Bisan Hinimo sa Abog, Padayon nga May Determinasyon!

“Siya mismo nahibalo sa pagkaumol kanato, nahinumdom nga kita mga abog lamang.”​—SALMO 103:14.

1. Husto ba ang Bibliya sa siyentipikanhong paagi sa pag-ingon nga ang mga tawo hinimo sa abog? Isaysay.

SA USA ka pisikal nga paagi, kita maoy abog. “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi, ug ang tawo nahimong usa ka buhing kalag.” (Genesis 2:7) Kining yano nga pagbatbat sa paglalang sa tawo kaharmoniya sa siyentipikanhong kamatuoran. Ang kapin sa 90 ka elemento nga nagsangkap sa tawhanong lawas makaplagan diha sa ‘abog gikan sa yuta.’ Usa ka kemiko kanhi miangkon nga ang lawas sa usa ka hamtong nga tawo maoy 65 porsientong oksiheno, 18 porsientong karbon, 10 porsientong hidroheno, 3 porsientong nitroheno, 1.5 porsientong kalsiyo, ug 1 porsientong phosphorus, nga ang nahibilin hinimo sa uban pang mga elemento. Kon kaha kining maong mga banabana tukma kaayo dili na hinungdanon. Ang kamatuoran nagpabilin: “Kita maoy abog”!

2. Unsay imong ikasulti sa paagi sa paglalang sa Diyos sa mga tawo, ug ngano?

² Kinsa, gawas kang Jehova, ang makalalang sa maong makuting mga linalang gikan lamang sa abog? Ang mga buhat sa Diyos hingpit ug walay depekto, busa ang iyang pagpili sa paglalang sa tawo sa iyang paagi tinong dili hinungdan sa pagreklamo. Sa pagkatinuod, nga ang Dakong Maglalalang nakahimo sa paglalang sa tawo gikan sa abog sa yuta diha sa makalilisang ug kahibulongang paagi magpauswag sa atong apresasyon sa Iyang walay-kinutobang gahom, kabatid, ug praktikal nga kaalam.​—Deuteronomio 32:4, potnot; Salmo 139:14.

Usa ka Kausaban sa mga Kahimtang

3, 4. (a) Sa paglalang sa tawo gikan sa abog, unsay wala planoha sa Diyos? (b) Unsay gitumong ni David sa Salmo 103:14, ug sa unsang paagi ang konteksto motabang kanato sa pagkab-ot niining maong konklusyon?

³ Ang mga linalang gikan sa abog adunay mga limitasyon. Hinuon, wala gayod magplano ang Diyos nga kini mahimong lulan o sobra ka limitado. Dili tumong niini nga magpahinabog pagkaluya sa buot o moresulta sa kagul-anan. Sa gihapon, sumala sa gipakita sa konteksto sa mga pulong ni David sa Salmo 103:14, ang mga limitasyon sa mga tawo makapahinabog pagkaluya sa buot ug moresulta gayod sa kagul-anan. Ngano? Sa dihang si Adan ug Eva misupak sa Diyos, gipahinabo nila ang kausaban sa kahimtang alang sa ilang umaabot nga pamilya. Ang pagkahinimo gikan sa abog nakabaton ug bag-ong mga kahulogan.a

⁴ Si David naghisgot, dili bahin sa kinaiyanhong mga limitasyon nga nabatonan bisan sa hingpit nga mga tawo nga hinimo sa abog, kondili mahitungod sa tawhanong mga kahuyangan nga gipahinabo sa napanunod nga pagkadili-hingpit. Kay kon mao pa dili unta siya maghisgot bahin kang Jehova: “Siya nga nagapasaylo sa tanan mong kalapasan, nga mao ang nagaayo sa tanan mong balatian, nga mao ang nagatubos sa imong kinabuhi gikan sa gahong, [kinsa] wala magbuhat kanato sa angay sa atong mga sala; ni magbalos siya kanato sa angay sa atong kalapasan.” (Salmo 103:2-4, 10) Bisan hinimo sa abog, kon ang hingpit nga mga tawo nagpabiling matinumanon, wala unta sila makalapas, makasala, nga manginahanglan ug kapasayloan; ni makabaton silag mga balatian nga nagkinahanglan ug pagtambal. Labaw sa tanan, dili unta kinahanglan nga manaog sila ngadto sa gahong sa kamatayon nga gikan niana sila matubos pinaagi lamang sa pagkabanhaw.

