TOLDA, TIGHIMO UG

Usa ka tawo nga tiggama o tig-ayog mga tolda. Sa Buhat 18:​3, ang pangita ni Pablo, Aquila, ug Priscila gitawag sa Gregong termino nga ske·no·poi·osʹ. Lainlaing opinyon ang gihatag maylabot sa kon unsa gayod nga matang sa artesano ang gipasabot niining pulonga (tighimo ba ug tolda, maghahablon ug mga tela, o kaha tighimog pisi); apan giila sa daghang eskolar nga “daw walay katarongan nga motipas gikan sa hubad nga ‘mga tighimo ug tolda.’”​—The Expositor’s Greek Testament, giedit ni W. Nicoll, 1967, Tomo II, p. 385.

Sa unang pagduaw ni Pablo sa Corinto siya miestar uban kang Aquila ug Priscila “kay managsama ang ilang pangita.” (Buh 18:1-3) Si apostol Pablo naggikan sa Tarso sa Cilicia, usa ka dapit nga ilado tungod sa panapton niini nga hinimo gikan sa balhibo sa kanding nga ginganlan ug cilicium nga gigamit sa paggamag mga tolda. (Buh 21:39) Taliwala sa mga Hudiyo sa unang siglo K.P., giisip nga maayong tudloan ang usa ka batan-ong lalaki ug usa ka pangita bisan kon siya mokuha ug hataas nga edukasyon. Busa lagmit nga si Pablo nakabaton ug kasinatian sa paggamag mga tolda samtang batan-on pa. Ang paghimog mga tolda tingali mao usab ang trabaho nga gibuhat sa apostol didto sa Tesalonica (1Te 2:9; 2Te 3:8) ug sa ubang mga dapit. (Buh 20:​34, 35; 1Co 4:​11, 12) Dili kini sayon nga trabaho, kay giingon nga ang cilicium maoy gahi ug gansangon, busa lisod ang pagtabas ug pagtahi niini.