Mga Saksi Batok sa Bakak nga mga Diyos

“‘Kamo mao ang akong mga saksi,’ mao ang pulong ni Jehova, ‘bisan ang akong alagad nga akong napili.’”​—ISAIAS 43:10.

1. Kinsa ang matuod nga Diyos, ug sa unsang mga katarongan nga siya mao ang supremo ibabaw sa daghang diyos nga gisimba karong adlawa?

KINSA ba ang matuod nga Diyos? Karong adlawa, ang tanang tawo nag-atubang niining labing hinungdanong pangutana. Bisan pag ang mga tawo nagsimba ug kapid-ang mga diyos, Usa lamay makahatag kanatog kinabuhi ug makatanyag kanatog malipayong kaugmaon. Kini ikaingon bahin sa Usa lamang: “Pinaagi kaniya kita adunay kinabuhi ug nagalihok ug nagalungtad.” (Buhat 17:28) Sa pagkamatuod, usa lamang ka Diyos ang adunay katungod nga pagasimbahon. Sumala sa giingon sa langitnong koro diha sa basahong Pinadayag: “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”​—Pinadayag 4:11.

2, 3. (a) Giunsa paglalis nga binakak ni Satanas ang katungod ni Jehova nga pagasimbahon? (b) Unsa ang sangpotanan sa sala ni Eva alang kang Eva ug sa iyang mga anak, ug unsa ang sangpotanan alang kang Satanas?

² Sa tanaman sa Eden, binakak nga gilalis ni Satanas ang katungod ni Jehova nga pagasimbahon. Pinaagi sa usa ka bitin, siya miingon kang Eva nga kon supakon niya ang balaod ni Jehova ug mokaon gikan sa kahoy nga gidili ni Jehova, siya mismo mahisama sa Diyos. Ang iyang mga pulong mao: “Ang Diyos nahibalo nga sa adlaw mismo sa inyong pagkaon gikan niini ang inyong mga mata mabuka ug kamo mahisama gayod sa Diyos, nga nahibalo sa maayo ug sa daotan.” (Genesis 3:5) Si Eva mituo sa bitin ug mikaon sa gidili nga bunga.

³ Siyempre, si Satanas namakak. (Juan 8:44) Ang bugtong paagi nga si Eva nahimong “sama sa Diyos” sa dihang nakasala siya mao nga siya nangako sa paghukom kon unsay matarong ug kon unsay daotan, nga angay unta nga si Jehova ang pahukmon niya. Ug bisan pa sa bakak ni Satanas, sa kadugayan siya namatay. Busa ang bugtong tinuod nga benepisyaryo sa sala ni Eva mao si Satanas. Sa pagkatinuod, ang wala-ibutyag nga tumong ni Satanas sa paghaylo kang Eva aron makasala mao ang pagkahimong diyos sa iyang kaugalingon. Sa dihang nakasala si Eva, nahimo siya nga iyang unang tawhanong sumusunod, ug sa wala madugay si Adan miduyog kaniya. Kadaghanan sa ilang mga anak wala lamang matawo “diha sa sala” kondili nailalom usab sa impluwensiya ni Satanas, ug sa mubong panahon, milungtad na ang usa ka tibuok kalibotan nga nabulag gikan sa matuod nga Diyos.​—Genesis 6:5; Salmo 51:5.

4. (a) Kinsa ang diyos niining kalibotana? (b) Adunay dina ang panginahanglan sa unsa?

⁴ Kadtong kalibotana nalaglag sa Lunop. (2 Pedro 3:6) Human sa Lunop naugmad ang laing kalibotan nga nabulag gikan ni Jehova, ug kini naglungtad gihapon. Bahin niini ang Bibliya nag-ingon: “Ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Pinaagi sa paglihok niini nga supak sa espiritu ug sa titik sa balaod ni Jehova, kining kalibotana nag-alagad sa mga tumong ni Satanas. Siya mao ang diyos niini. (2 Corinto 4:4) Bisan pa niana, siya sa panguna maoy diyos nga walay katakos. Siya dili makapalipay sa mga tawo o makahatag kanilag kinabuhi; si Jehova lamay makabuhat niana. Busa, ang mga tawong matinguhaon sa mapuslanong kinabuhi ug mas maayong kalibotan kinahanglan unang masayod nga si Jehova ang matuod nga Diyos ug unya magtuon sa pagbuhat sa iyang kabubut-on. (Salmo 37:18, 27, 28; Ecclesiastes 12:13) Busa adunay dinaliang panginahanglan nga ang matinuohong mga lalaki ug mga babaye magsaksi, o magmantala sa kamatuoran, bahin kang Jehova.