5. Nganong dili lisod alang kanato ang pagsabot sa mga pulong ni David?

⁵ Sanglit dili hingpit, kitang tanan nakasinati sa mga butang nga gihisgotan ni David. Kita kanunayng nasayod sa atong mga limitasyon tungod sa atong pagkadili-hingpit. Kita masubo kon kini nga limitasyon usahay daw magdaot sa atong relasyon uban kang Jehova o uban sa atong Kristohanong mga igsoon. Ginakagul-an nato nga ang atong mga pagkadili-hingpit ug ang mga pagpit-os sa kalibotan ni Satanas usahay motukmod kanato sa pagkawalay-paglaom. Sanglit hapit nang matapos ang pagmando ni Satanas, ang iyang kalibotan nagpahamtang ug mas dakong pagpit-os diha sa mga tawo sa katibuk-an ug ilabina diha sa mga Kristohanon.​—Pinadayag 12:12.

6. Nganong ang pipila ka Kristohanon mobatig kaluya, ug sa unsang paagi si Satanas mopahimulos niining matanga sa pagbati?

⁶ Gibati ba nimo nga ang pagkinabuhi sa Kristohanong kinabuhi nagakalisod? Ang pipila ka Kristohanon nadunggang miingon nga samtang nagkadugay sila sa kamatuoran daw nagkadili-hingpit sila. Apan, kalagmitan kaayo, kini tungod lamang kay sila nahimong mas pang nakaamgo sa ilang kaugalingong pagkadili-hingpit ug sa ilang pagkadili-makaarang sa pagsunod sa hingpit nga mga sukdanan ni Jehova sa paaging buot nila. Hinuon, sa pagkatinuod, kini maoy lagmit nga sangpotanan sa padayong pag-uswag sa kahibalo ug apresasyon sa matarong nga mga kinahanglanon ni Jehova. Hinungdanon nga dili gayod nato tugotan ang bisan unsang pagkaamgo nga magpaluya kanato ngadto sa punto nga himoon nato ang buot sa Yawa nga buhaton nato. Latas sa kasiglohan siya balikbalik nga misulay sa paggamit sa pagkaluya aron nga pabiyaon ang mga alagad ni Jehova sa matuod nga pagsimba. Bisan pa niana, ang tinuod nga gugma sa Diyos, maingon man ang “bug-os nga pagdumot” sa Yawa, nakapugong sa kadaghanan kanila sa pagbuhat niana.​—Salmo 139:21, 22; Proverbio 27:11.

7. Unsang bahina nga kita usahay sama kang Job?

⁷ Sa gihapon, ang mga alagad ni Jehova tingali sa usa ka panahon o sa lain mobati ug pagkaluya sa buot. Ang pagkadili-tagbaw sa atong kaugalingong mga kalamposan mahimo usab nga usa ka hinungdan. Ang pisikal nga mga hinungdan o dili-maayong mga relasyon uban sa mga membro sa pamilya, mga higala, o mga kauban sa trabaho mahimong nalangkit. Ang matinumanong si Job naluya pag-ayo nga siya mihangyo sa Diyos: “O nga sa Sheol unta tagoan mo ako, nga imo unta akong ibutang sa tago hangtod nga mahupay ang imong kaligutgot, nga imo unta akong tagalan ug panahon ug mahinumdom ka kanako!” Karon, kon ang malisod nga mga kahimtang nakatukmod kang Job, “usa ka tawo nga hingpit ug matarong, nga nahadlok sa Diyos ug nagapahilayo sa daotan,” nga mobatig kaluya, dili ikatingala nga ang samang butang mahitabo kanato.​—Job 1:8, 13-19; 2:7-9, 11-13; 14:13.

