Mga Lalaki, Nagpasakop ba Kamo sa Pagkaulo ni Kristo?

“Ang ulo sa matag lalaki mao si Kristo.”​—⁠1 COR. 11:3.

1. Unsay nagpakita nga si Jehova usa ka Diyos sa kahusay?

“TAKOS ikaw, Jehova, nga among Diyos, nga modawat sa himaya ug sa dungog ug sa gahom,” nag-ingon ang Pinadayag 4:​11, “tungod kay imong gilalang ang tanang butang, ug tungod sa imong kabubut-on sila milungtad ug nalalang.” Sanglit gilalang niya ang tanang butang, si Jehova nga Diyos mao ang Kinalabwang Soberano sa uniberso ug may awtoridad ibabaw sa tanan niyang linalang. Makita diha sa pag-organisar ni Jehova sa iyang mga manulonda nga siya “usa ka Diyos, dili sa kasamok, kondili sa kalinaw.”​—⁠1 Cor. 14:33; Isa. 6:1-3; Heb. 12:​22, 23.

2, 3. (a) Kinsay unang gilalang ni Jehova? (b) Unsay posisyon sa panganay may kalabotan sa iyang Amahan?

² Sa wala pa siya magsugod paglalang, ang Diyos naglungtad na sulod sa dili-maihap nga katuigan. Ang una niyang gilalang mao ang espirituhanong linalang nga gitawag ug “Pulong” tungod kay siya ang Tigpamaba ni Jehova. Pinaagi sa Pulong milungtad ang tanang ubang butang. Sa ulahi, siya mianhi sa yuta ingong hingpit nga tawo ug gitawag nga Jesu-Kristo.​—⁠Basaha ang Juan 1:1-3, 14.

³ Unsay giingon sa Kasulatan bahin sa posisyon sa Diyos may kalabotan sa iyang panganay? Si apostol Pablo giinspirar sa pagsulat: “Buot ko nga mahibalo kamo nga ang ulo sa matag lalaki mao si Kristo; sa baylo ang ulo sa usa ka babaye mao ang lalaki; sa baylo ang ulo ni Kristo mao ang Diyos.” (1 Cor. 11:3) Si Kristo nailalom sa pagkaulo sa iyang Amahan. Ang pagkaulo ug pagpasakop gikinahanglan aron molungtad ang kalinaw ug kahusay taliwala sa intelihenteng mga linalang. Bisan ang usa nga “pinaagi kaniya gilalang ang tanang ubang butang” kinahanglang magpasakop sa pagkaulo sa Diyos.​—⁠Col. 1:16.

4, 5. Unsay pagbati ni Jesus sa iyang posisyon may kalabotan kang Jehova?

⁴ Unsay pagbati ni Jesus labot sa iyang pagpasakop sa pagkaulo ni Jehova ug sa iyang pag-anhi sa yuta? Ang Kasulatan nag-ingon: ‘Si Kristo Jesus, kinsa, bisan tuod siya naglungtad diha sa dagway sa Diyos, wala maghunahuna sa pagpangilog, nga mao, nga siya mahimong katumbas sa Diyos. Wala, apan iyang gihaw-asan ang iyang kaugalingon ug gihuptan ang dagway sa usa ka ulipon ug nahisama sa mga tawo. Labaw pa niana, sa dihang iyang nakaplagan ang iyang kaugalingon nga diha sa dagway sa usa ka tawo, siya nagpaubos ug nagmasinugtanon hangtod sa kamatayon, oo, kamatayon sa estaka sa pagsakit.’​—⁠Filip. 2:5-8.

⁵ Sa tanang panahon, si Jesus mapainubsanong nagpasakop sa kabubut-on sa iyang Amahan. Siya miingon: “Dili ako makahimo ug usa ka butang sa akong kaugalingong pagbuot; . . . ang paghukom nga akong ipakanaog matarong, tungod kay akong gitinguha, dili ang akong kaugalingong kabubut-on, kondili ang kabubut-on niya nga nagpadala kanako.” (Juan 5:30) “Ginabuhat ko kanunay ang mga butang nga makapahimuot [sa akong Amahan],” siya miingon. (Juan 8:29) Sa hapit nang mamatay si Jesus, miampo siya sa iyang Amahan: “Gihimaya ko ikaw dinhi sa yuta, kay natapos ko ang buluhaton nga imong gihatag kanako aron buhaton.” (Juan 17:4) Dayag nga giila ug gidawat ni Jesus ang pagkaulo sa Diyos.

