HUKMANAN

Usa ka korte sa hustisya. Kining pulonga makita diha sa pipila ka hubad sa Bibliya sa 1 Corinto 4:​3, diin si Pablo nag-ingon: “Karon alang kanako gamay ra kaayong butang nga ako pagausisahon ninyo o pinaagi sa tawhanong hukmanan [Gr., an·thro·piʹnes he·meʹras].” Ang Gregong ekspresyon sa literal nagkahulogang “adlaw sa tawo” ug gisabot nga nagtumong sa usa ka gitakdang adlaw, o adlaw nga gitakda sa usa ka tawhanong maghuhukom aron sa paghusay o sa pagpakanaog ug hukom.

Giila ni Pablo nga ang mga tawo sama kang Apolos, Cefas, ug siya mismo sa usa ka paagi ikaingon nga sakop o maoy mga alagad sa kongregasyon sa Corinto. (1Co 3:​21, 22) Apan ang pipila niana nga kongregasyon nagbiaybiay ug naghukom kang Pablo, ug kana nga tinamdan milambo tungod sa ilang pagsektasekta, sa ilang pagkaunodnon imbes nga espirituhanon, sa ilang paglantaw sa mga tawo imbes ngadto kang Kristo. (1Co 9:1-4) Nadepensahan ni Pablo ang iyang ministeryo (1Co 9:5-27), nga naghatag ug katibuk-ang lagda o panglantaw nga ang usa ka Kristohanon angayng dili pangunang mabalaka bahin sa paghukom sa mga tawo, pinaagi man sa mga taga-Corinto o pinaagi sa pipila ka tawhanong korte sa usa ka gitakdang adlaw. Hinunoa, si Pablo nabalaka bahin sa umaabot nga adlaw sa paghukom o pag-usisa sa Diyos (pinaagi ni Jesus). Siya ang naghatag kang Pablo sa pagkatinugyanan nga niana siya kinahanglang magmatinumanon.​—1Co 1:8; 4:2-5; Heb 4:13.