadungog bahin niini gikan sa usa ka higala human nga namatay ang usa ka minahal.
Alang sa kadaghanang tawo, ang paglaom sa pagkakita pag-usab sa ilang patayng mga minahal makalibog ug dili-tin-aw. Ang rason yano. Sa pagsugod, halos walay tawo karong adlawa ang nagagugol ug panahon aron siya makabatog kahibalo bahin niining butanga. Ug kon dunay usa nga mosulay, ang impormasyon nga ihatag sa kadaghanang relihiyon bahin sa pangutana mahimong hanap kaayo o kaha makalilisang aron katuohan.
Sama sa nahibaloan na tingali nimo, alang sa kadaghanan ang “umaabot nga kinabuhi” lamang alang sa patay mao ang pagpadayon sa ilang mga linya sa pamilya. Tingali nakadungog ka sa hunahuna nga ang mga tawo ‘nagpadayon sa pagpabiling buhi diha sa ilang mga anak.’ Apan ang mao bang “kinabuhi” mohatag bisan unsang may panimuot nga kaayohan sa patay o bisan unsang palaabuton alang sa ilang gibiyaan nga makakita kanila pag-usab? Dili gayod! Busa wala gayoy paglipay sa maong hunahuna!
Alang sa intereses sa atong kaugalingong mga minahal, kadtong nangamatay na ug kadtong buhi pa, kita nagkinahanglag mga tubag sa mga pangutana: Kon ang usa sa atong minahal mamatay, makita pa kaha nato siya pag-usab? Kon oo ang tubag, kanus-a ug asa man kana mahitabo? Sa langit ba? O dinhi ba hinoon sa yuta? Sa pagkamatuod, unsay paglaom alang sa mga patayng minahal ug alang kanato sa umaabot?
Sa pagkaprangka, dunay maayong balita mahitungod niining mga pangutanaha. Maayo kini sa pagkaagi nga dunay usa ka segurado, makalipayng paglaom. Usa kini ka balita tungod kay kini maoy usa ka mensahe nga lahi gikan sa nadungog na sa kadaghanang tawo, bisan sa relihiyosong mga tuboran.
Sa unang siglo sa atong Komung Panahon, sa dihang ang Kristohanong misyonerong si Pablo didto pa sa Atenas, Gresya, siya naghisgot bahin sa Kasulatanhong paglaom alang sa mga patay. Ang ubang mga mamiminaw mapangutanahon, apan ang uban nakadungog nga may pagtamay. Ang pipila ka mga pilosopo gusto pang magpadayon sa pakig-ergo kaniya, ug sila miingon: “Unsa man kahay buot isulti niining tawong pataka lamag yamyam?” Ang uban nag-ingon nga siya maoy “‘usa ka tigmantalag mga diyos nga dumuloong.’ Kay iya mang gisangyaw ang maayong balita bahin kang Jesus ug ang pagkabanhaw.” (Buhat 17:18) Oo, ang maayong balita nga gipahayag ni Pablo nalangkit sa pagkabanhaw!
Unsay imong kaisipan sa paghisgot bahin sa umaabot nga pagkabanhaw—sa pagkakita sa mga patay nga mabuhi pag-usab? Mopatim-aw ba kini nga usa ka walay kapuslanang tabi-tabi? O, tungod sa imong relihiyosong edukasyon ug sa imong personal nga mga hunahuna, ang mensahe ba sa Balaang Kasulatan bahin sa paglaom sa mga patay mopatim-awng bag-o ug katingalahan kanimo, ingong daw nagagikan kini sa ‘diyos nga dumuloong’?
Alang kang Pablo, ang mga taga Atenas miingon: “Ikaw nagapailaila ug mga butang nga katingalahang pamation sa among mga dalunggan. Busa buot unta kami mahibalo unsay kahulogan niining mga butanga.” (Buhat 17:20) Ikaw ba usab buot nga makakat-on ug dugang bahin sa paglaom sa Bibliya alang sa atong patayng mga minahal, ug alang kanato nga buhi? Kon mao, ang mosunod nga artikulo makainteres kanimo.