Usa Ka Katawhang Nagasunod sa mga Lakang ni Jesus

“Dili ba kami nagalakaw diha sa samang epiritu? Diha sa samang mga lakang?”​—2 CORINTO 12:18.

1. Nganong kadaghanan dili lisdan sa pag-ila sa usa sa mga Saksi ni Jehova?

“INGONG usa ka grupo, sila matinahoron, responsable, ug maayog binuhatan sa eskuylahan. Dili kini ikasulti bahin sa ubang grupo.” Kana ang giingon sa prinsipal sa usa ka elementaryang tunghaan sa Tinipong Bansa. Kinsay iyang gihisgotan? Ang mga anak sa mga Saksi ni Jehova nga mga estudyante sa iyang tunghaan. Sa pagkamatuod, daghan ang nakamatikod nga ang mga Saksi ni Jehova, apil ang ilang mga anak, kadaghanan kaamgid sa ubang Saksi sa pila ka bahin. Latas sa katuigan sa mausbawon nadayag nga sila talagsaong nahiusa kon bahin sa mga pagtuo ug sa kagawian. Busa ang mga Saksi dili lisod nga ilhon.

2. Unsa ang linaing hiyas sa unang Kristohanong kongregasyon, ug unsay gisulti ni Pablo bahin niini?

² Ang panaghiusa sa mga Saksi ni Jehova maoy talagsaon niining wala-mahiusang kalibotan. Apan dili lisod ang pagsabot kon atong hinumdomang silang tanan naningkamot sa pagsunod sa mga lakang ni Jesus. (1 Pedro 2:21) Ang maong panaghiusa ilhanan usab sa unang-siglong mga Kristohanon. Sa usa ka higayon, gitambagan ni Pablo ang kongregasyon sa Corinto: “Karon magaawhag ako kaninyo, mga igsoon, tunogd sa ngalan sa atong Ginoong Jesu-Kristo nga kamong tanan magasulti unta nga nahiusa, ug walay ma pagakabahinbahin sa inyong taliwala, apan nga kamo unta magkahiusa sa tukma sa samang panghunahuna ug sa samang paagi sa hunahuna.” (1 Corinto 1:10) Si Pablo mihatag usab sa dinasig nga tambag kon unsaon sa pagpakiglabot sa mga tawondg dili buot maghupot sa Kristohanong panaghiusa.​—Tan-awa ang Roma 16:17; 2 Tesalonica 3:6.

3, 4. Giunsa pagbatbat ni Pablo ang panaghiusa tali sa iyang kaugalingon ug kang Tito, ug unsa ang pasikaranan sa maong panaghiusa?

³ Sas mga tuig 55 K.P., gipadala ni Pablo si Tito ngadto sa Corinto sa pagtabang sa paghimog koleksiyon alang sa nagkinahanglang mga igsoon sa Judea ug lagmit sa pagtan-aw kon unsay reaksiyon sa kongregasyon ngadto sa tambag ni Pablo. Sa nagsulat sa ulahi ngadto sa mga taga-Corinto, si Pablo naghisgot sa bag-o pang pagduaw ni Tito ug nangutana: “Nagpahimulos ba si Tito kaninyo? Dili ba kita nagalakaw diha sa saang espiritu? Diha sa samang mga lakang”?

⁴ Nagpahayag siya sa panaghiusang naglungtad tali kaniya ug kang Tito. Si Tito maoy panalagsang kauban sa pagpanaw ni Pablo, ug pihong daghan ang iyang nakat-onan gikan kang Pablo niining paagiha. Apan ang panaghiusang naglungtad taliwala sa duha gipasukad sa butang mas lig-on kay niana. Kadto gipasukad sa ilang maaong relasyon uban kang Jehova ug sa kamatuoran nga silang duha mga sumusunod sa lakang ni Kristo. Si Tito nagsundog kang Pablo maingon nga si Pablo nagsundog kang Kristo. (Lucas 6:40; 1 Corinto 11:1) Busa maoy diha sa espiritu ni Jesus ug sa iyang mga lakang nga sila naglakaw.

5. Unsay madahom sa mga tawo karong adlawa nga nagsundog kang Pablo ug kang Tito samtang sila nagalakaw “diha sa samang espiritu” ug “diha sa samang mga lakang”?

