Ipakita ang Kaikag sa Pagmantala sa Maayong Balita
“May kaikag sa akong bahin sa pagmantala usab sa maayong balita nganha kaninyo.”—ROMA 1:15.
“SILA naggikan sa tanang dapit . . . ang ginatos ka boluntaryo nangabot nga panonpanon sa duha ka kiliran sa distrito, nga nangabot nga nagdalag tinaraktarak nga pagkaon ug sinina, nga nagtukod sa mga silonganan sa ebakuweter, nga ang pipila mitrabahog 18 ngadto 20 ka oras sa usa ka adlaw, nga ang pipila kanila walay katulog sa unang mga adlaw tapos sa makalilisang nga pagkaguba sa dike.”
1, 2. Unsa kadaghanan ang sanong sa mga tawo sa usa ka emerhensiya?
2 Kana ang sanong sa katawhan sa dihang nahitabo ang usa ka kalit nga baha sa usa ka komunidad sa sentral California sa miagi nga tingpamulak, nga tungod niadto mga 24,000 ka tawo ang nangalagiw ngadto sa luwas nga dapit. Oo, sa dihang mahitabo ang mga katalagman—gikan sa lokal nga mga baha ngadto sa mga linog ngadto sa nukleyar nga mga aksidente—ang katawhan kadaghanan mosanong nga kinabubut-on ug motanyag sa pagtabang. Sila manghulho sa ilang mga bukton, ingnon ta, mosagubang sa daghang kapeligrohan ug sa kalisdanan, ug maikagon nga moayuda sa uban—bisan pa sa bug-os nga mga estranghero.
Usa ka Panahong Dinalian
3 Karong adlawa, giatubang sa katawhan ang kinadak-ang katalagman sa kasaysayan. Kini dili tungod sa kadaot nga ginahimo sa tawo nganha sa silinganan, sa hulga sa nukleyar nga gubat, o pag-uswag sa krimen ug kapintasan, bisan pag seryoso kining mga butanga. Hinuon, ang katawhan nagaatubang sa gitawag ni Jesu-Kristo nga usa ka “dakong kasakitan nga wala pa sukad mahitabo sukad sa sinugdanan sa kalibotan hangtod karon, wala, ni mahitabo kini pag-usab.” Sa pagpakita unsa ka malaglagon unya ang “dakong kasakitan,” si Jesus mipadayon sa pag-ingon: “Sa pagkamatuod, gawas nga pamub-on kanang mga adlawa, walay unod ang maluwas.”—Mateo 24:21, 22.
4. Atubangan sa maong emerhensiya, unsay angay nga atong sanong?
4 Unsay imong sanong kon ikaw nahibalo nga daghang tawo, apil kadtong pipila nga suod nimo, duol nang malaglag nianang kasakitana? Maikag ka bang motabang? Hinumdomi ang matagnaong panan-awon ni Ezekiel sa lalaki nga may tintero sa sekretaryo. Siya gisultihang kadto lamang nakadawat ug simbolikong patik sa ilang agtang ang maluwas sa pagkalaglag sa Jerusalem, ug siya ang magpadapat nianang moluwas-kinabuhing patik. Unsay iyang sanong? “Akong nabuhat ang imong gisugo kanako,” siya mitaho.—Ezekiel 9:1-11.
5. Unsang buluhaton nga kita gisugo sa pagbuhat, ug unsa ka dinalian kini?
5 Ikaw nagapadayag ba sa samang pagkaandam ug kaikag sama sa lalaking sinul-oban sa lino, sumala sa gisugo ni Jehova? Unsay gisugo ni Jehova? Pinaagi sa iyang Anak, si Jesu-Kristo, iyang gihatag ang sugo: “Busa panlakaw kamo ug himoa nga mga tinun-an ang katawhan sa tanang nasod, . . . nga magatudlo kanila sa pagbantay sa tanang butang akong gisugo kaninyo.” (Mateo 28:19, 20) Kini usa gayod ka buluhatong moluwas ug kinabuhi sama sa simbolikong pagpatik sa mga agtang sa adlaw ni Ezekiel. Si bisan kinsang dili mosanong ug mahimong tinun-an ni Jesu-Kristo makaagom sa kalaglagan diha sa kamot sa Pangulong Tiglaglag sa Diyos. (2 Tesalonica 1:6-8) Nasabtan ba nimo ang pagkadinalian sa panahon? Gipakita ba nimo kini pinaagi sa pagpadayag sa kaikag sa pagmantala sa maayong balita?
Kaikag—Unsaon Pagpadayag?