Ang Pagpasakop Naghatag ug Kaayohan sa Anak

6. Unsang dalayegong mga hiyas ang gipakita ni Jesus?

⁶ Sa dinhi pa si Jesus sa yuta, nagpasundayag siyag dalayegong mga hiyas. Lakip niana ang dakong gugma nga gipakita niya sa iyang Amahan. “Gihigugma ko ang Amahan,” siya miingon. (Juan 14:31) Nagpasundayag usab siya ug dakong gugma sa katawhan. (Basaha ang Mateo 22:35-40.) Si Jesus maluloton ug mahunahunaon, dili bangis o mahariharion. “Umari kanako, kamong tanang nabudlayan ug nabug-atan,” siya miingon, “ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.” (Mat. 11:28-30) Ang karnerohong mga tawo bisag unsay panuigon, ilabina kadtong dinaogdaog, nahupayan pag-ayo sa maayong personalidad ni Jesus ug sa iyang makapadasig nga mensahe.

7, 8. Ilalom sa Balaod, unsay dili angayng buhaton sa babaye nga gitalinug-an, apan giunsa siya pagtratar ni Jesus?

⁷ Tagda kon giunsa pagtratar ni Jesus ang mga babaye. Latas sa kasaysayan, daghang lalaki ang nagdaogdaog sa mga babaye. Ingon niana ang mga lider sa relihiyon sa karaang Israel. Hinunoa, gitahod ni Jesus ang mga babaye. Nadayag kini sa iyang pakiglabot sa usa ka babaye nga gitalinug-an sulod sa 12 ka tuig. “Gipaantos siyag daghang kasakit” sa mga mananambal ug nahurot na ang tanan niyang kahinguhaan aron lang maayo. Bisan pa sa tanan niyang paningkamot, “migrabe pa hinuon” siya. Ilalom sa Balaod, giisip siya nga mahugaw. Si bisan kinsa nga mohikap kaniya mahimong mahugaw usab.​—⁠Lev. 15:​19, 25.

⁸ Sa dihang nadungog sa babaye nga nanambal si Jesus sa mga masakiton, miduyog siya sa mga tawo nga minunot kang Jesus, nga nag-ingon: “Kon makahikap lang ako sa iyang panggawas nga besti ako mamaayo.” Siya mihikap kang Jesus ug dihadiha siya naayo. Nahibalo si Jesus nga dili angayng hikapon sa babaye ang iyang besti. Bisan pa niana, wala niya kini kasab-i. Sa kasukwahi, nagmaluloton si Jesus kaniya. Nakasabot siya sa gibati sa babaye sulod sa katuigan nga siya nagmasakiton ug nahibalo siya nga nagkinahanglan kaayo kinig tabang. Si Jesus mabinationg miingon kaniya: “Anak, ang imong pagtuo nakapaayo kanimo. Lakaw nga malinawon, ug mamaayo na ang imong lawas gikan sa imong grabeng sakit.”​—⁠Mar. 5:25-34.

9. Unsay reaksiyon ni Jesus sa dihang gipugngan sa iyang mga tinun-an ang mga bata sa pagduol kaniya?

⁹ Bisan ang mga bata wala magpanagana sa pagduol kang Jesus. Usa ka higayon niana, sa dihang gidala sa mga tawo kaniya ang mga bata, gibadlong sila sa mga tinun-an. Nagtuo sila nga dili niya gustong magpadisturbo sa mga bata. Apan dili na maoy gibati ni Jesus. Ang Kasulatan nag-ingon: “Sa pagkakita niini si Jesus nasuko ug miingon [sa mga tinun-an]: ‘Pasagdi ang mga bata nga moduol kanako; ayaw sila pagpugngi, kay ang gingharian sa Diyos ilaha sa mga ingon kanila.’” Unya, “iyang gikugos ang mga bata ug gipanalanginan sila, nga gitapion ang iyang mga kamot diha kanila.” Wala lamang pasagdi ni Jesus nga moduol kaniya ang mga bata kondili gihangop niya sila.​—⁠Mar. 10:13-16.

10. Sa unsang paagi naugmad ni Jesus ang mga hiyas nga iyang gipakita?

¹⁰ Sa unsang paagi naugmad ni Jesus ang mga hiyas nga iyang gipakita sa dinhi pa siya sa yuta? Sa didto pa siya sa langit, naobserbahan niya ang iyang Amahan sulod sa dugayng panahon ug nakakat-on sa Iyang mga paagi. (Basaha ang Proverbio 8:​22, 23, 30.) Nakita usab niya ang mahigugmaong paggamit ni Jehova sa iyang pagkaulo ibabaw sa tanan Niyang linalang ug gisundog kana. Mahimo kaha kini ni Jesus kon dili siya mapinasakopon? Kalipay niya nga magpasakop sa iyang Amahan, ug kalipay ni Jehova nga makabatog Anak nga sama niana. Sa dinhi pa si Jesus sa yuta, hingpit niyang gibanaag ang talagsaong mga hiyas sa iyang langitnong Amahan. Pagkadakong pribilehiyo nga magpasakop kita kang Kristo, ang tinudlo sa Diyos nga Magmamando sa langitnong Gingharian!

