Gilain Aron Mahimong Malipayong mga Magdadayeg sa Tibuok-Kalibotan
“Dayega si Jah, kamo nga katawhan! Pagtanyag ug pagdayeg, Oh kamo nga mga alagad ni Jehova, dayega ang ngalan ni Jehova.”—SALMO 113:1.
1, 2. (a) Nahiuyon sa Salmo 113:1-3, kinsa ang takos sa atong masibotong pagdayeg? (b) Unsang pangutana ang angayng isukna?
SI Jehova nga Diyos mao ang Dakong Maglalalang sa langit ug yuta, ang atong Soberano sa Uniberso sa walay kataposan. Siya takos gayod sa atong masibotong pagdayeg. Maoy hinungdan nga ang Salmo 113:1-3 nagsugo kanato: “Dayega si Jah, kamo nga katawhan! Pagtanyag ug pagdayeg, Oh kamo nga mga alagad ni Jehova, dayega ang ngalan ni Jehova. Hinaot ang ngalan ni Jehova mahimong dalayegon sukad karon ug hangtod sa kahangtoran. Gikan sa pagsubang sa adlaw ngadto sa pagsalop niini pagadayegon ang ngalan ni Jehova.”
2 Ingong mga Saksi sa Diyos, kita malipayng mobuhat niini. Pagkalalim nga sa dili madugay ipahinabo ni Jehova nga Diyos nga ang tibuok yuta mapuno sa malipayong awit sa pagdayeg nga atong ginaawit karon! (Salmo 22:27) Ang imo bang tingog nadunggan pinaagi niining dako tibuok-kalibotan nga koro? Kon mao, dako gayod seguro ang imong kalipay nga mahibulag gikan niining walay panaghiusa, walay kalipay nga kalibotan!
3. (a) Unsay nagpahimo sa katawhan ni Jehova nga lahi, talagsaon? (b) Sa unsang mga paagi kita nalain?
3 Ang atong hiusang pagdayeg kang Jehova naghimo gayod kanatong lahi, talagsaon. Kita nagasulti ug nagatudlo nga nagkahiuyon ug nagagamit sa samang mga paagi sa pagmantala sa ‘kadagaya sa pagkamaayo ni Jehova.’ (Salmo 145:7) Oo, ingong dedikadong katawhan ni Jehova, kita gilain alang sa pag-alagad sa atong Diyos, si Jehova. Gisultihan sa Diyos ang iyang karaan dedikadong katawhan, ang Israel, nga magpalain gikan sa mga nasod sa ilang palibot ug magpabiling walay buling sa mga buhat niadtong mga nasora. (Exodo 34:12-16) Iyang gihatagan ang iyang katawhan ug mga kasugoan sa pagtabang kanila nga makahimo niini. Susama karon, gihatagan kita ni Jehova sa iyang Balaang Pulong, ang Bibliya. Ang mga instruksiyon niini nagpakita kanato kon sa unsang paagi nga makapabilin kitang nahilain gikan niining kalibotana. (2 Corinto 6:17; 2 Timoteo 3:16, 17) Kita wala malain pinaagi sa pagpahilit diha sa mga monasteryo ug mga kombento, sama sa mga monghe ug sa mga madre sa Dakong Babilonya. Nagsunod sa panig-ingnan ni Jesu-Kristo, kita maoy mga magwawali ni Jehova sa publiko.
Sundoga ang Pangunang Magdadayeg ni Jehova
4. Sa unsang paagi si Jesus nagpakitag panig-ingnan sa pagdayeg kang Jehova?
4 Si Jesus wala gayod mosimang gikan sa iyang katuyoan sa pagdayeg kang Jehova. Ug kini ang nagpalain kaniya gikan sa kalibotan. Diha sa mga sinagoga ug sa templo sa Jerusalem, iyang gidayeg ang balaang ngalan sa Diyos. Maanaa man sa ibabaw sa kabukiran o sa kabaybayonan, bisag diin nga may mga tawong nagpundok, gisangyaw ni Jesus ang mga kamatuoran ni Jehova diha sa publiko. Siya miingon: “Ako sa dayag nagadayeg kanimo, Amahan, Ginoo sa langit ug yuta.” (Mateo 11:25) Bisan sa panahong gihusay atubangan kang Poncio Pilato, si Jesus nagpamatuod: “Tungod niini ako gipakatawo, ug tungod niini ako mianhi sa kalibotan, aron ako manaksi sa kamatuoran.” (Juan 18:37) Gihatagan ni Jesus ug importansiya ang iyang buluhaton. Bisag diin pa siya, si Jesus nagpamatuod kang Jehova ug nagdayeg kaniya diha sa publiko.