5. Unsang “panganod sa mga saksi” ang gihisgotan ni Pablo? Nganli ang pipila ka tawo nga iyang gitala.

⁵ Sukad gayod sa sinugdanan, ang maong matinuohong mga indibiduwal anaa sa kalibotan. Si apostol Pablo, sa Hebreohanon kapitulo 11, naghatag ug taas nga talaan kanila ug nagtawag kanilang “dakong panganod sa mga saksi.” (Hebreohanon 12:1) Ang ikaduhang anak ni Adan ug Eva, si Abel, mao ang una sa talaan ni Pablo. Si Enoc ug si Noe gihisgotan usab gikan sa panahong wala pa ang Lunop. (Hebreohanon 11:4, 5, 7) Inila mao si Abraham, ang katigulangan sa Hudiyonhong rasa. Si Abraham, kinsa gitawag nga “higala ni Jehova,” nahimong katigulangan ni Jesus, “ang matinumanon ug matuod nga saksi.”​—Santiago 2:23; Pinadayag 3:14.

Pagsaksi ni Abraham sa Kamatuoran

6, 7. Sa unsang mga paagi ang kinabuhi ug mga lihok ni Abraham usa ka pagsaksi nga si Jehova mao ang matuod nga Diyos?

⁶ Giunsa ni Abraham pag-alagad nga saksi? Pinaagi sa iyang malig-ong pagtuo ug maunongong pagkamasinugtanon kang Jehova. Sa dihang gisugo siya nga mopahawa sa siyudad sa Ur ug mopuyo sa iyang nahibiling kinabuhi sa usa ka halayong yuta, si Abraham misunod. (Genesis 15:7; Buhat 7:2-4) Ang laagang mga sakop sa tribo kasagarang mobiya sa ilang laagang pagkinabuhi ug mopalabi sa mas may kasegurohang kinabuhi sa siyudad. Busa, sa dihang si Abraham mibiya sa siyudad aron mopuyo sa mga balongbalong, naghatag siyag kusganong ebidensiya sa iyang pagsalig kang Jehova nga Diyos. Ang iyang pagkamasinugtanon maoy usa ka pagsaksi ngadto sa mga maniniid. Tugob nga gipanalanginan ni Jehova si Abraham tungod sa iyang pagtuo. Bisan pag nagpuyo sa mga balongbalong, si Abraham miuswag sa materyal nga paagi. Sa dihang si Lot ug ang iyang pamilya gipamihag, si Jehova mihatag kang Abraham ug kalamposan sa iyang paggukod, mao nga naluwas niya sila. Ang asawa ni Abraham nanganak ug usa ka anak lalaki sa iyang pagkatigulang, ug sa ingon napalig-on ang saad ni Jehova nga si Abraham mahimong amahan sa usa ka binhi. Pinaagi ni Abraham, ang mga tawo nakasabot nga si Jehova maoy buhing Diyos nga motuman sa iyang mga saad.​—Genesis 12:1-3; 14:14-16; 21:1-7.

⁷ Sa pagpauli gikan sa pagluwas kang Lot, si Abraham gitagbo ni Melkisedek, nga hari sa Salem (sa ulahi gitawag ug Jerusalem), kinsa nagpahalipay kang Abraham, nga nag-ingon: “Bulahan si Abram sa Labing Hataas nga Diyos.” Ang hari sa Sodoma mitagbo usab kaniya ug nagtinguha nga mohatag kaniyag mga gasa. Si Abraham mibalibad. Ngano? Dili niya gusto nga adunay bisan unsang pagduhaduha bahin sa Tinubdan sa iyang mga panalangin. Siya miingon: “Gibakyaw ko ang akong kamot diha sa usa ka panumpa ngadto kang Jehova nga Labing Hataas nga Diyos, ang Tagbuhat sa langit ug yuta, nga, gikan sa usa ka tanod ngadto sa laso sa sandalyas, dili, ako dili modawat sa bisan unsa nga imoha, aron ikaw dili makaingon, ‘Ako mao ang nagpadato kang Abram.’” (Genesis 14:17-24) Pagkatalagsaong saksi si Abraham!