8. Nganong ang panagsang kaluya maoy usa ka positibong ilhanan?

⁸ Pagkamakapahupay ang pagkasayod nga si Jehova nagatan-aw sa mga kasingkasing ug dili kay dili-manumbaling sa maayong mga motibo! Dili gayod niya isalikway kadtong naningkamot diha sa bug-os nga kasinsero nga mopahimuot kaniya. Ang panalagsang pagkaluya, sa pagkatinuod, mahimong usa ka positibong ilhanan, nga nagpakita nga wala nato pakamenosa ang atong pag-alagad kang Jehova. Gikan niining maong panglantaw, ang usa nga wala gayod makigbisog batok sa pagkaluya mahimo nga wala makaamgo sa espirituwal sa iyang mga kahuyangan sama sa pagkaamgo sa uban sa ilaha. Hinumdomi: “Siya nga nagahunahunang siya nagabarog pabantaya nga dili siya matumba.”​—1 Corinto 10:12; 1 Samuel 16:7; 1 Hari 8:39; 1 Cronicas 28:9.

Sila Usab Hinimo sa Abog

9, 10. (a) Kansang pagtuo ang kinahanglang sundon sa mga Kristohanon? (b) Sa unsang paagi misanong si Moises sa iyang asaynment?

⁹ Ang Hebreohanon kapitulo 11 naglista sa ubay-ubayng una-Kristohanong mga saksi ni Jehova kinsa nagpakita ug lig-on nga pagtuo. Ang mga Kristohanon sa unang siglo ug kadtong sa modernong kapanahonan naghimo sa susama. Ang mga leksiyon nga makat-onan gikan kanila maoy bililhon. (Itandi ang Hebreohanon 13:7.) Pananglitan, kang kinsang pagtuo ang mas maayong sundon sa mga Kristohanon kay sa iya ni Moises? Gisugo siya sa pagpahayag sa mga mensahe sa paghukom ngadto sa labing gamhanang magmamando sa kalibotan sa iyang panahon, si Paraon sa Ehipto. Karong adlawa, ang mga Saksi ni Jehova kinahanglang magpahayag sa susamang mga mensahe sa paghukom batok sa bakak nga relihiyon ug sa ubang mga organisasyon nga nagasupak sa natukod nga Gingharian ni Kristo.​—Pinadayag 16:1-15.

¹⁰ Dili sayon nga asaynment ang pagtuman niining maong sugo, sama sa gipakita ni Moises. “Kinsa ba ako aron ako moadto kang Paraon ug pagulaon ko gikan sa Ehipto ang mga anak sa Israel?” nangutana siya. Masabtan nato ang iyang mga pagbati sa kakulang sa katakos. Nabalaka usab siya kon unsay himoon sa iyang kaubang mga Israelinhon: “Pananglitan dili sila motuo kanako ug dili magpatalinghog sa akong tingog?” Gisaysay dayon ni Jehova kaniya kon sa unsang paagi niya mapamatud-an ang iyang awtoridad, apan si Moises may laing suliran. Siya miingon: “Pasayloa ako, Jehova, apan dili ako larinong mosulti, bisan kaniadto ni una pa niana bisan sukad nga ikaw misulti sa imong ulipon, kay ako yungit ug dila.”​—Exodo 3:11; 4:1, 10.

11. Sama kang Moises, sa unsang paagi kita mosanong sa teokratikanhong mga obligasyon, apan pinaagi sa pagpakitag pagtuo, sa unsa nga kita makasalig?

