Unsay Imong “Hinungdan sa Pagsadya”?
1. Unsay hinungdan nga kita magsadya pagkatapos sa matag bulan?
1 Sa dihang matapos ang bulan ug ang tanan pangayoan na sa ilang taho sa pag-alagad sa kanataran, unsay imong “hinungdan sa pagsadya”? (Gal. 6:4) Espesyal payunir man ta nga motahog 130 ka oras sa ministeryo o magmamantala nga giaprobahan nga motahog 15 minutos, kitang tanan angayng malipay nga bug-os kalag kitang nag-alagad kang Jehova.—Sal. 100:2.
2. Nganong angayng ihatag nato ang atong kinamaayohan sa pag-alagad kang Jehova?
2 Ingong Soberanong Ginoo sa uniberso, si Jehova takos nga hatagan sa atong kinamaayohan. (Mal. 1:6) Tungod sa atong gugma kaniya, gipahinungod nato ang atong kinabuhi sa pagbuhat sa iyang kabubut-on. Busa, pagkatapos sa adlaw o bulan, kon nagtuo ta nga gihatag nato ang “mga unang bunga” sa atong panahon, katakos, ug kusog sa pag-alagad kang Jehova, nan duna kitay hinungdan sa pagsadya. (Prov. 3:9) Apan, kon gihasol ta sa atong tanlag kay wala mahatag ang atong kinamaayohan, nan angay tang mamalandong kon unsaon pagpauswag.—Roma 2:15.
3. Nganong dili maalamon nga itandi ang atong kaugalingon sa uban?
3 “Dili sa Pagtandi sa Laing Tawo”: Dili maalamon nga itandi ang atong kaugalingon sa uban o sa atong kaugalingon sa dihang kita mas lagsik pa. Ang mga kahimtang mausab; ang mga katakos magkalahi. Ang mga pagtandi sagad motultol sa pag-indigay o pagbati sa pagkawalay-pulos. (Gal. 5:26; 6:4) Si Jesus wala magtandi-tandi. Hinuon, naghatag siyag komendasyon base sa kon unsay maarangan sa usa.—Mar. 14:6-9.
4. Unsang hinungdanong mga leksiyon ang atong makat-onan gikan sa sambingay ni Jesus sa mga talanton?
4 Sa sambingay ni Jesus sa mga talanton, ang matag ulipon nakadawat ug mga talanton “sumala sa iyang katakos.” (Mat. 25:15) Dihang mibalik ang agalon ug nangutana labot sa ilang nahimo, kadtong makugihong nagbuhat sumala sa ilang katakos ug kahimtang gikomendahan ug gikahimut-an sa ilang agalon. (Mat. 25:21, 23) Kon kita magmapuliki usab sa pagsangyaw sa Gingharian, kita makadawat sa pag-uyon sa Diyos ug makabatog hinungdan sa pagsadya!