4. Unsang situwasyon ang kinahanglang antoson ni Pablo, ug sa unsang mga paagi ang maong situwasyon makaapektar kanato?

⁴ Tagda ang nahitabo kang apostol Pablo. “Gihatagan akog tunok sa unod, usa ka manulonda ni Satanas, sa pagsagpa kanako sa kanunay,” siya misulat, nga midugang: “Sa tulo ka higayon ako nangaliyupo sa Ginoo nga unta kini mobiya kanako.” Nadungog ni Jehova ang iyang mga pangaliyupo. Bisan pa niana, iyang gipaila kang Pablo nga siya dili mangilabot pinaagi sa pagsulbad niana sa milagrosong paagi. Hinunoa, si Pablo kinahanglang mosalig sa gahom sa Diyos aron matabangan siya sa pagsagubang sa iyang “tunok sa unod.”b (2 Corinto 12:7-9) Sama kang Pablo, ikaw tingali nag-antos sa usa ka pagsulay. Tingali maghunahuna ka, ‘Ang kamatuoran ba nga si Jehova morag walay gihimo labot sa akong pagsulay nagpasabot nga siya wala mahibalo sa akong situwasyon o nga siya walay kahingawa kanako?’ Ang tubag maoy dili gayod! Ang dulot nga kahingawa ni Jehova sa matag usa sa iyang matinumanong mga alagad gipasiugda diha sa giingon ni Jesus sa iyang mga apostoles wala madugay human niya pilia sila. Tan-awon nato kon sa unsang paagi ang iyang gisulti makadasig kanato karon.