¹¹ Usahay, mobati tingali kita sama sa gibati ni Moises. Bisan tuod giila nato ang atong teokratikanhong mga obligasyon, kita tingali mahibulong kon unsaon kaha nato pagtuman kana. ‘Kinsa ba ako nga ako moduol sa mga tawo, nga ang uban kanila ilado sa katilingban, sapian, o hataas ug edukasyon, ug mangahas sa pagtudlo kanila sa mga dalan sa Diyos? Unsay pagsanong sa akong espirituwal nga mga igsoon sa dihang mokomento ako sa Kristohanong mga tigom o mohatag ug mga presentasyon gikan sa plataporma sa Tunghaan sa Teokratikanhong Ministeryo? Dili kaha nila makita ang akong mga kakulangan?’ Apan hinumdomi, si Jehova nag-uban kang Moises ug nagsangkap kaniya alang sa iyang asaynment tungod kay si Moises nagpakitag pagtuo. (Exodo 3:12; 4:2-5, 11, 12) Kon atong sundogon ang pagtuo ni Moises, si Jehova magauban kanato ug magsangkap usab kanato sa atong buluhaton.

12. Sa unsang paagi ang pagtuo ni David makadasig kanato atubangan sa pagkaluya tungod sa kasal-anan o kakulangan?

¹² Ang si bisan kinsa nga mibatig kahigawad o pagkaluya tungod sa kasal-anan o kakulangan makasabot gayod kang David sa dihang siya miingon: “Naila ko ang akong mga kalapasan, ug ang akong sala sa gihapon ania sa akong atubangan.” Nagpakiluoy kang Jehova, miingon usab si David: “Tagoa ang imong nawong gikan sa akong mga sala, ug palaa ang tanan kong mga kalapasan.” Hinunoa, wala gayod niya tugoti ang kaluya nga mowala sa iyang tinguha nga moalagad kang Jehova. “Ayaw ako isalikway gikan sa imong nawong; ug ayaw pagkuhaa ang imong balaang espiritu gikan kanako.” Si David tin-aw nga “abog,” apan si Jehova wala mobiya kaniya, tungod kay si David nagpakitag pagtuo diha sa mga saad ni Jehova nga dili niya tamayon ang “usa ka masulob-on ug nadugmok nga kasingkasing.”​—Salmo 38:1-9; 51:3, 9, 11, 17.

13, 14. (a) Nganong kinahanglang dili kita mahimong sumusunod sa mga tawo? (b) Sa unsang paagi ang mga panig-ingnan ni Pablo ug Pedro nagpakita nga bisan sila maoy hinimo sa abog?

¹³ Apan, matikdi nga bisan tuod isipon nato kining “dakong panganod sa mga saksi” ingong usa ka pagdasig nga “atong daganon nga may pag-agwanta ang lumba nga gibutang atubangan kanato,” wala kita sugoa nga mahimong ilang mga sumusunod. Kita gisugo sa pagsunod sa mga tunob sa “Pangulong Ahente ug Maghihingpit sa atong pagtuo, si Jesus,” dili sa dili-hingpit nga mga tawo​—dili bisan sa matinumanong mga apostol sa unang siglo.​—Hebreohanon 12:1, 2; 1 Pedro 2:21.

¹⁴ Sila si apostol Pablo ug Pedro, nga mga haligi sa Kristohanong kongregasyon, usahay napandol. “Ang maayo nga buot ko wala ko buhata, apan ang daotan nga dili ko buot mao ang akong ginabuhat,” misulat si Pablo. “Alaot ako nga tawo!” (Roma 7:19, 24) Ug si Pedro tungod sa sobra nga pagsalig sa kaugalingon miingon kang Jesus: “Bisan pag ang tanang uban mangapandol labot kanimo, dili gayod ako mapandol!” Sa dihang si Jesus nagpasidaan kang Pedro nga siya dili-moangkon Kaniya sa tulo ka higayon, si Pedro mapangahasong misupak sa iyang Agalon, nga nanghambog: “Bisan kon kinahanglan pa akong mamatay uban kanimo, dili ko gayod himoon ang dili-pag-angkon kanimo.” Apan wala gayod niya angkona si Jesus, usa ka sayop nga nagpahilak kaniya sa hilabihan. Oo, si Pablo ug Pedro hinimo sa abog.​—Mateo 26:33-35.

