Ang Hunahuna sa Bibliya

Ang Sektaryahanong Pagsimba Dawaton ba sa Diyos?

UNSAY moabot sa imong hunahuna inigkadungog nimo sa pulong “sekta”? Mga grupo sa mga tawong may katingad-anang biste nga nagasumaysumay ug nagasayaw sa mga eskina sa kadalanan? Panon sa mga debotadong nagayukbo atubangan sa misteryosong guru nga pigura? Mangilngig nga mga estorya bahin sa gidagit o giabusahang mga bata? O, tingali, kahadlokang mga sugilanon sa seryal nga mga pagpatay o masang mga paghikog?

Ikasubo, ang mga taho niining matanga subsob mopatim-aw, tingali subsob ra kaayo. Ang resulta mao nga, alang sa kadaghanang tawo, ang pulong “sekta” nahimong kaamgid sa butang katingad-anan, dili-naandan, ug tingali peligroso. Alang kanila, ang tanang relihiyosong grupo nga dili sakop sa gitawag establisado, dagkong mga iglesya maoy mga sekta. Katuohan ba ang maong hunahuna? Ug, labing hinungdanon, kana ba ang hunahuna sa Bibliya?

Unsa ba ang Usa ka Sekta?

Makaiikag, daghang Hudiyo sa unang siglo nagbaton sa maong hunahuna bahin sa mga sumusunod ni Jesu-Kristo, ilabina si apostol Pablo. Tungod sa madasigon niyang pagwali sa maayong balita bahin kang Jesu-Kristo, gisumbong sa Hudiyong mga awtoridad si Pablo nga “tawong samokan ug nagahulhog sa mga pag-alsa taliwala sa tanang Hudiyo sa tibuok gipuy-ang yuta ug nagapanguna sa sekta sa mga Nasareno.” (Buhat 24:5) Ang pulong “sekta” gihubad dinhi gikan sa Gregong pulong haiʹre·sis, nga nagkahulogang “pagpili,” nga mao, “ang pagpili sa usa ka hunahuna nga supak sa kasagarang gidawat.” Busa ang usa ka “sekta” maoy usa ka grupo o pundok sa mga tawo nga nagapalabi sa pagsunod sa dalan o tinuohan nga lahi sa kasagarang gidawat.

Ang Hudiyong relihiyosong mga pangulo nag-isip nga mabatokon ug makapagubot ang mensahe nga giwali ni Pablo ug sa iyang kaubang mga Kristohanon. Busa, sila nagtawag kanilang usa ka sekta. Apan husto ba sila? Tinong dili, kay kon tuohan nato ang maong pangatarongan ingong balido, nan makaingon gayod kitang ang Kristiyanidad nga giwali ni Jesus nga Nasareno ug ni apostol Pablo maoy usa ka sekta!

Sa kaatbang, ang Bibliya nagahisgot sa “ang sekta sa mga Pariseo” ug “sekta sa mga Saduseo.” (Buhat 15:5; 5:17) Ngano man? Kay gipalabi nila ang pagsunod sa usa ka dalan o tinuohan nga lahi sa ginatudlo sa Bibliya. Gipunting ni Jesus ang ilang sayop sa miingon siya: “Sa kaabtik gipadaplin ninyo ang sugo sa Diyos aron magpabilin ang inyong kalagdaang gikabilinbilin. . . . Sa ingon gihimo ninyong walay pulos ang pulong sa Diyos tungod sa inyong kalagdaang gikabilinbilin.” (Marcos 7:9, 13) Bisan pag ilang giisip nga sila nagtuman sa establisado, dakong relihiyon, sila nahimong mga sekta niadtong mga adlawa.

Tungod sa hugot nilang pagsunod sa ilang kaugalingong mga ideya kon unsay matarong, kadtong nagpakamatarong-sa-kaugalingong relihiyosong mga pangulo nagsalikway kang Jesus. Busa, giingnan sila ni Jesus: “Kini ang hinungdan ako magaingon kaninyo, Ang gingharian sa Diyos pagakuhaon gikan kaninyo ug igahatag ngadto sa usa ka nasod nga nagabunga sa iyang mga bunga.”—Mateo 21:43.

Kinsa ang mga Sekta Karong Adlawa?

Karong adlawa, ang pulong “sekta” libreng gigamit sa mga manunulat bahin sa relihiyon, mga kritiko, ug uban, nga magalabay niana samag lapok kang bisan kinsa nga makapasilo sa ilang kaugalingong matang sa relihiyosong salabotan. Apan maayo ba kanang pasikaranan sa paghukom? Hinunoa, dili ba labing maayong sundon ang lagda nga gihatag ni Jesus ug susihon ang ilang “mga bunga”? Matud niya: “Pinaagi sa ilang mga bunga mailhan ninyo sila.”—Mateo 7:16.

Pinaagi niining sukdanana, daghan sa mga grupo ug mga kalihokan nga atong mabasahan matawag gayong mga sekta. Inay magbunga sa “mga bunga sa espiritu,” ilang gipasundayag nga madagayaon “ang mga bunga sa unod,” nga nagaapil sa “pakighilawas, kahugawan, malaw-ayng kagawian, pagsimbag diyosdiyos, buhat nga espiritismo,” ug uban pa. (Galacia 5:19-24) Daghan kanila tukmang maisip nga mga kulto, sanglit sila nagaidolo sa karismatik nga mga pangulo ug nagasunod sa ilang mga pagtulon-an inay ang Pulong sa Diyos, ang Bibliya.

Apan komosta ang gitawag dagkong mga relihiyon? Aw, gilabanan ba nila ang hataas nga mga sukdanan sa Bibliya kon bahin sa moralidad, o sila ba may kaugalingong mga ideya bahin niana? (1 Corinto 6:9, 10) Nahigugma ba sila sa usag usa, nga matud ni Jesus maoy timaan sa matuod nga pagkatinun-an, o sila ba mahaylo sa nasyonalismo ug politika sa pagpatyanay sa usag usa sa panahon sa gubat? (Juan 13:35) Gilabanan ba nila ang Bibliya ingong dinasig nga Pulong sa Diyos, sama sa gibuhat ni Jesus, o gitawag ba nila kining kasugiran ug gilabanan hinunoa ang tawhanong mga pilosopiya ug nagapasipala-sa-Diyos nga teoriya sa ebolusyon? (Juan 17:17) Tin-aw nga, bisan pa sa ilang “pagkatinahod,” ang gitawag dagkong mga relihiyon mao lamay bakak nga mga sekta nga nagatakobang matuod nga Kristiyanidad.

Kon Unsay Imong Pagabuhaton

Ang matuod nga Kristiyanidad dili usa ka sekta, ni kini nagkabahinbahin. Kon sakop ka sa usa ka iglesya, nan kinahanglang imong susihon pag-ayo kon unsay ginatudlo sa imong iglesya ug kon unsang “mga bunga” ang gipamunga sa mga membro niini. Kini sila bug-os bang gipasukad ug nahiuyon sa Bibliya? O mahimo kahang ang imong iglesya nagpalabi usab sa usa ka dalan nga lahi sa ginatudlo sa Bibliya, sa ingon nagahimo niining usa ka sekta? Ang makugihong pagtuon sa Bibliya mao ang bugtong paagi sa pagpaneguro.

[Blurb sa panid 27]

Si apostol Pablo gisumbong nga “nagapanguna sa sekta sa mga Nasareno”

[Blurb sa panid 27]

Ang imong iglesya nagalaban ba sa Bibliya ingong Pulong sa Diyos o nagatawag niining kasugiran ug leyenda?