Sundoga ang mga Hiyas ni Kristo

11. (a) Kinsay paningkamotan natong sundogon? (b) Nganong ang mga lalaki sa kongregasyon maoy ilabinang maningkamot sa pagsundog kang Jesus?

¹¹ Ang tanan diha sa kongregasyon, ilabina ang mga lalaki, angayng magpadayon sa pagpaningkamot sa pagsundog sa mga hiyas ni Kristo. Sa nahisgotan na, ang Bibliya nag-ingon: “Ang ulo sa matag lalaki mao si Kristo.” Maingon nga gisundog ni Kristo ang iyang Ulo, ang matuod nga Diyos, ang Kristohanong mga lalaki angayng maningkamot sa pagsundog sa ilang ulo​—⁠si Kristo. Mao kanay gibuhat ni apostol Pablo sa dihang nahimo siyang Kristohanon. “Mahimong mga tigsundog kanako,” mitambag siya sa mga isigka-Kristohanon, “ingon nga ako nagsundog kang Kristo.” (1 Cor. 11:1) Ug si apostol Pedro miingon: “Niini nga dalan kamo gipanagtawag, tungod kay bisan si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob.” (1 Ped. 2:21) Aduna pay laing rason kon nganong angayng maikag ang mga lalaki sa tambag nga sundogon si Kristo. Sila maoy mahimong mga ansiyano ug ministeryal nga mga alagad. Maingon nga gikalipay ni Jesus ang pagsundog kang Jehova, ang Kristohanong mga lalaki angayng malipay usab sa pagsundog kang Kristo ug sa iyang mga hiyas.

12, 13. Sa unsang paagi ang mga ansiyano angayng makiglabot sa mga karnero nga gipiyal kanila?

¹² Ang mga ansiyano obligadong mosundog kang Kristo. Gitambagan sila ni Pedro: “Bantayi ninyo ang panon sa Diyos nga ubos sa inyong pag-atiman, dili nga pinugos, kondili kinabubut-on; ni tungod sa gugma sa kinitaan pinaagig limbong, apan maikagon; ni mahariharion ibabaw niadtong panulondon sa Diyos, apan mahimong mga panig-ingnan alang sa panon.” (1 Ped. 5:1-3) Ang mga ansiyano kinahanglang dili mahimong diktador, dominante, mabuotbuoton, o mabangis. Sa pagsundog kang Kristo, sila maningkamot nga mahimong mahigugmaon, mahunahunaon, mapainubsanon, ug maluloton sa ilang pagpakiglabot sa mga karnero nga gipiyal kanila.

¹³ Ang mga nanguna sa kongregasyon dili-hingpit, ug angay nila kanang hinumdoman. (Roma 3:23) Busa kinahanglang andam silang mokat-on bahin kang Jesus ug mosundog sa iyang gugma. Kinahanglang palandongon nila ang paagi sa Diyos ug ni Kristo sa pagpakiglabot sa mga tawo ug maningkamot nga sundogon sila. Si Pedro nagtambag kanato: “Kamong tanan sul-obi ang inyong kaugalingon sa pagkamapainubsanon sa hunahuna ngadto sa usag usa, tungod kay ang Diyos magabatok sa mga mapahitas-on, apan magahatag siyag dili-takos nga kalulot sa mga mapainubsanon.”​—⁠1 Ped. 5:5.

14. Sa unsang gilapdon nga ang mga ansiyano magpakitag pasidungog sa uban?

¹⁴ Sa ilang pagpakiglabot sa panon sa Diyos, ang tinudlong mga lalaki kinahanglang magpakitag maayong mga hiyas. Ang Roma 12:10 nag-ingon: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” Ang mga ansiyano ug ministeryal magpakitag pasidungog sa uban. Sama sa mga Kristohanon sa katibuk-an, kini nga mga lalaki ‘dili magabuhat ug bisan unsa tungod sa pagkamatigion o tungod sa pagpaimportante sa kaugalingon kondili uban sa pagpaubos sa hunahuna isipon nila nga ang uban labaw kanila.’ (Filip. 2:3) Angay gayong isipon niadtong nagapanguna nga ang uban labaw kanila. Kon buhaton nila kana, ilang gisunod ang tambag ni Pablo: “Hinunoa, kita nga mga lig-on angayng mopas-an sa mga kaluyahon niadtong mga dili lig-on, ug dili kay magpahimuot sa atong kaugalingon. Magpahimuot ang matag usa kanato sa iyang silingan sa kon unsay maayo aron sa paglig-on kaniya. Kay bisan gani si Kristo wala magpahimuot sa iyang kaugalingon.”​—⁠Roma 15:1-3.

