ANTIPATRIS

[Kang (Iya ni) Antipater].

Usa ka siyudad nga gitukod pag-usab ni Herodes nga Bantogan niadtong 9 W.K.P. ug ginganlan sumala sa ngalan sa iyang amahan nga si Antipater (II). Gituohan nga mao kini ang Ras el-ʽAin (Tel Afeq) diha sa daghag tubig ug tabunok nga dapit sa Patag sa Saron. Ang Antipatris gituohan nga mao ang nahimutangan sa unang siyudad sa Apek nga gihisgotan sa 1 Samuel 4:1. Ang mga pagpangubkob nga gihimo didto niadtong 1946, 1961, ug 1974 mopatim-awng nagkompirmar niini.​—Tan-awa ang APEK Num. 3.

Niining dapita nga ang gipakuyog nga pangunang pundok sa Romanhong kasundalohan naghatod kang Pablo, nga mipanaw ug mga 50 km (30 mi) palugsong sa mga kabukiran gikan sa Jerusalem sa panahon sa kagabhion. (Buh 23:31) Ang dapit nahimutang sa kinasang-an sa Romanhong mga dalan sa kasundalohan gikan sa Jerusalem ug Lida paingon sa Romanhong kaulohan sa Cesarea. Gikan sa Antipatris ang 70 ka sundalong mangangabayo nagdala kang Pablo sa nahibiling distansiya nga mga 40 km (25 mi) latas sa patag paingon sa Cesarea.

3. Usa ka siyudad nga kon basehan ang mga siyudad nga gihisgotan uban niini, lagmit nahimutang sa Patag sa Saron. Ang hari niini maoy lakip niadtong gipamatay ni Josue. (Jos 12:18) Mga siglo sa ulahi, apan sa wala pa mahimong hari si Saul, dinhi nagkampo ang mga Filistehanon una pa sa ilang kadaogan batok sa Israel, nga mihan-ay sa pagpakiggubat sa kasikbit nga Ebenezer. (1Sa 4:1) Gituohan nga nahimutang kini diha sa Ras el-ʽAin (Tel Afeq; lahi sa Num. 2) sa tinubdan sa Suba sa Yarkon. Ang Apek gihisgotan diha sa Ehiptohanon ug Asiryanhon nga mga sinulat. Gituohan nga ang lungsod sa Antipatris, nga gihisgotan sa Buhat 23:​31, gitukod sa nahimutangan sa karaang Apek. Si Josephus naghisgot sa “usa ka torre nga gitawag ug Apheku” maylabot sa Antipatris. (The Jewish War, II, 513 [xix, 1]) Ang Shilo, nga gikan didto gidala sa mga Israelinhon ang arka sa pakigsaad, maoy mga 35 km (22 mi) ang gilay-on dapit sa S.