CAUDA

Usa ka pulo tabok sa HK nga baybayon sa Creta nga gilabyan ni apostol Pablo ug Lucas sa pagpanaw paingon sa Roma niadtong mga 58 K.P. Human nila maisa ang angkla didto sa Maayong mga Dunggoanan, ang ilang barko namaybay sa H nga baybayon sa Creta hangtod nga, lagmit human molibot sa Cape Matala, sila naabtan ug gipadpad sa usa ka unos nga magdala unta sa sakayan ngadto sa mga huyonghuyong duol sa kabaybayonan sa Amihanang Aprika. Apan, sila nakapasalipod sa “usa ka gamayng pulo nga gitawag ug Cauda” ug ang nahimutangan sa pulo dayag nga nakasagang sa huros sa hangin, mao nga sila nakasinatig dili kaayo baloron nga katubigan, tingali ubay sa HK nga baybayon niini. Kini nakahatag ug igong higayon sa mga tripulante sa pagkarga sa bote, sa paggakot sa sakayan, ug sa pag-ariya sa kagamitan niini.​—Buh 27:13-17.

Ang Cauda diha sa asoy ni Lucas gitawag karong adlawa ug Gavdos, usa ka pulo nga 11 km (7 mi) ang gitas-on ug 5 km (3 mi) ang gilapdon, nga nahimutang nga mga 65 km (40 mi) sa KHK sa Maayong mga Dunggoanan.