5. Ngadto kang kinsa ang Salmo 22:22 ikapadapat, ug unsa ang angay natong tinamdan?
5 Diha sa Salmo 22:22, atong makita kining matagnaong mga pulong bahin sa Pangunang Magdadayeg ni Jehova: “Igapahayag ko ang imong ngalan ngadto sa akong kaigsoonan; sa taliwala sa kongregasyon pagadayegon ko ikaw.” Ug diha sa Hebreohanon 2:11, 12, gipadapat ni apostol Pablo kining mga bersikuloha ngadto kang Ginoong Jesus ug ngadto niadtong gibalaan ni Jehova nga Diyos alang sa langitnong himaya. Sama kaniya, sila dili maulaw sa pagdayeg sa ngalan ni Jehova taliwala sa kongregasyon. Kita ba adunay samang kaisipan sa dihang motambong sa atong mga tigom sa kongregasyon? Ang atong madasigong pagpakigbahin sa mga tigom, sa hunahuna ug sa binaba, nagadayeg kang Jehova. Apan ang ato bang malipayong pagdayeg matapos didto?
6. Unsang sugo ang gihatag ni Jesus sa iyang mga tinun-an, ug sa unsang paagi ang mga mahigugmaon sa kahayag nagahimaya sa Diyos?
6 Sumala sa Mateo 5:14-16, si Ginoong Jesus usab nagsugo sa iyang mga sumusunod sa pagpasidlak sa ilang kahayag aron ang uban magadayeg kang Jehova. Siya miingon: “Kamo mao ang kahayag sa kalibotan. . . . Palamdaga ang inyong kahayag atubangan sa mga tawo, aron ilang makita ang maayo ninyong mga buhat ug mohatag ug himaya sa inyong Amahan nga anaa sa mga langit.” Ang mga mahigugmaon sa kahayag mohatag ug himaya sa Diyos. Ginahimo ba nila kini pinaagi sa yanong pagsulti ug pagbuhat ug maayo, makitawhanong mga butang? Dili, hinunoa ilang ginahimo kini pinaagi sa hiniusang paghimaya kang Jehova. Oo, ang mga mahigugmaon sa kahayag nagpahinungod sa ilang kaugalingon ngadto sa Diyos ug nangahimong iyang malipayong mga magdadayeg. Nahimo na ba nimo kining mangayaong lakang?
Malipayon sa Pagdayeg Kang Jehova
7. Nganong ang mga magdadayeg ni Jehova malipayon kaayo, ug unsang kalipay ang nabatonan nila sa adlaw sa Pentekostes 33 K.P.?
7 Nganong malipayon kaayo ang mga magdadayeg ni Jehova? Tungod kay ang kalipay maoy usa ka bunga sa balaang espiritu sa Diyos. Diha sa Galacia 5:22, kini gilista sunod gayod sa gugma. Ang mga tinun-an ni Jesus sa unang siglo nagpakita niining bunga sa espiritu ni Jehova. Ngani, sa adlaw sa Pentekostes 33 K.P., sa dihang gibubo sa Diyos ang iyang espiritu diha sa mga 120 ka tinun-an ni Jesus, silang tanan nagsugod sa pagdayeg kang Jehova sa nagkalainlaing mga pinulongan. Ang diyosnong mga Hudiyo nga mianha sa Jerusalem gikan sa daghang nasod ‘nangalibog ug nahingangha.’ Sila miingon: “Atong nadungog sila nga nagasulti diha sa atong mga dila bahin sa halangdong mga butang sa Diyos”! (Buhat 2:1-11) Unsay misangpot niining katingalahang daghag-pinulongan nga pagdayeg kang Jehova? Duolan sa 3,000 ka Hudiyo ug Hudiyohanong mga kinabig ang midawat sa maayong balita sa Gingharian mahitungod sa Mesiyas. Sila gibawtismohan, nakadawat sa balaang espiritu, ug maikagong midugang sa ilang mga tingog ingong malipayong mga magdadayeg ni Jehova. (Buhat 2:37-42) Pagkadako niadto nga panalangin!