6. Unsay ipasabot sa “kaikag”?
6 Ang katawhan ni Jehova, sa katibuk-an, nakasabot sa pagkadinalian sa panahon. Kitang tanan maikagon sa pagtinong labing daghang tawo kutob sa mahimo ang maluwas gikan sa umaabot nga “dakong kasakitan.” Ang kaikag, sumala sa usa ka diksiyonaryo, maoy usa ka “idlot o mainitong tinguha sa pagpangagpas o pagkab-ot sa usa ka butang.” Ang usa nga maikagon sa usa ka butang nagatultol sa hunahuna ug sa aksiyon sa pagkab-ot niana. Buhaton niya ang tanang maarangan niya sa pagbuntog sa bisan unsang babag ug ali, ug siya molahutay sa pagbuhat niana hangtod iyang makab-ot ang iyang tumong. Kana ang gibati ni apostol Pablo mahitungod sa iyang ministeryo, ug maayo nga atong sundogon siya.—1 Corinto 4:16.
7. Nganong buot ni Pablo nga moadto sa Roma?
7 Pananglitan, palandonga ang mga pulong ni Pablo ngadto sa mga Kristohanon sa Roma, sa Roma 1:13-16. “Ako sa makadaghan may katuyoan sa pag-anha kaninyo,” iyang gisultihan sila. Ngano man? “Aron akong mabatonan ang pipila ka bunga usab sa inyong taliwala,” siya mipatin-aw. Sa maong paagi, yano bang diha sa hunahuna ni Pablo ang pagduaw sa mga igsoon sa Roma ug tingali pagdasig kanila sa pag-ugmad sa mas bug-os sa “mga bunga sa espiritu,” sumala sa giangkon sa pila ka komentarista? (Galacia 5:22, 23) Dili, kay ang iyang gidugang nga mga pulong “maingon sa taliwala sa uban sa kanasoran” nagatin-aw nga siya may tinguha sa pagbaton ug mga bunga sa Gingharian taliwala sa dili-Kristohanong komunidad didto sa Roma. Buot niyang dad-on ang maayong balita ngadto sa Roma ug tingali gikan didto ngadto sa mga dapit sa gawas.—Roma 15:23, 24.
8. Sa unsang paagi si Pablo “nababagan” sa pag-adto sa Roma?
8 “Apan ako nababagan hangtod karon,” matud ni Pablo. Nababagan sa unsa? Siya ba puliki kaayo sa personal nga mga butang mao nga dili makapangab-ot? Aw, si Pablo usa ka tawong puliki apan dili sa personal nga intereses. Sa panahon sa iyang pagsulat ngadto sa mga taga-Roma (duolan sa 56 K.P.), natapos na niya ang duha ka dagkong misyonaryong panaw ug napuliki sa iyang ikatulong misyonaryong panaw. Kadaghanan, sa maong mga panaw siya gitultolan sa balaang espiritu ngadto sa tinong mga asaynment. (Tan-awa ang Buhat 16:6-9.) Samtang siya nagsulat sa iyang sulat, ang mga plano gihimo na aron siya moadto sa Jerusalem “sa pag-alagad sa mga balaan” didto. (Roma 15:25, 26) Ug iya usab nasinati ang daghang ubang ‘kababagan’ sa maong matang.—Tan-awa ang 2 Corinto 11:23-28.
9. Giunsa pagpadayag ni Pablo ang kaikag sa pagmantala sa maayong balita?
9 Bisan pag ingon, si Pablo wala mobating siya may igo nang buluhaton, ni nangatarongan siya nga siya may asaynment na ug kana daghan. Buot niyang mobuhat ug labaw pa. Ngani, siya miingon: “Sa akong bahin may kaikag sa pagmantala pag-usab kaninyo diha sa Roma.” Kana ang ipasabot sa kaikag! Sa haom, si Propesor F. F. Bruce diha sa iyang librong The Epistle of Paul to the Romans miingon niini mahitungod sa apostol: “Ang pagsangyaw sa ebanghelyo anaa sa iyang dugo, ug siya dili makalikay niana; siya dili gayod mahimong ‘wala magtrabaho’ kondili kanunay nagabuhat, nga nagabayad ug diyutay nianang utang nga nautang niya sa tanang tawo—usa ka utang nga dili gayod niya bug-os kabayran samtang siya buhi pa.” Kana ba ang imong pag-isip sa ministeryo?