⁵ Nan, dili katingad-anan nga ang mga Kristohanon niining ika-20ng siglo, nga nagalakaw “diha sa samang espiritu” ug “diha sa samang mga lakang” ni Pablo ug ni Tito, nagapahimulos sa walay-ingong panaghiusa. Ngani, ang kawalay-panaghiusa sa mga Kristohanon sa ngalan nagapadayag nga sila mini nga mga Kristohanon, wala magalakaw sa mga lakang sa Pangulo nga ilang giangkong ginasunod. (Lucas 11:17) Kining iladong kalainan tali sa matuod ug sa mga Kristohanon sa ngalan ikailustrar sa lainlaing mga paagi. Atong hisgotan ang upat niana.

Ang Pagkabalaan sa Dugo

6, 7. (a) Unsang tukmang pagtuo bahin sa dugo ang nalangkit sa pagsunod sa mga lakang ni Jesus? (b) Unsa ang kalainan tali sa mga Saksi ni Jehova ug sa uban karong adlawa nga modumili sa mga abuno sa dugo?

⁶ Sa mga tuig 49 K.P., ang nagamandong lawas sa unang-siglong kongregasyon nagpadalag usa ka sulat nga nagtubag sa pangutana: Ang dili-Hudiyong mga Kristohanon angay bang magsugot as Kasugoan ni Moises? Ang sulat nag-ingon niini: “Ang balaang espiritu ug kami mismo nagpalabi sa dili pagdugang kaninyo ug palas-anon, gawas niining kinahanglanong mga butang, nga maglikay sa mga butang hinalad sa mga diyosdiyos ug sa dugo ug sa mga butang lnuok ug sa pakighilawas.” (Buhat 15:28, 29) Matikding apil sa “kinahanglanong nga butang” mao ang paglikay sa dugo. Ang pagsunod sa mga lakang ni Jesus magpasabot nga dili ipasulo sa lawas ang dugo pinaagi kahi sa baba o sa ubang mga paagi.

⁷ Kining prinsipyoha dayag ginalapas diha sa Kakristiyanohan tungod sa batasan sa pag-abunog ugo. Matuod, sa katuigang bag-o pa ang ubay-ubayng tawo nakaamgo sa kapeligrohan sa mga abuno sa dugo nganha sa lawas ug nagdumili niana tungod sa medikal nga mga hinungdan. Kini matuod ilabina sanglit daghan ang natakdag AIDS gikan sa giabunong dugo. Apan kinsay nagatuboy sa pagakabalaan sa dugo tungod sa pagtahod sa kasugoan sa Diyos, ug nagabuhat niana ingong usa ka grupo? Sa diha nga ang usa ka pasyente motutol sa pagpaabuno, sa awtomatiko ang doktor mahunahuna nga unsa siya? Dili ba ang doktor kasagarang moingon: ‘Saksi ni Jehova ka ba’?

8. Sa unsang paagi ang usa ka Saksi sa Italya gipanalanginan tungod sa iyang determinasyon sa pagbantay sa kasugoan sa Diyos niining bahina?

⁸ Si Antonietta nagpuyo sa Italya. Mga walo ka tuig kanhi siya masakiton kaayo, ug ang kuwenta sa iyang dugo ubos kaayo nga mipugos ang mga doktor nga gikinahanglan niya ang mga abuno sa pagluwas sa iyang kinabuhi. Siya midumili ug gisupak siya sa mga doktor ug mga paryente. Bisan ang duha niya ka batang lalaki nangaliyupo: “Mama, kon gihigugma nimo kami, dawata ang dugo.” Apan determinado si Antonietta nga magpabiling matinumanon, ug ikalipay nga siya wala mamatay. Bisan pa niana, ang iyang kondisyon grabe kaayo nga ang usa ka doktor miingon: “Dili kami makapatin-aw nganong siya buhi pa.” Apan sa dihang nasugdan ang wala-tutoli nga matang sa pagtambal, naarang-arang kaayo siya nga mikomento ang laing doktor: “Dili ako makatuo​—dili mahimong maulian ka sa kadiyut kaayong panahon, dili gayod bisan pag giabunohan ka namog dugo sa tibuok adlaw.” Sa pagkakaron, siya usa ka regular payunir, ug ang duha niya ka anak, nga karon 12 ug 14, maayog pag-uswag sa kamatuoran. Si Antonietta maisogong nagsunod nianang ’kinahanglanong butang,’ ang pagkabalaan sa dugo. Ang tanang Saksi ni Jehova nagbaton sa samang pagtuo samtang sila nagasunod sa mga lakang ni Jesus.