Usa ka Nasod sa mga Saksi

8. Giunsa pagpakita ni Moises ang dakong pagtuo kang Jehova?

⁸ Si Moises, usa ka kaliwat ni Abraham, makita usab sa talaan ni Pablo sa mga saksi. Gitalikdan ni Moises ang bahandi sa Ehipto ug sa ulahi maisogong giatubang ang magmamando nianang dakong gahom sa kalibotan aron maoy manguna sa mga anak sa Israel ngadto sa kagawasan. Diin siya mokuhag kaisog? Gikan sa iyang pagtuo. Si Pablo nag-ingon: “[Si Moises] nagpabilin mang lig-on nga daw sa nakita ang Usa kinsa dili-makita.” (Hebreohanon 11:27) Ang mga diyos sa Ehipto makita, mahikap. Bisan karong adlawa, ang mga tawo mahingangha sa ilang mga estatuwa. Apan si Jehova, bisan pag dili makita, labi pang tinuod alang kang Moises kay niadtong tanang bakak nga mga diyos. Si Moises wala magduhaduha nga si Jehova naglungtad ug nga iyang pagagantihan ang Iyang mga magsisimba. (Hebreohanon 11:6) Si Moises nahimong usa ka talagsaong saksi.

9. Sa unsang paagi ang nasod sa Israel mag-alagad kang Jehova?

⁹ Human sa pagpangulo sa mga Israelinhon ngadto sa kagawasan, si Moises nahimong tigpataliwala sa usa ka pakigtugon tali kang Jehova ug sa mga kaliwat ni Abraham pinaagi ni Jacob. Ingong sangpotanan, ang nasod sa Israel milungtad ingong linaing kabtangan ni Jehova. (Exodo 19:5, 6) Sa unang higayon, ang nasodnong pagsaksi kinahanglang igahatag. Ang mga pulong ni Jehova pinaagi ni Isaias, mga 800 ka tuig sa ulahi, sa prinsipyo mapadapat sukad sa sinugdanan sa paglungtad sa nasod: “‘Kamo mao ang akong mga saksi,’ mao ang pulong ni Jehova, ‘bisan ang akong alagad nga akong napili, aron kamo makaila ug magtuo kanako, ug aron kamo makasabot nga ako mao ang samang Usa.’” (Isaias 43:10) Sa unsang paagi kining bag-ong nasod mag-alagad nga mga saksi ni Jehova? Pinaagi sa ilang pagtuo ug pagkamasinugtanon ug pinaagi sa mga paglihok ni Jehova alang sa ilang kaayohan.

10. Sa unsang paagi ang gamhanang mga buhat ni Jehova alang sa Israel mitaganag usa ka pagsaksi, ug unsay mga sangpotanan?

¹⁰ Mga 40 ka tuig human sa sinugdanan niini, ang Israel hapit nang manag-iya sa Yutang Saad. Ang mga espiya nanglakaw aron pagsusi sa siyudad sa Jerico, ug si Rahab, nga usa ka molupyo sa Jerico, nanalipod kanila. Ngano? Siya miingon: “Kami nakadungog kon giunsa pagpamala ni Jehova ang katubigan sa Pulang Dagat sa inyong atubangan sa dihang kamo nanggawas sa Ehipto, ug kon unsay inyong gibuhat ngadto sa duha ka hari sa mga Amorehanon nga didto sa pikas nga tampi sa Jordan, nga mao, si Sihon ug si Og, kinsa inyong gitugyan ngadto sa kalaglagan. Sa dihang kami nakadungog niana, unya ang among mga kasingkasing misugod pagkatunaw, ug walay espiritu ang nakabangon pa diha ni bisan kinsa tungod kaninyo, kay si Jehova nga inyong Diyos mao ang Diyos sa mga langit sa itaas ug sa yuta sa ilalom.” (Josue 2:10, 11) Ang taho sa gamhanang mga buhat ni Jehova mitukmod kang Rahab ug sa iyang pamilya sa pagbiya sa Jerico ug sa bakak nga mga diyos niini ug sa pagsimba kang Jehova uban sa Israel. Tin-aw, si Jehova nakahatag ug kusganong pagsaksi pinaagi sa Israel.​—Josue 6:25.