8. Human sa Pentekostes, unsay gihimo sa mga Kristohanon sa pagpalambo sa ilang kalipay?
8 Ang taho nagpadayon: “Adlaw-adlaw sila kanunayng atua sa templo uban ang panag-uyon, ug sila nangaon diha sa kaugalingong mga puloy-anan ug miambit sa pagkaon uban ang dakong pagmaya ug katim-os sa kasingkasing, nga nagadayeg sa Diyos ug nakakaplag ug pabor sa tanang katawhan. Sa samang panahon padayong gitipon ni Jehova ngadto kanila adlaw-adlaw ang mga ginaluwas.” (Buhat 2:46, 47) Ang ila ba lang nga panag-uban ug pakigbahin sa pagkaon ang nagpamaya kanila pag-ayo? Dili, ang ilang dakong kalipay nagagikan sa pagdayeg kang Jehova nga Diyos sa adlaw-adlaw. Ug ang ilang kalipay midako pa gayod sa dihang ilang nakita ang libolibo nga misanong sa ilang mensahe sa kaluwasan. Sama usab kanato karong adlawa.
Malipayong mga Magdadayeg sa Tanang Kanasoran
9. (a) Kanus-a ug sa unsang paagi nagsugod ang Diyos sa paghatag sa katawhan sa tanang kanasoran ug higayon sa pagkadungog sa iyang maayong balita? (b) Nganong ang balaang espiritu gibubo diha kang Cornelio ug sa iyang mga kauban una pa sa ilang bawtismo?
9 Dili buot ni Jehova nga ang nagadalag-kahayag nga buluhaton sa iyang mga alagad ilimite lamang sa usa ka nasod. Busa, sa sinugdanan sa 36 K.P., iyang gihatagan ang katawhan sa tanang kanasoran ug higayon nga makadungog sa iyang maayong balita. Pinaagi sa pagtultol sa Diyos, si Pedro miadto sa balay sa usa ka Hentil nga opisyal sa sundalo sa Cesarea. Didto iyang nakita si Cornelio nga nagtigom uban sa iyang suod nga mga higala ug pamilya. Samtang namati sila pag-ayo sa mga pulong ni Pedro, sila mipasundayag ug pagtuo kang Jesus diha sa ilang mga kasingkasing. Sa unsang paagi kita nasayod? Tungod kay ang balaang espiritu sa Diyos mikunsad diha niadtong mga magtutuong Hentil. Kasagaran, ang gasa sa espiritu sa Diyos mokunsad lamang human sa bawtismo, apan niadtong higayona gipakita ni Jehova ang iyang pag-uyon niining dili mga Hudiyo una pa sa ilang pagtuslob sa tubig. Kon wala pa kadto himoa ni Jehova, si Pedro dili unta makatino nga gidawat na karon sa Diyos ang mga Hentil ingong Iyang mga alagad ug nga sila takos alang sa bawtismo sa tubig.—Buhat 10:34, 35, 47, 48.
10. Sa unsang paagi gitagna sa karaang mga panahon nga ang katawhan sa tanang kanasoran managdayeg kang Jehova?
10 Gikan sa karaang panahon, si Jehova nagtagna nga ang katawhan sa tanang kanasoran magadayeg kaniya. Siya makabaton ug malipayong mga magdadayeg sa matag yuta. Sa pagpamatuod niini, si apostol Pablo nagkutlog mga tagna gikan sa Hebreohanong Kasulatan. Iyang gisultihan ang internasyonal nga kongregasyon sa mga Kristohanon sa Roma: “Mahinangpong dawata ang usag usa, maingon nga ang Kristo usab mahinangpong midawat kanato, alang sa himaya sa Diyos. Kay ako nagaingon nga si Kristo sa tinuod nahimong usa ka ministro nilang mga tinuli alang sa pagkamatinud-anon sa Diyos, aron lig-onon ang saad nga Iyang gihatag sa ilang mga katigulangan, ug nga ang mga nasod makahimaya sa Diyos tungod sa iyang kaluoy. Maingon gayod sa nahisulat [diha sa Salmo 18:49]: ‘Mao kana nganong ilhon ko ikaw sa dayag taliwala sa mga nasod ug sa imong ngalan ako magasaluma.’ Ug usab siya nagaingon [diha sa Deuteronomio 32:43]: ‘Panagsaya, kamong mga nasod, uban sa iyang katawhan.’ Ug usab [diha sa Salmo 117:1]: ‘Dayega si Jehova, kamong tanang kanasoran, ug padayega ang tanang katawhan kaniya.’”—Roma 15:7-11.