10. Unsang ‘mga kababagan’ ang tingali anaa sa atong dalan, apan unsaon nato kana pag-atubang?
10 Karong adlawa, ang tanang katawhan ni Jehova puliki sa daghang responsabilidad. Ang pipila may mga pamilyang atimanon. Ang pipila may mga obligasyon sa laing mga bahin. Ang uban limitado sa ilang mahimo tungod sa edad o dili maayong panglawas. Ug ang uban pa gayod dunay mabug-at nga mga buluhaton sa Kristohanong kongregasyon. Bisan pa niana, ato usab naamgohan nga ang panahon talitapos na alang sa presenteng sistema sa mga butang, ug ang pamatuod mahitungod sa Gingharian kinahanglang igahatag. (Marcos 13:10) Busa, sama kang Pablo, angay atong ipadayag ang kaikag sa pagpangab-ot sa buluhatong pagsangyaw bisan pa sa ‘kababagan’ nga anaa sa atong dalan. Angay nga dili nato bation ang pagkatagbaw na, nga magahunahuna nga kita may igong buluhaton sumala sa kahimtang.—1 Corinto 15:58.
“Utangan” sa Tanan
11. Unsay kahulogan sa “Utangan ako”?
11 May laing gahom nagtukmod sa walay-hunong nga paningkamot ni Pablo sa pagmantala sa maayong balita. “Utangan ako sa mga Grego ug sa mga Barbaro, sa mga makinaadmanon ug sa mga walay buot,” matud ni Pablo. (Roma 1:14) Sa unsang paagi si Pablo “utangan”? Ang ubang mga hubad nagahubad niining ekspresyona ingong “Ako obligado” (New English Bible), “Ako adunay obligasyon” (Today’s English Version), o “Ako adunay katungdanan” (Jerusalem Bible). Nan, nag-ingon ba siyang ang buluhatong pagsangyaw usa ka bug-at nga katungdanan o obligasyon nga kinahanglang iyang tumanon atubangan sa Diyos? Dali nga atong maugmad ang maong tinamdan kon atong hikalimtan ang pagkadinalian sa panahon o mabalda sa kalibotanong mga panghaylo. Apan dili kana ang diha sa hunahuna ni Pablo.
12. Kang kinsa si Pablo “utangan,” ug ngano?
12 Ingong “piniling panudlanan” sa Diyos ug ingong “usa ka apostol sa kanasoran,” gibuhat ni Pablo ang pila ka bug-at kaayong responsabilidad atubangan sa Diyos. (Buhat 9:15; Roma 11:13) Apan ang iyang pagsabot sa obligasyon maoy dili lamang ngadto sa Diyos. Siya miingon nga siya “utangan” sa ‘mga Grego, mga Barbaro, mga makinaadmanon ug mga walay buot.’ Tungod sa kaluoy ug pribilehiyo nga gihatag kaniya, iyang gibati nga iyang katungdanan ang pagsangyaw aron ang tanang tawo makadungog sa maayong balita. Iyang naamgohan, usab, nga kabubut-on sa Diyos nga “ang tanang matang sa mga tawo mamaluwas ug mahidangat sa tukmang kahibalo sa kamatuoran.” (1 Timoteo 1:12-16; 2:3, 4) Kana ang hinungdan nga siya naghago nga walay hunong, dili lamang aron makatuman sa iyang responsabilidad ngadto sa Diyos kondili aron usab makabayad sa iyang utang sa iyang isigkatawo. Imo bang gibati ang maong personal nga utang sa mga tawo sa inyong teritoryo? Gibati ba nimong ikaw obligadong maningkamot sa pagdala kanila sa maayong balita?
“Dili Maulaw sa Maayong Balita”
13. Unsay pagtamod ni Pablo sa maayong balita?
13 Si Pablo tinong usa ka talagsaong panig-ingnan sa pagpadayag ug kaikag sa pagmantala sa maayong balita. Dulot niyang gipabilhan ang dili-takos nga kalulot nga gipakita kaniya sa Diyos, ug dili niya buot nga kana makawang. (1 Corinto 15:9, 10) Kana ang hinungdan nga siya miingon: “Kay ako dili maulaw sa maayong balita.” (Roma 1:16) Gikan sa tawhanong punto de vista, ang mga Kristohanon dili lamang kay dili popular kondili tinamay usab. “Kami nahisamag basura sa kalibotan, ang kinahig gikan sa tanang butang,” matud ni Pablo. (1 Corinto 4:13) Bisan pa niana siya wala maulaw sa pagdala sa maayong balita ngadto sa Roma, ang sentro sa maalam nga kalibotan ug ang kaulohan sa imperyal nga Romanhong Imperyo. Kon moatubang sa kawalay-pagtagad, pag-abusar, o bisan pagsupak sa atong buluhaton sa pagsangyaw, kita makahinumdom sa makapadasig nga panig-ingnan ni Pablo.
