ARISTARKO

[Labing Maayo (Labing Hamili) nga Magmamando].

Usa sa mga suod nga kaubanan ni Pablo, usa ka nagapanawng kauban ug isigkabinilanggo, usa ka Macedonianhon nga taga-Tesalonica. (Buh 20:4; 27:2) Siya gipailaila diha sa asoy sa ikatulong misyonaryong panaw ni Pablo; sa kinatayuktokan sa kagubot sa Efeso si Aristarko ug Gayo gipugos pagdala ngadto sa teatro. (Buh 19:29) Lagmit nga siya “ang igsoong lalaki” nga mitabang kang Pablo labot sa amot alang sa mga taga-Judea nga nakolekta didto sa Macedonia ug Gresya.​—2Co 8:18-20.

Si Aristarko milawig uban kang Pablo ngadto sa Roma, apan dili matino kon sa unsang paagi siya nakasakay, tingali ingong usa ka ulipon ni Pablo. (Buh 27:2) Samtang didto sa Roma siya padayong nagtabang ug nagdasig kang Pablo ug sa usa ka panahon nakaambit sa iyang mga talikala sa pagkabinilanggo. Ang mga pangomosta ni Aristarko gipaabot ni Pablo ngadto sa mga taga-Colosas (4:10) ug kang Filemon (23, 24) diha sa iyang mga sulat.