PAG-ALSA BATOK SA PAMUNOAN

Ang Gregong pulong nga staʹsis, nga sa panguna nagkahulogang “nagbarog” (Heb 9:8), sa ulahi nagkahulogan nga “pagbarog” o “pag-alsa batok sa pamunoan.” (Mar 15:7; Luc 23:​19, 25, Int) Kini mahimong hubaron usab nga “panagsumpaki” (Buh 15:2), ug usahay kini naglakip sa ideya sa kapintasan.​—Buh 23:​7, 10.

Ubos sa Romanhong balaod ang pag-alsa batok sa pamunoan o ang pagpasiugda o pagpakigbahin sa kagubot maoy usa ka salaod nga may silot nga kamatayon. Busa gipahinumdoman sa kalihim sa siyudad ang magubtanong panon sa Efeso sa kapeligrohan nga ilang dangatan sa dihang siya miingon: “Kita sa pagkatinuod nameligro nga ikihag pag-alsa batok sa pamunoan mahitungod sa mga hitabo karong adlawa, sanglit wala gayoy makaplagan nga hinungdan nga magtugot kanato sa paghatag ug katarongan labot niining magubtanong panon.” (Buh 19:40) Ug ang akusasyon ni Tertulo atubangan sa Romanong si Gobernador Felix nga si Pablo “nagsugnib ug mga pag-alsa sa pamunoan taliwala sa tanang Hudiyo” maoy seryoso kaayong akusasyon. Kon mapamatud-an nga sad-an, si Pablo mahimong masilotan sa kamatayon.​—Buh 24:5.