Naghulat nga Kalipay Alang Niadtong Nakakaplag sa Kamatuoran

SA IYANG lawting, usa ka taga-Finland nga lalaki nakakitag librong The Divine Plan of the Ages. Gisugdan dayon niya kinig basa, ug wala madugay nakaingon siya sa iyang kaugalingon, ‘Mao kini ang kamatuoran; mao kini ang kamatuoran.’ Pagkanaog gayod gikan sa lawting, iyang giingnan ang iyang asawa, “Nakaplagan nako ang matuod nga relihiyon.”

Kining maong eksperyensiya talagsaon sa paagi sa pagkakaplag sa lalaki sa kamatuoran, apan daghan sa mga Saksi ni Jehova ang makaasoy ug samang reaksiyon. Silang tanan makasugilon kanimo sa kalipay nga dala sa pagkakaplag sa kamatuoran. Ipadayag kini sa mosunod nga mga eksperyensiya.

Ang Matuod nga mga Pagtulon-an sa Bibliya Magdalag Kalipay

Si Margarita Königer nagdako sa Munich, Alemanya, niadtong Gubat sa Kalibotan II. Ang nabombahan ug nagdilaab nga mga balay maoy kasagarang talan-awon. Ang iyang igsoong lalaki namatay sa gubat. Samtang mitambong siya sa mga serbisyo sa simbahang Katoliko, nadunggan niya ang mga pag-ampo nga gipahinungod alang sa mga sundalong Aleman ug sa führer, si Hitler. Human sa gubat, nakadawat siya ug libreng pagtungha sa kolehiyo sa Tinipong Bansa ingong bahin sa programa sa pagbayloayg-estudyante. Iyang nadiskobrehan nga ang mga tawo mahigalaon kaniya, busa nahibulong siya kon unsa kadtong nagtukmod sa mga tawo, kansang kinaiyanhong tinguha mao ang pagkinabuhi nga malinawon, sa pagtahap ug pagdumot sa usag usa panahon sa gubat. Balik sa Munich, nakakontak siyag mga Saksi ni Jehova, ug pinaagi sa pagtuon sa Bibliya uban kanila, iyang nakaplagan ang mga tubag sa iyang mga pangutana. Siya miingon: “Gikan sa Bibliya gipakita kanako nga nalangkit ang daotang espirituhanong mga gahom . . . Ang Bibliya nagtawag kanilang ‘mga magmamando sa kalibotan,’ ug, sa pagkamatuod, nag-ingon nga si Satanas ‘nagpahisalaag sa tibuok pinuy-anang yuta.’ . . . Sa pagtan-aw sa dili-diyosnon, yawan-ong mga aksiyon sa mga nasod ug mga katawhan, pagkamakataronganon ug pagkamakapatagbaw kadtong tubaga!”​—Efeso 6:12; Pinadayag 12:9.

Si Margarita nagpadayon: “Kini nagdala kanako ug dakong kalipay sa pagkasayod sa tagana sa Diyos sa pagsulbad sa mga suliran sa yuta. Dili, dili kini pinaagi sa pila ka tawhanong ideolohiya o administrasyon, sama sa gisugyot sa mga edukador sa kalibotan. Hinunoa, gipakita sa Bibliya nga usa ka bag-ong langitnong gobyerno ang modumala sa mga kalihokan sa yuta. . . . Si Jesu-Kristo nagtudlo sa iyang mga sumusunod sa pag-ampo: ‘Paanhia ang imong gingharian.’ . . . Misugod ako sa pagkasabot nga kining maong gingharian maoy tinuod nga gobyerno ug nga pinaagi lamang niini nga makab-ot ang tinuod, tibuok kalibotang pakigdait.” Sulod sa halos 30 ka tuig, si Margarita nakaalagad ingong misyonaryo sa mga lima ka nasod sa Aprika​—ang ulahing 19 ka tuig gigugol aron magmantala sa kamatuoran ngadto sa mapaubsanong mga tawo sa Ouagadougou, Burkina Faso.