11. Unsay responsabilidad sa tanang Israelinhong mga ginikanan bahin sa pagsaksi?

¹¹ Samtang ang mga Israelinhon didto pa sa Ehipto, gipadala ni Jehova si Moises ngadto kang Paraon ug miingon: “Adtoa si Paraon, tungod kay ako​—ako nagtugot nga ang iyang kasingkasing ug ang mga kasingkasing sa iyang mga alagad mahimong di-masanongon, aron akong ikabutang kining mga ilhanana nako sa iya mismong atubangan, ug aron ikaw makapahayag diha sa mga igdulongog sa imong anak ug sa anak sa imong anak kon unsa ka mapig-oton nga ako nakiglabot sa Ehipto ug sa akong mga ilhanan nga akong gibutang sa ilang atubangan; ug kamo tinong mahibalo nga ako mao si Jehova.” (Exodo 10:1, 2) Ang masinugtanong mga Israelinhon magsugid sa gamhanang mga buhat ni Jehova ngadto sa ilang mga anak. Ang ilang mga anak, sa baylo, magsugid niana ngadto sa ilang mga anak, ug sa ingon pagabuhaton kana gikan sa kaliwatan ngadto sa kaliwatan. Busa, ang gamhanang mga buhat ni Jehova mahinumdoman. Sama karong adlawa, ang mga ginikanan adunay responsabilidad sa pagsaksi ngadto sa ilang mga anak.​—Deuteronomio 6:4-7; Proverbio 22:6.

12. Sa unsang paagi ang pagpanalangin ni Jehova kang Solomon ug sa Israel nagsilbing usa ka pagsaksi?

¹² Ang tugob nga panalangin ni Jehova sa Israel sa dihang matinumanon pa kini nagsilbing usa ka pagsaksi ngadto sa mga nasod sa palibot. Sumala sa giingon ni Moises human sa pagbatbat sa gisaad nga mga panalangin ni Jehova: “Ang tanang katawhan sa yuta makakita nga ang ngalan ni Jehova gitawag diha kaninyo, ug sila mahadlok gayod kaninyo.” (Deuteronomio 28:10) Si Solomon gihatagag kaalam ug bahandi tungod sa iyang pagtuo. Ubos sa iyang pagmando ang nasod nagmauswagon ug nagtagamtam ug hataas nga yugto sa kalinaw. Mahitungod niadtong panahona atong mabasa: “Nagpadayon sila pagpangabot gikan sa tanang katawhan aron magpatalinghog sa kaalam ni Solomon, bisan gikan sa tanang hari sa yuta nga nakadungog sa iyang kaalam.” (1 Hari 4:25, 29, 30, 34) Inila taliwala sa mga bisita ni Solomon mao ang rayna sa Sheba. Human makakita sa iyang kaugalingon sa pagpanalangin ni Jehova sa nasod ug sa hari niini, siya miingon: “Hinaot nga si Jehova nga imong Diyos pagadayegon, kinsa nagkalipay diha kanimo pinaagi sa pagbutang diha kanimo sa iyang trono ingong hari ilis kang Jehova nga imong Diyos; tungod kay ang imong Diyos nahigugma sa Israel.”​—2 Cronicas 9:8.

13. Unsa ba ang tingali labing epektibong pagsaksi sa Israel, ug sa unsang paagi kita makabaton gihapog kaayohan gikan niini?

¹³ Si apostol Pablo mihisgot sa butang nga mao tingali ang labing epektibong pagsaksi sa Israel. Sa dihang naghisgot sa unodnong Israel sa Kristohanong kongregasyon sa Roma, siya miingon: “Sila gisaligan sa sagradong mga pahayag sa Diyos.” (Roma 3:1, 2) Sugod kang Moises, ang pila ka matinumanong mga Israelinhon gidasig sa pagsulat sa mga pakiglabot ni Jehova uban sa Israel, ingon man sa iyang tambag, iyang mga balaod, ug iyang mga tagna. Pinaagi niining mga sinulata kadtong karaang mga eskriba nagsaksi ngadto sa tanang kaliwatan nga umaabot​—lakip ang atoa karong adlawa​—nga adunay usa lamang ka Diyos, ug ang iyang ngalan maoy Jehova.​—Daniel 12:9; 1 Pedro 1:10-12.