Maayong mga Kagawian

9. Unsay laing ‘kinahanglanong butang’ ang nalangkit sa pagsunod sa mga lakang ni Jesus, ug unsay mahitabo niadtong mapakyas sa pagtuman niini?

⁹ Ang laing ’kinahanglanong butang’ nga gipasiugda niadtong sulat gikan sa unang-siglong nagamandong lawas mao nga “magpadayon sa paglikay . . . sa pakighilawas.” Sa iyang unang sulat ngadto sa mga taga-Corinto, si Pablo nagpatin-aw niini, nga nag-ingon: “Ang mga makihilawason, mga tigsimbag diyosdiyos, mga mananapaw, mga lalaking gitipigan alang sa dili-kinaiyanhong mga katuyoan, ang mga lalaki nga modulog sa mga lalaki . . . dili magapanunod sa gingharian sa Diyos.” (1 Corinto 6:9, 10) Ang mga Kristohanon nagatabang sa mga tawo nga buot moalagad kang Jehova sa pagwagtang niining mahugawng mga buhat. Bisan ang mga membro sa kongregasyon nga mabitik kanila matabangan sa pagputli sa ilang kaugalingon kon sila magbag-o ug maghinulsol. (Santiago 5:13-15) Apan kon may Kristohanong mahulog nianang mahugawng mga buhat ug dili maghinulsol, ang prangkang lagda sa Bibliya mapadapat. Si Pablo gidasig sa Diyos sa pag-ingon: “Hunong na sa pagpakig-uban ni bisan kinsang gitawag igsoon nga usa ka makihilawason. . . . Palagpota ang tawong daotan gikan sa inyong taliwala.”​—1 Corinto 5:11, 13.

10, 11. (a) Kinsay magpas-an sa responsabilidad sa ubos nga mga sukdanan sa moral sa Kakristiyanohan, ug ngano? (b) Sa unsang paagi ang kasinatian sa usa ka lalaki sa Pilipinas nagapasundayag nga, ingong usa ka grupo, ang mga Saksi ni Jehova nagahupot sa hataas nga mga sukdanan sa moral?

¹⁰ Bisan pa niining tin-awng pagtulon-an, ang Kakristiyanohan natusaktusak sa imoralidad. Ang mga klerigo nga nagapahuyang sa balaang mga sukdanan mao ang mabasol sa maong kahimtang, maingon man niadtong sa ngabil nagawali sa mga sukdanan sa Bibliya apan napakyas sa pagpatuman nianang maisogon diha sa ilang mga kongregasyon. Bisan pa niana, niini usab, ang mga Saksi ni Jehova ingong usa ka katawhan nagasunod sa mga lakang ni Jesus.

¹¹ Tagda si Jose, nga taga Pilipinas. Sa 17 anyos pa lang siya nailhan nang samokan ug sugarol. Kanunay siyang mahubog, nagkinabuhing imoral, ug kanunay mapriso tungod sa pagpangawat. Unya nahibalag niya ang mga Saksi ni Jehova. “Ang pagtuon sa Bibliya bug-os nakausab sa akong kinabuhi,” matud niya. “Ako dili na moinom ug motabako, ug nakakat-on ako sa pagpugong sa akong kasuko. Ako karon may hinlong konsensiya, kay nagbatog usa lamang ka asawa. Naangkon ko usab ang pagtahod sa akong mga silingan, kinsa tigtawag kanakong ‘si Jose, ang banggiitan’ ug ‘si Jose, ang multo.’ Karon sila nagatawag kanako ‘si Jose, ang Saksi ni Jehova.’ Ang akong anak lalaki ug akong pag-umangkon maoy ministeryal nga mga alagad sa kongregasyon diin ako nagaalagad karon nga ansiano ug regular payunir.” Si Jose ug ang minilyon pang ubang Kristohanong saksi ni Jehova nagasunod sa mga lakang ni Jesus ingong mga Kristohanong may mahinlong moral.