‘Paghatag ug Kadungganan sa mga Asawa’

15. Sa unsang paagi angayng trataron sa mga bana ang ilang asawa?

¹⁵ Tagda karon ang tambag ni Pedro sa mga lalaking minyo. Siya misulat: “Kamong mga bana, magpadayon sa pagpuyo sa samang paagi uban [sa inyong mga asawa] sumala sa kahibalo, nga maghatag kanila ug kadungganan samag ngadto sa usa ka sudlanan nga mas mahuyang, ang babaye.” (1 Ped. 3:7) Ang paghatag ug kadungganan sa usa ka indibiduwal nagpasabot nga ato siyang gitamod pag-ayo. Busa, imong konsiderahon ang mga opinyon, panginahanglan, ug gusto sa maong tawo ug mopahiuyon kaniya gawas lang kon dunay bug-at nga rason nga dili kana buhaton. Kanay angay nga pagtratar sa bana sa iyang asawa.

16. Unsay gipasidaan sa Pulong sa Diyos sa mga bana maylabot sa paghatag ug kadungganan sa ilang asawa?

¹⁶ Sa dihang gitambagan ni Pedro ang mga bana sa paghatag ug kadungganan sa ilang asawa, gidugang niya kini nga pasidaan: “Aron nga dili mababagan ang inyong mga pag-ampo.” (1 Ped. 3:7) Tin-awng gipakita niana kon unsa ka seryoso ang panglantaw ni Jehova sa pagtratar sa bana sa iyang asawa. Kon dili niya hatagag kadungganan ang iyang asawa, mababagan ang iyang mga pag-ampo. Dugang pa, dili ba nga ang mga asawa sagad mosanong nga positibo kon hatagan silag kadungganan sa ilang bana?

17. Sa unsang gilapdon nga angayng higugmaon sa bana ang iyang asawa?

¹⁷ Mahitungod sa paghigugma sa asawa, ang Pulong sa Diyos nagtambag: “Ang mga bana angay nga maghigugma sa ilang mga asawa sama sa ilang kaugalingong mga lawas. . . . Kay wala gayoy tawo nga nagdumot sa iyang kaugalingong unod; kondili nagapakaon ug nagapangga niini, ingon sa ginahimo usab ni Kristo sa kongregasyon . . . Kinahanglang higugmaon gayod sa matag usa ang iyang asawa sama sa iyang kaugalingon.” (Efe. 5:​28, 29, 33) Sa unsang gilapdon nga ipakita sa mga bana ang ilang gugma sa ilang asawa? “Mga bana,” misulat si Pablo, “magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efe. 5:25) Oo, ang bana kinahanglang andam bisan sa paghatag sa iyang kinabuhi alang sa iyang asawa, sama sa gibuhat ni Kristo alang sa uban. Kon ang bana mabination, magpakitag konsiderasyon, mahunahunaon, ug dili-mahakogon, mas sayon sa asawa nga magpasakop sa iyang pagkaulo.

18. Unsang tabang ang mabatonan sa mga lalaki sa pag-atiman sa ilang mga responsibilidad sa kaminyoon?

¹⁸ Imposible bang mahatagan sa mga bana ug kadungganan ang ilang asawa niining paagiha? Dili. Si Jehova dili gayod mosugo kanilag usa ka butang nga dili nila mahimo. Gawas pa, mahimong pangayoon sa mga magsisimba ni Jehova ang labing kusganong puwersa sa uniberso​—⁠ang iyang balaang espiritu. Si Jesus miingon: “Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” (Luc. 11:13) Sa ilang mga pag-ampo, ang mga bana makahangyo nga pinaagi sa iyang espiritu, si Jehova motabang kanila sa ilang pagpakiglabot sa uban, lakip na sa ilang asawa.​—⁠Basaha ang Buhat 5:32.

19. Unsay hisgotan sa sunod nga artikulo?

¹⁹ Sa pagkatinuod, ang mga lalaki adunay bug-at nga responsibilidad sa pagkat-on kon sa unsang paagi mahimong mapinasakopon kang Kristo ug sundogon ang iyang pagkaulo. Apan komosta ang mga babaye, ilabina ang mga asawa? Hisgotan sa sunod nga artikulo kon unsay angay nilang panglantaw sa ilang papel diha sa kahikayan ni Jehova.

Mga Babaye, Nganong Angay Kamong Magpasakop?

“Ang ulo sa usa ka babaye mao ang lalaki.”​—⁠1 COR. 11:3.