14. Nganong ang pipila nga nagsaksi kang Jehova nag-antos ug paglutos?

¹⁴ Ikasubo, ang Israel subsob napakyas sa pagpakitag pagtuo, ug unya si Jehova kinahanglang magpadalag mga saksi nganha sa iyang kaugalingong nasod. Gilutos ang daghan kanila. Si Pablo miingon nga ang pipila “nagdawat sa ilang pagsulay pinaagi sa mga pagyagayaga ug mga paglapdos, sa pagkatinuod, labaw pa niana, pinaagig mga gapos ug mga prisohan.” (Hebreohanon 11:36) Matinumanon gayong mga saksi! Tuman ka makapasubo nga ang ilang mga paglutos kasagarang naggikan sa kaubang mga sakop sa piniling nasod ni Jehova! (Mateo 23:31, 37) Sa pagkamatuod, ang sala sa nasod nahimong labihan ka dako nga niadtong 607 W.K.P., si Jehova nagpasulod sa mga Babilonyanhon sa paglaglag sa Jerusalem uban sa templo niini ug pagdala sa kinabag-an sa buhi pang mga Israelinhon ngadto sa pagkadistiyero. (Jeremias 20:4; 21:10) Kadto ba ang kataposan sa nasodnong pagsaksi sa ngalan ni Jehova? Dili.

Usa ka Paghukom sa mga Diyos

15. Sa unsang paagi nahatag ang usa ka pagsaksi bisan sa pagkadistiyero sa Babilonya?

¹⁵ Bisag nadistiyero sa Babilonya, ang matinumanong mga sakop sa nasod wala magpanuko sa pagsaksi bahin sa pagka-Diyos ug gahom ni Jehova. Pananglitan, si Daniel maisogong naghubad sa mga damgo ni Nabukodonosor, nga misaysay sa sinulat sa paril alang kang Belsasar, ug wala mokompromiso atubangan ni Dario maylabot sa pag-ampo. Ang tulo ka Hebreohanon usab, sa dihang midumili sa pagyukbo ngadto sa usa ka imahen, mihatag kang Nabukodonosor ug kahibulongang pagsaksi.​—Daniel 3:13-18; 5:13-29; 6:4-27.

16. Giunsa pagtagna ni Jehova ang pagbalik sa Israel ngadto sa ilang yuta, ug unsa ba ang katuyoan niadtong maong pagbalik?

¹⁶ Bisan pa niana, gituyo ni Jehova nga ang nasodnong pagsaksi igahatag na usab sa yuta sa Israel. Si Ezekiel, kinsa nanagna taliwala sa nadistiyerong mga Hudiyo sa Babilonya, misulat bahin sa hugot nga tinguha ni Jehova maylabot sa nagun-ob nga yuta: “Padaghanon ko diha kaninyo ang katawhan, ang tibuok nga balay sa Israel, ang katibuk-an niana, ug ang mga siyudad mapuy-an, ug ang nagun-ob nga mga dapit mismo matukod pag-usab.” (Ezekiel 36:10) Nganong buhaton kadto ni Jehova? Sa panguna ingong pagsaksi sa iyang ngalan mismo. Pinaagi ni Ezekiel siya miingon: “Dili tungod kaninyo nga akong ginabuhat kini, Oh balay sa Israel, kondili tungod sa akong balaang ngalan, nga inyong gipasipalahan taliwala sa mga nasod.”​—Ezekiel 36:22; Jeremias 50:28.

17. Unsa ang konteksto sa mga pulong sa Isaias 43:10?

¹⁷ Maoy sa panahong nagtagna sa pagbalik sa Israel gikan sa pagkadistiyero sa Babilonya nga ang propetang si Isaias gidasig sa pagsulat sa mga pulong sa Isaias 43:10, nga nag-ingon nga ang Israel maoy saksi ni Jehova, iyang alagad. Sa Isaias 43 ug 44, si Jehova gibatbat ingong Maglalalang, Mag-uumol, Diyos, Balaang Usa, Manluluwas, Manlulukat, Hari, ug Magbubuhat sa Israel. (Isaias 43:3, 14, 15; 44:2) Ang pagkabihag sa Israel gitugotan tungod kay ang nasod subsob napakyas sa paghimaya kaniya sa maong paagi. Bisan pa niana, sila iya gihapong katawhan. Si Jehova miingon kanila: “Ayaw kahadlok, kay ako naglukat kaninyo. Kamo akong gitawag pinaagi sa imong ngalan. Kamo maoy ako.” (Isaias 43:1) Ang pagkadistiyero sa Israel didto sa Babilonya matapos na.

18. Sa unsang paagi ang pagkagawas sa Israel gikan sa Babilonya nagpamatuod nga si Jehova mao ang bugtong matuod nga Diyos?