11. Sa unsang paagi gitabangan sa Diyos ang katawhan sa tanang kanasoran sa pagkakat-on sa iyang mga kamatuoran, ug unsa ang resulta?
11 Ang mga tawo dili hiusang makadayeg kang Jehova gawas kon ilang isalig ang ilang paglaom diha kang Jesu-Kristo, ang usa nga gitudlo sa Diyos nga magmando ibabaw sa katawhan sa tanang kanasoran. Aron matabangan sila sa pagsabot sa Iyang mga kamatuoran nga motultol sa kinabuhing walay kataposan, ang Diyos nagtukod ug internasyonal nga programa sa pagtudlo. Siya naghatag ug paggiya pinaagi sa iyang kasaligan nga ulipon nga matang. (Mateo 24:45-47) Ang resulta? Kapin sa lima ka milyong malipayong mga tingog ang nanag-awit sa ilang mga pagdayeg ni Jehova diha sa kapin sa 230 ka kayutaan. Ug minilyon pa ang dugang nga nagpakitag interes nga mobuhat ug sama. Tan-awa lang kon unsa ka daghan ang mitambong sa Memoryal sa 1996: 12,921,933. Pagkakatingalahan!
Usa ka Dakong Panon sa Malipayong mga Magdadayeg Gitagna
12. Unsang makapapukaw nga panan-awon ang naeksperyensiyahan ni apostol Juan, ug unsa ang buhing pamatuod niining tanan?
12 Diha sa panan-awon, si apostol Juan nakakita ug “usa ka dakong panon” gikan sa tanang kanasoran. (Pinadayag 7:9) Unsa ang tema sa mga pagdayeg nga ginaawit niining dakong panon uban sa dinihogang nanghibilin sa Diyos? Si Juan nagtug-an kanato: ‘Ang kaluwasan utang nato sa atong Diyos, nga naglingkod sa trono, ug sa Kordero.’ (Pinadayag 7:10) Kini maisogong giwali sa tanang bahin sa kalibotan. Nagwarawara sa mga sanga sa palma, pagaingnon pa, kita nagkahiusang nagabayaw sa Diyos ingon nga mao ang Soberano sa Uniberso ug malipayong nagasugid atubangan sa langit ug yuta nga ‘utang nato’ ang atong kaluwasan ngadto kaniya ug sa iyang Anak, ang Kordero, si Jesu-Kristo. Oh, pagkalalim ang naeksperyensiyahan ni apostol Juan sa pagkakita niining makapapukawng panan-awon sa dakong panon! Ug pagkalalim sa atong gibati karon sa pagkakita, ug bisan sa pagkahimong bahin sa, buhing pamatuod sa nakita ni Juan!
13. Unsay nagpalain sa katawhan ni Jehova gikan sa kalibotan?
13 Ingong mga alagad ni Jehova, kita mapasigarbohon sa pagdala sa iyang ngalan. (Isaias 43:10, 12) Ang atong pagkahimong mga Saksi ni Jehova nagpalahi kanato gikan niining kalibotana. Pagkadakong kalipay ang pagdala sa lahi nga ngalan sa Diyos ug sa paghimo sa iyang diyosnong buluhaton ingong atong katuyoan sa kinabuhi! Ang dakong katuyoan ni Jehova sa pagbalaan sa iyang balaang ngalan ug sa pagbindikar sa iyang pagkasoberano sa uniberso pinaagi sa Gingharian naghatag ug kahulogan sa atong mga kinabuhi. Ug siya nagtabang kanato nga makabaton ug dapit sa iyang diyosnong katuyoan bahin sa iyang ngalan ug Gingharian. Kini iyang gihimo sa tulo ka paagi.