Ang eksperyensiya ni Margarita dili talagsaon. Daghan ang misanong sa mao gayod nga pagkapositibo sa dihang ilang nadiskobrehan nga ang klero sa Kakristiyanohan sa magkaatbang nga mga kiliran sa gubat parehong nag-ampo sa Diyos alang sa kadaogan. Ang mga matinud-anon ug kasingkasing nakasabot sa pagkamakataronganon sa pagpatin-aw sa Bibliya nga ang Diyos wala makiglabot sa mga gubat sa tawo apan nga kini nahitabo tungod kay “ang tibuok kalibotan nahimutang diha sa gahom sa tuman-kadaotang usa.” Kining mga tigpangitag kamatuoran nakakat-on nga ang matuod nga mga Kristohanon maoy “dili bahin sa kalibotan” apan magpabilin nga neyutral sa mga kalihokan niini. Kay nakasabot nga ang mga Saksi ni Jehova mihimo niini nga baroganan, kining bag-ong mga interesado nakombinsir nga ilang nakaplagan ang kamatuoran. Kini sila nagtubo diha sa paglaom ug kalipay samtang sila nakabaton ug dugang kahibalo bahin sa kon nganong gitugotan sa Diyos ang pagkadaotan ug kon sa unsang paagi sa dili madugay iyang ipatungha ang malinawon ug matarong nga mga kahimtang sa ibabaw sa yuta pinaagi sa iyang Gingharian.​—1 Juan 5:19; Juan 17:16; Mateo 6:9, 10.

Ang Matuod nga mga Prinsipyo sa Bibliya Magdalag Kalipay

Si Daniel Rosero sa Ecuador mibati nga walay kahulogan ang kinabuhi, busa misugod siya sa hinobrang pag-inom ug alkoholikong ilimnon. Ang simbahan nga iyang gitambongan nagtudlo kaniya nga ang butang lamang nga iyang malaoman mao ang kamatayon ug ang nagkalayong impiyerno. Siya mitubag, “Masunog man lang diay ako, busa pasagdi lang ko nga moinom!” Walo ang sakop sa iyang pamilya nga wala niya tagan-i sa panginahanglan niini, ug kanunay lang siyang nakig-away sa iyang asawa, si Delia. Ang lisoanang punto miabot usa niana ka buntag sa Dominggo sa dihang giduaw sila sa mga Saksi ni Jehova ug gisugdan ang pagtuon sa Bibliya. Sa unang higayon nga mitambong si Daniel sa usa ka sirkitong asembliya sa mga Saksi ni Jehova, iyang naamgohan nga nakaplagan niya ang kamatuoran. Siya miingon: “Nadani ako sa organisasyon. Ang mga tawo nagkasinabtanay, daghan kanila. Imong mabati ang gugma diha sa pundok. Walay nanigarilyo. Walay hilas nga sinultihan. . . . Mahinumdom ako nga naghunahuna, ‘Mao kini ang kamatuoran!’ Dili ang kahadlok sa kamatayon o kahadlok sa kataposan sa kalibotan ang nakapalihok kanako. Kadto maoy ang kahinlo sa organisasyon.”

Ang tibuok pamilyang Rosero nahimong mga Saksi ni Jehova. Ang ilang pamilyahanong kinabuhi ug ang ilang kahimtang sa ekonomiya miuswag samtang ilang gipadapat ang mga prinsipyo sa Bibliya. Si Delia Rosero miingon: “Abi nimo kining tanan utang nako sa kamatuoran sa Bibliya. Unsa kahay kahimtang sa akong mga anak kon wala pa ang Pulong sa Diyos? Tanan sa pito kanila maoy bawtismado ug timbang. Ang kamatuoran nagkahulogan ug usa ka hingpit bag-ong kinabuhi, bag-ong kalipay, alang kanako.”

