Ang Panahon sa Pagpangita sa Diyos
ANG ilustrasyon dinhing panira maoy sa Atenyanhong Acropolis, kas-a sentro sa pagsimba sa daghang mga diyos ug mga diyosa. Sa ubos sa Acropolis mao ang Areopago, gikaingon nga mao ang gikahimutangan sa korte sa hustisya sa karaang mga panahon. Dinhing dapita, hapit 2,000 ka tuig sa miagi, si apostol Pablo mibarog ug mipahayag sa pagkatinuod tagsaong pakigpulong. Ang mosunod maoy pila sa iyang gipanulti:
“Siya [Diyos] mao ang nagbuhat sa tanang nasod sa katawhan gikan sa usa ka tawo, aron papuy-on sa tanang dapit sa yuta, tapos niya maandam ang mga gitagal nga kapanahonan ug ang mga utlanan sa mga dapit nga ilang pagapuy-an, aron sila mangita sa Diyos, basin pag ila siyang mapangita ug makaplagan, bisan tuod nga siya dili ra halayo gikan sa matag-usa kanato. Kay diha kaniya kita nangabuhi ug nagalihok ug nagalungtad.”—Buhat 17:26-28.
Pagkadakong kalainan unta sa kasaysayan kon ang katawhan sa linangkob nagpakabana sa mga pulong ni Pablo! Pagkadaghang mga gubat, pagkadaghang mga pag-antos, ang napugngan unta kon ang katawhan nakaila sa ilang komon nga interes ingong kaliwat sa usa ka tawo nga gilalang sa Soberanong Ginoo, si Jehova.
Karong adlawa, ang katawhan nabahin tungod sa nasyonalismo, mga kalainan sa ang-ang sa panginabuhi, rasanhong pagdumot, ug sa sosyal nga dili-pagkaangay. Bisan pa, ang mga pulong ni Pablo mapadapat gihapon. Tanan kita maoy mga kaliwat nianang usa ka tawo nga gilalang sa Diyos. Tanan kita, sa maong diwa, mga managsoon. Ug sa gihapon dili pa ulahi kaayo sa pagpangita sa Diyos samtang siya hikaplagan pa.
Ang mga pulong ni Pablo nagpasabot ug labaw pang kaugdang sa dihang atong tagdon ang kataposang mga pulong sa iyang diskurso. Siya nag-ingon: “Siya [Diyos] nakatudlo na ug adlaw kanus-a subay sa katarongan iyang pagahukman ang kalibotan pinaagi sa usa ka tawo nga iyang gitudlo, ug iyang himatud-an ngadto sa tanang mga tawo pinaagi sa pagbanhaw kaniya gikan sa mga patay.”
Ang pagkabanhaw ni Jesus usa ka kasaysayanhong kamatuoran, ug maingon sa gipakita ni Pablo, kadto maoy garantiya nga may usa ka adlaw sa paghukom alang sa katawhan. Anus-a? Tinuod, kita nahibalo nga kana hapit 2,000 ka tuig nga mas duol kay sa panahon nga si Pablo mibarog ibabaw sa Areopago ug naglitok niining mga pulonga. Sa pagkatinuod, ang katumanan sa tagna sa Bibliya nagtimaan nga kana duol na kaayo. Pagkamakapahinuklog nga hunahunaon! Pagkadinalian nga kita mangita sa Diyos sa bug-os nga kaugdang, sanglit, sama sa giingon ni Pablo sa mga taga-Atenas, “karon siya nagasugo sa tanang mga tawo bisan diin sa paghinulsol”!—Buhat 17:30, 31.