14. Nganong si Pablo “dili maulaw sa maayong balita”?
14 Ang “dili maulaw sa maayong balita” sa pagkamatuod usa ka laing paagi sa pag-ingong “mapagarbohon sa maayong balita,” ug kana gayod ang angay. Ngano? Tungod kay “kini maoy, sa pagkamatuod, ang gahom sa Diyos alang sa kaluwasan sa tanan nga may pagtuo,” mipatin-aw si Pablo. Siya nagbaton ug daghang personal nga kasinatian sa pagpaluyo sa iyang gipamulong. Pinaagi sa maayong balita, si Pablo miingon, “ginalumpag namo ang mga pangatarongan ug ang tanang mapahitas-ong butang nga gipatindog batok sa kahibalo sa Diyos; ug ginabihag namo ang tanang hunahuna aron kini magmasinugtanon kang Kristo.” (2 Corinto 10:5) Kon kaha kini batok sa tradisyon sa mga Hudiyo, sa pilosopiya sa mga Grego, o sa gahom sa mga taga-Roma, ang maayong balita nagmadaogon.
15. Sa unsang paagi ang kaikag usa ka matukmorong gahom sa kinabuhi ni Pablo?
15 Pagkamaayo nga inay bation nga kabug-at, si Pablo ‘ikag’ nga motuman sa iyang hinatag-sa-Diyos nga responsabilidad! Sumala sa iya mismong pagpahayag niini: “Kay gipahamtang kanato ang butang kinahanglanon. Sa pagkamatuod, alaot ako kon dili ko imantala ang maayong balita!” (1 Corinto 9:16) Ang maong kaikag nakatabang niya sa pagpadayon sa daghang katuigan sa walay-hunong nga pag-alagad, mao nga sa kataposan siya nakaingon: “Gibugno ko na ang maayong pagpakigbugno, natapos ko na ang akong pagdalagan hangtod sa dag-anan, gibantayan ko ang pagtuo.”—2 Timoteo 4:7.
Pagkaepektibo Makadugang sa mga Bunga
16. Unsang posibleng mga hagit sa imong hunahuna ang giatubang sa lalaking may tintero sa sekretaryo sa panan-awon ni Ezekiel?
16 Sama kang Pablo, ang lalaking may tintero sa sekretaryo sa panan-awon ni Ezekiel pihong maikagon sa iyang asaynment. Gidala niya sa pagbalik ang maayong taho: Misyon natuman! Ang asoy wala magsugid kanato kon giunsa niya pagpangita ang tanang “nanghupaw ug nag-agulo tungod sa tanang dulumtanang butang nga ginahimo.” (Ezekiel 9:4) Bisan tuod walay gisulti kon giunsa paghimo kanang tanang pagpatik, tin-aw nga kadto dili yano nga buluhaton.
17. (a) Unsang mga hagit ang imong giatubang sa buluhaton sa paghimog tinun-an, ug sa unsang paagi imong giatubang sila? (b) Takos ba ang gikinahanglang paningkamot?
17 Sa susama karong adlawa, ang atong komisyon dili yano. Busa, ang pangutana mao: Unsa nato ka epektibo sa maong moluwas-kinabuhing buluhaton? Aron mahimo ang labing daghang tinun-an kutob sa mahimo, kinahanglang himoon nato kining buluhatona nga regular ug sistematiko, nga dili palabyon ang bisan unsang higayon sa pagpakig-ambit sa maayong balita. Sama kanato, ang katawhan sa atong komunidad puliki; tingali sila tagsaon rang anaa sa balay inigduaw nato, ug bisan pag sila anaa sa balay, kadaghanan sila puliki. Unsay atong mahimo? Aw, kinahanglang atong huptan ang tukmang mga rekord ug mobalik sa nagkalainlaing panahon, nga balikbalik, sa paglaom nga adunay atong hikit-ang ikasulti. Takos ba ang maong paningkamot? Itugot nga motubag ang mosunod nga mugbong sulat gikan sa duha ka tagbalay:
“Buot kong ipahayag ang akong pagpasalamat sa mga Saksi ni Jehova tungod sa ilang daghang pagduaw sa akong balay. Ako nasayod nga may panahong ang inyong misyon dili isipon niadtong dili sakop sa inyong relihiyon uban ang kadasig nga takos gayod niana. Busa akong gihunahuna nga ipaambit ko ang akong mga kasinatian uban kaninyo ug ipahayag ang pasalamat kaninyo!”