1, 2. (a) Unsay gisulat ni apostol Pablo bahin sa kahikayan ni Jehova sa pagkaulo ug pagpasakop? (b) Unsang mga pangutana ang tubagon niining artikuloha?

SI Jehova ang nagtakda sa kahikayan sa pagkaulo nga gihisgotan ni apostol Pablo sa 1 Corinto 11:3: “Ang ulo sa matag lalaki mao si Kristo . . . ang ulo ni Kristo mao ang Diyos.” Sumala sa miaging artikulo, giisip ni Jesus nga usa ka pribilehiyo ug kalipay ang pagpasakop sa iyang Ulo, si Jehova nga Diyos, ug ang ulo sa lalaki mao si Kristo. Si Kristo maluloton, malumo, mabination, ug dili-mahakogon sa dihang nakiglabot sa mga tawo. Kinahanglan nga ang mga lalaki mogawi nga sama niana, ilabina sa ilang asawa.

² Apan, komosta ang mga babaye? Kinsa may ilang ulo? “Ang ulo sa usa ka babaye mao ang lalaki,” misulat si Pablo. Unsay angayng tinamdan sa mga babaye niana? Mapadapat ba gihapon kanang prinsipyoha kon dili magtutuo ang bana? Ang pagpasakop ba sa pagkaulo sa lalaki nagpasabot nga ang asawa magpakahilom lang, nga dili makahatag sa iyang opinyon sa dihang adunay himoong desisyon? Sa unsang paagi mabatonan sa usa ka babaye ang pagdayeg?

“Buhatan Ko Siyag Katabang”

3, 4. Nganong mapuslanon ang kahikayan sa pagkaulo diha sa kaminyoon?

³ Ang kahikayan sa pagkaulo naggikan sa Diyos. Human lalanga si Adan, si Jehova nga Diyos miingon: “Dili maayo alang sa tawo nga magpadayon nga mag-inusara. Buhatan ko siyag katabang, ingon nga iyang katimbang.” Human lalanga si Eva, nalipay kaayo si Adan nga aduna na siyay kauban ug katabang nga siya miingon: “Kini sa kataposan bukog sa akong mga bukog ug unod sa akong unod.” (Gen. 2:18-24) Si Adan ug Eva adunay maanindot nga palaaboton nga mahimong ginikanan sa hingpit nga mga tawo, nga malipayong mabuhi sa walay kataposan sa paraisong yuta.

⁴ Tungod sa pagrebelde sa atong unang ginikanan, nawala ang hingpit nga kahimtang sa tanaman sa Eden. (Basaha ang Roma 5:12.) Apan nagpabilin ang kahikayan sa pagkaulo. Kon sundon sa hustong paagi, maghatag kinig dakong kaayohan ug kalipay sa kaminyoon. Susama niana ang gibati ni Jesus sa dihang nagpasakop siya sa iyang Ulo, si Jehova. Sa didto pa siya sa langit, si Jesus ‘nagakalipay sa atubangan ni Jehova sa tanang panahon.’ (Prov. 8:30) Tungod sa pagkadili-hingpit, ang mga lalaki dili makapakitag hingpit nga pagkaulo, ug ang mga babaye dili makapakitag hingpit nga pagpasakop. Apan kon ang mga bana ug asawa padayong maningkamot sa pagbuhat sa ilang maarangan, bation nila ang dakong katagbawan sa ilang kaminyoon bisan karon.

5. Nganong angayng sundon sa mga magtiayon ang tambag sa Roma 12:10?

⁵ Aron magmalamposon ang kaminyoon, kinahanglang ipadapat sa mga magtiayon kining tambag alang sa tanang Kristohanon: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” (Roma 12:10) Dugang pa, ang bana ug asawa angayng maningkamot nga “magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa.”​—⁠Efe. 4:32.

Kon Dili Magtutuo ang Kapikas

6, 7. Unsay mahimong resulta kon ang Kristohanong asawa magpasakop sa iyang dili-matutuong bana?

⁶ Komosta kon dili alagad ni Jehova ang imong kapikas? Sagad, ang bana maoy dili magtutuo. Nan, unsaon man siya pagtratar sa iyang asawa? Ang Bibliya nagtubag: “Kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.”​—⁠1 Ped. 3:​1, 2.

⁷ Ang Pulong sa Diyos nag-ingon nga ang asawa angayng magpasakop sa iyang dili-magtutuong bana. Ang iyang maayong panggawi mahimong makaimpluwensiya sa bana sa pagsusi kon unsay nagtukmod sa iyang asawa sa pagpakita niana. Ingong resulta, mahimong susihon niya ang gituohan sa iyang asawa ug sa ngadtongadto dawaton ang kamatuoran.