Neyutralidad

12. Unsang tinamdan sa tinuod nga mga Kristohanon ang gipasiugda ni Jesus sa iyang pag-ampo nga nahitala sa Juan kapitulo 17?

¹² Sa taas nga pag-ampo nga gilitok ni Jesus sa kataposang gabii nga siya kauban sa iyang mga tinun-an, gihisgotan niya ang laing paagi nga ang iyang mga sumusunod ‘makalakaw diha sa iyang mga lakang.’ Nga nagtumong sa iyang mga tinun-an, siya miingon: “Sila dili bahin sa kalibotan, maingon nga ako dili bahin sa kalibotan.”(Juan 17:16) Kini nagkahulogang ang mga Kristohanon neyutral. Inay nga makig-apil sa politika o sa nasodnong mga away, sila nagasugilon sa uban bahin sa Gingharian sa Diyos, ang bugtong solusyon sa mga suliran niining kalibotana.​—Mateo 6:9, 10; Juan 18:36.

13, 14. (a) Sa unsang paagi ang Kakristiyanohan lahi sa mga Saksi ni Jehova kon bahin sa neyutralidad? (b) Sa unsang paagi ang paghupot sa politikanhong neyutralidad sa bahin sa usa ka Saksi sa Hapon misangpot sa kaayohan sa tibuok nga kapunongan?

¹³ Kining prinsipyo sa neyutralidad nahikalimtan sa kadaghanang membro sa Kakristiyanohan, nga alang kanila ang nasodnong kagikan kasagarang labi pang bililhon kay sa relihiyosong tinuohan. Ang kolumnistang si Mike Royko nagpunting nga ang “mga Kristohanon” sukad dili gayod “makuratan bahin sa pagpakiggubat batok sa ubang mga Kristohanon,” nga midugang: “Kon makuratan pa sila, ang kadaghanan sa labing mainitong mga gubat sa Uropa dili gayod mahitabo.” Nga ang mga Saksi ni Jehova nagahupot sa estriktong Kristohanong neyutralidad panahon sa gubat maoy iladong kamatuoran. Apan ingong sumusunod sa lakang ni Jesus, sila neyutral usab sa sosyal ug politikanhong mga isyu. Busa, walay makatugaw sa ilang talagsaong tibuok-kalibotang panaghiusa.​—1 Pedro 2:17.

¹⁴ Ang ilang neyutralidad usahay mopatunghag wala-dahomang sangpotanan. Sa Tsugaru nga distrito sa amihanang Hapon, pananglitan, ang eleksiyon giisip nga seryoso kaayo. Apan si Toshio, luyoluyong manedyer sa Departamento sa Panalapi sa usa ka opisina sa lokal nga gobyerno, tungod sa konsensiya wala makiglabot sa kampanya sa alkalde aron mapili na usab. Kadto misangpot nga siya gipaubos sa posisyon diha sa Departamento sa Awasanan sa Hugaw. Ugaling, usa ka tuig sa ulahi ang alkade gidakop ug gipugos sa pagluwat tungod sa hiwing mga buhat. Napili ang usa ka bag-ong alkalde. Sa nakadungog siya nga gipaubos si Toshio sa posisyon, iya siyang gibalik sa taas nga posisyong administratibo, ug kadto nagpatunghag mga panalangin sa Kristohanong mga igsoon ni Toshio. Sa unsang paagi? Si Toshio nagpatin-aw nga lisod kaayo ang pagkuhag permiso aron magamit ang mga gymnasium alang sa mga tigom gawas sa mga dulang atletiko. Apan sa iyang posisyon karon, “Si Jehova nakagamit kanako”​—sa pagkutlo sa mga pulong mismo ni Toshio—​“aron magamit ang maong mga gymnasium alang sa tulo ka distritong kombensiyon ug sa upat ka sirkitong asembliya.” Siya mihinapos: “Basta kita magpabiling matinumanon, buksan ni Jehova ang dili-mahandurawng mga paagi sa paggamit kanato.”

Diha sa Balay

15. Sa unsang paagi si Jesus nagbilin sa usa ka sulundan alang sa mga sumusunod sa iyang lakang kon bahin sa pamilyahanong mga relasyon?