Gisaligan sa Kamatuoran
14, 15. (a) Unsa ang usa ka paagi nga nagtabang kanato ang Diyos nga makabaton ug dapit diha sa iyang diyosnong katuyoan bahin sa iyang ngalan ug Gingharian? (b) Sa unsang paagi ang Gingharian nga natukod sa 1914 K.P. lahi sa usa nga napukan sa 607 W.K.P.?
14 Una, gisaligan ni Jehova ang iyang katawhan sa kamatuoran. Ang labing kulbahinam nga pinadayag mao nga ang iyang Gingharian nagsugod na sa pagmando sa 1914. (Pinadayag 12:10) Kining langitnong kagamhanan maoy lahi gikan sa tipikanhong gingharian sa Jerusalem, diin ang mga hari sa linya ni David sa naandan naglingkod. Kadto nga gingharian napukan, ug sa sinugdanan sa 607 W.K.P., ang Jerusalem bug-os nga napasakop sa pagmando sa Hentil nga mga gahom sa kalibotan. Ang bag-ong Gingharian nga gitukod ni Jehova sa 1914 maoy usa ka langitnong gahom nga dili gayod mapailalom kang bisan kinsa gawas kang Jehova, ni malaglag kini. (Daniel 2:44) Lain pa, ang pagmando niini lahi. Sa unsang paagi? Ang Pinadayag 11:15 nagtubag: “Ang makusog nga mga tingog sa langit, nga nag-ingon: ‘Ang gingharian sa kalibotan nahimong ang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.’”
15 “Ang gingharian sa atong Ginoo ug sa iyang Kristo” magpasundayag sa awtoridad ibabaw sa tibuok kalibotan sa katawhan. Kining bag-ong pagpasundayag sa pagkasoberano ni Jehova, nga naglakip sa iyang Mesiyanikong Anak ug sa 144,000 ka igsoon ni Jesus, nga ang kadaghanan kanila gibanhaw na karon ngadto sa langitnong himaya, dili maoy alang lamang sa edukasyonal nga kaikag—usa ka teoriya nga buot nga hisgotan sa mga estudyante. Dili, kining langitnong Gingharian maoy usa ka tinuod nga kagamhanan. Ug ang atong malipayong palaaboton nga mabuhing walay kataposan diha sa kahingpitan ingong resulta sa pagmando niini nagahatag kanato ug igong katarongan sa pagpadayon sa pagmaya. Kay gisaligan sa maong mga kamatuoran sa Pulong ni Jehova kita matukmod kanunay sa pagsulti ug maayo bahin niana. (Salmo 56:10) Ikaw ba regular nga nagahimo niini pinaagi sa pagsulti sa tanan nga ang Mesiyanikong Gingharian sa Diyos karon nagamando na sa kalangitan?
Gitabangan sa Balaang Espiritu ug sa Tibuok-Kalibotang Panag-igsoonay
16, 17. Unsa ang ikaduha ug ikatulong mga paagi nga nagtabang kanato ang Diyos nga makabaton ug dapit diha sa iyang diyosnong katuyoan?
16 Ang ikaduhang paagi nga nagtabang kanato ang Diyos nga makabaton ug dapit diha sa iyang diyosnong katuyoan mao ang paghatag kanato sa iyang balaang espiritu, nga nagpaarang kanato sa pagpatungha sa matahom nga mga bunga niini diha sa atong mga kinabuhi ug makabaton sa iyang pag-uyon. (Galacia 5:22, 23) Dugang pa, gisulatan ni Pablo ang dinihogang mga Kristohanon: “Atong nadawat . . . ang espiritu nga gikan sa Diyos, aron kita mahibalo sa mga butang nga malulotong gikahatag kanato sa Diyos.” (1 Corinto 2:12) Pinaagi sa atong pagsanong sa espiritu ni Jehova, kitang tanan karon makahimo na sa pagkahibalo ug pagkasabot sa presenteng maayong mga butang nga maluloton niyang gihatag kanato—iyang mga saad, kasugoan, mga prinsipyo, ug uban pa.—Itandi ang Mateo 13:11.