8, 9. Unsay mahimo sa Kristohanong asawa kon ang iyang dili-magtutuong bana dili madani bisan pa sa iyang maayong panggawi?

⁸ Apan, unsa na man kon ang bana dili madani sa kamatuoran? Ang Kasulatan nagdasig sa magtutuong asawa sa pagpakita sa Kristohanong mga hiyas sa tanang panahon, bisag unsa pa kini kalisod buhaton. Pananglitan, atong mabasa sa 1 Corinto 13:4: “Ang gugma hataas-ug-pailob.” Nan, maalamon nga ang asawa magpadayon sa paggawi “uban ang bug-os nga pagpaubos sa hunahuna ug kalumo, uban ang hataas-nga-pailob,” nga sagubangon ang maong kahimtang pinaagi sa gugma. (Efe. 4:2) Sa tabang sa aktibong puwersa sa Diyos​—⁠ang iyang balaang espiritu​—⁠mahuptan nato ang Kristohanong mga hiyas bisan sa lisod nga mga kahimtang.

⁹ “Sa tanang butang ako adunay kusog pinaagi kaniya nga naghatag ug gahom kanako,” misulat si Pablo. (Filip. 4:13) Ang espiritu sa Diyos makatabang sa Kristohanong kapikas sa pagbuhat sa mga butang nga dili unta niya mahimo. Pananglitan, kon mabangis ang pagtratar sa usa ngadto sa iyang kapikas, basin maaghat kini sa pagpanimalos. Apan, ang Bibliya nagtambag sa tanang Kristohanon: “Ayaw balosi si bisan kinsa ug daotan tungod sa daotan. . . . Kay nahisulat: ‘Akoa ang panimalos; ako magabalos, nag-ingon si Jehova.’” (Roma 12:17-19) Sa susama, ang 1 Tesalonica 5:15 nagtambag kanato: “Tinoa nga walay usa nga mobalos ug kadaot sa kadaot kang bisan kinsa, hinunoa kanunayng tinguhaa ang maayo sa usag usa ug sa tanan.” Sa tabang sa balaang espiritu ni Jehova, atong mahimo ang dili nato mahimo sa kaugalingong kusog. Haom gayod nga atong pangayoon ang balaang espiritu sa Diyos aron itagana ang kusog nga atong gikinahanglan!

10. Unsay reaksiyon ni Jesus sa dihang gisultihan o gihimoan siyag dili maayo?

¹⁰ Si Jesus naghatag ug maayong panig-ingnan sa pagpakiglabot niadtong misulti o mihimog dili maayo kaniya. “Sa gisultihan siya ug pasipala,” nag-ingon ang 1 Pedro 2:​23, “wala siya mobalos sa pagsultig pasipala. Sa nag-antos siya, wala siya manghulga, apan nagpadayon sa pagpiyal sa iyang kaugalingon ngadto sa usa nga nagahukom sa pagkamatarong.” Giawhag kita nga sundon ang iyang maayong ehemplo. Ayawg kapikal sa dili maayong panggawi sa uban. Ingon sa gitambag sa tanang Kristohanon, “magmabination uban ang kalumo, magmapainubsanon sa hunahuna, nga dili magabalos ug kadaot sa kadaot o magasultig pasipala sa pasipala.”​—⁠1 Ped. 3:​8, 9.

Magpakahilom Lang ang Asawa?

11. Unsang dakong pribilehiyo ang mabatonan sa pipila ka Kristohanong mga babaye?

¹¹ Ang pagpasakop ba sa pagkaulo sa bana nagpasabot nga ang mga babaye magpakahilom lang, nga dili makahatag sa ilang opinyon maylabot sa mga kahikayan sa pamilya o sa ubang mga butang? Wala gayod. Sama sa mga lalaki, ang mga babaye gihatagan usab ni Jehova ug daghang pribilehiyo. Hunahunaa lang ang dakong kadungganan nga mabatonan sa 144,000 nga mahimong hari ug mga saserdote didto sa langit ilalom kang Kristo sa dihang magmando siya sa tibuok yuta! Apil niana ang mga babaye. (Gal. 3:26-29) Dayag nga gihatagan ni Jehova ang mga babaye ug pribilehiyo diha sa iyang kahikayan.

12, 13. Paghatag ug pananglitan nga dihay mga babaye nga nanagna.

¹² Pananglitan, sa panahon sa Bibliya dihay mga babaye nga nanagna. Ang Joel 2:​28, 29 nagtagna: “Ibubo ko ang akong espiritu sa tanang matang sa unod, ug ang inyong mga anak nga lalaki ug ang inyong mga anak nga babaye managna. . . . Bisan sa mga sulugoong lalaki ug sa mga sulugoong babaye ibubo ko ang akong espiritu.”