15. Bisan sa kamatuoran nga kita hinimo sa abog, unsay atong panukmod nga mopadayon?

¹⁵ Hinunoa, bisan pa sa ilang mga kahuyangan, si Moises, David, Pablo, Pedro, ug uban pang sama kanila nagmadaogon. Ngano? Tungod kay sila nagpakitag lig-ong pagtuo kang Jehova, bug-os nga nagsalig kaniya, ug nagpabiling suod kaniya bisan pa sa mga babag. Sila misalig kaniya sa pagtagana kanila ug “gahom nga labaw sa kasagaran.” Ug nagtagana gayod siya, nga wala gayod magtugot kanila nga matumba nga dili na makabangon. Kon padayon kitang magpakita ug pagtuo, makaseguro kita nga sa dihang ang paghukom ipahamtang na sa atong kahimtang, kini mahimong kaharmoniya sa mga pulong: “Ang Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” Pagkamaayong motibo kini nga gihatag kanato nga mopadayon bisan pa sa kamatuoran nga kita hinimo sa abog!​—2 Corinto 4:7; Hebreohanon 6:10.

Unsay Kahulogan sa Pagkahinimo sa Abog Alang Kanato nga Indibiduwal?

16, 17. Maylabot sa paghukom, sa unsang paagi si Jehova nagpadapat sa prinsipyo nga gisaysay sa Galacia 6:4?

¹⁶ Ang kasinatian nagtudlo sa daghang ginikanan ug mga magtutudlo sa kaalam sa paghukom sa kabataan o estudyante sumala sa indibiduwal nga abilidad, dili pinasikad sa mga pagtandi uban sa ilang mga igsoon o mga kauban sa klase. Kini maoy kaharmoniya sa prinsipyo sa Bibliya nga ang mga Kristohanon gisugo sa pagsunod: “Ipapamatuod sa matag usa kon unsa ang iyang kaugalingong buhat, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.”​—Galacia 6:4.

¹⁷ Kaharmoniya niining maong prinsipyo, bisan tuod si Jehova nakiglabot sa iyang mga tawo ingong organisadong pundok, siya nagahukom kanila ingong indibiduwal. Ang Roma 14:12 nag-ingon: “Ang matag usa kanato manubag alang sa iyang kaugalingon ngadto sa Diyos.” Nasayod kaayo si Jehova sa henetikong pagkagama sa matag usa sa iyang mga alagad. Nasayod siya sa ilang pisikal ug mental nga pagkagama, sa ilang mga abilidad, sa ilang napanunod nga mga kusog ug mga kaluyahon, sa ilang mga potensiyal, maingon man sa gilapdon nga sila nagpahimulos niining maong mga potensiyal sa pagpatungha ug Kristohanong mga bunga. Ang mga pulong ni Jesus mahitungod sa babayeng balo nga naghulog ug duha ka diyut sa panudlanan sa templo ug ang iyang ilustrasyon bahin sa binhi nga natisok sa maayong yuta maoy makapadasig nga mga panig-ingnan alang sa mga Kristohanon nga nangaluya tungod sa dili-maalamong pagtandi sa ilang kaugalingon sa uban.​—Marcos 4:20; 12:42-44.

18. (a) Nganong tinoon nato kon unsay kahulogan sa pagkahimong abog alang sa matag usa kanato? (b) Nganong dili kita angay maguol sa prangkang pagsusi sa kaugalingon?

