TUL-ID

Usa ka dalan sa Damasco, Sirya. (Buh 9:​10, 11; HULAGWAY, Tomo 2, p. 748) Panahon sa mga Romano, kini maoy usa ka pangunang dalan nga nagtadlas sa siyudad gikan sa sidlakan ngadto sa kasadpan, nga mga 1.5 km (1 mi) ang gitas-on. Ang tunga sa maong dalan maoy para sa mga sakyanan ug may gilapdong mga 15 m (50 p), ug sa isigkakilid dunay portiko diin mangagi ang mga tawo, busa ang tibuok dalan may gilapdong 26 m (85 p). Kini nagbaton gihapon sa Arabiko nga katumbas sa kanhing ngalan niini (Darb al-Mustaqim), apan dili na bug-os nga tul-id, ug kini milatas sa K gikan sa Sidlakang Ganghaan sa siyudad. Niining karaang dalan, diha sa balay sa usa ka tawo nga ginganlag Judas, si Saulo sa Tarso miestar kadiyot human ang hinimayang si Jesu-Kristo magpakita kaniya. Diha sa usa ka panan-awon, si Jesus nagtultol sa tinun-an nga si Ananias ngadto niining balaya diha sa “dalan nga gitawag ug Tul-id” aron ipasig-uli ang panan-aw ni Saulo.​—Buh 9:3-12, 17-19.