¹⁸ Sa pagkatinuod, gihimo ni Jehova ang pagpagawas sa Israel gikan sa Babilonya nga usa ka paghukom sa mga diyos. Iyang gihagit ang bakak nga mga diyos sa mga nasod sa pagpatungha sa ilang mga saksi, ug iyang ginganlan ang Israel ingong iyang saksi. (Isaias 43:9, 12) Sa dihang iyang gibunggo ang mga bara sa pagkadistiyero sa Israel, iyang gipamatud-an nga ang mga diyos sa Babilonya dili diay mga diyos ug nga siya mao ang bugtong matuod nga Diyos. (Isaias 43:14, 15) Sa dihang, mga 200 ka tuig una pa sa panghitabo, ginganlan niya si Ciro nga Persiano ingong iyang alagad aron pagpagawas sa mga Hudiyo, siya mihatag ug dugang pagsaksi sa iyang pagka-Diyos. (Isaias 44:28) Pagawson ang Israel. Ngano? Si Jehova misaysay: “Aron sila [Israel] magbatbat sa akong kadayegan.” (Isaias 43:21) Kana maghatag ug dugang higayon sa usa ka pagsaksi.

19. Unsang pagsaksi ang nahatag sa pagdapit ni Ciro sa mga Israelinhon nga mobalik ngadto sa Jerusalem ug sa mga buhat sa matinumanong mga Hudiyo human sa maong pagbalik?

¹⁹ Sa pag-abot sa panahon, si Ciro nga Persiano nagpukan sa Babilonya sumala sa gitagna. Si Ciro, bisan pag pagano, nagmantala sa pagka-Diyos ni Jehova sa iyang giluwatan ang usa ka pahayag ngadto sa mga Hudiyo sa Babilonya: “Si bisan kinsa nga anaa sa inyong taliwala gikan sa tanan niyang katawhan, hinaot ang iyang Diyos magauban kaniya. Busa siya patungasa ngadto sa Jerusalem, nga anaa sa Juda, ug ipatukod ang balay ni Jehova nga Diyos sa Israel​—siya mao ang matuod nga Diyos​—nga atua sa Jerusalem.” (Esdras 1:3) Daghang Hudiyo ang misanong. Sila mipanaw ngadto sa Yutang Saad ug nagpatindog ug halaran sa dapit sa karaang templo. Bisan pa sa pagpabugnaw ug kusganong pagsupak, sila sa kataposan nakatukod pag-usab sa templo ug sa siyudad sa Jerusalem. Kining tanan nahitabo, sumala sa giingon mismo ni Jehova, “dili pinaagig kusog sa kasundalohan, ni pinaagi sa gahom, kondili pinaagi sa [iyang] espiritu.” (Zacarias 4:6) Kining maong mga kahimoan mihatag ug dugang ebidensiya nga si Jehova mao ang matuod nga Diyos.

20. Bisan pa sa mga kahuyangan sa Israel, unsay ikaingon bahin sa ilang paghatag ug pagsaksi sa ngalan ni Jehova sa karaang kalibotan?

²⁰ Busa, si Jehova nagpadayon sa paggamit sa Israel, bisan pag usa ka nasod sa dili-hingpit ug usahay rebelyosong katawhan, ingong iyang saksi. Sa una-Kristohanong kalibotan, ang maong nasod, uban sa templo ug mga saserdote niini, naghawas ingong tibuok-kalibotang sentro sa matuod nga pagsimba. Si bisan kinsa nga magbasa diha sa Hebreohanong Kasulatan bahin sa mga buhat ni Jehova maylabot sa Israel dili gayod magduhaduha nga adunay usa lamang ka matuod nga Diyos, ug ang iyang ngalan maoy Jehova. (Deuteronomio 6:4; Zacarias 14:9) Bisan pa niana, ang labi pang dakong pagsaksi igahatag sa ngalan ni Jehova, ug hisgotan namo kini sa mosunod nga artikulo.

Nahinumdom Ka Ba?

◻ Giunsa pagsaksi ni Abraham nga si Jehova mao ang matuod nga Diyos?

◻ Unsang talagsaong hiyas ni Moises ang nakapaarang niya nga mahimong usa ka matinumanong saksi?

◻ Sa unsang mga paagi ang Israel mihatag ug nasodnong pagsaksi bahin kang Jehova?

◻ Sa unsang paagi ang pagkagawas sa Israel gikan sa Babilonya usa ka pasundayag nga si Jehova mao ang bugtong matuod nga Diyos?

[Hulagway sa panid 10]

Tungod sa iyang pagtuo ug pagkamasinugtanon, si Abraham mihatag ug talagsaong pagsaksi sa pagka-Diyos ni Jehova