¹⁸ Hinungdanon nga atong tinoon kon unsa ang kahulogan sa pagkahimong abog diha sa atong tagsa-tagsa ka kahimtang aron nga kita makaalagad kutob sa atong bug-os nga maarangan. (Proverbio 10:4; 12:24; 18:9; Roma 12:1) Sa pagkaamgo lamang pag-ayo sa atong personal nga mga kahuyangan ug mga kaluyahon nga kita makapabiling igmat sa panginahanglan ug mga posibilidad nga mouswag. Sa paghimog pagsusi sa kaugalingon, dili gayod nato taligam-an ang gahom sa balaang espiritu nga motabang kanato nga mouswag. Pinaagi niana, ang uniberso nalalang, ang Bibliya nasulat, ug, sa taliwala sa himalatyong kalibotan, ang usa ka malinawon bag-ong kalibotang sosyedad gipatungha. Busa ang balaang espiritu sa Diyos gamhanan kaayo nga makahatag niadtong nangayo niana sa kaalam ug kalig-on nga gikinahanglan sa paghupot sa integridad.​—Miqueas 3:8; Roma 15:13; Efeso 3:16.

19. Sa unsa nga dili ikapasangil ang atong pagkahinimo sa abog?

¹⁹ Pagkamakapahupay ang pagkasayod nga si Jehova nahinumdom nga kita abog! Hinunoa, dili gayod kita mangatarongan nga usa kini ka makataronganon nga pasangil sa pagkahimong tapolan o tingali sa pagbuhat ug sayop. Dili gayod! Ang paghinumdom ni Jehova nga kita abog maoy kapahayagan sa iyang dili-takos nga kalulot. Apan dili kita buot nga mahimong “mga tawong dili-diyosnon, nga nagahimo sa dili-takos nga kalulot sa atong Diyos nga katarungan alang sa malaw-ayng panggawi ug nagapamatuod ingong bakak ngadto sa atong bugtong Tag-iya ug Ginoo, si Jesu-Kristo.” (Judas 4) Ang pagkahinimo gikan sa abog dili pasangil nga mahimong dili-diyosnon. Ang usa ka Kristohanon maningkamot sa pagpakigbisog sa sayop nga mga kiling, nga nagapanton sa iyang lawas ug nagahimo niana nga sama sa usa ka ulipon, aron malikayan ang ‘pagpaguol sa balaang espiritu sa Diyos.’​—Efeso 4:30; 1 Corinto 9:27.

20. (a) Sa unsang duha ka bahin nga kita adunay “daghang buhaton sa buluhaton sa Ginoo”? (b) Nganong may katarongan kita nga magmalaomon?

²⁰ Karon, sa panahon sa naghinapos nga katuigan sa sistema sa kalibotan ni Satanas, maoy dili panahon sa paghinayhinay​—dili maylabot sa pagsangyaw sa Gingharian ug dili maylabot sa pag-ugmad nga mas bug-os pa sa bunga sa espiritu sa Diyos. Niining duha ka bahin kita adunay “daghang buhaton.” Karon na ang panahon sa pagpadayon tungod kay kita nasayod nga ang atong “paghago dili makawang.” (1 Corinto 15:58) Si Jehova magpaluyo kanato, tungod kay bahin kaniya si David miingon: “Dili gayod niya tugotan ang matarong nga matarog.” (Salmo 55:22) Pagkadakong kalipay ang pagkasayod nga si Jehova nagatugot kanato sa personal sa pagpakig-ambit sa kinadak-ang buluhaton nga sukad masukad gipabuhat sa dili-hingpit nga tawhanong mga linalang​—ug kini bisan pa sa atong pagkahinimo sa abog!

[Footnote]

Makapatin-aw Ka Ba?

◻ Sa unsang paagi ang Genesis 2:7 ug Salmo 103:14 magkalahi diha sa paghisgot sa mga tawo nga hinimo gikan sa abog?

◻ Nganong ang Hebreohanon kapitulo 11 usa ka tuboran sa pagdasig alang sa mga Kristohanon karong adlawa?

◻ Nganong maalamon kita kon atong ipadapat ang prinsipyo nga gipakita sa Galacia 6:4?

◻ Sa unsang paagi ang Hebreohanon 6:10 ug 1 Corinto 15:58 motabang sa pagsumpo sa pagkaluya?

[Hulagway sa panid 10]

Ang mga Kristohanon nagasundog sa pagtuo sa kaubang mga magsisimba, apan ginasunod nila ang Maghihingpit sa ilang pagtuo, si Jesus