“Daghan kaayo kanamo ang gigutom sa kamatuoran, daghan kaayo ang nagtuo nga ang tanang dalan mosangko sa kaluwasan. Kamong nagmaisogon sa pagpadayon sa pagpangita sa usang maalagaran, ayaw kamig hunongi! Kami dili mangil-ad nga mga tawo, bisan tuod kami manginsulto kaninyo, magpakaulaw kaninyo, ug dili modawat kaninyo. Ayaw kamo paghunong, tungod kay kami gitudloan ug daghang bakak, gisuginlan ug daghang makalilisang nga mga estorya, ug gitudloan sa pagdumot kaninyo aron dili makaabot kanamo ang mensahe sa Gingharian ni Jehova.”
18. (a) Sa unsang paagi makatabang ka sa uban sa pagsabot sa maayong balita? (b) Sa unsang paagi gibuntog sa usa ka magmamantala ang dayag nga kawalay-pagtagad?
18 Aron maabot ang kasingkasing sa mga tawo ug katabangan sila sa pagsabot sa maayong balita gikinahanglan ang labaw pa sa hapaw nga pagkontak, pagpahayag sa inandam nga mensahe, o pagbilin ug basahon sa Bibliya. Kinahanglang maningkamot kita sa pag-ila sa ilang mga panginahanglan ug mga gikabalak-an, mga gusto ug mga dili-gusto, mga kahadlok ug mga sayop nga hunahuna. Kining tanan nagkinahanglag dakong hunahuna ug paningkamot—ug kaikag sa atong bahin. Palandonga ang mosunod nga kasinatian:
Ang usa ka magmamantala nakigsulti sa usa ka babaye sa ganghaan sa usa ka apartment apan walay dakong sanong. Sa pagmatikod nga dihay daghang bata, siya nangutana pila ug anak ang babaye. Siya mitubag nga kadto dili iyang mga anak kondili iya sa iyang bayaw nga lalaki, nga bag-o pang milalin gikan sa laing nasod. Sa taudtaod ang kabildohay nakaabot sa ulohan sa pagkakulang ug mga puy-anan. Miuyon ang magmamantala nga ang maarang-arang nga balay lisod hikaplagan sa dagkong siyudad, sanglit siya may mga paryente usab nga umaabot sa dili madugay, ug mitanyag siya sa pagtabang. Ang babaye nalipay ug iyang gitawag ang iyang bayaw nga lalaki. Ang panaghisgot nagpadayon, ug nagbayloay silag mga numero sa telepono. Kay wala malimot sa katuyoan sa pagduaw, ang magmamantala mataktikanhong nag-abli sa panid 157 sa Mabuhing Walay Kataposan nga basahon ug misaysay nga sa sinaad nga bag-ong sistema, ang mga suliran sa puy-anan ug trabaho mahanaw na. Ang lalaki nahingangha kaayo ug nagdawat dayon sa basahon. Sa ulahi, ang magmamantala mibalik uban ang balita mahitungod sa usa ka apartment nga maabangan; iya usab gipadayon ang ilang panaghisgot sa Bibliya.
19. Karon panahon na sa pagbuhat sa unsa? Ug unsay kinahanglang atong hisgotan sa dugang pa?
19 Ang panahon sa pagsangyaw sa maayong balita tuling nagakatapos. Hangtod pa kanus-a ang “upat ka manulonda” magpadayon sa “pagkupot nga hugot sa upat ka hangin sa yuta” kita wala masayod. (Pinadayag 7:1) Sa bisan unsang kahimtang, ang “dakong kasakitan” anaa pa sa unahan, ug ang mga tawong may mabuot nga kasingkasing ginatigom. Sa pagkamatuod, ang “kaumahan” maoy “hinog na nga pagaanihon.” (Mateo 24:21, 22; Juan 4:35) Karon na ang panahon nga kita maningkamot niining dili-na-masubling buluhaton. Sa unsang paagi atong mapahimuslan sa labing maayo ang nahibiling panahon? Unsay atong mahimo aron makabaton ug bug-os pang bahin sa maong moluwas-kinabuhing buluhaton? Ug unsay makatabang nato sa pagpadayon sa pagpadayag sa kaikag sa pagmantala sa maayong balita? Kining mga pangutanaha pagahisgotan sa sunod nga artikulo.
Palandonga ang Panig-ingnan ni Pablo Sumala sa Roma 1:13-16—
◻ Nganong siya naikag nga moadto sa Roma?
◻ Unsay mibabag kaniya sa pag-adto? Apan unsay iyang sanong?
◻ Kang kinsa ug nganong siya “utangan”?
◻ Unsay iyang pagbati sa maayong balita? Ngano?
◻ Sama kang Pablo, unsay atong mahimo aron mahimong epektibo sa pagmantala sa maayong balita?
3. Unsang grabeng emerhensiya ang giatubang sa katawhan karong adlawa?