¹⁵ Ang laing natad diin ang mga Kristohanon ‘nagasunod sa mga lakang ni Jesus’ maoy diha sa balay. Ang Bibliya nagatino sa panig-ingnan ni Jesus ingong mao ang sulundan sa mga relasyon sa panimalay sa nagaingon kini: “Magpasakop kamo sa usag usa diha sa kahadlok ni Kristo. Ang mga asawa magpasakop sa ilang mga bana ingon nga ngadto sa Ginoo, tungod kay ang bana mao ang ulo sa iyang asawa maingon nga si Kristo mao usab ang ulo sa kongregasyon . . . Ngani, maingon nga ang kongregasyon nagapasakop kang Kristo, busa ang mga asawa magpasakop usab sa ilang mga bana diha sa tanang butang. Mga bana, magpadayon sa paghigugma sa inyong mga asawa, maingon nga si Kristo nahigugma usab sa kongregasyon ug nagtugyan sa iyang kaugalingon alang niana.”​—Efeso 5:21-25.

16, 17. (a) Unsang daotang kahimtang ang nagalungtad sa Kakristiyanohan kon bahin sa pamilyahanong mga relasyon? (b) Sa unsang paagi lamang ang pamilyahanong relasyon mapauswag, sumala sa gipakita sa kasinatian sa usa ka magtiayon sa Brazil?

¹⁶ Ang Kakristiyanohan karong adlawa sa dakong bahin wala manumbaling niining tambaga ug mao nga puno sa nabungkag nga mga pamilya. Kasagaran ang mga panimalayng nagkabulag, ug kadaghanan grabe kaayo ang mga panagbingkil sa ginikanan ug anak. “Ang pamilya nagakagun-ob,” nagpahayag ang usa ka propesor sa sikolohiya pila ka tuig kanhi. Ang mga sikologo sa bata, mga magtatambag bahin sa kaminyoon, ug mga sikyatrista may gamay rang kalamposan sa pagpahiusa sa nameligrong mga pamilya. Apan ang mga Saksi ni Jehova naningkamot pag-ayo sa pagpadapat sa mga prinsipyo sa Bibliya ug ilado tungod sa labaw kay sa kasarangang mga relasyon pamilyahanon.

¹⁷ Si Aldemar, pananglitan, maoy usa ka tenyente sa militaryong kapolisan sa Brazil ug may mga problema sa pamilya. Ang iyang asawa mibiya kaniya ug nagtinguhag legal nga pakigbulag. Misugod siya sa sobrang pag-inom ug misulay gani sa paghikog. Sa ulahi, ang iyang mga paryente, nga mga Saksi ni Jehovah, nakigsulti kaniya bahin sa Bibliya. Nakaangay siya sa iyang nadungog ug misugod sa pagtuon. Kay buot ipahiuyon ang iyang kinabuhi sa baroganan sa pagkaneyutral nga niana ilado ang mga Saksi ni Jehovah, mihangyo siyang mogawas sa militaryo. Si Aldemar ug ang iyang asawa naghusay sa ilang mga kabingkilan sa panagtiayon pinaagi sa pagpadapat sa mga prinsipyo sa Bibliya nga nakat-onan ni Aldemar. Karong adlawa, sila nagasunod sa mga lakang ni Jesus, nga nagaalagad kang Jehova ingong regular nga mga payunir.

Masinugtanon Tungod sa Gugma

18. (a) Nganong ang mga Saksi ni Jehova gipanalanginan sa espirituwal karong adlawa? (b) Sa unsang paagi ang Isaias 2:2-4 karon nagakatuman?

¹⁸ Dayag nga ang mga Saksi ni Jehova nagakahiusa sa paglakaw diha sa espiritu ug sa mga lakang ni Kristo Jesus. Ingong mga indibiduwal ug ingong grupo, sila gipanalanginan sa espirituwal tungod sa pagbuhat niana. (Salmo 133:1-3) Ang dayag nga mga ebidensiya sa pagpanalangin sa Diyos kanila nakadasig sa daghang buotag-kasingkasing nga mga tawo sa paglihok nga nahiuyon sa tagna sa Isaias 2:2-4. Sa miaging lima ka tuig lamang, 987,828 ang mihimo sa gikinahanglang mga lakang sa pagpahinungod ug unya nagtanyag sa ilang kaugalingon alang sa bawtismo sa tubig. Sa pagkamahigugmaon, si Jehova wala magbutang ug limitasyon sa gidaghanon sa mga tawo nga makahimo niini una pa mohampak ang “dakong kasakitan”!​—Pinadayag 7:9, 14.

