“Diha sa Usa ka Parada sa Kadaogan”

ANG parada sa kadaogan maoy usa ka talan-awon sa selebrasyon sa kadaogan batok sa kaaway. Ang usa sa labing taas nga pasidungog nga ikahatag sa Senado diha sa usa ka nagmadaogong heneral mao ang pagtugot kaniya sa pagsaulog sa iyang kadaogan pinaagi sa usa ka maluho, gastoso nga parada. Gihisgotan ni apostol Pablo ang parada sa kadaogan duha ka higayon diha sa iyang mga sinulat. Hinunoa, sa dili pa nato hisgotan ang iyang mga pulong, handurawa ang panon sa mga tawo nga naglinya sa mga dalan samtang hinay nga moagi kini diha sa Via Triumphalis ug patungas sa nag-ikis-ikis nga dalan paingon sa templo ni Jupiter sa ibabaw sa Capitoline Hill sa Roma.

“Ang mahumot nga alimyon gikan sa nagsiga nga mga lamas abundang gisabwag diha sa mga templo ug sa daplin sa mga karsada, nga nagpuno sa hangin sa ilang kaamyon,” misulat ang eskolar nga si James M. Freeman. “Diha sa parada mao ang senado ug ang dagkong mga lungsoranon sa estado, kinsa sa ilang presensiya nagpasidungog sa mangdadaog. Ang bahanding mga inagaw sa gubat, sama sa bulawan, salapi, mga hinagiban sa tanang matang, mga bandera, talagsaon ug mahalong mga obra maestra, ug tanang butang nga makitang labing bililhon sa mangdadaog o sa napilding kaaway, gipas-an nga makita diha sa nagdasok nga siyudad. Ang mga bihag sa gubat gipugos sa pagmartsa sa parada. Ang heneral, kang kansang pasidungog gisugo, nagsakay sa usa ka karro nga lahig porma ug giguyod sa upat ka kabayo. Ang iyang kapa binordahan sa bulawan, ug ang iyang tuniko binordahag mga bulak. Sa iyang tuong kamot mao ang sanga sa laurel, ug sa iyang wala usa ka setro; diha sa iyang ulo mao ang purongpurong nga Delphic laurel. Sa taliwala sa mga singgit sa mga sundalo ug suliyaw sa mga lungsoranon ang mangdadaog gipaagi diha sa mga karsada ngadto sa templo ni Jupiter, diin didto gitanyag ang mga halad, nga human niadto adunay kombira sa katilingban diha sa templo.”

Gigamit ni Pablo ang parada sa kadaogan sa mahulagwayong paagi sa dihang iyang gisulat ang iyang ikaduhang sulat ngadto sa mga Kristohanon sa Corinto sa tuig 55 sa atong Komung Panahon. Siya miingon: “Salamat sa Diyos nga kanunayng nagtultol kanato sa parada sa kadaogan uban kang Kristo ug nagpakaylap sa kahumot sa kahibalo mahitungod kaniya pinaagi kanato diha sa tanang dapit! Alang sa Diyos kita ang kahumot ni Kristo sa taliwala kanila nga ginaluwas ug kanila nga nagakalaglag; alang sa naulahi ingon nga baho sa kamatayon ngadto sa kamatayon, ug sa nahauna ingon nga kahumot sa kinabuhi ngadto sa kinabuhi.”—2 Corinto 2:14-16.

Dinhi si Pablo ug ang ubang dinihogang mga Kristohanon gihawasan ingon nga maunongong mga sakop sa Diyos, “uban kang Kristo.” Sila gilarawan ingong mga anak, mga opisyal, ug mga sundalo nga nagsunod sa parada ni Jehova ug gipangunahan niya diha sa parada sa kadaogan sa gipahumotan nga rota. (Tan-awa ang Ang Bantayanang Torre, Hulyo 15, 1990, mga panid 10-15.) Kining mahulagwayong paggamit sa parada nagpaila usab nga kadtong kinsa mosalikway sa maayong balita sa Gingharian sa Diyos kamatayon lamang ang palaabuton kanila. Apan pagkalahi niini alang sa dinihogang mga sumusunod ni Jesus! Sila adunay paglaom sa kaluwasan ngadto sa dili-mamatay nga langitnong kinabuhi uban kang Kristo. Ug komosta ang ilang maunongong mga kauban, nga nagapahinungod sa Diyos? Ilang nabatonan ang masadyaong paglaom sa kinabuhi diha sa usa ka yutan-ong paraiso, diin ang Diyos “magapahid sa tanang luha gikan sa ilang mga mata, ug ang kamatayon mawala na, ni pagminatay ni paghilak ni kasakit.” (Pinadayag 21:1-4; Lucas 23:43) Bahin ka ba niining malipayong panon?

Usa ka lahi nga hulagway ang gipresentar diha sa Colosas 2:15, diin didto si Pablo misulat: “Gihuboan ang mga kagamhanan ug pamunoan, sila gipasundayag sa [Diyos] diha sa kadaghanan sa iyang pagdaog batok kanila, nagapanguna kanila diha sa parada sa kadaogan pinaagi niana.” Dinhi ang kaaway nga mga kagamhanan ug mga pamunoan ubos ni Satanas nga Yawa gihulagway ingong mga bihag ug mga binilanggo diha sa parada sa kadaogan. Gihuboan ug gipasundayag sila ni Jehova nga Mangdadaog diha sa katilingban ingong mga nangapildi. Sila nangaparot “pinaagi niana,” sa ato pa, sa “kahoy sa pagsakit” ni Jesus. Ang iyang kamatayon diha sa kahoy sa pagsakit nagtaganag pasikaranan sa pagwala “sa sinulat sa kamot nga kasabotan” (ang Kasugoan sa pakigtugon) ug nagpaposible sa mga Kristohanon nga makalingkawas gikan sa pagkaulipon sa satanasnong mga gahom sa kangitngit. (Colosas 2:13, 14) Pagkadako sa atong apresasyon alang sa maong Kristohanong kagawasan!