“Ayaw Pagpayugo nga Dili Timbang”
ANG duha ka torong baka nga gihulagway dinhi kusgan kaayo, nga nagpaarang kanila sa pagbira ug bug-at nga mga karga uban sa kasayon. Apan komosta kon ang usa sa mga toro ilisdan ug asno. Sanglit ang asno mas gamay ug mas menos ug kusog kay sa torong baka, malagmit mosuki kini pinaagi sa pagpatid sa labtong nga nagpugong kaniya niining dili timbang nga yugo. Nan, may maayong katarongan nga ang balaod sa Diyos sa Israel nag-ingon: “Ayaw lumponga pagsangon sa pagdaro ang torong baka ug ang asno.”—Deuteronomio 22:10.
Si apostol Pablo nagsulat ug susamang butang mahitungod sa mga tawo. Siya nag-ingon: “Ayaw pagpayugo nga dili timbang uban sa mga dili-magtutuo.” (2 Corinto 6:14) Ilabinang ibutang kini sa hunahuna sa dihang magpili ug kapikas sa kaminyoon. Ang kaminyoon maoy usa ka permanenteng panag-uban, tungod kay si Jesu-Kristo nag-ingon: “Kon unsay giusag yugo sa Diyos ayaw ipabulag ni bisan kinsang tawo.” (Mateo 19:6) Daghang kasakit ang mosangpot kon ang minyong magtiayon dili parehog relihiyosong pagtuo, mga prinsipyo, ug mga tumong. Busa makataronganon lamang nga mosunod sa pahamatngon sa Bibliya nga magminyo “lamang diha sa Ginoo.” (1 Corinto 7:39) Ang pagpakigminyo sa usa nga dili sama kanimo ug relihiyosong tinuohan makahatag ug mas dako pang suliran kay sa paglumpong pagsangon sa pagdaro sa torong baka ug asno.
Ang panaglahi ug relihiyosong pagtuo maoy usa lamang ka hinungdan nga magpahimo sa magtiayon nga dili timbang nga pagkayugo. Ang mga naghunahunang magminyo—bisan pag sama ug pagtuo—maayong mangutana, ‘Pareho ba ang among mga tumong? Asa kami mopuyo? Kinsay mogunit sa badyet? Motrabaho ba kaming duha? Komosta ang bahin sa mga anak? Ang kalulot ba ug konsiderasyon mangibabaw sa relasyon?’
Sa pipila ka sukod, ang paagi sa paghisgot niining mga isyuha mopadayag kon ang yugo timbang o dili. Siyempre, walay duha ka tawo ang hingpit nga magkaangay. Hinunoa, sa katibuk-an kon ang managtrato makaatubang ug makasulbad sa mga suliran nga magkauban ug kon ilang mamentinar ang maayong komunikasyon, malagmit nga sila dili mahimong dili timbang nga pagkayugo.