19. (a) Unsang dayag nga mga kaayohan ang tingali mosangpot sa pag-alagad kang Jehova, ug sa unsang paagi kana pagaisipon? (b) Unsa ang atong pangunang hinungdan sa pagsugot sa mga sugo ni Jehova?

¹⁹ Sumala sa ginapasundayag sa mga kasinatian sa ibabaw, ang espirituwal nga mga panalangin nga gipahimuslan sa katawhan sa Diyos kadaghanan giduyogan sa dayag nga mga kaayohan. Pananglitan, pinaagi sa paglikay sa tabako, pinaagi sa pagkinabuhig hinlong kinabuhi, ug pinaagi sa pagtahod sa pagkabalaan sa dugo, sila makalikay nga mabiktima sa pila ka sakit. O tungod sa pagkinabuhing nahiuyon sa kamatuoran, sila makabatog kaayohan sa ekonomikanhon, sosyal, o panimalaynong paagi. Ang maong dayag nga mga kaayohan maisip nga panalangin gikan ni Jehova, ug kana nagapamatuod sa pagkapraktikal sa mga kasugoan ni Jehova. Apan ang posibilidad nga maangkon kanang praktikal nga mga kaayohan dili sa kaugalingon mao ang pangunang hinungdan sa pagsugot sa kasugoan sa Diyos. Ang matuod nga mga Kristohanon nagasugot kang Jehova tungod kay sila nahigugma kaniya, tungod kay siya takos sa ilang pagsimba, ug tungod kay ang pagbuhat sa iyang kabubut-on mao ang bugtong matarong butang. (1 Juan 5:2, 3; Pinadayag 4:11) Si Satanas mao ang nagpatuo nga ang mga tawo nagaalagad sa Diyos tungod lamang sa hinakog nga mga kaayohan.​—Tan-awa ang Job 1:9-11; 2:4, 5.

20. Sa unsang paagi ang mga Saksi ni Jehova karong adlawa nagalakaw diha sa samang espiritu sa tulo ka matinumanong Hebreohanong saksi sa karaang panahon?

²⁰ Ang modernong-adlawng mga saksi ni Jehova nagalakaw diha sa samang espiritu sa tulo ka matinumanong batan-ong Hebreohanong saksi sa adlaw ni Daniel. Sa gihulgang itambog sa nagdilaab nga hurno, sila miingon: “Kon mao kana, ang among Diyos nga among gialagaran makaluwas kanamo. Gikan sa nagdilaab nga hurno ug gikan sa imong kamot, Oh hari, kami iyang pagaluwason. Apan kon dili [nga buot ingnon, bisan pag itugot niyang kami mamatay], hibaloi, Oh hari, nga ang imong mga diyos dili mao ang among gialagaran, ug ang larawan nga bulawan nga imong gipatindog dili namo pagasimbahon.” (Daniel 3:17, 18) Walay pagsapayan sa dihadiha dayag nga mga kaayohan o sangpotanan, ang mga Saksi ni Jehova mopadayon sa pagsunod gayod sa mga lakang ni Jesus, kay nahibalo nga tino ang kinabuhing walay kataposan sa bag-ong kalibotan sa Diyos! Ingong nahiusang katawhan, sila mopadayon sa paglakaw “diha sa samang espiritu” ug “diha sa samang mga lakang,” bisan kon unsay mahitabo!

Makapatin-aw Ka Ba:

◻ Nganong nahiusa ang mga Saksi ni Jehova?

◻ Sa unsang mga bahin ang mga Saksi ni Jehova lahi sa mga Kristohanon sa ngalan?

◻ Unsa ang dakong hinungdan ang matuod nga mga Kristohanon nagaalagad kang Jehova?

◻ Unsay pag-isip sa katawhan sa Diyos sa mga kaayohang mosangpot sa pagsugot kang Jehova?

[Hulagway sa panid 16]

Dihang ang usa ka pasyente motutol nga magpaabunog dugo, kasagarang tuohan nga siya Saksi ni Jehova

[Hulagway sa panid 18]

Daghang nag-angkong mga Kristohanon dili makuratan bahin sa pagpakiggubat sa usag usa​—uban sa pagpanalangin sa ilang klero