Ang eksperyensiya sa pamilyang Rosero dili talagsaon. Daghan sa atong adlaw ang gihasol sa mga suliran. Usa ka katarongan mao nga ang moral nga mga sukdanan nga gitagana diha sa Bibliya sa katibuk-an wala na tahora, ingon sa pagtahod niini sa mas unang mga kaliwatan. Kadaghanan sa mga relihiyon misunod niining maong dagan, mahimong tungod sa pagkahaluag o tungod kay ilang gibati nga uban sa nagakausab nga mga panahon ang karaang mga sukdanan sa moral kinaraan na. Busa, sama sa uban, ang pamilyang Rosero gipasagdang nangapkap nga walay giya sa Bibliya. Ugaling, sa dihang masabtan sa maong mapaubsanong mga tawo ang hunahuna sa Diyos bahin sa moralidad ug sa kinabuhing pamilyahanon, sila sa walay langan nagpadapat sa ilang nakat-onan. Gikan sa ilang mga kaagi makakita kita ug maayong sangpotanan sa paghimo niana.

Ang Kalipay Kinahanglang Ugmaron

Hinunoa, kini wala magpasabot nga ang usa ka Kristohanon kanunayng anaa sa malipayong kahimtang. Dayag, ang mga kalisod nga giatubang sa mga tawo sa katibuk-an, sama sa kawalay-trabaho, sakit, ug kamatayon, nag-apektar usab sa mga Kristohanon. Ang mga Kristohanon kinahanglang makigbugno kanunay batok sa ilang kaugalingong mga dili-kahingpitan ug mga kahuyangan. Ang asoy sa Bibliya nagaingon nga si Lot “nasakit pag-ayo gumikan sa pagpatuyang sa mga masupilon-sa-balaod nga katawhan diha sa malaw-ayng panggawi” sa siyudad sa Sodoma. Ang matinumanong mga Kristohanon dili makalikay sa samang mga pagbati sa dihang makakita nga nangibabaw ang daotang mga kahimtang.​—2 Pedro 2:7, 8.

Hinunoa, kadtong nakakaplag sa kamatuoran adunay bentaha. Pananglitan, ang usa ka magtutuo nga nagbangotan tungod sa usa nga namatay dili kinahanglang “managsubo ingon sa uban usab nga mga walay paglaom.” Ang iyang kaguol dili kay walay kinutoban. Tinuod kini may kalabotan sa ubang suliran usab. Ang tawo nga nakakaplag sa kamatuoran nahibalo nga ang presenteng mga kalisod maoy temporaryo lamang. Ang paglaom nagpasayon sa pag-agwanta ubos sa mga kalisod. Ang timbang usab nga estilo sa kinabuhi makatabang.​—1 Tesalonica 4:13.

Si Pablo naghatag niining maong tambag sa mga Kristohanon: “Pagmaya kanunay diha sa Ginoo. Sa makausa pa ako magaingon, Pagmaya!” (Filipos 4:4) Kini nagpakita nga samtang ang kalipay mahimong makab-ot natong tanan, posible usab nga dili kana makab-ot. Ang mga kabalaka niining karaang sistema sa mga butang makapamatuod nga usa ka babag. Dugang pa, ang Bibliya nagtug-an kanato nga kinahanglang ugmaron nato ang kalipay, usa sa mga bunga sa espiritu sa Diyos. (Galacia 5:22) Kon ikaw magpadayon sa pagkuhag kahibalo sa kamatuoran ug sa pagpahinumdom sa imong kaugalingon sa espirituwal nga mga bahandi nga dala niini ug pagadad-on pa, ang imong kalipay dili maibanan. Mahimo kining mas malig-on samtang nagkahiduol kita sa panahon sa dihang “pahiran [sa Diyos] ang matag luha” gikan sa mga mata sa katawhan ug sa dihang wala nay “pagbangutan ni pagtiyabaw ni may kasakit” pa.​—Pinadayag 21:4.

[Mga hulagway sa panid 8]

Daghan ang nakadayeg sa kalipay ug maayong organisasyon diha sa mga asembliya sa mga Saksi ni Jehova