17 Mahitungod sa ikatulong paagi nga nagtabang kanato ang Diyos, atong nabatonan ang atong tibuok-kalibotang panag-igsoonay ug ang makapalipayng organisasyonal nga kahikayan ni Jehova sa pagsimba. Si apostol Pedro naghisgot bahin niini sa dihang gitambagan kita niya nga ‘magbaton ug gugma alang sa tibuok kapunongan sa mga igsoon.’ (1 Pedro 2:17) Ang atong mahigugmaon, internasyonal nga pamilya sa mga igsoong lalaki ug mga igsoong babaye motabang kanato sa pag-alagad kang Jehova uban ang dakong kalipay sa kasingkasing, ingon sa gisugo sa Salmo 100:2: “Alagara si Jehova uban ang kalipay. Dumuol kamo atubangan kaniya uban ang pag-awit.” Ang bersikulo 4 dugang nag-ingon: “Sumulod kamo ngadto sa iyang mga ganghaan uban ang pasalamat, ngadto sa iyang mga sawang uban ang pagdayeg. Ihatag ang pasalamat ngadto kaniya, dayega ang iyang ngalan.” Busa kon kita nagasangyaw man sa publiko o nagatambong sa atong mga tigom, kita makasinati ug kalipay. Pagkakatingalahang kalinaw ug kasegurohan ang atong nakaplagan diha sa matahom nga mga sawang sa espirituwal nga templo ni Jehova!
Malipayong Dayega si Jehova!
18. Nganong kita makamaya sa pagdayeg kang Jehova bisan pa sa paglutos o ubang mga problema nga mohasol kanato?
18 Bisag unsa pay malisod nga mga kahimtang, paglutos, o ubang mga problema ang mohasol kanato, magkalipay kita nga kita anaa sa balay sa pagsimba ni Jehova. (Isaias 2:2, 3) Hinumdomi nga ang kalipay maoy usa ka hiyas sa kasingkasing. Ang atong unang Kristohanong mga igsoong lalaki ug mga igsoong babaye maoy malipayong mga magdadayeg ni Jehova bisan pa sa daghang kalisod ug kapildihan nga ilang naagoman. (Hebreohanon 10:34) Ang atong kaubang mga magtutuo karong adlawa sama gayod kanila.—Mateo 5:10-12.
19. (a) Unsang sublisubling mga sugo ang nagpukaw kanato sa pagdayeg kang Jehova? (b) Ang atong kinabuhing walay kataposan nagadepende sa unsa, ug unsa ang atong determinasyon?
19 Kitang tanan nga nag-alagad kang Jehova malipay sa pagtuman sa mga sugo sa Bibliya sa pagdayeg kaniya. Masubsob nga gipasiugda diha sa basahon sa Pinadayag ang mga pagdayeg sa Diyos pinaagi sa ekspresyong “Dayega ninyo si Jah!” (Pinadayag 19:1-6) Diha sa unom ka bersikulo sa Salmo 150, kita gisultihan sa 13 ka higayon sa pagdayeg kang Jehova. Kini maoy malukpanong hangyo ngadto sa tanang kalalangan sa pagduyog sa malipayong pag-awit sa pagdayeg kang Jehova. Ang atong kinabuhing walay kataposan nagadepende sa atong pagpakigduyog niining dakong Hallelujah nga koro! Oo, ang bugtong nga katawhan nga mabuhing walay kataposan mao lamang kadtong kinsa nagahatag ug walay-hunong nga pagdayeg kang Jehova. Busa, kita determinado sa pagpabiling suod diha sa iyang maunongong tibuok-kalibotan nga kongregasyon samtang nagakahiduol na ang kataposan. Sa ingon niana, kita makalaom sa pagkakita sa hinapos nga mga pulong sa Salmo 150 nga bug-os nga matuman: “Ang tanang buhing butang—pagapadayega kang Jah. Dayega si Jah, kamo nga katawhan!”
Unsay Imong Tubag?
◻ Unsay nagpahimo sa katawhan ni Jehova nga lahi, talagsaon?
◻ Nganong malipayon kaayo ang mga alagad ni Jehova?
◻ Unsay nagpahimo kanato nga nahilain gikan sa kalibotan?
◻ Unsang tulo ka paagi nga nagtabang kanato ang Diyos sa pagbaton ug dapit diha sa iyang diyosnong katuyoan?
[Hulagway sa panid 17]
Bisag diin siya, si Jesus nagpamatuod kang Jehova ug nagdayeg kaniya diha sa publiko