¹³ Lakip sa 120 ka tinun-an ni Jesus nga nagtigom sa itaas nga lawak sa Jerusalem sa adlaw sa Pentekostes 33 K.⁠P. mao ang mga babaye. Silang tanan gibuboan sa espiritu sa Diyos. Busa gikutlo ni Pedro ang gitagna ni Joel ug parehong gipadapat kana sa mga lalaki ug babaye. Si Pedro miingon: “Kini mao ang giingon pinaagi sa manalagnang si Joel, ‘Ug sa kataposang mga adlaw,’ nagaingon ang Diyos, ‘ibubo ko ang bahin sa akong espiritu sa tanang matang sa unod, ug ang inyong mga anak nga lalaki ug ang inyong mga anak nga babaye managna . . . ; ug bisan nganha sa akong mga ulipong lalaki ug nganha sa akong mga ulipong babaye ibubo ko ang bahin sa akong espiritu nianang mga adlawa, ug sila managna.’”​—⁠Buh. 2:16-18.

14. Unsay nahimo sa mga babaye sa pagpakaylap kaniadto sa Kristiyanidad?

¹⁴ Sa unang siglo, ang mga babaye dakog nahimo sa pagpakaylap sa Kristiyanidad. Sila nagsangyaw bahin sa Gingharian sa Diyos ug mihimog ubang mga buluhaton maylabot niana. (Luc. 8:1-3) Pananglitan, gitawag ni apostol Pablo si Febe nga “usa ka ministro sa kongregasyon sa Cencrea.” Ug sa pagpangomosta niya sa iyang mga isigkamagbubuhat, gihisgotan ni Pablo ang ubay-ubayng matinumanong mga babaye, lakip na si ‘Trifena ug Trifosa, mga babaye nga nagahago diha sa Ginoo.’ Giapil usab niya si “Persida nga atong hinigugma, kay siya mihimog daghang paghago diha sa Ginoo.”​—⁠Roma 16:​1, 12.

15. Unsay nahimo sa mga babaye sa pagpakaylap sa Kristiyanidad sa atong panahon?

¹⁵ Sa atong panahon, dakong bahin sa kapin sa pito ka milyon nga nagsangyaw sa maayong balita sa Gingharian sa Diyos sa tibuok yuta maoy mga babaye nga lainlaig edad. (Mat. 24:14) Daghan kanila ang bug-os-panahong mga ministro, misyonarya, ug mga membro sa pamilyang Bethel. Ang salmistang si David miawit: “Si Jehova nag-ingon; ang kababayen-an nga nagapahayag sa maayong balita maoy usa ka dakong panon.” (Sal. 68:11) Tinuod gayod kining mga pulonga! Gipabilhan ni Jehova ang nahimo sa mga babaye sa pagmantala sa maayong balita ug sa pagpalampos sa iyang katuyoan. Ang sugo niya nga magpasakop ang mga babaye wala gayod magpasabot nga magpakahilom sila.

Duha ka Babaye nga Wala Magpakahilom

16, 17. Sa unsang paagi ang panig-ingnan ni Sara nagpakita nga ang mga asawa makahatag ug opinyon?

¹⁶ Kon gihatagan ni Jehova ang mga babaye ug daghang pribilehiyo, dili ba angay usab nga konsultahon sa mga bana ang ilang asawa sa dili pa mohimog bug-at nga mga desisyon? Maalamon nga buhaton nila kana. Naghisgot ang Kasulatan ug ubay-ubayng panghitabo diin ang mga asawa misulti o mibuhat ug usa ka butang bisag wala ingna sa ilang bana. Tagda ang duha ka pananglitan.

¹⁷ Si Sara, nga asawa sa patriarkang si Abraham, kanunayng nagsulti kaniya nga papahawaon ang iyang ikaduhang asawa ug ang anak niini tungod sa ilang pagkawalay-tahod. ‘Ang maong butang wala gayod makapahimuot kang Abraham’​—⁠apan giuyonan kadto sa Diyos. Si Jehova miingon kang Abraham: “Ayaw tugoting ang bisan unsa nga gisulti kanunay ni Sara bahin sa bata ug bahin sa imong ulipon nga babaye mahimong dili makapahimuot kanimo. Pamati sa iyang tingog.” (Gen. 21:8-12) Si Abraham misunod kang Jehova ug namati kang Sara.

18. Unsang desisyon ang gihimo ni Abigail?

¹⁸ Tagda usab si Abigail, nga asawa ni Nabal. Sa dihang mikalagiw si David gikan sa masinahon nga si Haring Saul, nagkampo siya duol sa panon sa kahayopan ni Nabal. Imbes manguha sila sa kahayopan niining adunahang tawo, gipanalipdan kini ni David ug sa iyang mga kauban. Apan, si Nabal “mapig-oton ug daotan sa iyang mga binuhatan,” ug “gikasab-an” niya ang mga mensahero ni David. Siya “walay-silbing tawo,” ug “ang kawalay-salabotan anaa kaniya.” Sa dihang nangayog pagkaon ang mga kauban ni David, gibalibaran sila ni Nabal. Unsay gibuhat ni Abigail sa dihang nasayran niya kini? Nga wala magpahibalo kang Nabal, siya “nagdali ug nagkuhag duha ka gatos ka tinapay ug duha ka tadyaw nga bino ug lima ka hinikay na nga karnero ug lima ka seah nga sinangag nga mga lugas ug usa ka gatos ka tinapay sa mga pasas ug duha ka gatos ka tinapay sa pinisa nga mga igos” ug gihatag kana kang David ug sa iyang mga kauban. Husto ba ang gihimo ni Abigail? “Si Jehova naghampak kang Nabal, mao nga siya namatay,” nag-ingon ang Bibliya. Sa ulahi gipangasawa ni David si Abigail.​—⁠1 Sam. 25:​3, 14-19, 23-25, 38-42.

‘Ang Babaye nga Dalayegon’

19, 20. Unsay makapahimo sa usa ka babaye nga tinuod nga dalayegon?

¹⁹ Ang Kasulatan naghatag ug komendasyon sa asawa nga nagbuhat sa mga butang sa paagi ni Jehova. Ang basahon sa Proverbio nagdayeg sa “asawa nga takos,” nga nag-ingon: “Ang iyang bili labaw pa kaayo kay sa mga korales. Diha kaniya nagasalig ang kasingkasing sa iyang tag-iya, ug walay nakulang nga ganansiya. Siya nagabalos kaniya sa maayo, ug dili sa daotan, sa tanang adlaw sa iyang kinabuhi.” Dugang pa, “siya nagbuka sa iyang baba uban ang kaalam, ug ang balaod sa mahigugmaong-kalulot anaa sa iyang dila. Siya nagabantay sa mga panghitabo sa iyang panimalay, ug siya dili mokaon sa tinapay sa pagkatapolan. Ang iyang mga anak mobangon ug magpahayag kaniya nga malipayon; ang iyang tag-iya mobangon, ug siya magdayeg kaniya.”​—⁠Prov. 31:10-12, 26-28.

²⁰ Unsay makapahimo sa usa ka babaye nga tinuod nga dalayegon? “Ang pagkamadanihon mahimong malimbongon, ug ang kaanyag mahimong kawang,” nag-ingon ang Proverbio 31:​30, “apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.” Nalakip sa pagkahadlok kang Jehova ang kinabubut-ong pagpasakop sa kahikayan sa pagkaulo. “Ang ulo sa usa ka babaye mao ang lalaki,” maingon nga “ang ulo sa matag lalaki mao si Kristo,” ug “ang ulo ni Kristo mao ang Diyos.”​—⁠1 Cor. 11:3.

Magmapasalamaton sa Gasa sa Diyos

21, 22. (a) Nganong ang minyong mga Kristohanon magmapasalamaton sa Diyos sa gasa sa kaminyoon? (b) Nganong angay natong tahoron ang mga kahikayan ni Jehova maylabot sa awtoridad ug pagkaulo? (Tan-awa ang kahon sa panid 17.)

²¹ Ang minyong mga Kristohanon adunay daghang rason nga magmapasalamaton sa Diyos! Sila mahimong mag-inunongay ingong malipayong magtiayon. Mapasalamaton sila sa Diyos ilabina sa gasa sa kaminyoon tungod kay maghatag kini kanilag kahigayonan nga magkahiusa ug maglakaw uban kang Jehova. (Ruth 1:⁠9; Miq. 6:8) Siya, nga Tagmugna sa kaminyoon, nahibalo gayod kon unsay gikinahanglan aron kini magmalipayon. Kanunayng buhata ang mga butang sa iyang paagi, ug “ang kalipay ni Jehova mao ang inyong salipdanan,” bisan niining gubot nga kalibotan.​—⁠Neh. 8:10.

²² Ang Kristohanong bana nga nahigugma sa iyang asawa sama sa iyang kaugalingon maggamit sa iyang pagkaulo sa malumo ug mahunahunaong paagi. Ang iyang diyosnong asawa takos gayong higugmaon, kay kini magpaluyo kaniya ug magpakita kaniyag halalom nga pagtahod. Labaw sa tanan, ang ilang sulondang kaminyoon magpasidungog sa atong dalayegong Diyos, si Jehova.